Мән чохлу јахшы шејләр тапмышам

Нәгл етди Артур Боно

ҺӘЈАТ ЈОЛДАШЫМ Едит вә мән 1951-ҹи илдә кечирилән вилајәт конгресиндә оларкән миссионер хидмәти илә мараглананлар үчүн ҝөрүш барәдә елан сәсләнди. Мән һәјәҹанла Едитә дедим:

— Ҝәл ҝедәк гулаг асаг!

— Сән нә данышырсан? Биз һара, миссионер хидмәти һара?!

— Едит, ҝәл, биз садәҹә гулаг асаҹағыг.

Ҝөрүшдән сонра Ҝилеад Мәктәби үчүн әризә бланкы пајланды. Мән тәкидлә дедим:

— Ҝәл биз дә долдураг.

— Арт, бәс бизим аиләмиз?

О ҝөрүшдән ил јарым кечмәди ки, биз Ҝилеад Мәктәбинә дәвәт алдыг. Ону битирдикдән сонра бизи Ҹәнуби Америкада јерләшән Еквадора тәјин етдиләр.

Јухарыдакы сөһбәтимиздән, јәгин, ҝөрдүнүз ки, мән чох гәтијјәтли вә өзүнә инанан инсан идим. Едит исә мүлајим вә тәвазөкар иди. Онун ушаглығы Пенсилванија штатында (АБШ) јерләшән кичик Елизабет шәһәриндә кечмишди. Бу мүддәт әрзиндә о, јашадығы әразидән кәнара чыхмамышды вә әҹнәбиләрлә гаршылашмамышды. Буна ҝөрә дә аиләсини гојуб узаглара ҝетмәк онун үчүн чәтин иди. Буна бахмајараг, Едит хариҹдә хидмәт етмәк тәјинатыны ҹанла-башла гәбул етди. 1954-ҹү илдә биз миссионер кими Еквадора ҝәлдик вә индијә кими бу өлкәдә хидмәт едирик. Бу илләр әрзиндә биз чохлу јахшы шејләр тапмышыг. Онларын бәзиләрини сизинлә бөлүшмәк истәјәрдим.

Хош хатирәләр

Илк тәјинатымыз Анд дағларынын 2850 метр јүксәклијиндә јерләшән пајтахт шәһәр Кито иди. Еквадорун башга шәһәри олан Гуајакилдән ора чатмаг үчүн биз гатарла вә јүк машыны илә ики ҝүн јол ҝетмәли олдуг, һалбуки бу ҝүн һәмин мәсафәни тәјјарә илә 30 дәгигәјә гәт етмәк олар. Китода хидмәт етдијимиз дөрд ил, һәгигәтән дә, унудулмаз иди. Сонра, 1958-ҹи илдә һәјатымызда даһа бир јахшы шеј баш верди: биз сәјјар хидмәтинә башладыг.

О вахт өлкәдә јалныз ики балаҹа теократик рајон варды. Буна ҝөрә дә јығынҹаглара башчәкмәмиз битәндән сонра биз һәфтәләрлә Шаһидләрин олмадығы балаҹа һинду шәһәрләриндә тәблиғ едирдик. Онларын јашадығы евләр, адәтән, балаҹа, пәнҹәрәсиз вә ичиндә чарпајыдан башга һеч нә олмајан бир отагдан ибарәт иди. Биз өзүмүзлә тахта чамадан ҝәздирирдик. Чамаданын ичиндә балаҹа нефт собасы, тава, бошгаблар, ләјән, мәләфә, ағҹаганадлардан горунмаг үчүн тор, пал-палтар, көһнә гәзетләр вә башга әшјалар вар иди. Биз бу гәзетләрдән дивардакы дәликләри тутмаг үчүн истифадә едирдик ки, аз да олса сичовулларын ишини чәтинләшдирәк.

Јашадығымыз евләрдә шәраит олмаса да, о ҝүнләрлә бағлы бизим хош хатирәләримиз галыб. Ахшамлар чарпајыда отурараг нефт собасында биширдијимиз садә хөрәкләри јејә-јејә ширин сөһбәтләр едәрдик. Тәбиәтҹә чылғын олдуғум вә чох вахт дүшүнмәдән данышдығым үчүн Едит бу сакит анлардан истифадә едәрәк мәнә баш чәкдијимиз гардашларла неҹә даһа мүлајим сөһбәт едә биләҹәјими ҝөстәрирди. Мән онун дедикләринә гулаг асырдым вә бунун сајәсиндә башчәкмәләрим даһа руһландырыҹы олду. Һәмчинин мән киминсә барәсиндә пис данышмаға башлајанда Едит сөһбәти давам етдирмәк истәмәдијини дејирди. Бунун сајәсиндә диггәтими гардашларын јахшы хүсусијјәтләринә ҹәмләмәји өјрәндим. Амма биз, әсас етибарилә, «Ҝөзәтчи Гүлләси»ндән өјрәндикләримиз һагда данышырдыг вә ҝүн әрзиндә хидмәтдә баш верән һадисәләри бир-биримизлә бөлүшүрдүк. Бу һадисәләр, һәгигәтән дә, чох мараглы иди!

