«Бирини дә ичим»

ОН БИР јашы оланда Аланa спиртли ичкиләрдән суи-истифадә етмәјә башлады. Онлар достлары илә бирҝә мешәдә оланда филм гәһрәманларыны јамсылајараг ојун ојнајырдылар. Јамсыладыглары гәһрәманлар ујдурулмуш олса да, Аланла достларынын ичдији спиртли ички әсил иди.

Тони һәр ахшам бир-ики гәдәһ ичмәји јаваш-јаваш беш-алты гәдәһә галдырмаға башлады. Онда онун 40 јашы вар иди. Ахырда бүтүн ҝүнү нә гәдәр ичдијинин сајыны итирди.

Алан ичкидән јаха гуртармаг үчүн көмәк ахтарырды. Тони исә гајғыкеш аиләсинин вә достларынын көмәјини рәдд етди. Алан индијә кими сағдыр вә башына ҝәләнләри бизә өзү данышыр. Тони исә бир нечә ил бундан әввәл һәддән артыг чох ичәндән сонра автомобил гәзасында һәјатыны итирди.

Һәтта кимсә өзү ифрат дәрәҹәдә ичибсә, бу, диҝәр инсанларын да һәјатына тәсир едир, чох вахт исә фаҹиә илә нәтиҹәләнир. Ичкидән суи-истифадә етмәк чох вахт сөз-сөһбәтин, дава-далашын дүшмәсиндә, башгаларынын үстүнә һүҹум чәкмәкдә, гәтл һалларынын, јол гәзаларынын, ишдә бәдбәхт һадисәләрин баш вермәсиндә, еләҹә дә сағламлыгла бағлы бир чох проблемләрин јаранмасында әсас амилдир. Ичкидән суи-истифадә етмәјин нәтиҹәсиндә һәр ил ҹәмијјәтә күлли мигдарда мадди зәрәр дәјир, биз һәлә бунун ајры-ајры шәхсләрә, аиләләрә вә ушаглара вурдуғу физики вә емосионал зәрәрдән данышмырыг.

АБШ-ын Милли Сағламлыг Институтунун вердији мәлумата ҝөрә, «ичмәк вәрдиши олан һәр адамын ичкидән асылылығы олмур», һәмчинин ола биләр «инсан һәр ҝүн ичмәсин, амма онун ички илә проблеми олсун». Ички дүшкүнү олмајан бир чохлары өзләри дә билмәдән һәддән артыг чох ичмәјә вәрдиш едирләр. Диҝәрләри һәрдәнбир ичсәләр дә, бир отурума беш дәфәнин әвәзини ичирләр.

Әҝәр сиз ичмәк истәјирсинизсә, бәс бунун һәдди нә гәдәр олмалыдыр? Бирини дә ичмәјин артыг олаҹағыны неҹә мүәјјән етмәк олар? Нөвбәти мәгаләләрдә бу мөвзуја даир фајдалы мәлумат мүзакирә едиләҹәк.

[Һашијә]