Хаинлик — бизим ҝүнләрин дәһшәтли әламәти
«Бизләр... неҹә сәдагәтли, салеһ вә гүсурсуз һәјат сүрмүшүк» (1 САЛОН. 2:10).
ӘСАС ФИКИРЛӘРИ ТАПЫН
Хаин чыхан Делила, Авшалом вә Јәһуда Искариотун нүмунәләриндән нә өјрәндик?
Биз Јонатан вә Петер кими неҹә садиг ола биләрик?
Һәјат јолдашымыза вә Јеһоваја неҹә садиг гала биләрик?
1-3. а) Ахыр ҝүнләрин дәһшәтли әламәтләриндән бири һансыдыр? Хаинлик вә ја сатгынлыг нәдир? б) Һансы үч суалын ҹавабыны тапаҹағыг?
ДЕЛИЛА, Авшалом вә Јәһуда Искариотун арасында һансы охшар ҹәһәт вар? Онларын үчү дә хаин чыхды — Делила ону севән һаким Шимшона, Авшалом атасы падшаһ Давуда, Јәһуда исә Ағасы Иса Мәсиһә. Онларын бу пис һәрәкәти башгаларына чохлу әзаб вермиш вә зијан вурмушду! Бәс нәјә ҝөрә бу, бизи марагландырмалыдыр?
2 Мүасир јазычылардан бири хаинлији ән чох јајылан писликләрдән бири адландырыр. Бу һеч дә тәәҹҹүблү дејил! Иса «дөврүн јекунунун әламәти» барәдә данышанда чохларынын сатгын олаҹағыны демишди (Мат. 24:3, 10). «Хаинлик» сөзү кимисә «сатмаг», «дүшмәнә тәслим етмәк» мәнасыны верир. Хаинлијин бу дәрәҹәдә вүсәт алмасы бизим «ахыр ҝүнләрдә» јашадығымыза дәлаләт едир. Павел буну пејғәмбәрлик едәрәк инсанларын «вәфасыз,.. хаин» олаҹағыны јазмышды (2 Тим. 3:1, 2, 4). Китабларда вә филмләрдә јазычылар вә киноссенаричиләр хаинлији чох вахт романтикләшдирирләр вә ону јахшы бир шеј кими гәләмә верирләр. Анҹаг реал һәјатда хаинлик, хәјанәт ағры-аҹыдан вә әзабдан башга инсана һеч нә вермир. Һәгигәтән дә, бүтүн бунлар бизим сон ҝүнләрдә јашадығымыза бир сүбутдур!
3 Мүгәддәс Китабда гејд олунан хаин инсанларын нүмунәләриндән нә өјрәнмәк олар? Һансы садиг инсанларын нүмунәсини тәглид едә биләрик? Вә кимә гејд-шәртсиз садиг галмалыјыг? Ҝәлин бир-бир бу суаллары арашдыраг.
КЕЧМИШДӘ ХАИН ЧЫХАН ИНСАНЛАРЫН НҮМУНӘСИ
4. Делила Шимшона неҹә хаин чыхды вә нәјә ҝөрә бу, алчаг һәрәкәт иди?
4 Әввәлҹә ҝәлин һаким Шимшонун севдији һијләҝәр гадын Делиланын нүмунәсинә нәзәр салаг. Шимшон Аллаһын халгы наминә филиштлиләрлә вурушмаг нијјәтиндә иди. Ҝөрүнүр, филиштлиләрин ағаларындан беш нәфәр Делиланын Шимшону үрәкдән севмәдијини билирди. Онлар Шимшону арадан ҝөтүрмәк үчүн онун гејри-ади ҝүҹүнүн сиррини өјрәнмәк мүгабилиндә Делилаја бөјүк мәбләғдә рүшвәт тәклиф етдиләр. Пулҝир Делила онларын тәклифини гәбул етди. Лакин Шимшонун сиррини өјрәнмәк ҹәһди дүз үч дәфә боша чыхды. О, Шимшону дилә тутараг «һәр ҝүн она әзијјәт вә башағрысы» верирди. Сонда «Шимшонун ҹаны боғазына јығылды» вә о, сиррини ачды. Шимшон Делилаја деди ки, доғуландан бәри башына үлҝүҹ дәјмәјиб вә әҝәр сачы кәсиләрсә, ҝүҹүнү итирәҹәкa. Делила Шимшону дизләри үстүндә јатыздырыб сачларыны кәсдиртди вә ону дүшмәнләрин әлинә тәслим етди ки, онунла истәдикләрини етсинләр (Һак. 16:4, 5, 15—21). Пула ҝөрә Делила ону севән инсаны сатды. Бу неҹә дә алчаг һәрәкәт иди!
