Охуҹуларымыз сорушур...
Нәјә ҝөрә Һәвва илә данышмаг үчүн Шејтан иландан истифадә етди?
▪ Јәгин разылашаҹагсыныз ки, 8-ҹи сәһифәдә гејд олундуғу кими, Һәвва илә данышан иланын архасында дуран гүввә Шејтан иди. Мүгәддәс Китаб да елә буну өјрәдир. Лакин, ола билсин, сизи јенә дә бир суал дүшүндүрүр: «Нәјә ҝөрә белә ҝүҹлү руһани варлыг мәһз илан васитәсилә данышды?»
Мүгәддәс Китаб Шејтанын үсулларынын чох һијләҝәр олдуғуну ҝөстәрир вә бу һадисә буну бир даһа тәсдиг едир (Ефеслиләрә 6:11). Едендә баш вермиш һадисә даныша билән һејван һаггында нағыл дејил; инсанлары Аллаһдан узаглашдырмаг мәгсәдилә гурулмуш фәндләрин түкүрпәдиҹи нүмунәсидир. Нәјә ҝөрә белә демәк олар?
Шејтан өз шикарыны сечәркән чох еһтијатла вә диггәтлә давраныр. Һәвва каинатда шүурлу варлыглардан ән ҝәнҹи иди. Шејтан онун тәҹрүбәсизлијиндән истифадә едиб алдадараг ону тәләјә салды. Адәтән, чох еһтијатлы һејван олан иланын архасында ҝизләнмәклә Шејтан өз мәкрли вә чиркин нијјәтини өрт-басдыр етди (Јарадылыш 3:1). Һәмчинин ҝәлин ҝөрәк, Шејтан иланы данышырмыш кими ҝөстәрмәклә нәјә наил олду.
Биринҹиси, Шејтан бунунла Һәвванын диггәтини ҹәлб етмәјә мүвәффәг олду. Һәвва билирди ки, иланлар даныша билмир; бүтүн һејванларын, еләҹә дә иланын адыны, еһтимал ки, диггәтлә мүшаһидә етдикдән сонра онун әри гојмушду (Јарадылыш 2:19). Шүбһә јохдур ки, еһтијатлы олан бу һејваны Һәвва да мүшаһидә етмишди. Буна ҝөрә дә, Шејтанын бу һијләси онда ҝүҹлү мараг ојатды; онун диггәтини о бојда бағда гадаған олунмуш бир шејә јөнәлтди. Икинҹиси, әҝәр илан гадаған олунмуш ағаҹын будагларында ҝизләнмишдисә, Һәвва бундан һансы гәнаәтә ҝәлә биләрди? Бәлкә, Һәвва даныша билмәјән бу сүрүнән һејванын һәмин мејвәдән једијинә ҝөрә дил ачыб данышдығыны дүшүндү? О, дүшүнә биләрди ки, әҝәр бу мејвә илана данышмаг габилијјәти верибсә, ҝөр, онда мәним үчүн нәләр едә биләр?! Һәвванын нә фикирләшдијини вә иланын мејвәдән јејиб-јемәдијини дәгиг билмирик, лакин бир шеј данылмаздыр: илан Һәвваја мејвәдән јејәрсә, «Аллаһ кими» олаҹағыны дејәндә о, бу јалана инанмаға һазыр иди.
Шејтанын сөз сечими дә чох шејдән хәбәр верир. О, Һәвванын үрәјинә шүбһә тохумуну сәпмәклә билдирди ки, Аллаһ ондан нә исә јахшы бир шеј ҝизләдир вә лазымсыз јерә онун сәрбәстлијини мәһдудлашдырыр. Шејтанын гурдуғу фәндин уғурлу олмасы Һәвванын худбинлијинин малик олдуғу һәр шеји верән Аллаһа олан мәһәббәтини үстәләмәсиндән асылы иди (Јарадылыш 3:4, 5). Тәәссүф ки, Шејтанын ишләтдији фәнд баш тутду; нә Һәвва, нә дә Адәм үрәкләриндә Аллаһа гаршы лазыми мәһәббәт вә миннәтдарлыг инкишаф етдирмәмишдиләр. Шејтан ејнилә бу ҝүн дә инсанларда худбинлик јаратмагла вә она бәраәт газандырмагла мәшғул дејилми?
Бәс Шејтанын нијјәти һагда нә демәк олар? О, даһа сонра нә етмәк фикриндә иди? Еден бағында Шејтан өз шәхсијјәтини вә нијјәтләрини ҝизли сахламаға чалышырды. Лакин сонралар әслиндә ким олдуғуну ҝөстәрди. О, Иса Мәсиһи сынаға чәкәндә билирди ки, кимлијини ҝизләдә билмәјәҹәк. Буна ҝөрә дә Исаја ачыг-ајдын билдирди: «Диз чөкүб мәнә сәҹдә... [гыл]» (Матта 4:9). Ҝөрүнүр, Шејтан Јеһова Аллаһа ибадәт едилдији үчүн Она пахыллыг едир. О, бундан сонра әлиндән ҝәләни едәҹәк ки, инсанлары Аллаһа ибадәтдән дөндәрсин. Инсанларын Аллаһ гаршысында нөгсансызлығыны позмаг онун хошуна ҝәлир.
Мүгәддәс Китаб ҝөстәрир ки, Шејтан өз гурбанларыны мәһв етмәјә чалышыр. Анҹаг хошбәхтликдән, о, Һәвваны алдатдығы кими, бизи алдада билмәз, чүнки «биз онун фәндләриндән бихәбәр дејилик» (2 Коринфлиләрә 2:11).