Охуҹуларымыз сорушур...
Аллаһ һаггында өјрәнмәк үчүн һамыја ејни имкан вериләҹәкми?
▪ Бир дәфә Иса Мәсиһдән һансы әмрин ән бөјүк олдуғуну сорушурлар. «Аллаһын Јеһованы бүтүн үрәјинлә, бүтүн ҹанынла вә бүтүн ағлынла сев», — дејә о ҹаваб верир (Матта 22:37). Лакин Аллаһы севмәк үчүн инсан илк өнҹә Онун һаггында дәгиг билијә јијәләнмәлидир (Јәһја 17:3). Бәс бу билијә јијәләнмәк үчүн һамынын ејни имканы олаҹагмы?
Аллаһ һаггында билијин әсас мәнбәји Мүгәддәс Китабдыр (2 Тимотејә 3:16). Әксәр инсанлар бу китабы әлдә едә биләрләр. Бундан әлавә, Аллаһ һаггында билик алмаг үчүн, ола билсин, һәмин инсанлара дәфәләрлә Мүгәддәс Китабы өјрәнмәк тәклиф едилиб (Матта 28:19). Бәзиләри исә Аллаһ горхусу олан аиләдә тәрбијә олунуб вә онлара валидејнләри тәрәфиндән һәр ҝүн Аллаһ һаггында билик ашыланыб (Ганунун тәкрары 6:6, 7; Ефеслиләрә 6:4).
Амма башгалары исә һеч дә бу кими шәраитдә јашамырлар. Бәзиләри елә аиләләрдә бөјүјүб боја-баша чатыблар ки, орада зоракылыг ади һал олуб вә онлар валидејнләри тәрәфиндән мәһәббәт ҝөрмәјибләр (2 Тимотејә 3:1—5). Белә аиләләрдә бөјүјән инсанлара Аллаһын мәһәббәтли олдуғуна инанмаг чәтин олур. Бәзиләри савадсыз олдуглары үчүн Мүгәддәс Китабы охуја билмирләр. Диҝәрләри исә јалан тәлимләрин тәсири алтындадырлар вә јахуд Мүгәддәс Китаб һәгигәтинә нифрәт олунан аиләләрдә, әразиләрдә вә һәтта өлкәләрдә јашајырлар (2 Коринфлиләрә 4:4). Демәк олармы ки, белә вәзијјәтдә јашадыглары үчүн бу инсанларын Аллаһ һаггында билијә јијәләнмәк вә Ону севмәк имканы олмајаҹаг?
Үзләшдикләри чәтинликләрә ҝөрә инсанлара Аллаһы севмәјин вә Она итаәт етмәјин чәтин олаҹағыны Иса чох јахшы баша дүшүрдү (Матта 19:23, 24). Лакин о, шаҝирдләринин јадына салды ки, инсанын ҝөзүндә мүмкүн олмајан шејләр, «Аллаһ үчүн... мүмкүндүр» (Матта 19:25, 26).
Ҝәлин нөвбәти фактлары нәзәрдән кечирәк. Јеһова гајғы ҝөстәриб ки, Онун Кәламы олан Мүгәддәс Китаб бәшәр тарихи боју ән ҝениш јајылмыш китаб олсун. Бу китабда пејғәмбәрлик едилмишди ки, Аллаһ вә Онун јер үчүн олан нијјәти һаггында хош хәбәр «бүтүн јер үзүндә тәблиғ едиләҹәк» (Матта 24:14). Бизим ҝүнләрдә Јеһованын Шаһидләри бу хәбәри 230-дан чох өлкә вә әразидә тәблиғ едирләр вә тәхминән 500 дилдә Аллаһын Кәламына әсасланан әдәбијјат нәшр етдирирләр. Һәтта Мүгәддәс Китабы әлдә едә билмәјән инсанлар белә Аллаһын јаратдыгларыны мүшаһидә едәрәк һәгиги Аллаһ һаггында өјрәнә биләрләр (Ромалылара 1:20).
Бундан әлавә, Аллаһын Кәламында дејилир: «Рәбб бүтүн үрәкләри сынајыр вә ағылларын бүтүн истәкләрини билир. Әҝәр Ону ахтарсан, сән Ону тапаҹагсан» (1 Салнамәләр 28:9). Беләликлә, Ону танымаг үчүн һамыја ејни дәрәҹәдә имкан вериләҹәјинә Јеһова сөз вермир, лакин О, әмин едир ки, бу имкан бүтүн сәмими гәлбли инсанлара вериләҹәк. Һәтта һәјаты боју Онун һаггында һеч нә ешитмәјән инсанларын белә, јени дүнјада дирилдиләндә Аллаһ һаггында ешитмәк имканлары олаҹаг (Һәвариләрин ишләри 24:15).