5. а) Авшалом Давуда неҹә хаинлик етди вә о, бунунла нәји ҝөстәрди? б) Ахитофелин сатгын чыхмасы Давуда неҹә тәсир етди?
5 Хаинлик едәнләрин сијаһысында мәкрли Авшаломун да ады вар. О, үрәјиндә баш галдыран шөһрәтпәрәстлик руһуна гапылараг атасы Давудун тахт-таҹыны әлә кечирмәк нијјәтинә дүшдү. Авшалом, илк нөвбәдә, исраиллиләрин ҝөзүнә ҝирәрәк онларын көнлүнү алды; о, јанына ҝәләнләрә јалан вәдләр верир вә сахта мәһәббәт ҝөстәрирди. Авшалом, санки, бу инсанлара вә еһтијаҹларына мараг ҝөстәрирмиш кими онлары гуҹаглајыр вә өпүрдү (2 Шам. 15:2—6). О һәтта Давудун етибар етдији Ахитофели дә өз тәрәфинә чәкди (2 Шам. 15:31). 3-ҹү вә 55-ҹи мәзмурларында Давуд бу хаинлијин она неҹә тәсир етдијини тәсвир едиб (Мәз. 3:1—8; Мәзмур 55:12—14 ајәләрини оху). Авшалом абырсызҹасына Јеһованын тәјин етдији падшаһа гаршы суи-гәсд гурмагла Онун али һөкмранлығына бөјүк һөрмәтсизлик етдијини ҝөстәрди (1 Салн. 28:5). Лакин онун үсјаны уғурсузлуға уғрады вә Јеһованын мәсһ етдији Давуд падшаһ јенә дә өлкәни идарә етмәјә башлады.
6. Јәһуда Исаны неҹә әлә верди вә бу ад бәзи дилләрдә һансы сөзүн синонимидир?
6 Инди исә Мәсиһи әлә верән сатгын Јәһуда Искариот һаггында данышаг. Иса 12 һәвариси илә бирҝә гејд етдији сонунҹу Пасха бајрамында онлара деди: «Буну билин ки, сизләрдән бири мәни сатаҹаг» (Мат. 26:21). Һәмин ҝеҹә Ҝетсемани бағында Иса Петер, Јагуб вә Јәһјаја деди: «Хаин јахынлашыр». Иса бу сөзләри сөјләјән кими Јәһуда онунла әлбир оланларла баға ҝәлди вә «дүз Исаја јахынлашыб: “Салам, Мүәллим!” — деди вә ону нәвазишлә өпдү» (Мат. 26:46—50; Лука 22:47, 52). Јәһуда салеһ адам олан Исаны сатараг ону дүшмәнләрин әлинә тәслим етди. Пулпәрәст Јәһуда Исаны нечәјә сатды? Ҹәми-ҹүмләтаны 30 ҝүмүш пула! (Мат. 27:3—5). О вахтдан етибарән бәзи дилләрдә Јәһуда ады «сатгын» сөзүнүн синоними кими ишләнир вә хүсусилә дә достларыны сатан инсанлара аид едилирb.
7. а) Авшалом вә Јәһуданын, еләҹә дә б) Делиланын нүмунәсиндән нә өјрәнирик?
7 Биз бу үч нүмунәдән нә өјрәндик? Авшалом вә Јәһуда Јеһованын мәсһ олунмушларына хаинлик етдикләри үчүн шәрәфсиз агибәтә дүчар олдулар (2 Шам. 18:9, 14—17; Һәв. иш. 1:18—20). Делиланын ады исә һәмишәлик сатгынлыг вә сахта мәһәббәтлә бағлы олаҹаг (Мәз. 119:158). Јеһованын лүтфүнү итирмәмәк үчүн шөһрәтпәрәстлијә вә тамаһкарлыға олан һәр бир мејлимизи рам етмәк неҹә дә ваҹибдир! Мәҝәр хаинлијә ҝәтириб чыхаран һәр бир шеји рәдд етмәк үчүн бундан да тәсирли нүмунәләр ола биләр?
САДИГ ИНСАНЛАРДАН НҮМУНӘ ҜӨТҮРӘК
8, 9. а) Нәјә ҝөрә Јонатан Давуда садиг галаҹағына сөз верди? б) Биз Јонатаны неҹә тәглид едә биләрик?
