Сән Аллаһын динҹлик ҝүнүнә јетишмисәнми?

«Аллаһын сөзү ҹанлы вә гүдрәтлидир» (ИБР. 4:12).

1. Биз бу ҝүн Аллаһын динҹлик ҝүнүнә неҹә јетишә биләрик? Нәјә ҝөрә Аллаһа итаәт етмәк бәзән чәтин олур?

ӘВВӘЛКИ мәгаләдән өјрәндик ки, Аллаһын динҹлик ҝүнүнә јетишмәк үчүн биз Она итаәт етмәли вә нијјәтинә ујғун давранмалыјыг. Буну демәк етмәкдән асандыр. Мәсәлән, бизим хошладығымыз шеји Јеһованын бәјәнмәдијини биләндә илк реаксијамыз буна гаршы чыхмаг ола биләр. Бу ону ҝөстәрир ки, Аллаһын сөзүнә дәрһал итаәт етмәк үчүн биз һәлә үзәримиздә ишләмәлијик (Јаг. 3:17). Һансы вәзијјәтләрдә үрәкдән итаәткарлыг ҝөстәрмәк бизим үчүн әсил сынаг ола биләр? Бу мәгаләдә биз бир нечә белә вәзијјәти арашдыраҹағыг.

2, 3. Јеһоваја бундан сонра да мәгбул олмаг үчүн биз нә илә мүбаризә апармалыјыг?

² Мүгәддәс Китабдан һәјатында дәјишиклик етмәли олдуғуну өјрәнәндә буна мүнасибәтин неҹә олур? Мүгәддәс Јазыларда дејилир ки, Аллаһ «бүтүн милләтләрин вар-дөвләти»ни, јәни ҹаһ-ҹалалыны јығмаг нијјәтиндәдир (Һаг. 2:7). Етираф етмәк лазымдыр ки, әксәријјәтимиз илк дәфә һәгигәти ешидәндә һеч дә ҝөзәл даш-гаша бәнзәмирдик. Лакин Аллаһа вә Онун севимли Оғлуна олан мәһәббәт бизи дүшүнҹә тәрзимиздә вә вәрдишләримиздә бөјүк дәјишикликләр етмәјә тәшвиг етмишди, чүнки биз Аллаһа мәгбул олмаг истәјирдик. Биз Јеһоваја чохлу дуа едирдик вә лазыми дәјишикликләр етмәк үчүн бөјүк сәј ҝөстәрирдик вә нәһајәт, өзүмүзү Јеһоваја һәср едиб вәфтиз олдуг. (Колослулара 1:9, 10 ајәләрини оху.)

³ Анҹаг вәфтиздән сонра гејри-камиллијимизә гаршы мүбаризә битмәди. Мүбаризәмиз һәлә дә давам едир вә нә гәдәр ки биз гејри-камилик, бу давам едәҹәк. Лакин Јеһова вәд едир ки, Она мәгбул олмаг уғрунда ҝедән мүбаризәни давам етдирсәк, бизә хејир-дуа верәҹәк.

Бизә мәсләһәт вериләндә

4. Јеһова сәһвимизи ҝөстәрмәк үчүн һансы үч үсулдан истифадә едә биләр?

⁴ Һансыса мәнфи ҹәһәтимизи дәјишмәздән өнҹә ону мүәјјән етмәлијик. Падшаһлыг Залында ешитдијимиз бир мәрузә вә ја нәшрләримиздә охудуғумуз һансыса мәгалә ҹидди сәһвләримизи ҝөрмәјә көмәк едә биләр. Лакин бәзән бунлардан сонра да биз һансыса дәјишиклик етмәли олдуғумузу баша дүшмәјә биләрик. Буна ҝөрә дә Јеһова сәһвләримизи бизә ҝөстәрмәк үчүн баҹы-гардашларымыздан истифадә едә биләр. (Галатијалылара 6:1 ајәсини оху.)

