Мәсиһ — Аллаһын хилас васитәси
«Неҹә ки, Адәмдә һамы өлүр, Мәсиһдә дә һамы һәјата говушур» (1 КОР. 15:22).
1, 2. а) Андреј вә Филип Исаны ҝөрәндә нә етдиләр? б) Нәјә ҝөрә дејә биләрик ки, биринҹи әсрдәки мәсиһчиләрдән фәргли олараг, бизим әлимиздә Исанын Мәсиһ олдуғуна даир сүбутлар даһа чохдур?
НАЗАРЕТЛИ Исанын Аллаһын Мәсиһи олдуғуна әмин олан Андреј гардашы Петерә деди: «Биз Мәсиһи тапдыг». Филип дә буна әмин олдуғу үчүн досту Натанели тапыб деди: «Биз Мусанын Мүгәддәс Ганунда һаггында јаздығы, пејғәмбәрләрин дә бәһс етдији Јусиф оғлу Назаретли Исаны тапдыг» (Јәһ. 1:40, 41, 45).
2 Сән дә Исанын вәд олунмуш Мәсиһ, Јеһованын ‘гуртулуш Рәиси’ олдуғуна там әминсәнми? (Ибр. 2:10). Биринҹи әсрдәки шаҝирдләрдән фәргли олараг, бу ҝүн бизим әлимиздә онун Мәсиһ олдуғуна даир сүбутлар даһа чохдур. Исанын доғулмасындан дирилмәсинә кими һәјатында баш верән һадисәләр Аллаһдан илһам алмыш Мүгәддәс Јазыларда гәләмә алыныб вә бүтүн бунлар онун Мәсиһ олдуғуна инандырыҹы сүбутдур. (Јәһја 20:30, 31 ајәләрини оху.) Мүгәддәс Китаб һәмчинин ҝөстәрир ки, Иса ҝөјләрдән Мәсиһ ролуну иҹра етмәјә давам едир. (Јәһ. 6:40; 1 Коринфлиләрә 15:22 ајәсини оху.) Сән дә, Мүгәддәс Китабдан өјрәндикләринә әсасән, ‘Мәсиһи тапдығыны’ дејә биләрсән. Илк нөвбәдә ҝәлин еркән шаҝирдләрин онун һәгигәтән дә Мәсиһ олдуғу гәнаәтинә неҹә ҝәлдијини нәзәрдән кечирәк.
Мәсиһ һаггында «мүгәддәс сирр» тәдриҹән ачыгланмышдыр
3, 4. а) Биринҹи әсрдәки мәсиһчиләр Мәсиһи неҹә тапмышдылар? б) Нәјә ҝөрә дејә биләрсән ки, Мәсиһ һаггындакы бүтүн пејғәмбәрликләри јалныз Иса һәјата кечириб?
3 Исанын биринҹи әсрдәки давамчылары онун Мәсиһ олдуғуна неҹә әмин олмушдулар? Вәд олунмуш Мәсиһи һансы әламәтләрдән танымағын мүмкүн олдуғуну Јеһова тәдриҹән пејғәмбәрләр васитәсилә ачыгламышды. Бир Мүгәддәс Китаб тәдгигатчысы буну мәрмәр һејкәлин ајры-ајры һиссәләринин бир јерә јығылмасына бәнзәдир. Тәсәввүр едәк ки, һеч вахт бир-бирини ҝөрмәмиш вә үнсијјәт етмәмиш чохлу инсанларын һәр бири мәрмәр парчасы илә бир отаға дахил олур. Бу һиссәләри бирләшдирдикдән сонра мүкәммәл бир һејкәл алынарса, мәнтиги олараг сиз белә бир гәнаәтә ҝәләҹәксиниз ки, һәмин һиссәләри бир нәфәр дүзәлдиб вә бу инсанлара ҝөндәриб. Һејкәлин һәр бир һиссәси кими, Мәсиһ һаггындакы һәр бир пејғәмбәрлик дә онун һаггында ваҹиб мәлуматы тәгдим едир.