8 Мүгәддәс Китабда бир чох садиг инсанларын да нүмунәси вар. Ҝәлин онлардан икисинә нәзәр салаг вә ҝөрәк биз онлардан нә өјрәнә биләрик. Илк өнҹә Давуда садиг олан инсанын нүмунәсинә диггәт јетирәк. Шаул падшаһын бөјүк оғлу Јонатан Исраилин тахт-таҹынын вариси олаҹагды, лакин Јеһова Давуду сечди. Јонатан Јеһованын бу гәрарына һөрмәтлә јанашды. О, Давуда рәгиб ҝөзү илә бахмырды вә она пахыллыг етмирди. Әксинә, «Јонатанын гәлби Давудун гәлбинә бағланды» вә она садиг олаҹағына сөз верди. Ҹүббәсини, ох-каманыны вә кәмәрини Давуда вермәклә Јонатан она падшаһа лајиг иззәти ҝөстәрди (1 Шам. 18:1—4). Јонатан әлиндән ҝәләни едәрәк «ону Аллаһ наминә руһландырды» вә һәтта Давуду Шаулун әлиндән гуртармаг үчүн өз һәјатыны рискә атды. Садиг Јонатан Давуда деди: «Исраилин падшаһы сән олаҹагсан, мән сәндән сонра икинҹи олаҹағам» (1 Шам. 20:30—34; 23:16, 17). Тәәҹҹүблү дејил ки, Јонатанын өлүмүндән сонра Давуд өз кәдәрини вә она олан мәһәббәтини ағы демәклә ифадә етмишди (2 Шам. 1:17, 26).
9 Јонатан кимә садиг олдуғуну билирди. О, тамамилә Али Һөкмдар Јеһоваја итаәт едир вә Онун мәсһ олунмушу олан Давуду үрәкдән дәстәкләјирди. Ејнилә, биз јығынҹагда хүсуси мәсулијјәтләр алмасаг да, арамызда нәзарәтчи тәјин олунанлара ҹанла-башла дәстәк олмалыјыг (1 Салон. 5:12, 13; Ибр. 13:17, 24).
10, 11. а) Нәјә ҝөрә Петер Исаја садиг галды? б) Биз Петерин нүмунәсини неҹә изләјә биләрик вә бу, бизи нәјә тәшвиг етмәлидир?
10 Арашдыраҹағымыз икинҹи јахшы нүмунә һамынын гаршысында Исаја садиглијини бәјан едән һәвари Петердир. Бир дәфә Иса мәҹази диллә тезликлә гурбан верәҹәји бәдән вә ганына иман ҝәтирмәјин ваҹиб олдуғуну дејәндә онун бу сөзләриндән дәһшәтә ҝәлән бир чох шаҝирдләр ону тәрк етдиләр (Јәһ. 6:53—60, 66). Бу заман Иса үзүнү 12 һәварисинә тутуб онлардан сорушду: «Бәлкә, сиз дә ҝетмәк истәјирсиниз?» Исанын бу суалына Петер ҹаваб верди: «Аға, кимин јанына ҝедәк? Әбәди һәјатын сөзләри сәндәдир. Биз инандыг вә билирик ки, Аллаһын мүгәддәс гулу сәнсән» (Јәһ. 6:67—69). Бу, о демәкдирми ки, Петер Исанын фидјә гурбанлығы илә бағлы бир аз әввәл дедији сөзләри там баша дүшмүшдү? Јәгин ки, јох. Амма буна бахмајараг, о, Аллаһын мәсһ олунмушуна садиг галмаг әзминдә иди.
11 Петер фикирләшмирди ки, Исанын дүшүнҹәләриндә нәсә бир сәһв вар вә әҝәр она вахт вериләрсә, о, фикрини дәјишәҹәк. Әксинә, Петер тәвазөкарлыгла етираф етди ки, «әбәди һәјатын сөзләри» Иса Мәсиһдәдир. Бәс биз «садиг... нөкәрбашы»нын нәшрләриндә чәтин баша дүшүлән вә ја бизим фикирләримизлә үст-үстә дүшмәјән фикирләрә раст ҝәләндә нә едирик? Бу фикрин истәдијимиз кими дәјишәҹәјини ҝөзләмәк әвәзинә, ону баша дүшмәјә чалышмалыјыг. (Лука 12:42 ајәсини оху.)
ҺӘЈАТ ЈОЛДАШЫНЫЗА САДИГ ГАЛЫН
12, 13. Хәјанәт никаһда өзүнә неҹә јер еләјир вә нәјә ҝөрә инсанын јашы бу һәрәкәтә бәраәт газандырмыр?
