Јанлыш фикирләрлә өзүнү алдатма
«СӘН нијә белә етдин?» — дејә Аллаһ гадаған олунмуш ағаҹдан мејвә дәриб јејән Һәввадан сорушду. О ҹаваб верди: «Илан мәни јолдан чыхартды, мән дә једим» (Јар. 3:13). Һәвваны Аллаһын сөзүндән чыхмаға тәһрик едән һијләҝәрә сонрадан Мүгәддәс Китабда «бүтүн дүнјаны алдадан гәдим илан» ады верилди (Вәһј 12:9).
«Јарадылыш» китабында Шејтан еһтијатсызлары алдатмаға чалышан кәләкбаз вә фырылдагчы кими тәсвир олунур. Әфсуслар олсун ки, Һәвва Шејтанын јаланына ујду. Бунунла белә, биз фикирләшмәли дејилик ки, јалныз Шејтан бизи јолдан чыхара биләр. Мүгәддәс Китаб: «Јанлыш фикирләрә гапылыб өзүнүзү алдатмајын», — дејә бизи хәбәрдарлыг едир (Јаг. 1:22).
Кимәсә бу фикир ағласығмаз вә һәтта инанылмаз ҝәлә биләр. Амма унутмамалыјыг ки, Аллаһ һеч вахт әсассыз сөз сөјләмир. Бәс онда инсанын өзү-өзүнү алдатмасы неҹә мүмкүндүр? Һансы јанлыш фикирләр бизи јолдан чыхара биләр? Бир Мүгәддәс Китаб нүмунәси бу суаллара ҹаваб верир.
Өзләри-өзләрини алдаданлар
Ерамыздан әввәл 537-ҹи илдә фарс падшаһы Бөјүк Кир Бабилә сүрҝүн едилмиш јәһудиләрин Јерусәлимә гајыдыб мәбәди бәрпа етмәләри барәдә фәрман чыхартды (Езра 1:1, 2). Нөвбәти илдә, Јеһованын нијјәтинә ујғун олараг, халг јени мәбәдин бүнөврәсини гојду. Бу ваҹиб лајиһәнин илкин мәрһәләсинә Јеһова хејир-дуа вердији үчүн онлар чох севинирдиләр вә Она һәмд едирдиләр (Езра 3:8, 10, 11). Лакин тезликлә јәһудиләр мүгавимәтләрлә үзләшдиләр вә бу, онлары руһдан салды (Езра 4:4). Јәһудиләрин сүрҝүндән гајытмаларындан тәхминән 15 ил кечәндән сонра фарс һөкумәти Јерусәлимдә ҝедән бүтүн тикинти ишләринә гадаға гојду. Бу гадағаны һәјата кечирмәк үчүн вилајәт мәмурлары Јерусәлимә ҝәлиб јәһудиләрин «ишини зорла, ҝүҹлә дајандырдылар» (Езра 4:21—24).
Белә ҹидди манеәләрлә үзләшән јәһудиләр јанлыш фикирләрә гапылараг өзләри-өзләрини алдатмаға башладылар. Онлар белә дејирдиләр: «Һәлә Рәббин мәбәдини гурмаг вахты чатмајыб» (Һаг. 1:2). Башга сөзлә, онлар белә бир нәтиҹәјә ҝәлдиләр ки, Аллаһ мәбәдин тез тикилиб гуртармасыны истәмир. Аллаһын ирадәсини јеринә јетирмәк үчүн чыхыш јолу ахтармаг әвәзинә, јәһудиләр мүгәддәс ишләрини кәнара гојуб өзләри үчүн евләр тикмәјә башладылар. Аллаһын пејғәмбәри Һаггај онлара ачыг шәкилдә деди: «Бу мәбәд хараба галдығы һалда сизин үчүн дамы јарашыглы евләриниздә отурмаг вахтыдырмы?» (Һаг. 1:4).
Бу нүмунәдән биз нә өјрәнә биләрик? Әҝәр биз: «Јеһованын Өз нијјәтини јеринә јетирәҹәји вахта һәлә чох вар», — дејә өзүмүзү алдадсаг, онда руһани мәшғулијјәтләрин ваҹиблијини асанлыгла унудаҹағыг вә башымыз шәхси ишләримизә гарышаҹаг. Бир әјани нүмунәјә нәзәр салаг. Туталым, сиз евинизә гонаг дәвәт етмисиниз вә онлары ҝөзләдијиниз мүддәтдә евиниздә гызғын иш ҝедир: јемәк биширирсиниз, евләри јығышдырырсыныз вә саирә. Амма бирдән хәбәр ҝәлир ки, гонаглар бир аз ҝеҹикәҹәкләр. Бу заман нә едәҹәксиниз? Һазырлыг ишләрини дајандыраҹагсыныз?
