Аллаһын халгыны өзүнә сығынаҹаг ет

«Бөјүк топлантыда Сәнә шүкүр едәҹәјәм» (МӘЗ. 35:18).

1-3. а) Һеч өзү дә билмәдән мәсиһчи руһанилијини тәһлүкә алтына неҹә ата биләр? б) Аллаһын халгы сығынаҹағы һарада тапа биләр?

МӘЗУНИЈЈӘТ заманы Ҹо вә онун һәјат јолдашы рәнҝарәнҝ вә ирили-хырдалы балыгларла долу тропик мәрҹан рифләриндә суалты үзҝүчүлүклә мәшғул олурдулар. Онлар бир аз дәринликдә јерләшән рифләри сејр етмәк истәдиләр. Бирдән дәрин чөкәклик үзәриндә үздүкләрини ҝөрән Ҹонун арвады деди: «Мәнҹә, чох узаға ҝетмишик». «Нараһат олма, — дејә Ҹо ҹаваб верди. — Мән нә етдијими билирәм». Ҹо хатырлајыр: «Бирдән мәни тәәҹҹүб бүрүдү. “Ҝөрәсән, бүтүн балыглар һара јоха чыхыб?” — дејә фикирләшдим». Ҹо бунун сәбәбини ҝөрәндә дәһшәтә ҝәлди. Бирдән сујун дәринликләриндән бир көпәкбалығынын дүз она тәрәф үздүјүнү ҝөрдү. О, тамамилә аҹиз иди. Лакин бу јыртыҹы балыг онлара чатмаға бир метр галмыш бирдән сәмтини дәјишиб јоха чыхды.

² Шејтан дүнјасынын «ҝөзәлликләри» — әјләнҹә, иш вә вар-дөвләт — мәсиһчијә о гәдәр ҹәлбедиҹи ҝөрүнә биләр ки, јаваш-јаваш дәринлијә, тәһлүкәли сулара гәрг олдуғуну нәзәриндән гачыра биләр. «Башыма ҝәләнләр мәни кимләрлә үнсијјәт етдијимиз барәдә дүшүнмәјә вадар етди», — дејә ағсаггал кими хидмәт едән Ҹо гејд едир. «Тәһлүкәсиз вә ҝөзәл јердә, јәни јығынҹагда үз!» Һеч вахт руһани ҹәһәтдән тамамилә тәҹрид олуна вә тәһлүкәләрә мәруз гала биләҹәјин дәрин сулара тәрәф үзмә. Бирдән о јерләрә дүшсән, вахт итирмәдән «тәһлүкәсиз сулара» тәрәф гајыт. Әкс тәгдирдә, руһанилијини итирмәк тәһлүкәси илә үзләшәҹәксән.

³ Јашадығымыз дүнја мәсиһчиләр үчүн чох тәһлүкәлидир (2 Тим. 3:1—5). Шејтан билир ки, онун сонуна аз галыб, буна ҝөрә дә еһтијаты әлдән верәнләри ашырмаг истәјир (1 Пет. 5:8; Вәһј 12:12, 17). Амма биз бунун гаршысында аҹиз дејилик. Чүнки Јеһова халгына руһани сығынаҹаг кими мәсиһчи јығынҹағыны вериб.

4, 5. Чохлары ҝәләҹәјә неҹә бахыр вә бунун сәбәби нәдир?

⁴ Бу дүнја истәр физики, истәрсә дә емосионал ҹәһәтдән инсанларын тәһлүкәсизлијини чох аз тәмин едир. Чохлары һисс едир ки, ҹинајәткарлыг, зоракылыг, баһачылыг вә һәтта әтраф мүһитин чиркләнмәси һәјатларыны тәһлүкә алтына атыр. Һамы гоҹалығын вә зәиф сәһһәтин төрәтдији проблемләрлә үзләшир. Һәтта ишләри, өз евләри, пулу вә мүәјјән сағламлығы олан инсанлар белә бүтүн бунлары нә вахтса итирәҹәкләриндән горхурлар.