12 Хаинлијин истәнилән формасы алчаг һәрәкәтдир вә биз јол вермәмәлијик ки, бу, мәсиһчи аиләсиндә вә јығынҹагда сүлһ вә бирлији позсун. Буну јадда сахлајараг, ҝәлин ҝөрәк Аллаһа вә һәјат јолдашымыза садиглијимизи неҹә мөһкәмләндирә биләрик.
13 Зина хәјанәтин ән ағыр формаларындан биридир. Јолдашына хәјанәт едән инсан садиглијини позур вә башга бирисинә диггәт ҝөстәрир. Ҝүнаһсыз тәрәф гәфләтән тәк галыр вә онун һәјаты тамамилә алт-үст олур. Нә вахтса бир-бирини севән ики нәфәр арасында бу, неҹә баш верә биләр? Чох вахт буна ҝәтириб чыхаран илк аддым әрлә арвадын емосионал ҹәһәтдән бир-бириндән узаглашмаларыдыр. Сосиолоҝија үзрә профессор Габриелла Турнатури изаһ едир ки, «мүнасибәтләрдә ҝаһ иштирак едәндә, ҝаһ да иштирак етмәјәндә хаинлик артыг өзүнә јер еләјир». Бу һәтта орта јаш дөврүндә олан бәзи инсанларла да баш вериб. Мәсәлән, 25 ил евли олан 50 јашлы бир киши хошуна ҝәлән башга бир гадынла бирҝә олмаг үчүн өз садиг һәјат јолдашындан бошаныб. Бәзиләри буну орта јаш синдрому адландырырлар. Анҹаг хәјанәтә гачылмаз бир шеј кими бәраәт газандырмаг әвәзинә, ҝәлин ону әслиндә олдуғу кими — орта јаш дөврү хәјанәти адландырагc.
14. а) Јеһованын хәјанәтә мүнасибәти неҹәдир? б) Иса садиглик барәдә нә демишди?
14 Мүгәддәс Китаб әсасы олмадан һәјат јолдашларыны тәрк едән инсанлара гаршы Јеһованын мүнасибәти неҹәдир? Аллаһымыз Јеһова бошанмаја нифрәт едир вә јолдашлары илә пис рәфтар едән вә онлары атан инсанлары ҹидди шәкилдә гынајыр. (Малаки 2:13—16 ајәләрини оху.) Атасынын сөзләринә там шәрик олан Иса да өјрәдирди ки, һеч кәс һәјат јолдашыны атараг, санки, һеч нә баш вермәмиш кими даврана билмәз. (Матта 19:3—6, 9 ајәләрини оху.)
15. Евли инсанлар һәјат јолдашларына садиг галмаг үчүн нә етмәлидирләр?
15 Евли инсанлар бир-биринә неҹә садиг гала биләрләр? Аллаһын Кәламында дејилир: «Ҝәнҹ икән евләндијин арвадынла [вә ја әринлә] хошбәхт јаша» вә «һәјатынын һамысыны севдијин гадынла [вә ја киши илә] хош... кечир» (Сүл. мәс. 5:18; Ваиз 9:9). Әрлә арвад јаша долдугҹа һәм физики, һәм дә емосионал ҹәһәтдән мүнасибәтләриндә там «иштирак етмәлидирләр». Бу, бир-биринә гаршы диггәтли олмаг, бир-бири илә вахт кечирмәк вә гәлбән бир-биринә бағланмаг демәкдир. Онлар бүтүн диггәтләрини никаһларыны вә Јеһова илә мүнасибәтләрини горујуб сахламаға јөнәлтмәлидирләр. Бунун үчүн әр-арвадлар бирликдә Мүгәддәс Китабы арашдырмалы, мүнтәзәм олараг бирликдә тәблиғ етмәли вә бирликдә дуада Јеһовадан онлара хејир-дуа вермәсини истәмәлидирләр.
ЈЕҺОВАЈА САДИГ ГАЛЫН
16, 17. а) Аиләдә вә јығынҹагда Јеһоваја садиглијимиз неҹә сынана биләр? б) Һансы нүмунә ҝөстәрир ки, Аллаһын јығынҹагдан кәнар едилән гоһумла үнсијјәти кәсмәк әмринә риајәт етмәк јахшы бәһрәләр ҝәтирә биләр?