Һаггај вә Зәкәријјә јәһудиләрә изаһ етдиләр ки, Јеһова һәлә дә онларын тәхирә салмадан мәбәди тикмәләрини истәјир. «Еј бүтүн өлкә халгы, гүввәтләнин вә ишләјин!» — дејә Һаггај онлары сәсләјирди (Һаг. 2:4). Јәһудиләр Јеһованын руһунун онлара дәстәк олаҹағына там әмин олараг ишләрини давам етдирмәли идиләр (Зәк. 4:6, 7). Бу нүмунә бизә Јеһованын ҝүнү илә әлагәдар сәһв нәтиҹәјә ҝәлмәјимизин гаршысыны ала биләрми? (1 Кор. 10:11).
Өзүн-өзүнү алдатма! Сағламдүшүнҹәли ол!
Һәвари Петер икинҹи мәктубунда Јеһованын «јени... ҝөј вә јени јер» һагда дедикләринин јеринә јетәҹәји вахт барәдә јазмышды (2 Пет. 3:13). О гејд етмишди ки, бәзи ришхәндчиләр Аллаһын инсанларын ишләринә мүдахилә едәҹәјини шүбһә алтына алаҹаглар. Бу ришхәндчиләр јанлыш олараг иддиа едәҹәкләр ки, һеч нә баш вермәјәҹәк, чүнки «һәр шеј јарадылышдан бәри олдуғу кими дурур» (2 Пет. 3:4). Һәвари Петер бу ҹүр јанлыш фикирләри тәкзиб едирди. О демишди: «Сизә мүәјјән шејләри хатырлатмаг мәгсәдилә зеһнинизи ојатмаға чалышырам». О, һәмиманлыларына билдирмишди ки, ришхәндчиләр чох јанылырлар. Ахы гәдимдә Аллаһ Үмумдүнја дашгыны ҝөндәрәрәк бәшәријјәтин ишләринә мүдахилә етмишди (2 Пет. 3:1, 5—7).
Бизим ерадан әввәл 520-ҹи илдә Һаггај руһдан дүшмүш гејри-фәал јәһудиләрә буна бәнзәр сөзләр сөјләмишди: «Һәјат јолларыныз һаггында јахшы дүшүнүн» (Һаг. 1:5). Һәмиманлыларынын зеһнини ојатмаг мәгсәдилә Һаггај онлара Аллаһын Өз халгы үчүн олан нијјәтини вә вәдләрини хатырлатды (Һаг. 1:8; 2:4, 5). Онун сөзләрини ешидән халг, рәсми гадағаја бахмајараг, тикинти ишләринә јенидән башлады. Дүшмәнләр јенә дә лајиһәни дајандырмаға ҹәһд ҝөстәрсәләр дә, бу дәфә бүтүн нијјәтләри пуча чыхды. Гадаға ҝөтүрүлдү вә јәһудиләр тәхминән беш илә мәбәдин тикинтисини баша вурдулар (Езра 6:14, 15; Һаг. 1:14, 15).
Һәјат јолларын һагда јахшы дүшүн
Һаггајын ҝүнләриндәки јәһудиләр кими, ола биләрми ки, чәтинликләрлә гаршылашанда биздә дә руһ дүшкүнлүјү јарансын? Әҝәр бу баш версә, онда хош хәбәри сәјлә тәблиғ етмәк бизим үчүн чәтин олаҹаг. Һәмчинин руһ дүшкүнлүјүнә бу дүнјадакы әдаләтсизлик уҹбатындан чәкдијимиз әзаб-әзијјәтләр сәбәб ола биләр. Ҝәлин Һабаггугун нөвбәти сөзләри үзәриндә дүшүнәк: «“Зоракылыг вар!” дејә Сәнә фәрјад едирәм, лакин бизи гуртармырсан» (Һаб. 1:2). Әтрафымыздакы бәзи инсанларын Јеһованын ҝүнүнүн ҝеҹикдијини дүшүндүјүнә ҝөрә мәсиһчи дә һансы вахтда јашадығыны унудуб өзү үчүн бу дүнјада раһат шәраит гурмаг фикринә дүшә биләр. Бу, сәнинлә дә баш верирми? Әҝәр биз бу ҹүр дүшүнүрүксә, онда өзүмүзү алдадырыг. Мүгәддәс Китабда мәсләһәт ҝөрүлдүјү кими, ‘һәјат јолларымыз һаггында јахшы дүшүнмәк’ вә ‘зеһнимизи ојатмаг’ олдугҹа ваҹибдир! Биз өзүмүздән сорушмалыјыг: «Бу пис системин фикирләшдијимдән даһа чох давам етдијинә ҝөрә тәәҹҹүбләнмәлијәм?»
