Гәзәбинизи ҹиловлајараг ‘пислијә галиб ҝәлин’
«Еј севимлиләр, гисас алмајын... Пислијә јахшылыг илә галиб ҝәл[ин]» (РОМ. 12:19, 21).
1, 2. Сәјаһәт едән бир груп баҹы-гардаш һансы ҝөзәл нүмунәни верди?
БЕТ-ЕЛИН һәср олунма мәрасиминә ҝедән отуз дөрд нәфәрдән ибарәт бир груп Јеһованын Шаһиди тәјјарәдә јаранан механики насазлыг уҹбатындан јолда ләнҝиди. Тәјјарәнин јанаҹаг бакыны долдурмаг үчүн бир саатлыг дајанаҹаг кифајәт гәдәр гида, су вә санитар шәраити олмајан узаг бир һава лиманында 44 саатлыг әсил сынаға чеврилди. Гәзәб ичиндә олан сәрнишинләрин чоху һава лиманынын ишчиләрини һәдәләјирдиләр. Бизим баҹы вә гардашлар исә өзләрини тәмкинли апарырдылар.
2 Онлар һәср олунма програмынын јалныз сон һиссәсинә чатдылар. Јорғун олмаларына бахмајараг, програмдан сонра галыб јерли гардашларла үнсијјәт етдиләр. Сонрадан билдиләр ки, онларын өзләрини сәбирли вә тәмкинли апармасы башгаларынын нәзәриндән јајынмајыб. Һәмин рејслә учан сәрнишинләрдән бири авиаширкәтә белә сөзләр демишди: «Әҝәр тәјјарәдә 34 Јеһованын Шаһиди олмаса иди, һава лиманында гијам галхарды».
Биз гәзәбли дүнјада јашајырыг
3, 4. а) Гәзәб вә зоракылыг нә вахтдан мөвҹуддур вә инсанлара неҹә тәсир ҝөстәрир? б) Габил өз гәзәбинә һаким ола биләрдими? Изаһ един.
3 Бу пис дүнјада һәјатын ағры-аҹылары инсанларда гәзәб доғурур (Ганун. т. 28:34). Чох вахт гәзәб нифрәтә вә ачыг-ашкар зоракылыға ҝәтириб чыхарыр. Өлкәләрарасы вә вәтәндаш мүһарибәләри баш верир, аиләдәки ҝәрҝинлик уҹбатындан исә бир чох евләрдә мүнагишәләр јараныр. Белә гәзәб вә зоракылыг бәшәр тарихинин та башланғыҹындан мөвҹуддур. Адәмлә Һәвванын илк оғлу Габил һәсәд апардығы кичик гардашы Һабилә гәзәбләнәрәк ону өлдүрдү. Јеһованын Габилә һиссләринә һаким олмасына даир габагҹадан хәбәрдарлыг етмәсинә вә Она гулаг асаҹағы тәгдирдә ону хејир-дуаландыраҹағыны демәсинә бахмајараг, о, бу алчаг һәрәкәтә јол верди. (Јарадылыш 4:6—8 ајәләрини оху.)
4 Гејри-камиллији мирас алса да, Габилин бу мәсәләдә сечим етмәк имканы варды. Гәзәбини ҹиловламаг онун әлиндә иди. Бу сәбәбдән төрәтдији зоракылыға ҝөрә бүтүн мәсулијјәт онун үзәринә дүшүрдү. Ејнилә, гејри-камил олдуғумуздан гәзәбдән вә онун нәтиҹәләриндән там гачынмаг бизим үчүн дә асан дејил. Бу «чәтин» ҝүнләрдә јаранан башга ҹидди проблемләр вәзијјәтимизи даһа да ҝәрҝинләшдирир (2 Тим. 3:1). Мәсәлән, игтисади чәтинликләр уҹбатындан дахили ҝәрҝинлик кечирә биләрик. Полис органлары вә аиләләрә јардым тәшкилатлары гәзәбин вә аиләдә зоракылығын артмасынын сәбәбини малијјә системиндәки бөһран илә әлагәләндирир.
