Охуҹуларымыз сорушур...
Иса баш мәләк Микајылдырмы?
▪ Гысаҹа десәк, бәли. Инсаны мүхтәлиф адларла чағырмаг бир чох мәдәнијјәтләрдә ҝениш јајылмышдыр. Ејни һала Мүгәддәс Китабда да раст ҝәлмәк олар. Мәсәлән, Јагуб Исраил кими дә танынырды (Јарадылыш 35:10). Һәвари Петер исә Мүгәддәс Китабын орижинал мәтнинә әсасән, беш мүхтәлиф адла чағырылырды: Симеон, Шимон, Петер, Кефа вә Шимон Петер (Матта 10:2; 16:16; Јәһја 1:42; Һәвариләрин ишләри 15:7, 14). Бәс неҹә әмин ола биләрик ки, Микајыл Исанын диҝәр адыдыр? Ҝәлин Мүгәддәс Китабдан ҝәтирилән сүбутлара нәзәр салаг.
Мүгәддәс Китабда Микајыл адына беш дәфә раст ҝәлинир. Үчү елә Даниел китабында јазылыб. Даниел 10:13, 21 ајәләриндә охујуруг ки, мүәјјән тапшырығы јеринә јетирмәк үчүн ҝөндәрилән мәләји «баш мәләкләрдән бири» вә ‘башчы’ адланан Микајыл хилас едир. Даһа сонра Даниел 12:1 ајәсиндән дөврүн сонунда ‘халгына мәнсуб оланларын дајағы баш мәләк Микаелин [Микајылын] галхаҹағыны’ өјрәнирик.
Бундан әлавә, Микајыл ады Вәһј 12:7 ајәсиндә дә чәкилир. Орада ‘Микајыл вә онун мәләкләринин’ ваҹиб бир мүһарибә апардығы вә нәтиҹәдә Шејтан Иблиси вә онун пис мәләкләрини ҝөјдән јерә атдығы тәсвир олунур.
Диггәт јетирин ки, јухарыда данышылан һадисәләрин һәр бириндә Микајыл Аллаһын халгы үчүн вурушан вә ону мүдафиә едән, һәтта Јеһованын ән бөјүк дүшмәни Шејтана гаршы чыхан ҹәнҝавәр мәләк кими тәсвир олунур.
«Јәһуда» китабынын 9-ҹу ајәсиндә Микајыл «баш мәләк» адланыр. Мүгәддәс Китабын орижинал мәтнинин һеч бир јериндә «баш мәләк» ифадәси ҹәмдә ишләнмир. Бу ифадә бундан башга 1 Салониклиләрә 4:16 ајәсиндә дә ишләнилир. Орада Павел дирилдилмиш Исаны тәсвир едәрәк дејир: «Рәбб [Иса] Өзү јүксәк нида илә, баш мәләјин сәдасы вә Аллаһын шејпуру илә ҝөјдән енәҹәк». Беләликлә, мәһз Иса Мәсиһ бурада баш мәләк адландырылыр.
Јухарыда дејиләнләри нәзәрә алараг һансы нәтиҹәјә ҝәлә биләрик? Иса Мәсиһ баш мәләк Микајылдыр. Истәр Микајыл (мәнасы «Аллаһа бәнзәр кимдир?»), истәрсә дә Иса (мәнасы «Јеһова хиласдыр») ады диггәти онун Аллаһын һөкмранлығынын мүдафиәчиси кими ојнадығы рола јөнәлдир. Филипилиләрә 2:9 ајәсиндә охујуруг: «Аллаһ Ону [Исаны] чох уҹалтды вә Она бүтүн адлардан үстүн олан ады верди».
Гејд етмәјә дәјәр ки, Исанын һәјаты инсан кими доғулмасы илә башламады. Иса доғулмаздан габаг Мәрјәмин јанына мәләк ҝәлди вә деди ки, о, мүгәддәс руһун васитәсилә һамилә галаҹаг вә дүнјаја ҝәләҹәк ушағын адыны Иса гојаҹаг (Лука 1:31). Иса хидмәти боју јер үзүнә ҝәлмәздән өнҹә мөвҹуд олмасындан тез-тез данышырды (Јәһја 3:13; 8:23, 58).
Демәли, Иса јер үзүнә ҝәлмәздән әввәл баш мәләк Микајыл олмушду. Дирилиб ҝөјә гајыдандан сонра Иса Микајыл, јәни баш мәләк кими «Аллаһын иззәти үчүн» әввәлки хидмәтини давам етдирди (Филипилиләрә 2:11).