Вадидә Аллаһын ады
САНКТ-МОРИС. Бу ад сәнә таныш ҝәлир? Бәлкә дә һә. Чүнки бу, Исвечрәнин Енгадин вадисиндә јерләшән дүнја шөһрәтли курорт зонасыдыр. Бу ҝөзәл, сәфалы ҝушә Исвечрәнин ҹәнуб-шәргиндә, Италија илә сәрһәдинин јахынлығында, бәјаз гарла өртүлмүш Алп дағларынын гојнунда јерләшир. Санкт-Морис инсанлары узун илләр бу вадијә ҹәлб едән јерләрдән јалныз биридир. Ҝөзохшајан тәбиәти, зәнҝин флора вә фаунасы илә Даһи Јараданымыз Јеһова Аллаһа иззәт ҝәтирән Исвечрәнин Милли Паркы да бурада јерләшир (Мәз. 148:7—10). Лакин тәк бу мәнзәрәли јерләр јох, 17-ҹи әсрин орталарына ҝедиб чыхан бир әнәнәнин изләри дә Аллаһы иззәтләндирир.
Бу вадидәки бир чох евләрин үзәриндә олан гејри-ади бир шеј инсанларын диггәтини өзүнә ҹәлб едир. Евләрин өн һиссәләриндә, мәсәлән, ҝириш гапыларынын үзәриндә Аллаһын адына раст ҝәлмәк олар. Өтән әсрләрдә евләрин чөл тәрәфини јазыларла бәзәмәк адәти варды. О дөврүн инсанлары бу јазылары сувағын үстүндә ҹызыр, дашларын үзәриндә ојур, јахуд да евләрин үстүндә боја илә јазырдылар. Бу шәкилдә Бевер кәндиндәки бир еви ҝөрмәк олар. Евин үзәриндәки јазы белә тәрҹүмә олунур: «1715-ҹи ил. Јеһова башланғыҹдыр вә Јеһова сондур. Һәр шејә Аллаһын көмәји илә наил олмаг олар, Онун көмәји олмадан бир шеј етмәк мүмкүн дејил». Ҝөрдүјүмүз кими, 18-ҹи әсрин әввәлләринә тәсадүф едән бу јазыда Аллаһын шәхси адына дүз ики дәфә раст ҝәлинир.
Икинҹи шәкилдә исә 17-ҹи әсринин орталарына аид олан јазы тәсвир олунуб. Мадулин кәндиндәки бир тикилинин үзәриндә нөвбәти сөзләр һәкк олунуб: «Мәзмур 127. Еви Јеһова тикмәзсә, иншаатчылар бош јерә чалышыр. Лукис Румадис. 1654-ҹү ил».
Нәјә ҝөрә инсанлар о вахтлар Аллаһын адыны евләринин үзәриндә јазырдылар? Реформасија дөврүндә Мүгәддәс Китаб Енгадин вадисинин сакинләринин данышдығы латын әсаслы ретороман дилинә тәрҹүмә олунмушду. Бу, һәмин дилә тәрҹүмә едилән илк китаб иди. Аллаһын Кәламындан охудуглары јерли сакинләрә о гәдәр бөјүк тәсир ҝөстәрмишди ки, онлар евләринин бајыр һиссәсиндә јалныз өз адларыны јох, Аллаһын ады јазылан Мүгәддәс Китаб ајәләрини дә һәкк едирдиләр.
О вахтдан бәри әсрләр өтсә дә, бу јазылар бу ҝүн дә Јеһованын адыны бәјан едир вә Она иззәт ҝәтирир. Туристләр вә јерли сакинләр ҝөзәл Аллаһ олан Јеһова барәдә даһа чох өјрәнмәк үчүн Онун адыны дашыјан диҝәр тикилијә — Бевәрдә јерләшән Јеһованын Шаһидләринин Падшаһлыг Залына баш чәкмәјә дәвәт олунурлар.
[7-ҹи сәһифәдәки шәкил. Иҹазә илә]
© Стäһли Ролф А/аҝе фотостоҹк