5, 6. Гәзәбә даир дүнјада ҝениш јајылмыш һансы нөгтеји-нәзәр бизә тәсир ҝөстәрә биләр?
5 Бундан әлавә, тәмасда олдуғумуз бир чох инсанлар «худбин», «ловға», һәтта «рәһмсиз»дирләр. Бу кими мәнфур хүсусијјәтләр асанлыгла бизә өз тәсирини ҝөстәрә биләр вә гәзәбләнмәк биздә вәрдиш һалыны ала биләр (2 Тим. 3:2—5). Үстәлик, филм вә телевизија програмлары, чох вахт, интигам алмағы нәҹиблик, зоракылығы исә проблемләрдән тәбии вә дүзҝүн чыхыш јолу кими гәләмә верир. Бу кими шејләрә тамаша едәнләр ҹинајәткарын «лајигли ҹәза» алаҹағыны сәбирсизликлә ҝөзләјир вә чох вахт о, һекајәнин гәһрәманы тәрәфиндән амансызҹасына гәтлә јетирилир.
6 Бүтүн бунлар Аллаһын нормаларынын јох, бу дүнјанын аҹыглы рәһбәри олан Шејтанын вә ‘дүнјанын руһунун’ тәблиғатына хидмәт едир (1 Кор 2:12; Ефес 2:2; Вәһј 12:12). Бу руһ гејри-камил бәдәнин арзуларыны тәмин едир вә Аллаһын мүгәддәс руһуна вә онун сәмәрәсинә там зиддир. Әслиндә, тәһрикә ујараг гисас алмаг әсас мәсиһчи тәлимләринә зиддир. (Матта 5:39, 44, 45 ајәләрини оху.) Онда Исанын тәлимләрини даһа јахшы неҹә тәтбиг едә биләрик?
Јахшы вә пис нүмунәләр
7. Шимеон вә Левинин өз гәзәбини ҹиловламамасы нә илә нәтиҹәләнди?
7 Мүгәддәс Китабда гәзәби ҹиловламаға даир чохлу мәсләһәтләр, еләҹә дә гәзәби ҹиловлајанда, јахуд ҹиловламајанда нә баш верә биләҹәјини ҝөстәрән нүмунәләр јер алыр. Ҝәлин ҝөрәк, Јагубун ики оғлу Шимеон вә Леви баҹылары Динаны зорладығы үчүн Шекемдән гисас алдыглары заман нә баш верди. ‘Онлар мәјус олмуш вә бәрк гәзәбләнмишдиләр’ (Јар. 34:7). Сонра Јагубун диҝәр оғуллары Шекемин јашадығы шәһәрә һүҹум едәрәк ону талан етмиш, бүтүн гадынлары вә ушаглары исә әсир ҝөтүрмүшдүләр. Онлар буну садәҹә Динаја ҝөрә етмәмишдиләр, ҝөрүнүр, бу, онлар үчүн намус мәсәләси олдуғундан онларын гүруруна тохунмушду. Онлар Шекемин бу һәрәкәтини өзләринә вә аталары Јагуба гаршы тәһгир сајырдылар. Бәс, ҝөрәсән, оғулларынын һәрәкәти барәдә Јагуб нә дүшүнүрдү?
8. Шимеонла Левинин һадисәси интигам алмаға даир нәји ҝөстәрир?