5. Кимсә бизә дүзәлиш верәндә биз бәзән неҹә реаксија ҝөстәририк? Нәјә ҝөрә ағсаггаллар һеч нәјә бахмајараг, бизә көмәк етмәлидирләр?

⁵ Мәсләһәт нә гәдәр мүлајим вә нәзакәтли шәкилдә верилсә дә, гејри-камил инсандан ону гәбул етмәк асан дејил. Бунунла белә, Галатијалылара 6:1 ајәсиндә Јеһова руһән јеткин хидмәтчиләринә әмр едир ки, бизә «мүлајимҹәсинә» дүзәлиш вермәјә чалышсынлар. Әҝәр биз мәсләһәти гәбул едириксә, Аллаһын ҝөзүндә даһа мәгбул олаҹағыг. Мараглыдыр, биз дуа едәндә гејри-камил олдуғумузу ачыг етираф едирик. Лакин кимсә ҝәлиб конкрет сәһвимизи бизә дејәндә дәрһал өзүмүзә бәраәт газандырмаға, проблемин бир о гәдәр дә ҹидди олмадығыны демәјә, мәсләһәт верәнин нијјәтини шүбһә алтына алмаға вә ја мәсләһәтин верилмә тәрзиндән наразычылыг етмәјә башлајырыг (2 Пад. 5:11). Үстәлик, мәсләһәт бизим үчүн һәссас олан саһәләрә аид вериләндә, мәсәлән, аилә үзвләримизин һәрәкәтләри, ҝејим вә хариҹи ҝөрүнүш, шәхси ҝиҝијена, јахуд да бизим севдијимиз, Јеһованын исә нифрәт етдији әјләнҹә барәдә оланда биз сәрт реаксија ҝөстәрә биләрик. Белә етмәклә һәм өзүмүзү, һәм дә мәсләһәт верәни пис вәзијјәтдә гојмуш олуруг. Һирсимиз сојујанда исә, адәтән, мәсләһәтин јериндә олдуғу илә разылашырыг.

6. Аллаһын сөзү «үрәјин дүшүнҹә вә нијјәтләрини» неҹә «үзә чыхарыр»?

⁶ Бу мәгаләнин әсас ајәсиндә дејилир ки, Аллаһын сөзү «гүдрәтлидир». Бәли, Мүгәддәс Китабда гәләмә алынан Аллаһын сөзләри инсан һәјатыны дәјишмәјә гадирдир. Мүгәддәс Китаб вәфтиздән әввәл бизә лазыми дәјишикликләр етмәјә көмәк етдији кими, вәфтиздән сонра да көмәк едә биләр. Павел ибрани мәсиһчиләрә һәмчинин јазмышды: «Аллаһын сөзү... о гәдәр дәринә ишләјир ки, бәдәнлә руһу, ојнагларла илији бир-бириндән ајырыр, үрәјин дүшүнҹә вә нијјәтләрини үзә чыхарыр» (Ибр. 4:12). «Бәдән» башгаларынын бизи неҹә инсан кими таныдығыны, «руһ» исә дахилән неҹә инсан олдуғумузу тәмсил едир. Беләликлә, Павел демәк истәјирди ки, Мүгәддәс Китабдан Аллаһын биздән нә тәләб етдијини баша дүшәндә һәрәкәтләримиз әслиндә неҹә инсан олдуғумузу үзә чыхарыр. Башгаларынын бизи неҹә инсан кими танымасы илә дахилән неҹә инсан олдуғумуз арасында бәзән фәрг олурму? (Матта 23:27, 28 ајәләрини оху.) Нөвбәти абзасларда арашдыраҹағымыз вәзијјәтләрдә сән неҹә давранаҹагсан? Бунун үзәриндә фикирләш.

Јеһованын тәшкилаты илә ајаглаш

7, 8. а) Нәјә ҝөрә бәзи ибрани мәсиһчиләр Мусанын мүәјјән ганунларына риајәт етмәјә давам едирдиләр? б) Нәјә әсасән дејә биләрик ки, онлар Аллаһын әмрләринә зидд давранырдылар?