⁵ Чохлары гәлб раһатлығынын нә олдуғуну билмирләр. Әфсуслар олсун ки, аилә һәјатында сәадәт тапаҹагларына үмид едәнләрин чоху буна наил ола билмәмишдир. Руһани тәһлүкәсизлијә ҝәлдикдә исә, алдыглары рәһбәрлијин доғрулуғуна шүбһә едән бир чох диндарлар чашгынлыг ичиндәдирләр. Онлар дин рәһбәрләринин чиркин әмәлләрини вә Мүгәддәс Китаба зидд тәлимләрини ҝөрәндә даһа да чаш-баш галырлар. Бир чох башга инсанлар исә дүшүнүрләр ки, елмә, инсанларын мәрһәмәтинә вә сағламдүшүнҹәлилијинә үмид етмәкдән савајы башга јоллары јохдур. Буна ҝөрә дә һеч дә тәәҹҹүблү дејил ки, инсанлар өзләрини тәһлүкәсизликдә һисс етмирләр вә ја ҝәләҹәк һаггында чох фикирләшмәмәјә үстүнлүк верирләр.

6, 7. а) Аллаһа хидмәт едәнләрлә Она хидмәт етмәјәнләрин бахышлары арасындакы фәрги нә илә изаһ етмәк олар? б) Биз нәји нәзәрдән кечирәҹәјик?

⁶ Мәсиһчи јығынҹағынын үзвү оланларла олмајанларын бахышлары арасында неҹә дә бөјүк фәрг вар! Һамы кими, Јеһованын халгы олан бизләр бир чох проблемләрлә үзләшсәк дә, онлара мүнасибәтимиз тамамилә башгадыр. (Јешаја 65:13, 14; Малаки 3:18 ајәләрини оху.) Нәјә ҝөрә? Чүнки биз Мүгәддәс Китабдан бәшәријјәтин нәјә ҝөрә бу вәзијјәтдә олмасынын сәбәбини јахшы билирик, һәмчинин алдығымыз билик сајәсиндә һәјатда гаршылашдығымыз проблем вә чәтинликләрлә даһа јахшы мүбаризә апармағы өјрәнмишик. Бу сәбәбдән ҝәләҹәјә ҝөрә һәддән артыг нараһатчылыг кечирмирик. Јеһованын хидмәтчиләри олдуғумуза ҝөрә ағылсыз вә Мүгәддәс Китаба зидд мүлаһизәләрдән, әхлагсыз һәрәкәтләрдән вә онларын нәтиҹәләриндән мүдафиә олунмаг имканымыз вар. Бу сәбәбдән мәсиһчи јығынҹағынын үзвләри диҝәрләринин һисс етмәдији гәлб раһатлығына маликдирләр (Јешаја 48:17, 18; Филип. 4:6, 7).

⁷ Јеһоваја хидмәт етмәјәнләрдән фәргли олараг Онун хидмәтчиләринин малик олдуғу тәһлүкәсизлик үзәриндә дүшүнмәјә бир нечә нүмунә көмәк едә биләр. Бу нүмунәләр өз дүшүнҹә вә әмәлләримизи тәһлил етмәјә, еләҹә дә бизи горумаг үчүн нәзәрдә тутулан Аллаһын мәсләһәтләрини там шәкилдә тәтбиг едиб-едә билмәјәҹәјимизин үзәриндә дүшүнмәјә тәшвиг едәҹәк (Јешаја 30:21).

«Мәним ајагларым аз гала бүдрәмишди»

8. Јеһованын хидмәтчиләри һәмишә нә етмәли олмушлар?

⁸ Та гәдимдән бу ҝүнә гәдәр Јеһоваја хидмәт вә итаәт етмәји сечәнләр Она хидмәт етмәјән инсанларла сых үнсијјәтдә олмамаға чалышмышлар. Јеһова Онун хидмәтчиләри илә Шејтанын әлалтылары арасында дүшмәнчилијин олаҹағындан габагҹадан хәбәр вермишди (Јар. 3:15). Јеһованын халгы Онун принсипләринә садиг олдуғу үчүн башга инсанлардан фәргли шәкилдә давраныр (Јәһ. 17:15, 16; 1 Јәһ. 2:15—17). Лакин бу һеч дә һәмишә асан олмајыб. Јеһованын хидмәтчиләри арасында бәзән фәдакар һәјат тәрзи сүрмәјин мүдрик олдуғуну шүбһә алтына аланлар да олуб.

9. 73-ҹү мәзмурун јазычысынын нә илә мүбаризә апардығыны тәсвир един.

⁹ Вердији гәрарларын мүдриклијинә шүбһә илә јанашмаға башлајан Јеһованын хидмәтчиләриндән бири 73-ҹү мәзмурун јазычысы иди. Асәфин нәслиндән олдуғу еһтимал едилән бу мәзмурчуну Аллаһа хидмәт етмәјә чалышан бәзи инсанларын сынаг вә чәтинликләрдән әзијјәт чәкдији һалда, писләрин чохунун нәјә ҝөрә хошбәхт вә фираван јашадығы нараһат едирди. (Мәзмур 73:1—13 ајәләрини оху.)