Карлосун сорағында

Еквадорун гәрбиндә јерләшән Хипихапа шәһәриндә бизә Мүгәддәс Китабла марагланан Карлос Мехија адлы бир нәфәрин адыны вердиләр. Лакин онун һарада јашадығы барәдә бизим һеч бир мәлуматымыз јох иди. Биз сәһәр тездән кирајәдә галдығымыз евдән чыхыб ону ахтармаға јолландыг. Билмирдик һара ҝедәк — ајағымыз һара, башымыз да ора. Ахшамдан лејсан јағдығы үчүн јоллар палчыг ичиндә иди. Буна ҝөрә дә биз палчыгла долу олан чохсајлы чухурларын јанындан еһтијатла кечмәли олурдуг. Мән габагда ҝедирдим, Едит исә архада ҝәлирди. Бирдән киминсә: «А-а-арт!» — дејә јазыг-јазыг мәни чағырдығыны ешитдим. Архаја чеврилиб ҝөрдүм ки, Едит дизинә гәдәр палчыға батыб. Мәнзәрә о гәдәр ҝүлмәли иди ки, әҝәр Едитин ҝөзләри долмасајды, мән ҝүлмәкдән өләрдим.

Едитә чухурдан чыхмаға көмәк етдим, амма ајаггабылары палчығын ичиндә галды. Бир оғлан вә бир гыз гырагда дуруб бизә бахырдылар. Мән онлара дедим: «Ајаггабылары палчығын ичиндән чыхартсаныз, сизә пул верәҹәјәм». Сөз ағзымдан чыхмамыш онлар ајаггабылары палчығын ичиндән чыхартдылар. Амма онлары тәмизләмәк лазым иди. Бүтүн бунлары ҝөрән ушагларын анасы бизи евинә дәвәт етди. О, Едитә ајагларыны јумаға көмәк етди, ушаглар исә бу арада ајаггабылары тәмизләјирдиләр. Ҝетмәјә һазырлашанда чох мараглы бир шеј баш верди. Мән о гадындан сорушдум: «Тәсадүфән, Карлос Мехијанын һарада јашадығыны билмирсиниз?» О, тәәҹҹүблә мәнә бахараг: «О ки мәним әримдир!» — деди. Бир мүддәт сонра Карлосла Мүгәддәс Китабы өјрәнмәјә башладыг вә нәтиҹәдә, бу аиләнин бүтүн үзвләри вәфтиз олдулар. Илләр кечди, Карлос, онун һәјат јолдашы вә ики ушағы хүсуси пионер кими хидмәт етмәјә башладылар.

Чәтинликләр вә гардашларын гонагпәрвәрлији

Сәјјар хидмәти заманы јолда чохлу чәтинликләрлә үзләширдик. Биз автобусла, гатарла, јүк машыны илә, ағаҹдан јонулмуш каное вә балаҹа тәјјарәләрлә сәјаһәт едирдик. Бир дәфә биз вилајәт нәзарәтчиси Ҹон Маклеһан вә онун һәјат јолдашы Дороти илә бирликдә Колумбија сәрһәди јахынлығында јерләшән кәндләрдә тәблиғ едирдик. Бу әразидә јашајан инсанларын әксәријјәти балыгчылыгла мәшғул иди. Салланма мүһәррики олан каное илә ҝедәркән дүз бизим јанымызда каное бојда көпәк балыгларынын үздүкләрини ҝөрдүк! Һәтта бизи мүшајиәт едән тәҹрүбәли дәнизчи белә бу көпәк балыгларынын өлчүсүнү ҝөрәндә горхуб тез каноенин истигамәтини саһилә тәрәф дәјишди.

Сәјјар хидмәтдә бир чох чәтинликләрлә гаршылашсаг да, Јеһоваја хидмәт етмәјә дәјәрди. Биз чох јахшы вә гонагпәрвәр гардашларла таныш олдуг. Чох вахт галдығымыз аиләләр ҝүндә үч дәфә јемәк јемәјимизә тәкид едирдиләр, һалбуки өзләри јалныз бир дәфә јејирдиләр. Јахуд өзләри јердә јатдыглары һалда, бизим јеримизи евләриндәки јеҝанә чарпајыда салырдылар. Едит тез-тез дејирди: «Бу әзиз баҹы-гардашларымыз мәнә әслиндә инсана һәјатда аз шејин лазым олдуғуну дәрк етмәјә көмәк етдиләр».