4 Бәс Мәсиһ һаггында бүтүн пејғәмбәрликләрин тәсадүфән бир шәхсин үзәриндә јеринә јетмәси нә дәрәҹәдә мүмкүндүр? Бир тәдгигатчынын сөзләринә ҝөрә, бир нәфәрин Мәсиһ һаггында бүтүн пејғәмбәрликләри тәсадүфән јеринә јетирмәси еһтималы «о гәдәр ҹүзидир ки», ону һеч һесаба алмамаг да олар. Тарих бојунҹа буна јалныз вә јалныз Иса мүвәффәг олуб.
5, 6. а) Шејтана гаршы чыхарылан һөкм неҹә иҹра олунаҹагды? б) Аллаһ вәд олунмуш ‘өвладын’ һансы нәсилдән ҝәләҹәјини тәдриҹән неҹә ачыглады?
5 Мәсиһ һаггында пејғәмбәрликләр сон дәрәҹә ваҹиб јөнләри олан ‘мүгәддәс сиррин’ (ЈД) әтрафында дөвр едир (Колос. 1:26, 27; Јар. 3:15). Бу сиррә бәшәријјәти ҝүнаһ вә өлүмә сүрүкләјән Шејтан Иблисә, ‘гәдим илана’ гаршы кәсилән һөкм дахил иди (Вәһј 12:9). Бу һөкм неҹә иҹра едиләҹәкди? Јеһова пејғәмбәрлик етмишди ки, ‘гадынын’ дүнјаја ҝәтирәҹәји «өвлад» Шејтаны башындан вураҹаг. О, иланын башындан вурмагла үсјанын, хәстәликләрин вә өлүмүн сәбәбкарыны арадан галдыраҹагды. Лакин Аллаһын изнилә әввәлҹә Шејтан символик мәнада гадынын ‘өвладынын’ дабанындан санҹаҹагды.
6 Јеһова вәд олунмуш ‘өвладын’ ким олаҹағыны тәдриҹән ачыглајырды. Аллаһ Ибраһимә анд ичиб деди: «Дүнјанын бүтүн милләтләри сәнин нәслинин васитәсилә хејир-дуа алаҹаг» (Јар. 22:18). Муса пејғәмбәрлик етмишди ки, бу шәхс ондан да бөјүк «бир пејғәмбәр» олаҹаг (Ганун. т. 18:18, 19). Давуда исә дејилмишди ки, Мәсиһ онун нәслиндән ҝәләҹәк вә онун тахтыны әбәди олараг мирас алаҹаг. Бир гәдәр сонра буну пејғәмбәрләр дә тәсдиг етдиләр (2 Шам. 7:12, 16; Јер. 23:5, 6).
Исанын Мәсиһ олдуғуна даир сүбутлар
7. Аллаһын ‘гадынынын’ өвладынын пејда олмасы үчүн нә тәләб олунурду?
7 Аллаһ Өз Оғлуну — јаратдығы илк варлығы — Онун арвады тимсалында чыхыш едән вә руһани варлыглардан ибарәт тәшкилатындан јер үзүнә вәд олунмуш «өвлад» гисминдә ҝөндәрди. Бунун үчүн Аллаһын ваһид Оғлу «Өзүнү һеч едәрәк» ҝөјләри тәрк етмәли вә јер үзүндә камил инсан кими доғулмалы иди (Филип. 2:5-7; Јәһ. 1:14). Мүгәддәс руһун Мәрјәмин ‘үстүнә көлҝә салмасы’ онун дүнјаја ҝәтирәҹәји көрпәнин «Аллаһын Оғлу» адланаҹағына зәманәт иди (Лука 1:35).
8. Иса суда вәфтиз олунмаг үчүн Јәһјанын јанына ҝәләндә Мәсиһ барәдәки пејғәмбәрлик неҹә јеринә јетди?