10. Мәзмурчунун вердији суаллар нәјә ҝөрә сәнин үчүн әһәмијјәт кәсб едир?

¹⁰ Мәзмурчу кими, сәни дә белә суаллар нараһат едибми? Әҝәр едибсә, өзүнү буна ҝөрә һәддән артыг мүһакимә етмә вә ја иманыны итирдијини дүшүнмә. Мүгәддәс Китабы јазмаг үчүн Јеһованын истифадә етдији бәзи инсанлар да дахил олмагла, Онун бир сыра хидмәтчиләриндә белә фикирләр јаранырды (Әјј. 21:7—13; Мәз. 37:1; Јер. 12:1; Һаб. 1:1—4, 13). Әслиндә, Јеһоваја хидмәт етмәк истәјәнләрин һамысы «доғруданмы Аллаһа хидмәт вә итаәт етмәк һәјатда ән јахшы јолдур?» суалынын үзәриндә ҹидди дүшүнмәли вә онун ҹавабыны гәбул етмәлидир. Бу, Шејтанын Еден бағында ортаја атдығы суалла бағлыдыр вә бирбаша олараг каинатда али һөкмранлыг мәсәләси илә әлагәлидир (Јар. 3:4, 5). Беләликлә, һамымыз мәзмурчунун галдырдығы мәсәләни нәзәрдән кечирмәлијик. Һәјатда гајғы чәкмәјән кими ҝөрүнән мәғрур, пис инсанлара һәсәд апармалыјыгмы? Биз Јеһоваја хидмәтдә ‘бүдрәјәрәк’ онларын јолу илә ҝетмәлијикми? Шејтанын истәдији дә елә будур.

11, 12. а) Мәзмурчу шүбһәләринин өһдәсиндән неҹә ҝәлди вә биз бундан нә өјрәнирик? б) Мәзмурчунун ҝәлдији нәтиҹәјә ҝәлмәкдә сәнә нә көмәк едиб?

¹¹ Мәзмурчуја шүбһәләринин өһдәсиндән ҝәлмәкдә нә көмәк етди? Салеһлик јолунда аз гала бүдрәјәҹәјини етираф едән бу мәзмурчу «Аллаһын мүгәддәс мәканына» ҝедәндә, јәни Аллаһын сәҹдәҝаһында вә ја мәбәдиндә руһани инсанларла үнсијјәт едәндә вә Онун нијјәти үзәриндә дүшүнәндә бахышлары дәјишди. Бундан сонра о дәрк етди ки, писләрин агибәтинә дүчар олмаг истәмир. Мәзмурчу писләрин һәјат тәрзинин вә гәрарларынын онлары, санки, ‘сүрүшкән јерә гојдуғуну’ ҝөрдү. Үстәлик, о анлады ки, Јеһованы тәрк едиб әхлагсыз арзуларынын далынҹа дүшәнләрин һамысы «дәһшәт ичиндә» јох олаҹаг вә бу, гачылмаздыр; Өз хидмәтчиләринә исә Јеһова дајаг олаҹағыны вәд едир. (Мәзмур 73:16—19, 27, 28 ајәләрини оху.) Шүбһә јохдур ки, бу сөзләрин һәгигилијинә өзүн дә әмин олмусан. Аллаһын ирадәсини нәзәрә алмадан инсанын сырф өзү үчүн јашамасы бир чохларына ҹәлбедиҹи ҝөрүнә биләр, лакин бунун аҹы нәтиҹәләри гачылмаздыр (Галат. 6:7—9).

¹² Мәзмурчунун нүмунәсиндән биз даһа нә өјрәнирик? О, Аллаһын халгы арасында тәһлүкәсизлик вә һикмәт тапды. Јеһованын сәҹдәҝаһына баш чәкәндән сонра о, ајдын вә мәнтигли шәкилдә дүшүнмәјә башлады. Ејнилә биз дә мүдрик мәсләһәтләри вә сағлам руһани гиданы јығынҹаг ҝөрүшләриндә ала биләрик. Буна ҝөрә дә тәәҹҹүблү дејил ки, Јеһова хидмәтчиләринә мәсиһчи ҝөрүшләриндә иштирак етмәји бујурур. Бурада онлар руһланыр вә мүдрик давранмаға тәшвиг олунурлар (Јешаја 32:1, 2; Ибр. 10:24, 25).