⁷ Чохларымыз Сүлејманын мәсәлләри 4:18 ајәсиндә јазылан сөзләри әзбәр билирик: «Салеһләрин јолу... дан јери тәк шәфәг сачар, нуруну артырараг ҝүндүзә говушар». Бу о демәкдир ки, вахт кечдикҹә биз Аллаһын нијјәтини даһа јахшы баша дүшәҹәјик вә давранышымыз ҝетдикҹә јахшылашаҹаг.

⁸ Бир чох ибрани мәсиһчиләр Исанын өлүмүндән сонра да Мусанын Ганунуна риајәт едилмәсинин тәрәфдары иди (Һәв. иш. 21:20). Павел Аллаһдан илһам алараг мәсиһчиләрин артыг Мусанын Ганунунун алтында олмадыгларыны әтрафлы вә ајдын шәкилдә изаһ етсә дә, бәзиләри Јеһованын тәләбләрини гәбул етмирдиләр (Колос. 2:13—15). Ола билсин, онлар дүшүнүрдүләр ки, һеч олмаса Мусанын бәзи ганунларына риајәт етсәләр, јәһуди дининин тәрәфдарларынын тәгибләриндән гачаҹаглар. Анҹаг Павел онлара гәти шәкилдә билдирди ки, әҝәр Аллаһын јени әмринә зидд давранмаға давам етсәләр, Онун динҹлик ҝүнүнә јетишмәјәҹәкләрa. (Ибр. 4:1, 2, 6; Ибраниләрә 4:11 ајәсини оху.) Аллаһын рәғбәтини итирмәмәк үчүн онлар Јеһованын Өз халгыны башга истигамәтдә апардығыны гәбул етмәли идиләр.

9. Садиг вә ағыллы нөкәр Мүгәддәс Китабын һансыса тәлимини дәгигләшдирәрәк јени шәкилдә тәгдим едәндә биз буна неҹә мүнасибәт ҝөстәрмәлијик?

⁹ Бизим ҝүнләрдә бәзи Мүгәддәс Китаб тәлимләри дәгигләшдириләрәк јени шәкилдә тәгдим олунуб. Бу дәјишикликләр бизи нараһат етмәмәлидир, әксинә, онлар садиг вә ағыллы нөкәрә олан етибарымызы мөһкәмләндирмәлидир. Садиг вә ағыллы нөкәри тәмсил едән Рәһбәрлик Шурасы бәзән мүәјјән һәгигәтләрә јенидән нәзәр салыр. Бу гардашлар ҝөрәндә ки, һансыса тәлими дәгигләшдирмәк вә ја ону башга ҹүр изаһ етмәк лазымдыр, буну етмәкдән чәкинмирләр. Рәһбәрлик Шурасы баша дүшүр ки, бәзиләри онлары тәнгид атәшинә тутаҹаглар. Лакин онлар Аллаһын нијјәтилә ајаглашмағы өзләрини тәнгид атәшиндән горумагдан даһа ваҹиб һесаб едирләр. Бәс һансыса тәлим дәгигләшдириләндә сән буна неҹә мүнасибәт ҝөстәрирсән? (Лука 5:39 ајәсини оху.)

10, 11. Бәзи Мүгәддәс Китаб Тәдгигатчылары башга ҹүр тәблиғ етмәли олдугларыны өјрәнәндә нә етдиләр вә бу нүмунәдән һансы ибрәт дәрси ҝөтүрүрүк?