8 Мәсиһ барәдә пејғәмбәрликләрдә Исанын һарада вә нә заман пејда олаҹағы һагда дејилирди. Иса елә Бет-Лехемдә дә доғулду (Мик. 5:2). Ы әсрдә инсанлар Мәсиһи даһа һәсрәтлә ҝөзләјирдиләр. Һәтта Вәфтизчи Јәһјанын Мәсиһ олуб-олмадығы чохларына мараглы ҝәлдији үчүн онлар сорушурдулар: «Ҝөрәсән, бу Мәсиһдирми?» Јәһја исә: «Мәндән Гүдрәтлиси ҝәлир»,— дејә ҹаваб верәрди (Лука 3:15, 16). Ерамызын 29-ҹу илинин пајызында 30 јашлы Иса вәфтиз олмаг үчүн Јәһјанын јанына ҝәләндә вәд олунмуш Мәсиһ кими дүз вахтында пејда олду (Дан. 9:25). Сонра һадисәләрлә зәнҝин хидмәтинә башлады; о: «Вахт тамам олду, Аллаһын Сәлтәнәти јахынлашды»,— дејәрәк тәблиғ едирди (Марк 1:14, 15).
9. Бүтүн тәфәррүатлары билмәсәләр дә, Исанын шаҝирдләри нәјә әмин идиләр?
9 Лакин инсанларын дүшүнҹә тәрзинин дүзәлишә еһтијаҹы варды. Халгын Исаны падшаһ кими гаршыламасы дүзҝүн иди, анҹаг һәмин вахт инсанлар там баша дүшмүрдүләр ки, о, ҝәләҹәкдә ҝөјдән рәһбәрлик едәҹәк (Јәһ. 12:12-16; 16:12, 13; Һәв. иш. 2:32-36). Буна бахмајараг, Иса: «Сиз Мәни ким һесаб едирсиниз?» — дејә сорушанда Петер тәрәддүд етмәдән ҹаваб вермишди: «Сән Дири Аллаһын Оғлу Мәсиһсән» (Мат. 16:13-16). Мүәјјән тәлимләри баша дүшмәдикләри үчүн чохлары бүдрәјиб Исадан үз дөндәрәндә дә Петер ејни ҹавабы вермишди. (Јәһја 6:68, 69 ајәләрини оху.)
Мәсиһә гулаг асын
10. Нәјә ҝөрә Јеһова Оғлуна гулаг асмағын ваҹиблијини вурғулады?
10 Аллаһын ваһид Оғлу ҝөјдә гүдрәтли руһани варлыг иди. Јердә исә Атасыны тәмсил едирди (Јәһ. 16:27, 28). О демишди: «Вердијим тәлим Мәним дејил, Мәни Ҝөндәрәниндир» (Јәһ. 7:16). Исанын ҝөркәминин дәјишилмәси заманы Јеһова онун Мәсиһ олдуғуну тәсдигләјиб әмр етди: «Она гулаг асын!» (Лука 9:35). Бәли, Аллаһын Сечилмишинә гулаг асмаг, јәни итаәт етмәк лазым иди. Бунун үчүн иман вә дүзҝүн әмәлләр тәләб олунурду. Аллаһы разы салмаг вә әбәди һәјаты газанмаг үчүн бунларын һәр икиси дә бөјүк әһәмијјәт кәсб едир (Јәһ. 3:16, 35, 36).
11, 12. а) Нәјә ҝөрә биринҹи әсрдә јашајан јәһудиләр Исаны Мәсиһ кими гәбул етмәдиләр? б) Исаја кимләр иман ҝәтирди?