Дост сечиминдә мүдрик ол

13-15. а) Динанын башына нә иш ҝәлмишди вә бу, нәји ҝөстәрир? б) Нәјә ҝөрә һәмиманлыларымызла үнсијјәт бизим үчүн мүдафиәдир?

¹³ Јагубун гызы Динанын нүмунәси ҝөстәрир ки, Јеһоваја хидмәт етмәјәнләрлә үнсијјәтдә олмаг инсанын башына бөјүк бәла ача биләр. «Јарадылыш» китабындан билдијимиз кими, о, аиләси илә бирҝә јашадығы әразинин Кәнан гызлары илә ‘тез-тез ҝөрүшүб’ (ЈД) үнсијјәт едирди. Јеһованын хидмәтчиләриндә олан јүксәк әхлаг нормалары кәнанлыларда јох иди. Археологларын ашкар етдикләри кими, бу, онларын әразисиндә бүтпәрәстлијин, әхлагсызлығын, ијрәнҹ ајинләрин вә зоракылығын чичәкләнмәсинә ҝәтириб чыхарды (Чых. 23:23; Лев. 18:2—25; Ганун. т. 18:9—12). Ҝәлин Динанын бу инсанларла үнсијјәтинин нә илә нәтиҹәләндијини јадымыза салаг.

¹⁴ Һәмин әразидә јашајан вә «атасынын евиндә ән һөрмәтли адам» һесаб олунан Шекем Динаны ҝөрдү, сонра «апарыб онунла јатды вә ону зорлады» (Јар. 34:1, 2, 19). Бу неҹә дә бөјүк бәдбәхтчилик иди! Сәнҹә, Дина башына белә бир ишин ҝәләҹәјини ағлына ҝәтирирдими? Јәгин, о, јерли ҝәнҹ оғланларла садәҹә достлашмаг истәјирди вә дүшүнүрдү ки, онларын фикриндә пис бир шеј јохдур. Лакин Дина чох јанылырды.

¹⁵ Бу һадисәдән биз нә өјрәнирик? Биз дүшүнмәмәлијик ки, иманымыза шәрик олмајанларла үнсијјәт етмәјин пис нәтиҹәси олмајаҹаг. Мүгәддәс Јазыларда гејд олунур ки, «пис достлуг јахшы әхлагы позар» (1 Кор. 15:33). Амма иманымыза, јүксәк әхлаг нормаларымыза шәрик олан вә Јеһованы бизим кими севән инсанларла үнсијјәтдә олмаг бизим үчүн мүдафиәдир. Белә достлар бизи мүдрик давранмаға тәшвиг едәҹәкләр (Сүл. мәс. 13:20).

«Сиз тәмизләндиниз»

16. Павел Коринф јығынҹағынын бәзи үзвләри һагда нә јазмышды?

¹⁶ Мәсиһчи јығынҹағы бир чох инсанлара өзләрини натәмиз әмәлләрдән тәмизләмәјә көмәк едиб. Һәвари Павел Коринф јығынҹағына јаздығы биринҹи мәктубунда бурадакы мәсиһчиләри һәјатларыны Аллаһын нормаларына ујғунлашдырмаг үчүн дәјишикликләр етдикләринә ҝөрә тәрифләмишди. Бәзиләри вахтилә әхлагсыз, бүтпәрәст, зинакар, һомосексуалист, оғру, әјјаш вә саирә олмушлар. Павел онлара демишди: «Лакин сиз тәмизләндиниз». (1 Коринфлиләрә 6:9—11 ајәләрини оху.)

17. Мүгәддәс Китаб принсипләринә ујғун јашамаг бир чохларынын һәјатыны неҹә дәјишиб?

¹⁷ Иманлары олмајан инсанларын әлдә рәһбәр тута биләҹәкләри етибарлы принсипләри јохдур. Онлар јолларыны ја өзләри мүәјјән едир, ја да ки, мәсиһчи олмаздан әввәл гәдим коринфлиләр кими, әхлагсызлыг селиндә о тәрәф-бу тәрәфә атылырлар (Ефес. 4:14). Лакин Аллаһын Кәламы вә Онун нијјәти һаггында дәгиг билик Мүгәддәс Китаб мәсләһәтләринә риајәт едән һәр бир инсанын һәјатыны јахшылыға доғру дәјишмәјә гадирдир (Колос. 3:5—10; Ибр. 4:12). Бир чох мәсиһчиләр сәнә дејә биләрләр ки, Јеһованын салеһ нормалары һагда өјрәнмәздән вә онлары тәтбиг етмәздән өнҹә онларын һәјатында һеч бир әхлаг нормалары јох иди. Бунунла белә, онлар һәјатдан мәмнунлуг дујмур вә бәдбәхт идиләр. Бу инсанлар јалныз Аллаһын халгы илә тәмасда олмаға вә Мүгәддәс Китаб принсипләринә ујғун јашамаға башлајандан сонра гәлб раһатлығына наил олублар.