¹⁰ Ҝәлин инди башга нүмунәјә бахаг. Тәхминән јүз ил бундан әввәл јахшы натиг олан бәзи Мүгәддәс Китаб Тәдгигатчылары дүшүнүрдүләр ки, мәрузәләрлә чыхыш етмәк онлар үчүн тәблиғ етмәјин ән јахшы үсулудур. Чохлу инсан гаршысында нитг сөјләмәк вә инсанлардан тәриф сөзләри ешитмәк онларын хошуна ҝәлирди. Амма сонра Аллаһын халгы баша дүшдү ки, Јеһова онларын евдән-евә вә диҝәр үсулларла тәблиғ етмәләрини истәјир. Тәҹрүбәли натигләрдән бәзиләри бу дәјишиклији гәти шәкилдә рәдд етдиләр. Чыхышларында онлар Јеһованы севән вә Она итаәт едән инсанлар кими ҝөрүнсәләр дә, бу вәзијјәтдә онларын әсил фикирләри вә нијјәтләри үзә чыхды. Биз билирик ки, Јеһова онларын һәрәкәтини бәјәнмәди. Бу инсанлар Јеһованын тәшкилатыны тәрк етдиләр (Мат. 10:1—6; Һәв. иш. 5:42; 20:20).

¹¹ Амма демәк олмаз ки, Јеһованын тәшкилатына садиг галанларын һамысына евдән-евә тәблиғ етмәк асан иди. Хүсусилә дә әввәл-әввәл бу, чохларына чәтин ҝәлирди. Лакин онлар итаәткарлыг ҝөстәрдиләр вә бир вахтдан сонра горхуларынын өһдәсиндән ҝәлдиләр. Јеһова да онлара бол-бол хејир-дуа верди. Садиг вә ағыллы нөкәр әввәлләр һеч вахт иштирак етмәдијин тәблиғ нөвүндә иштирак етмәјә тәшвиг едәндә сән неҹә давранырсан? Чәтин олмасына бахмајараг, итаәткарлыг ҝөстәрирсән?

Севдијимиз инсан Јеһованы тәрк едәндә

12, 13. а) Нәјә ҝөрә Јеһова төвбә етмәјән ҝүнаһкарлары јығынҹагдан кәнар етмәји әмр едир? б) Бәзи мәсиһчи валидејнләр һансы сынагла гаршылашырлар вә онларын вәзијјәтини нә чәтинләшдирә биләр?

¹² Һамымыз билирик ки, Јеһоваја мәгбул олмаг үчүн физики, әхлаги вә руһани ҹәһәтдән тәмиз олмалыјыг. (Титус 2:14 ајәсини оху.) Анҹаг бәзән бу әмрә табе олмаг бизә әзаб верә биләр. Ҝәлин бир нүмунәјә нәзәр салаг. Туталым, нүмунәви мәсиһчи әр-арвадын јеҝанә оғлу һәгигәтдән ҝедир; о, ҝүнаһдан мүвәггәти һәзз алмағы Јеһовадан вә валидејнләриндән үстүн тутур вә јығынҹагдан кәнар едилир (Ибр. 11:25).

¹³ Валидејнләр дәрддән өзләринә јер тапмырлар. Әлбәттә, онлар Мүгәддәс Китабда јығынҹагдан кәнар едилән инсан барәдә нә дејилдијини јахшы билирләр: «Өзүнү гардаш адландырыб әхлагсызлыг едән, аҹҝөз, бүтпәрәст, налајиг сөз данышан, ички дүшкүнү вә ја сојғунчулуг едәнлә отуруб-дурмајасыныз, беләси илә һәтта бир сүфрәјә дә әјләшмәјәсиниз» (1 Кор. 5:11, 13). Онлар баша дүшүрләр ки, «өзүнү гардаш адландыран» ифадәси онларла бир евдә јашамајан аилә үзвләринә дә аиддир. Лакин онлар өвладларыны чох севдикләри үчүн белә фикирләшә биләрләр: «Әҝәр оғлумузла үнсијјәти бу дәрәҹәдә мәһдудлашдырсаг, она Јеһоваја дөнмәјә неҹә көмәк едә биләрик? Ҝәрәк онунла баҹардығымыз гәдәр чох үнсијјәтдә олаг»b.

14, 15. Јығынҹагдан кәнар едилмиш ушаглары илә сөһбәт едиб-етмәмәк гәрарыны гәбул етмәк зәрурәти јарананда валидејнләр нәји јадда сахламалыдырлар?