«Һансыса шәрәфли тапшырыгдан... имтина етмәк истәмирик»

1960-ҹы илдә бизимлә даһа бир јахшы шеј баш верди: бизи Гуајакилдә јерләшән филиалда хидмәт етмәјә дәвәт етдиләр. Мән орада инзибати ишләрлә мәшғул олурдум, Едит исә филиалын јахынлығында јерләшән јығынҹагла тәблиғ хидмәтиндә әмәкдашлыг едирди. Өзүмү һеч вахт офис ишчиси кими тәсәввүр етмәдијимдән бу иш үчүн јарарсыз олдуғуму дүшүнүрдүм. Анҹаг Ибраниләрә 13:21 ајәсиндә дејилдији кими, Аллаһ бизи һәр ҹүр јахшы шејлә тәҹһиз едир ки, Онун ирадәсини иҹра етмәк үчүн јарарлы олаг. Ики ил сонра мәни Бруклинә (Нју-Јорк) онајлыг Ҝилеад курсуну кечмәјә дәвәт етдиләр. О вахтлар аиләли баҹылар өз тәјинатларында галырдылар. Бруклиндән јолдашыма мәктуб ҝәлди. Орада она әринин онајлыг јохлуғуна һазыр олуб-олмадығыны ҹидди ҝөтүр-гој етмәк мәсләһәт ҝөрүлүрдү.

Едит мәктуба белә ҹаваб верди: «Билирәм ки, бу, мәним үчүн асан олмајаҹаг, анҹаг Јеһова јаранан һәр бир чәтинлијин өһдәсиндән ҝәлмәјә бизә мүтләг көмәк едәҹәк... Аллаһын бизә һәвалә етдији һансыса шәрәфли тапшырыгдан вә ја өз мәсулијјәтләримизи даһа јахшы иҹра етмәк үчүн бизә верилән тәлимдән имтина етмәк истәмирик». Бруклиндә олдуғум мүддәтдә јолдашымдан һәр һәфтә мәктуб алырдым.

Садиг һәмиманлыларымызла чијин-чијинә хидмәт едирик

1966-ҹы илдә сәһһәтимдә проблемләр јарандығы үчүн биз Китоја гајыдыб јенидән миссионер хидмәтинә башладыг. Орада јерли баҹы-гардашларла чијин-чијинә хидмәт едирдик. Онларын Јеһоваја неҹә садиг галдыгларыны ҝөрмәк чох хош иди!

Бир баҹынын мәсиһчи олмајан әри ону һәмишә дөјүрдү. Бир ҝүн сәһәр саат 6-да кимсә бизә зәнҝ вуруб әринин ону јенидән дөјдүјүнү хәбәр верди. Мән өзүмү дәрһал ора чатдырдым. Баҹыны ҝөрәндә ҝөзләримә инана билмәдим. О, чарпајыда узанмышды, һәр јери шишмишди вә ҝөмҝөј иди. Әри ону сүпүрҝәнин сапы илә елә бәрк вурмушду ки, сап ики јерә бөлүнмүшдү. Һәмин ҝүн баҹынын әрини ҝөрәндә она дедим ки, о, әсил горхаг кими давраныб. Әри һәддиндән артыг пешман олдуғуну сөјләди.

1970-ҹи илин әввәлләриндә сәһһәтим јахшылашды вә биз јенидән сәјјар хидмәтә башладыг. Хидмәт етдијимиз теократик рајона Ибарра шәһәри дә дахил иди. 1950-ҹи илләрин сонуна јахын бу шәһәрә баш чәкәндә орада јалныз ики Шаһид вар иди; онлардан бири миссионер, диҝәри исә јерли гардаш иди. Буна ҝөрә о јығынҹаға ҝәлән јени баҹы-гардашларла таныш олмаг арзусунда идик.

Јығынҹаға ҝәлдијимиз илк ҝүн Родриго Вака адлы бир гардаш чыхыш едирди вә онун чыхышына динләјиҹиләрин иштиракы да дахил иди. Гардаш һәр дәфә суал верәндә динләјиҹиләр әлләрини галдырмаг әвәзинә, уҹадан: «Мән, мән!» — дејирдиләр. Едитлә мән тәәҹҹүблә бир-биримизә бахырдыг. «Бурада нә баш верир?» — дејә өз-өзүмә фикирләширдим. Сонрадан бизә мәлум олду ки, сән демә, Вака гардаш кордур. Буна бахмајараг, о, јығынҹаг үзвләрини сәсләриндән таныјырды. Һәгигәтән дә, о, гузуларыны јахшы таныјан чобан иди! Бу заман Јәһја 10:3, 4, 14 ајәләри јадыма дүшдү. Орада Исанын бир-бирләрини чох ҝөзәл таныјан јахшы чобан вә гојунлардан бәһс олунур. Бу ҝүн Ибарра шәһәриндә алты испандилли, бир кечуадилли вә бир жестдилли јығынҹаг фәалијјәт ҝөстәрир. Вака гардаш бу ҝүнәдәк сәдагәтлә ағсаггал вә хүсуси пионер кими хидмәт едирa.