8 Динанын башына ҝәлән бу бәла Јагубу чох кәдәрләндирмишди, бунунла белә, о, оғулларынын гисас алмаларыны мүһакимә етди. Шимеон вә Леви: «Бәс бизим баҹымызла бир фаһишә кими рәфтар етмәк олармы?» — дејәрәк өзләринә бәраәт газандырмаға чалышырдылар (Јар. 34:31). Амма Јеһова да онлардан наразы олдуғу үчүн бу мәсәлә бурада битмәди. Чох илләр сонра Јагуб пејғәмбәрлик етмишди ки, Шимеон вә Леви һиддәтләнәрәк зоракылыға јол вердикләринә ҝөрә онларын нәсли Исраил гәбиләләри арасында сәпәләнәҹәк. (Јарадылыш 49:5—7 ајәләрини оху.) Бәли, гәзәбләрини ҹиловламадыглары үчүн бу ики нәфәр һәм Аллаһын, һәм дә аталарынын ҝөзүндән дүшдү.
9. Давуд нә вахт аз гала гәзәбә ујмушду?
9 Давуд падшаһын һадисәси исә тамам фәргли иди. Гисас алмаг үчүн онун әлинә чохлу фүрсәт дүшмүшдү, амма о, бу имканларын һеч бириндән истифадә етмәмишди (1 Шам. 24:3—7). Анҹаг бир дәфә о, аз гала гәзәбә ујмушду. Навал адында бир варлы адам чобан вә сүрүләрини горујан Давудун адамларыны тәһгир етди. Ола билсин, хүсусилә дә адамларына ҝөрә өзүнү тәһгир олунмуш һисс едән Давуд гәддарҹасына гисас алмаг фикринә дүшдү. Давуд адамлары илә бирликдә Навала вә евинә һүҹум етмәк үчүн јолда оларкән нөкәрләрдән бири баш верәнләр һагда Навалын мүдрик арвады Авигаилә хәбәр верди вә бунунла әлагәдар бир тәдбир ҝөрмәсини хаһиш етди. Авигаил дәрһал чохлу азугә топлајыб, Давудун габағына ҝетди. О, Навалын һөрмәтсизлијинә ҝөрә тәвазөкарлыгла Давуддан үзр истәјиб Јеһованын гаршысында малик олдуғу горхуну јадына салды. Давуд өзүнә ҝәлиб деди: «Хејир-дуалы оласан! Бу ҝүн мәни ган төкмәкдән... сахладын» (1 Шам. 25:2—35).
Мәсиһчи нөгтеји-нәзәри
10. Мәсиһчиләрин интигам алмаға мүнасибәтләри неҹә олмалыдыр?
10 Шимеонла Левинин, еләҹә дә Давудла Авигаилин нүмунәси ачыг-ајдын ҝөстәрир ки, Јеһова ҹиловланмајан гәзәб вә зоракылыға гаршыдыр, сүлһ јаратмаг сәјләринә исә хејир-дуа верир. Һәвари Павел јазмышды: «Мүмкүнсә, әлиниздән ҝәлдији гәдәр бүтүн адамларла сүлһдә олун. Еј севимлиләр, гисас алмајын, анҹаг Аллаһын гәзәбинә јол верин. Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”. Демәли, “Әҝәр дүшмәнин аҹдырса, ону једиздир; әҝәр сусуздурса, ону ичирт. Чүнки сән буну етмәклә, онун башына јанан көмүр јығырсан”. Пислијә мәғлуб олма, пислијә јахшылыг илә галиб ҝәл» (Ром. 12:18—21)a.
11. Бир баҹы өз гәзәбини ҹиловламағы неҹә өјрәнди?
11 Бу мәсләһәти биз дә тәтбиг едә биләрик. Мәсәлән, бир баҹы ағсаггала ишиндәки јени мүдириндән шикајәт етмишди. Баҹы онун әдаләтсиз вә кобуд гадын олдуғуну деди. О, онун әлиндән јаман һирсли иди вә ишдән чыхмаг истәјирди. Ағсаггал она тәләсик иш ҝөрмәмәји мәсләһәт ҝөрдү. О анлады ки, баҹынын мүдирин пис рәфтарына аҹыглы мүнасибәт ҝөстәрмәси вәзијјәти даһа да ҝәрҝинләшдирир (Тит. 3:1—3). Ағсаггал гејд етди ки, о, өзүнә башга иш тапса белә, кобудлуға дүзҝүн реаксија вермәји өјрәнмәлидир. О, баҹыја Исанын тәлиминә ујғун давранмағы мәсләһәт ҝөрдү, јәни мүдиринин онунла неҹә рәфтар етмәсини истәјирсә, о да онунла елә рәфтар етмәлидир. (Лука 6:31 ајәсини оху.) Баҹы чалышаҹағына сөз верди. Бу, јахшы нәтиҹәләр ҝәтирди. Бир гәдәр сонра мүдиринин мүнасибәти јумшалды вә о һәтта баҹыја ишинә ҝөрә миннәтдарлығыны билдирди.