¹⁴ Биз бу ҹүр бәдбәхтлик үз верән валидејнләрин дәрдинә шәрикик. Онларын оғлунун сечим етмәк имканы вар иди. Анҹаг о, валидејнләринә вә јығынҹаға јох, пис һәјат тәрзи сүрмәјә үстүнлүк верди. Валидејнләр оғулларына көмәк етмәк истәјирләр, лакин онун гәрарына тәсир едә билмирләр. Онларын өзләрини аҹиз һисс етмәләри тәәҹҹүблү дејил.

¹⁵ Белә вәзијјәтдә олан валидејнләр нә едәҹәкләр? Онлар Јеһованын ајдын ҝөстәришинә табе олаҹаглар? Дүздүр, надир һалларда ваҹиб аиләви мәсәләләрлә әлагәдар јығынҹагдан кәнар едилән оғуллары илә сөһбәт етмәк зәрурәти јарана биләр. Анҹаг онлар оғуллары илә сөһбәт етмәк үчүн ваҹиб сәбәбләрин чох олдуғуну дүшүнәҹәкләр? Онлар гәрар гәбул едәркән Јеһованын бу барәдә нә фикирләшдијини јадда сахламалыдырлар. Јеһованын мәгсәди јығынҹағын тәмизлијини горумаг вә әҝәр мүмкүндүрсә, ҝүнаһ ишләдән инсаны пис әмәлиндән дөнмәјә тәшвиг етмәкдир. Мәсиһчи валидејнләр неҹә ҝөстәрә биләрләр ки, онлар да Јеһованын истәдијини истәјирләр?

16, 17. Һарунун нүмунәсиндән биз нә өјрәнирик?

¹⁶ Бир дәфә Мусанын гардашы Һарун чох чәтин вәзијјәтә дүшмүшдү. Јеһова онун оғуллары Надав вә Авиһуну Һүзур чадырында һарам од ҝәтирдикләри үчүн өлдүрдү. Бу заман онун һансы һиссләр кечирдијини тәсәввүр едирсиниз? Һарунун оғуллары илә артыг сөһбәт етмәк имканы јох иди. Һарунун вә аиләсинин вәзијјәтини чәтинләшдирән даһа бир амил вар иди. Јеһова Муса васитәсилә она вә онун садиг оғулларына әмр етмишди: «Сиз јас тутараг сачларынызы дағытмајын, [кәдәрдән] ҝејимләринизи ҹырмајын. Јохса өләрсиниз вә Рәбб бүтүн иҹмаја гәзәбләнәр» (Лев. 10:1—6). Бу нүмунәдән алаҹағымыз дәрс ајдындыр: биз Јеһованы Она садиг олмајан аилә үзвләримиздән даһа чох севмәлијик.

¹⁷ Бизим ҝүнләрдә Јеһова Онун ганунларыны позан инсанлары дәрһал өлдүрмүр. Јеһова мәһәббәтдән ирәли ҝәләрәк онлара пис әмәлләриндән төвбә етмәк имканы верир. Әҝәр валидејнләр јығынҹагдан кәнар едилмиш оғул вә ја гызлары илә үнсијјәт етмәк үчүн мүхтәлиф бәһанәләр ахтарырларса вә бунунла Јеһованы сынајырларса, О, һансы һиссләри кечирир?

18, 19. Јығынҹагдан кәнар едилмиш шәхсин аилә үзвләринин Јеһованын бунунла әлагәдар гојдуғу гануна сәдагәтлә әмәл етмәләри һансы хејир-дуалары ҝәтирә биләр?

¹⁸ Чохлары етираф едир ки, достларынын вә аилә үзвләринин Јеһованын ганунуна гәти шәкилдә риајәт етмәләри вә онларла үнсијјәти кәсмәләри јенидән јығынҹаға гајытмаларына көмәк етмишди. Мәсәлән, јығынҹагдан кәнар едилмиш бир ҝәнҹ гадынын бәрпа едилмәсини төвсијә едән ағсаггаллар јазыр ки, һәјатында дәјишикликләр етмәсиндә «доғма гардашынын бу тәдбирә һөрмәтлә јанашмасынын ролу олуб». Онун сөзләринә ҝөрә, «гардашынын Јеһованын әмринә садиг галмасы онда јенидән јығынҹаға дөнмәк һәвәси ојатмышды».