Ҝөзләмәли олаҹағымыз габагҹадан дејилмишди
Исанын бу системин сону барәдә дедији сөзләрин үзәриндә дүшүнәк. «Маркын јаздығы Хош Хәбәр»дә Иса сон ҝүнләрлә бағлы сөјләдији пејғәмбәрликдә бизи дәфәләрлә ојаг дурмаға тәшвиг едир (Марк 13:33—37). Ејни хәбәрдарлығы «Вәһј» китабында да тапырыг. Орада Јеһованын бөјүк ҝүнү олан Һар-Маҝедон тәсвир едилир (Вәһј 16:14—16). Бу хәбәрдарлыг нәјә ҝөрә тәкрарланыр? Чүнки инсан һансыса һадисәни узун мүддәт ҝөзләмәли оланда онда асанлыгла архајынлыг һисси јарана биләр. Буна ҝөрә дә хатырлатмалара һәмишә еһтијаҹ вар.
Иса бу системин сонуну ҝөзләдијимиз мүддәтдә даима ајыг-сајыг олмағымызын ваҹиблијини еви јарылан ев саһибинин нүмунәси әсасында ҝөстәрмишди. Ев саһиби бу бәдбәхтчилијин гаршысыны неҹә ала биләрди? Бүтүн ҝеҹәни ојаг дурмагла. Иса өз нүмунәсинә белә бир мәсләһәтлә јекун вурду: «Һазыр олун, чүнки инсан Оғлу ҝөзләмәдијиниз саатда ҝәләҹәк» (Мат. 24:43, 44).
Нүмунәдән ајдын олур ки, узун мүддәт ҝөзләмәк лазым ҝәлсә белә, биз ҝөзләмәлијик. Бу пис системин дүшүндүјүмүздән даһа чох давам етдијинә ҝөрә һәддән артыг нараһат олмаг лазым дејил. «Јеһованын тәјин етдији вахта һәлә чох вар» кими јанлыш фикирләрлә өзүмүзү алдатмамалыјыг. Белә фикирләр Падшаһлыг һаггында хош хәбәри тәблиғ етмәк истәјимизи өлдүрәҹәк (Ром. 12:11).
Фикирләрини «алаг отларындан» тәмизлә
Галатијалылара 6:7 ајәсиндәки принсипи јанлыш дүшүнҹә тәрзинә дә тәтбиг етмәк олар: «Алданмајын... инсан нә әкәрсә, ону да бичәҹәк». Торпагда һеч нә әкмәјәндә ону алаг оту басыр. Ејнилә, әҝәр биз ‘зеһнимизи ојатмырыгса’, јанлыш фикирләр орада көк саласаг. Мәсәлән, биз өзүмүзә дејә биләрик: «Јеһованын ҝүнү һөкмән ҝәләҹәк, лакин инди јох». Әҝәр биз белә дүшүнсәк, онда ибадәтимизә бармагарасы бахаҹағыг, бир мүддәтдән сонра исә хидмәтимизә етинасыз јанашмаға башлајаҹағыг. Онда Јеһованын ҝүнү бизи гәфләтән јахалајаҹаг (2 Пет. 3:10).
Амма әҝәр биз даима «Аллаһын ирадәсинин фајдалы, хош вә камил олдуғуна» әмин олуругса, јанлыш фикирләр бејнимиздә көк салмајаҹаг (Ром. 12:2). Буна ҝөрә дә Аллаһын Кәламыны мүнтәзәм охумалыјыг. Орада јазыланлар Јеһованын мәһз тәјин етдији вахтда һәрәкәтә кечәҹәјинә даир әминлијимизи мөһкәмләндирәҹәк (Һаб. 2:3).
Арашдырмалар, дуалар, һәмчинин јығынҹаг ҝөрүшләриндә вә тәблиғ хидмәтиндә мүнтәзәм иштирак етмәјимиз, ејни заманда мәһәббәтдән доған хејирхаһ әмәлләримиз бизә «Јеһованын ҝүнүнү бәрк-бәрк јадда сахлајыб» ону ҝөзләмәјә көмәк едәҹәк (2 Пет. 3:11, 12). Бу саһәләрдә мүнтәзәм олмағымыз Јеһованын нәзәриндән јајынмајаҹаг. Һәвари Павел бизә хатырладыр: «Јахшылыг етмәкдән јорулмајаг, чүнки тагәтдән дүшмәсәк, вахтында бичәҹәјик» (Галат. 6:9).
Инди Јеһованын ҝүнүнүн ҝеҹикдијини дүшүнәрәк өзүмүзү алдатмағын вахты дејил. Әксинә, инди даһа да әзмли олмағын вахтыдыр, чүнки Јеһованын ҝүнү јахындыр!
[4-ҹү сәһифәдәки шәкил]
Һаггај вә Зәкәријјә јәһудиләри тикинти ишләрини давам етдирмәјә тәшвиг едирди
[5-ҹи сәһифәдәки шәкил]
Ев саһиби оғрунун ҝәләҹәјини габагҹадан билсәјди, нә едәрди?