12. Нәјә ҝөрә мәсиһчиләр арасында јаранан проблемләр хүсусилә ағыр ола биләр?
12 Мәсиһчи јығынҹағындан хариҹдәкиләрлә бу кими проблемләримиз јарананда биз тәәҹҹүбләнмирик. Билирик ки, Шејтан дүнјасында әдаләтсизлик ади һалдыр вә буна ҝөрә дә писләрин бизи өзүмүздән чыхармасына јол вермәли дејилик (Мәз. 37:1—11; Ваиз 8:12, 13; 12:13, 14). Лакин баҹы вә ја гардашла проблемимиз јарананда бизим үчүн даһа ағыр ола биләр. Бир баҹы хатырлајыр: «Һәгигәтә ҝәләндә Јеһованын халгынын камил олмадығыны гәбул етмәк мәним үчүн чох чәтин иди». Сојуг вә гәддар дүнјадан чыхдығымыз үчүн биз мәсиһчи јығынҹағында һәр кәсин бир-бири илә хејирхаһлыгла давранаҹағына үмид едирик. Буна ҝөрә дә һәмиманлымыз, хүсусилә дә јығынҹагда мәсул гардашлардан кимсә дүшүнүлмәмиш бир сөз дејәндә вә ја мәсиһчијә јарашмајан тәрздә һәрәкәт едәндә бу, бизә тохуна вә ја гәзәбләндирә биләр. «Ахы Јеһованын халгы арасында белә шејләр неҹә баш верә биләр?» — дејә өзүмүздән соруша биләрик. Әслинә галса, белә шејләр һәтта һәвариләрин дөврүндә мәсһ олунмушларын арасында да баш верирди (Галат. 2:11—14; 5:15; Јаг. 3:14, 15). Әҝәр бу, бизимлә дә баш верирсә, онда нә етмәлијик?
13. Биз проблемләрин өһдәсиндән нәјә ҝөрә вә неҹә ҝәлмәлијик?
13 «Мән Хәтримә дәјән һәр кәс үчүн дуа етмәји өјрәнмишәм, — дејә јухарыда хатырланан баҹы гејд едир. — Бунун һәмишә көмәји дәјир». Артыг охудуғумуз кими, Иса бизи тәгиб едәнләр үчүн дуа етмәји өјрәдирди (Мат. 5:44). Онда руһани баҹы-гардашларымыз үчүн даһа чох дуа етмәли дејиликми? Ата ушагларынын бир-бирилә меһрибан олмасыны истәдији кими, Јеһова да јер үзүндәки хидмәтчиләринин бир-бири илә јола ҝетмәсини истәјир. Биз әбәди олараг бирликдә сүлһ вә хошбәхтлик ичиндә јашајаҹағымыз вахты сәбирсизликлә ҝөзләјирик вә Јеһова бизи буна индидән өјрәдир. О истәјир ки, биз Онун бөјүк ишини ҝөрәркән бир-биримизлә әмәкдашлыг едәк. Буна ҝөрә дә ҝәлин ја проблемләри һәлл едәк, ја да ки онлара мәһәл гојмадан бирлији горујаг. (Сүлејманын мәсәлләри 19:11 ајәсини оху.) Проблем баш галдыранда гардашларымыздан узаглашмаг әвәзинә, биз бир-биримизә Аллаһын халгынын арасында — Онун ‘әбәди әлләриндә’ тәһлүкәсизликдә галмаға көмәк етмәлијик (Ганун. т. 33:27, КМ).