¹⁹ Бундан биз өјрәнирик ки, гејри-камил үрәјимизин Мүгәддәс Китаб мәсләһәтинә гаршы чыхмаг мејили илә мүбаризә апармалыјыг. Биздә зәррә гәдәр дә шүбһә олмамалыдыр ки, Јеһова һәмишә проблемләри һәлл етмәјин ән јахшы үсулуну ҝөстәрир.

«Аллаһын сөзү ҹанлы»дыр

20. Ибраниләрә 4:12 ајәсини нәјә аид етмәк олар? (Һашијәјә бах.)

²⁰ Павел «Аллаһын сөзү ҹанлы»дыр дејәндә Мүгәддәс Китабы нәзәрдә тутмурдуc. Контекстдән ҝөрүндүјү кими, о, Аллаһын вәдини, јәни вердији сөзү нәзәрдә тутурду. Павел демәк истәјирди ки, Аллаһ һеч вахт бош јерә сөз вермир. Јеһова һәмишә Өз вәдләрини јеринә јетирдијини Јешаја пејғәмбәрин васитәсилә демишди: «Ағзымдан чыхан кәлмә... бош јерә јаныма гајытмаз... ону ҝөндәрдијим иш иҹра олунсун дејә һәјата кечирәр» (Јешаја 55:11). Аллаһ Өз вәдләрини истәдијимиз вахтда јеринә јетирмәјәндә сәбирли олмалыјыг. Биз әмин ола биләрик ки, Јеһова һал-һазырда Өз нијјәтини мүвәффәгијјәтлә јеринә јетирмәјин үзәриндә чалышыр (Јәһ. 5:17).

21. Ибраниләрә 4:12 ајәси Јеһованын јашлы хидмәтчиләрини неҹә руһландырыр?

²¹ «Бөјүк... издиһам»ын јашлы үзвләри узун илләрдир ки, Јеһоваја сәдагәтлә хидмәт едирләр (Вәһј 7:9). Онлар үмид едирдиләр ки, бу пис системдә гоҹалмајаҹаглар. Лакин онлар руһдан дүшмүрләр (Мәз. 92:14). Бу баҹы-гардашлар билирләр ки, Аллаһын сөзү ҹанлыдыр вә О, Өз вәдини јеринә јетирмәјин үзәриндә ишләјир. Аллаһын вәди Онун үчүн чох ваҹибдир вә әҝәр бу, бизим үчүн дә ваҹиб олса, О севинәҹәк. Динҹлик ҝүнүндә, јәни једдинҹи ҝүн әрзиндә Јеһоваја Өз вәдләрини һәјата кечирмәјә һеч нә мане олмајаҹаг. Јеһова билир ки, халгы, бир груп кими, нијјәтини һәјата кечирмәкдә Онунла әмәкдашлыг едәҹәк. Бәс сәнин барәндә нә демәк олар? Сән Аллаһын динҹлик ҝүнүнә јетишмисән?

[Һашијә]

Мәгаләнин мәгсәдини унутма

• Биз бу ҝүн Аллаһын динҹлик ҝүнүнә неҹә јетишә биләрик?

• Мүгәддәс Китабдан Аллаһын биздән нә тәләб етдијини баша дүшәндә Ону разы салмаг истәдијимизи неҹә ҝөстәрә биләрик?

• Һансы вәзијјәтләрдә Јеһованын әмрләринә табе олмаг бизим үчүн чәтин ола биләр? Анҹаг нәјә ҝөрә Аллаһа итаәт етмәк чох ваҹибдир?

• Ибраниләрә 4:12 ајәсини нәјә аид етмәк олар?

[31 сәһифәдәки шәкил]

Валидејнләр дәрддән өзләринә јер тапмырлар