Јеһованын хејирхаһлығына ҝөрә миннәтдарам

1974-ҹү илдә Јеһованын башга бир хејирхаһлығыны да ҝөрдүк: бизи јенидән Бет-Елә чағырдылар. Илк әввәл инзибати ишләрлә мәшғул олурдум, сонра исә мәни филиалын комитәсиндә хидмәт етмәјә тәјин етдиләр. Едит әввәлҹә мәтбәхдә ишләјирди, сонра исә ону офис ишинә тәјин етдиләр вә индијә кими о, бурада чалышыр.

Бу илләр әрзиндә бизә Ҝилеад Мәктәбини битирмиш вә бу өлкәјә тәјин олунмуш јүзләрлә миссионерләри гаршыламаг севинҹи нәсиб олду. Бу јеткин вә хидмәтә ҹан јандыран баҹы-гардашларын әһвал-руһијјәси јерли јығынҹаглара сирајәт едирди. Һәмчинин 30-дан чох өлкәдән минләрлә баҹы-гардашларын Еквадора хидмәт етмәк үчүн ҝәлдијини ҝөрмәк дә бизи руһландырыр. Онларын фәдакарлыг руһу бизә чох бөјүк тәсир бағышлајыр. Тәблиғчиләрә еһтијаҹ олан әразиләрдә хидмәт етмәјә ҝәлмәк үчүн бәзиләри һәтта өз евләрини вә шәхси бизнесләрини сатмышдылар. Онлар өзләринә машын алыб узаг әразиләрдә хидмәт етмәјә ҝедирдиләр, јени јығынҹаглар тәсис етмәјә вә Падшаһлыг Заллары тикмәјә көмәк едирдиләр. Һәмчинин бурада пионер кими хидмәт етмәк үчүн хариҹи өлкәләрдән чохлу субај баҹылар ҝәлир. Онларын хидмәтдә ҝөстәрдикләри сәј вә баҹарыглары һејрәтамиздир!

Јеһоваја хидмәт етдијим бу илләр әрзиндә мән сөзүн әсил мәнасында бир чох јахшы шејләр тапмышам. Онларын арасында ән гијмәтлиси Јеһова илә мүнасибәтләримдир. Һәмчинин Јеһоваја миннәтдарам ки, мәнә Едит кими ҝөзәл «көмәкчи» бәхш едиб (Јар. 2:18). Бирҝә јашадығымыз 69 илә бојланыб баханда Сүлејманын мәсәлләри 18:22 («Китабы Мукаддес») ајәсиндә јазылан сөзләр јадыма дүшүр. Орада дејилир: «Јахшы арвад алан јахшылыг тапар». Едит кими инсанла өмүр-ҝүн јолдашы олмаг мәнә чох хошдур. О, мәнә һәр ишдә бөјүк дајаг олуб. Едит һәм дә анасына јахшы гыз олуб. Биз Еквадора ҝәлән андан та анасы 1990-ҹы илдә 97 јашында вәфат едәнә гәдәр Едит һәр һәфтә она мәктуб ҝөндәрирди.

Һал-һазырда мәним 90, Едитин исә 89 јашы вар. Биз чох шадыг ки, бу илләр әрзиндә тәхминән 70 нәфәрә Јеһова һагда өјрәнмәјә көмәк етмишик. Нә јахшы ки, 60 ил бундан әввәл Ҝилеад Мәктәбинә әризә јаздыг. Һәгигәтән дә, бу гәрар сајәсиндә һәјатымыз чохлу јахшы шејләрлә долу олуб!

[Һашијә]

[29-ҹу сәһифәдәки шәкил]

Нју-Јоркун Јанки стадионунда Ҝилеад Мәктәбиндә охудуғум миссионерләрлә бирҝә, 1958-ҹи ил

[31-ҹи сәһифәдәки шәкил]

Сәјјар хидмәтдә оларкән баш чәкдијим аилә, 1959-ҹу ил

[32-ҹи сәһифәдәки шәкил]

Еквадор филиалында, 2002-ҹи ил