11 Исанын Мәсиһ олдуғуну сүбут едән дәлилләрин чохлуғуна бахмајараг, биринҹи әсрдә јашајан јәһудиләрин бөјүк әксәријјәти ону гәбул етмәди. Нәјә ҝөрә? Чүнки онларын Мәсиһ барәдә јанлыш тәсәввүрләри варды. Онларын фикринҹә, ҝуја, Мәсиһ ҝәлиб онлары Рома империјасынын сијаси әсарәтиндән гуртараҹагды. (Јәһја 12:34 ајәсини оху.) Буна ҝөрә дә онлар инсанлар тәрәфиндән һәгарәтлә рәдд едилмәси, дәрд вә хәстәликләр ҝөрән инсан олмасы, сонда исә өлдүрүлмәси барәдә пејғәмбәрликләри јеринә јетирән Мәсиһи гәбул едә билмәдиләр (Јешаја 53:3, 5). Һәтта бәзи садиг шаҝирдләри белә Исанын онлара азадлыг ҝәтирмәјәҹәјини биләндә мәјус олдулар. Буна бахмајараг, онлар Исадан үз дөндәрмәдиләр вә вахты ҝәләндә һәр шеј онлара ајдын олду (Лука 24:21).
12 Исанын вәд олунмуш Мәсиһ кими гәбул едилмәмәсинин диҝәр сәбәби исә чохларынын онун тәлимләрини гәбул етмәкдә чәтинлик чәкмәси иди. Падшаһлыға дахил олмаг үчүн ‘өзүнү инкар етмәк’, Исанын ‘әтини јејиб, ганыны ичмәк’, ‘јенидән доғулмаг’ вә бу ‘дүнјадан олмамаг’ тәләб олунурду (Марк 8:34; Јәһ. 3:3; 6:53; 17:14, 16). Мәғрур, варлы вә икиүзлү адамлар бу тәләбләри јеринә јетирмәјин чох чәтин олдуғуну дүшүнүрдүләр. Анҹаг: «Дүнјанын һәгиги Хиласкары Будур» дејән бәзи самаријалылар кими, тәвазөкар јәһудиләр Исаны Мәсиһ кими гәбул етдиләр (Јәһ. 4:25, 26, 41, 42; 7:31).
13. Иса мәҹази мәнада дабанындан неҹә санҹылды?
13 Иса пејғәмбәрлик етмишди ки, баш каһинләр тәрәфиндән мәһкум едилиб, гејри-јәһудиләр тәрәфиндән дирәјә чәкиләҹәк, үчүнҹү ҝүн исә дириләҹәкдир (Мат. 20:17-19). Иса Синедрион гаршысында «Аллаһын Оғлу Мәсиһ» олдуғуну тәсдиг едәндә ону күфр сөјләмәкдә иттиһам етдиләр (Мат. 26:63-66). Пилат онда «өлүмә лајиг һеч бир шеј» тапмады, амма јәһудиләр ону үсјана тәһрикчиликдә иттиһам етдикләри үчүн Пилат Исаны «онларын ихтијарына тәслим етди» (Лука 23:13-15, 25). Онлар, Исанын Аллаһ тәрәфиндән ҝөндәрилдијинә даир чохлу сүбутларын олмасына бахмајараг, «Һәјат Рәисини» ‘рәдд едиб’ өлдүрдүләр (Һәв. иш. 3:13-15). Габагҹадан дејилдији кими, Мәсиһ ‘һәлак олду’ — б. е. 33-ҹү илинин Пасха ҝүнүндә ишҝәнҹә дирәјиндә едам едилди (Дан. 9:26, 27; Һәв. иш. 2:22, 23). Онун амансызҹасына өлдүрүлмәси илә өвладын ‘дабанындан санҹылаҹағы’ барәдә Јарадылыш 3:15 ајәсиндә дејилән пејғәмбәрлик јеринә јетди.
Мәсиһ нәјә ҝөрә өлмәли иди?
14, 15. а) Һансы ики сәбәбә ҝөрә Јеһова Исанын едам едилмәсинә јол верди? б) Дирилдикдән сонра Иса нә етди?