16 Јығынҹағын бәзи үзвләри ҹидди ҝүнаһа јол вермишләр. «Иманлары мөһкәм олсун дејә, онлары... ҹидди тәнбеһ [етмәк]» лазым ҝәлмишди (Тит. 1:13). Бәзиләринин давранышы исә јығынҹагдан кәнар едилмәләринә сәбәб олмушду. Низам-интизам тәдбирләриндән ибрәт ҝөтүрәнләрә бу, Јеһова илә мүнасибәтләрини бәрпа етмәјә көмәк етмишди (Ибр. 12:11). Бәс әҝәр јығынҹагдан кәнар едилән јахын достумуз вә ја гоһумумуздурса, онда неҹә? Белә вәзијјәтдә бизим һәмин инсана јох, Јеһоваја олан садиглијимиз сынаға чәкилир. Бизи ҝөрән Јеһова, јығынҹагдан кимин кәнар едилмәсиндән асылы олмајараг, онунла бүтүн әлагәләри кәсмәк әмринә риајәт едиб-етмәјәҹәјимизи мүшаһидә едир. (1 Коринфлиләрә 5:11—13 ајәләрини оху.)
17 Ҝәлин јалныз бир нүмунәјә нәзәр салаг вә ҝөрәк аилә Јеһованын јығынҹагдан кәнар едилән гоһумла әлагәни кәсмәк әмринә итаәт едәндә бу, онлара һансы хејир-дуалары ҝәтирә биләр. Бир ҝәнҹ оғлан он илдән чох иди ки, јығынҹагдан кәнар едилмишди. Бу мүддәт әрзиндә онун атасы, анасы вә дөрд гардашы онунла үнсијјәт етмирдиләр. Бәзән бу ҝәнҹ онларла бирҝә вахт кечирмәјә ҹәһд ҝөстәрирди. Анҹаг тәрифәлајигдир ки, бу аиләнин бүтүн үзвләри онунла әлагә сахламамаг нијјәтиндә гәти идиләр. О бәрпа олунандан сонра деди ки, һәмишә, хүсусилә дә ҝеҹәләр тәк оланда доғмалары илә бирҝә кечирдији вахт үчүн бурнунун уҹу ҝөјнәјирди. Лакин о етираф етди ки, аиләси онунла, аз да олса, үнсијјәт етсәјди, бу, ону гане едәҹәкди. Лакин нә валидејнләри, нә дә гардашлары онунла, аз да олсун, үнсијјәт етмәдикләри үчүн јенидән онларла олмаг арзусу бу ҝәнҹи Јеһова илә мүнасибәтләрини бәрпа етмәјә тәшвиг етди. Үрәјимиздә Јеһованын јығынҹагдан кәнар едилән гоһумумузла үнсијјәт етмәмәк әмрини позмаг истәји баш галдырарса, ҝәлин бу барәдә фикирләшәк.
18. Бу мәгаләдә арашдырдығымыз сатгын вә садиг инсанларын нүмунәләриндән сонра сиз нә етмәк әзминдәсиниз?
18 Јашадығымыз дүнјада хаинлик ади һалдыр. Лакин мәсиһчи јығынҹағында бир чох садиг инсанлар вар ки, онларын нүмунәсини тәглид едә биләрик. Онлар, санки, һәјат тәрзләри илә дејирләр: «Аллаһ да, сиз дә шаһидсиниз ки, бизләр сиз иманлыларын јанында неҹә сәдагәтли, салеһ вә гүсурсуз һәјат сүрмүшүк» (1 Салон. 2:10). Ҝәлин һамымыз Аллаһа вә бир-биримизә садиг галмаг үчүн әлимиздән ҝәләни әсирҝәмәјәк!
[Һашијә]
a Шимшонун ҝүҹүнүн мәнбәји онун сачы јох, бу сачла тәмсил олунан Јеһова илә бир Нәзири кими хүсуси мүнасибәтләри иди.
b Буна ҝөрә дә «Јәһуданын өпүшү» «хаинлик етмәк» мәнасыны верир.
c Бу мөвзу илә әлагәдар даһа чох мәлумат әлдә етмәк үчүн «Ҝөзәтчи гүлләси»нин 2010-ҹу ил 15 ијун сајынын 29-дан 32-дәк сәһифәләриндә јерләшән «Һәјат јолдашы хәјанәт едәндә» адлы мәгаләјә бахын.
[10–ҹу сәһифәдәки шәкил]
Башгалары Исадан үз дөндәрсәләр дә, Петер Аллаһын мәсһ олунмуш Оғлуна садиг галды