Јадыныздадырмы?
«Ҝөзәтчи Гүлләси»нин сон сајлары хошунуза ҝәлдими? Елә исә ашағыдакы суаллара ҹаваб вермәјә чалышын.
• Еден бағынын, һәгигәтән дә, мөвҹуд олдуғуну нәјин әсасында демәк олар?
Мүгәддәс Китаб бу бағын һарада јерләшдијини тәфәррүаты илә тәсвир едәрәк онун ҝерчәк бир јер олдуғуну ҝөстәрир. Вахтилә орада ахан чајларын икиси индијә кими мөвҹуддур. Адәтән, нағылларда вә әфсанәләрдә белә тәфсилатлар олмур. Ән етибарлы Шаһид олан Иса Адәмлә Һәвва һагда реал инсанлар кими данышырды (јанвар—март, сәһифәләр 5, 6 вә 9).
• Аллаһ Адәмлә Һәвванын ҝүнаһ ишләдәҹәјини габагҹадан билирдими?
Хејр. Јеһова онлара шүур вә ирадә азадлығы вермишди. Буна ҝөрә дә Јеһова Она хидмәт едиб-етмәмәк сечимини онларын өһдәсинә бурахмышды. Јеһова ҝәләҹәји ҝөрмәк габилијјәтинә малик олса да, бу баҹарығындан сечиҹи шәкилдә истифадә едир (јанвар—март, сәһифәләр 13—15).
• Һәгиги мәсиһчиләр Аллаһын адындан талисман кими истифадә едирләрми?
Бәзи инсанлар мүәјјән әшја вә рәмзләрә онлары мөҹүзәли шәкилдә мүдафиә едән талисман кими јанашырлар. Лакин Аллаһын хидмәтчиләри Онун адыны талисман һесаб етмирләр. Әксинә, онлар Јеһоваја иман едир вә адына сығынараг ирадәсини јеринә јетирирләр (Сеф. 3:12, 13) (15.1, сәһифәләр 5, 6).
• Нәјә ҝөрә Јеһова Шаул падшаһы рәдд етди?
Шаул Аллаһын пејғәмбәри олан Шамуелин ҝәлиб гурбан ҝәтирмәсини ҝөзләмәли иди. Амма Шаул итаәтсизлик ҝөстәрәрәк бу иши өз үзәринә ҝөтүрдү. Бир гәдәр сонра исә о, Аллаһын дүшмән халгын көкүнү кәсмәк әмрини јеринә јетирмәди (15.2, сәһифәләр 22, 23).
• Ганунсузлуға нифрәт етдијимизи неҹә ҝөстәрә биләрик?
Спиртли ичкиләрдән суи-истифадә етмәмәклә, сеһирбазлыгдан узаг дурмагла вә Исанын әхлагсызлыға даир хәбәрдарлығына әмәл етмәклә. Мәсәлән, биз порнографијаја бахмајаҹағыг вә онун нәтиҹәси олан әхлагсыз фикирләрлә зеһнимизи ләкәләмәјәҹәјик (Мат. 5:27, 28). Үстәлик, јығынҹагдан кәнар едилән кәсләрлә үнсијјәт етмәјәҹәјик (15.2, сәһифәләр 29—32).
• Һансы мәнада Јеремја «сулар кәнарында әкилмиш ағаҹ кими» иди? (Јер. 17:7, 8).
О, һеч вахт бәһрә вермәкдән галмырды вә ришхәндчиләрин она тәсир етмәсинә јол вермирди. Әксинә, һәјатвериҹи ‘су’ Мәнбәји олан Јеһоваја јахын дурур вә Онун һәр сөзүнә ҹидди јанашырды (15.3, сәһифә 14).