14 Јеһова ики мүһүм сәбәбә ҝөрә Исанын өлдүрүлмәсинә јол верди. Биринҹиси, Исанын өлүмәдәк садиг галмасы ‘мүгәддәс сиррин’ ваҹиб бир аспектинә ајдынлыг ҝәтирди. О, сонадәк садиг галмагла сүбут етди ки, камил инсан Шејтанын ән шиддәтли сынаглары гаршысында белә ‘Аллаһа бағлы’ галмаға вә Онун һөкмранлығынын тәрәфини тутмаға гадирдир (1 Тим. 3:16, ЈД). Икинҹиси, Исанын дедији кими, «Инсан Оғлу... бир чохлары үчүн ҹаныны фидијә олараг вермәјә ҝәлмишдир» (Мат. 20:28). Исанын мүвафиг фидјә гурбанлығы Адәмдән өвладларына мирас галан ҝүнаһын әвәзини өдәјә билди, бунун сајәсиндә дә Исаны Аллаһын хилас васитәси кими гәбул едән һәр кәс үчүн әбәди һәјаты алмаг имканы ачылды (1 Тим. 2:5, 6).
15 Мәсиһ үч ҝүн гәбирдә галдыгдан сонра дирилди вә 40 ҝүн әрзиндә шаҝирдләринә ҝөрүнәрәк сағ олдуғуну сүбут етди вә онлара әлавә ҝөстәришләр верди (Һәв. иш. 1:3-5). Сонра фидјә гурбанлығынын дәјәрини Јеһоваја тәгдим етмәк үчүн ҝөјә гајытды вә мәсһ олунмуш Падшаһ кими иштиракынын вахтыны ҝөзләмәјә башлады. Бу мүддәт әрзиндә о, чох ишләр ҝөрүб.
Исанын Мәсиһ ролуну тамамламасы
16, 17. Иса ҝөјә галхандан сонра Мәсиһ кими ҝөрдүјү ишләр барәдә данышын.
16 Иса дирилдикдән сонра үзәриндә Падшаһ тәјин олундуғу мәсиһчи јығынҹағына әсрләр бојунҹа сәдагәтлә нәзарәт етмишдир (Колос. 1:13). Тәјин олунмуш вахтда о, Аллаһын Падшаһлығынын Падшаһы вәзифәсини иҹра етмәјә башламалы иди. Мүгәддәс Китаб пејғәмбәрликләри вә дүнјада баш верән һадисәләр 1914-ҹү илдән онун Падшаһ кими иштирак етдијини вә һәмин ил ‘дөврүн сонунун’ башладығыны сүбут едир (Мат. 24:3; Вәһј 11:15). Бу һадисәдән гыса мүддәт сонра о, табечилијиндә олан мүгәддәс мәләкләри илә бирҝә Шејтаны вә онун ҹинләрини ҝөјдән јерә атды (Вәһј 12:7-10).
17 Ерамызын 29-ҹу илиндә Исанын башладығы тәблиғ вә тәлим иши өз мөһтәшәм сонуна јахынлашыр. Тезликлә о, һамы барәдә һөкм чыхараҹаг. Онда Иса ону Јеһованын хилас васитәси кими гәбул едән һәлим инсанлара дејәҹәк: «Дүнја јаранандан бәри сизин үчүн һазырланмыш олан Сәлтәнәти мирас алын» (Мат. 25:31-34, 41). Ону Падшаһ кими гәбул етмәкдән имтина едәнләри исә сәмави ордусу илә бирҝә бүтүн пислијин көкүнү кәсмәјә ҝәләндә мәһв едәҹәк. Сонра Шејтаны зәнҹирләјиб, ҹинләри илә бирҝә «дибсиз дәринликләрә» атаҹаг (Вәһј 19:11-14; 20:1-3).
18, 19. Исанын Мәсиһ ролуну һәјата кечирмәси илә нәјә наил олунаҹаг вә бу, итаәткар инсанлара һансы хејир-дуалары ҝәтирәҹәк?