Һамыја гаршы мүлајим олмаг ҝөзәл нәтиҹәләр ҝәтирир
14. Бизи парчаламаға ҹан атан Шејтанын тәсиринә гаршы неҹә мүбаризә апара биләрик?
14 Бизи хош хәбәри тәблиғ етмәк ишиндән јајындырмаг үчүн Шејтан вә онун ҹинләри вар ҝүҹләри илә хошбәхт аиләләри вә јығынҹаглары дағытмаға чалышырлар. Онлар арамызда нифаг салмаға чалышырлар, чүнки дахили парчаланманын мәһведиҹи характер дашыдығы онлар үчүн сирр дејил (Мат. 12:25). Онларын бәд нијјәтләринин гурбаны олмамаг үчүн Павелин мәсләһәтинә риајәт етмәјимиз јахшы оларды: «Рәббин гулу исә тоггушмаја баш гошмамалы, амма һамы илә сакит рәфтар етмәли[дир]» (2 Тим. 2:24). Јадда сахла ки, «мүбаризәмиз ган вә әтә гаршы дејилдир... пис руһи гүввәләрә гаршыдыр». Бу мүбаризәдә галиб ҝәлмәк үчүн, ‘сүлһ Мүждәсини тәблиғ етмәк һазырлығы’ да дахил олмагла, руһани зиреһләри ҝејинмәлијик (Ефес. 6:12—18).
15. Јығынҹағын хариҹиндән бизә һүҹум едиләндә неҹә давранмалыјыг?
15 Јығынҹағын хариҹиндән Јеһованын дүшмәнләри Онун сүлһпәрвәр халгына амансызҹасына һүҹумлар едир. Бәзиләри Јеһованын Шаһидләринә бирбаша һүҹумлар едирләр. Диҝәрләри мәтбуат васитәсилә вә ја мәһкәмәләрдә бизә бөһтанлар атырлар. Иса давамчыларыны бунларын баш верәҹәјинә даир габагҹадан хәбәрдар етмишди (Мат. 5:11, 12). Бәс белә һалларда биз неҹә давранмалыјыг? Биз сөздә вә ја әмәлдә һеч вахт ‘пислик әвәзинә пислик етмәмәлијик’. (Ром. 12:17; 1 Петер 3:16 ајәсини оху.)
16, 17. Бир јығынҹаг һансы чәтин вәзијјәтлә үзләшди?
16 Шејтан бизи һансы сынаглара чәкир чәксин, ‘пислијә јахшылыгла галиб ҝәлмәклә’ ҝөзәл шаһидлик верә биләрик. Нүмунә үчүн Сакит океан адаларындан бириндә баш верән бир һадисәни нәзәрдән кечирәк. Јығынҹаг Хатирә Ҝеҹәсини гејд етмәк үчүн бир залы иҹарәјә ҝөтүрмүшдү. Бу һагда хәбәр тутан килсә рәһбәрлији килсә үзвләринә хидмәтләрини иҹра етмәк үчүн Хатирә Ҝеҹәсинин кечириләҹәји вахтда һәмин зала јығышмаларыны тапшырды. Лакин полис рәиси килсә рәһбәрлијинә билдирди ки, Јеһованын Шаһидләринин ҝөрүшү башлајана гәдәр залы бошалтсынлар. Буна бахмајараг, һәмин вахт зал килсә үзвләри илә долу иди вә онлар хидмәтләринә башладылар.