18. Ҝәнҹ оланда бир баҹынын башына нә ҝәлмишди вә бу, нәји ҝөстәрир?

¹⁸ Амма вахтилә јығынҹағынын «тәһлүкәсиз суларыны» тәрк едән бәзи мәсиһчиләр инди башларына дөјүрләр. Танјаa адлы бир баҹы данышыр ки, «һәгигәти ушаглыгдан билмәсинә бахмајараг», 16 јашы оланда «дүнјанын ширникдириҹи шејләринә алданараг» јығынҹағы тәрк етди. Бунун аҹы нәтиҹәләринин бәзиләри арзуолунмаз һамиләлик вә аборт иди. Инди о дејир: «Јығынҹагдан узаг олдуғум бу үч ил гәлбимдә хошаҝәлмәз дәрин из бурахыб. Дүнјаја ҝәлмәмиш көрпәми өлдүрдүјүмү һәлә дә унуда билмирәм... Азҹа да олса, бу дүнјанын “дадына бахмаг” истәјән бүтүн ҝәнҹләрә үз тутуб демәк истәјирәм ки, әсла буну етмәсинләр! Башланғыҹда һәр шеј ширин ола биләр, лакин нәтиҹә чох аҹы олур. Бу дүнја ағры-аҹыдан башга адама һеч нә тәклиф етмир. Мән бунун дадыны ҝөрмүшәм. Јеһованын тәшкилатыны тәрк етмәјин! Бу, инсана хошбәхтлик ҝәтирән јеҝанә јолдур».

19, 20. Мәсиһчи јығынҹағы бизи нәдән вә неҹә мүдафиә едир?

¹⁹ Әҝәр сән тәһлүкәсиз мүһити — мәсиһчи јығынҹағыны тәрк етсәјдин, ҝөр сәнин башына нәләр ҝәләрди. Чохлары һәгигәтә ҝәлмәздән өнҹә сүрдүкләри мәнасыз һәјатларыны јада саланда түкләри үрпәшир (Јәһ. 6:68, 69). Сән мәсиһчи баҹы-гардашларла сых мүнасибәтдә олмагла Шејтанын дүнјасында ади һал олан изтираб вә әзаб-әзијјәтләрдән һифз олунаҹагсан. Онларла үнсијјәтдә олсан вә мүнтәзәм олараг јығынҹаг ҝөрүшләриндә иштирак етсән, бу, сәнә Јеһованын салеһ нормаларынын мүдрик олдуғуну даима хатырладаҹаг вә онлара ујғун јашамаға тәшвиг едәҹәк. Мәзмурчу кими, ‘бөјүк топлантыда [Јеһоваја] шүкүр етмәк’ үчүн сәнин там әсасын вар (Мәз. 35:18).

²⁰ Әлбәттә, бәзән мүхтәлиф сәбәбләрдән һәр бир мәсиһчи үчүн һәјатда нөгсансызлығыны горујуб сахламаг чәтин олур. Ола билсин, бу баҹы-гардашлар садәҹә киминсә онлара дүзҝүн јол ҝөстәрмәсинә еһтијаҹ дујурлар. Белә анларда бүтүн јығынҹаг, еләҹә дә сән һәмиманлыларына неҹә көмәк едә биләрсән? Нөвбәти мәгаләдә бир-биримизә неҹә тәскинлик верә биләҹәјимиз вә бир-биримизи неҹә инкишаф етдирә биләҹәјимиз мүзакирә олунаҹаг (1 Салон. 5:11).

[Һашијә]

Неҹә ҹаваб верәрдиниз?

• 73-ҹү мәзмурун јазычысынын нүмунәсиндән нә өјрәнирик?

• Динанын нүмунәси бизә нә өјрәдир?

• Нәјә ҝөрә мәсиһчи јығынҹағы сәнин үчүн тәһлүкәсиз сығынаҹагдыр?

[7-ҹи сәһифәдәки шәкил]

Тәһлүкәсиз суларда үз — јығынҹагда гал!