18 Миниллик Һөкмранлығы заманы Иса «Еҹазкар, Мәсләһәтчи, Гүдрәтли Аллаһ, Әбәди Ата, Әмин-аманлыг Һөкмдары» кими титулларынын һамысыны доғрулдаҹаг (Јешаја 9:6, 7). Онун һөкмранлығы заманы, һәјата гајтараҹағы инсанлар да дахил олмагла, һамы камиллијә јетишәҹәк (Јәһ. 5:26-28). Мәсиһ үрәји истәјән һәр кәси «һәјат суларынын гајнагларына апараҹаг» вә итаәткар инсанларын Јеһова илә әмин-аманлыг ичиндә јашамаларынын гајғысына галаҹаг. (Вәһј 7:16, 17 ајәләрини оху.) Сонунҹу имтаһандан сонра бүтүн үсјанкарлар, о ҹүмләдән Шејтан вә онун ҹинләри ‘одлу вә күкүрдлү ҝөлә атылаҹаг’ — «илан»ын башына өлүмҹүл зәрбә ендириләҹәк (Вәһј 20:10).
19 Иса она һәвалә олунмуш Мәсиһ ролуну неҹә дә ҝөзәл вә гүсурсуз шәкилдә һәјата кечирир! Сатын алынмыш инсанлар јерүзү Ҹәннәтдә әбәдијјән сағлам вә хошбәхт өмүр сүрәҹәкләр. Јеһованын мүгәддәс ады бүтүн бөһтанлардан тәмизләнәҹәк вә али һөкмранлығына бәраәт газандырылаҹаг. Аллаһын Мәсһ олунмушуна итаәт едәнләр неҹә дә ҝөзәл мирас алаҹаглар!
Сән Мәсиһи тапмысанмы?
20, 21. Башгаларына Мәсиһ барәдә данышмаг үчүн һансы сәбәбләримиз вар?
20 Биз 1914-ҹү илдән етибарән Мәсиһин парусијасы, јәни иштиракы дөврүндә јашајырыг. Аллаһын Падшаһлығынын Падшаһы кими онун иштиракы ҝөзәҝөрүнмәз олса да, јеринә јетән пејғәмбәрликләрдән ајдын ҝөрүнүр (Вәһј 6:2-8). Лакин биринҹи әсрдә јашајан јәһудиләр кими, бу ҝүн дә әксәр инсанлар Мәсиһин иштиракына ишарә едән әламәтләрә әһәмијјәт вермирләр. Онлар да сијаси мәсиһин, јахуд ән азындан, инсан һакимләри васитәсилә һәрәкәт едәҹәк бир кәсин ҝәлмәсини истәјирләр. Амма билирик ки, Иса артыг Аллаһын Падшаһлығында һөкмранлыг едир. Мәҝәр Мүгәддәс Китабы тәзәҹә өјрәнмәјә башлајанда бу, сәни севиндирмәдими? Исанын биринҹи әсрдәки шаҝирдләри кими, ола билсин, сән дә: «Мән Мәсиһи тапдым!» — дејәрәк нида етмишдин.
21 Бәс инди сән башгалары илә һәгигәт барәдә сөһбәт едәндә Исанын Мәсиһ олдуғу һагда да данышырсанмы? Белә етсән, онун сәнин үчүн етдији вә едәҹәји һәр шејә ҝөрә миннәтдарлығын артаҹаг. Јәгин, Андреј вә Филип кими, сән дә гоһумларына вә достларына Мәсиһ һаггында данышмысан. Нәјә ҝөрә даһа бөјүк сәјлә онлара Исанын һәгигәтән дә Мәсиһ вә Аллаһын хилас васитәси олдуғуну ҝөстәрмәјәсән?
Изаһ едә биләрсинизми?
• Биринҹи әсрдә јашајан шаҝирдләр Мәсиһи неҹә тапдылар?
• Исанын өлмәсинин ики ваҹиб сәбәби нә иди?
• Иса бир Мәсиһ кими даһа нәләри һәјата кечирәҹәк?
[21-ҹи сәһифәдәки шәкил]
Биринҹи әсрдә јашајан инсанлар онун Мәсиһ олдуғуну неҹә анладылар?
[23-ҹү сәһифәдәки шәкил]
Башгалары илә сөһбәт едәркән Исанын Мәсиһ олдуғу һагда данышырсанмы?