17 Полис зорла залы бошалтмаға һазырлашанда килсә сәдри ағсаггаллардан биринә јахынлашыб деди: «Сиз бу ахшам бу залда хүсуси мәрасим кечирмәји планлашдырырдыныз?» Гардаш она бурада Хатирә Ҝеҹәсини кечирмәк истәдикләрини дејәндә һәмин адам ҹаваб верди: «Доғрудан?! Мәним һеч хәбәрим јох иди!» Буну ешидән полис тәәҹҹүблә деди: «Ахы биз сәһәр бу һагда сизә хәбәр вермишдик!» Килсә хадими ағсаггала үз тутуб биҹ-биҹ ҝүлүмсәјәрәк деди: «Инди нә етмәк фикриндәсиниз? Зал адамларла долудур. Истәјирсиниз ки, полис бизи бурадан говсун?» О, биләрәкдән ишләри елә дүзүб-гошмушду ки, Јеһованын Шаһидләрини тәгибчиләр кими гәләмә версин. Гардашлар бу вәзијјәтдә өзләрини неҹә апардылар?
18. Гардашлар онлары өзләриндән чыхармаг ҹәһдләринә ујмајараг неҹә даврандылар вә бу, һансы бәһрәләри ҝәтирди?
18 Шаһидләр тәклиф етдиләр ки, әввәлҹә килсә үзвләри өз јарымсаатлыг хидмәтләрини кечирсин, сонра да онлар Хатирә Ҝеҹәсини гејд етсинләр. Килсә хидмәти узун чәкди, буна бахмајараг, онлар залы тәрк етдикдән сонра Хатирә Ҝеҹәси башланды. Нөвбәти ҝүн һакимијјәт даирәләри бу мәсәләни арашдырмаг үчүн рәсми иҹлас кечирди. Бүтүн фактлара бахылдыгдан сонра гәрара алынды ки, килсә рәһбәрлији проблемин сәбәбкарынын Јеһованын Шаһидләри јох, килсә сәдринин олдуғуну елан етсин. Һәмчинин мәмурлар белә мүрәккәб вәзијјәтдә сәбир нүмајиш етдирдикләри үчүн Јеһованын Шаһидләринә өз миннәтдарлыгларыны билдирдиләр. Гардашларын ‘һамы илә сүлһдә олмаг’ үчүн ҝөстәрдикләри сәј ҝөзәл бәһрәләр ҝәтирди.
19. Инсанларла сүлһ мүнасибәтини горујуб сахламагда бизә даһа нә көмәк едә биләр?
19 Башгалары илә сүлһ мүнасибәтләрини горујуб сахламағын диҝәр јолу нәвазишли данышыгдыр. Нөвбәти мәгаләдә биз нәвазишли данышығын нә олдуғуну, она неҹә јијәләнә вә истифадә едә биләҹәјимизи мүзакирә едәҹәјик.
[Һашијә]
a «Јанан көмүр» ифадәси гәдимдә метал әлдә етмәк үчүн алтындан вә үстүндән көмүр јығылараг филизин әридилмә үсулуна ишарә едир. Бизә гаршы пис мүнасибәт бәсләјәнләрлә јахшылыгла давранмағымызын сајәсиндә онларын бизә олан мүнасибәтини јумшалда вә јахшы кејфијјәтләрини үзә чыхара биләрик.
Изаһ едә биләрсинизми?
• Нәјә ҝөрә бу ҝүн инсанлар бу гәдәр гәзәблидирләр?
• Гәзәби ҹиловлајанда, јахуд ҹиловламајанда нә баш верә биләҹәјини һансы Мүгәддәс Китаб нүмунәләри ҝөстәрир?
• Һәмиманлымыз хәтримизә дәјәндә биз неҹә давранмалыјыг?
• Јығынҹағын хариҹиндән бизә һүҹумлар едиләндә неҹә реаксија ҝөстәрмәлијик?
[16-ҹы сәһифәдәки шәкил]
Шимеон вә Леви гисас алдыгдан сонра евә гајытдылар
[18-ҹи сәһифәдәки шәкил]
Хејирхаһлыг башгаларынын мүнасибәтини јумшалда биләр