«Мән... сизинләјәм»

«Чох адам өзүнү ора-бура вураҹаг вә билик артаҹаг» (ДАН. 12:4).

НЕҸӘ ҸАВАБ ВЕРӘРДИН?

Мүасир дөврдә һәгиги билик неҹә ашкар едилиб?

Нәјин сајәсиндә һәгигәти гәбул едәнләрин сајы артыб?

Дәгиг билик неҹә артыб?

1, 2. а) Һарадан билирик ки, Иса бу ҝүн дә өз тәбәәләри иләдир вә ҝәләҹәкдә дә онларла олаҹаг? б) Даниел 12:4 ајәсинә әсасән, Мүгәддәс Јазылары диггәтлә арашдырмаг һансы нәтиҹәни верәҹәкди?

БИР АНЛЫГ өзүнү Ҹәннәтдә тәсәввүр ет! Һәр сәһәр ҝөзүнү ачыб јухудан дуранда өзүнү ҝүмраһ һисс едирсән вә гаршыдакы ҝүнү сәбирсизликлә ҝөзләјирсән. Һеч јерин ағрымыр. Хәстәликләрин бирдәфәлик јох олуб. Ҝөрмә, ешитмә, ијбилмә, тохунма вә дадбилмә габилијјәтләринин һамысы мүкәммәл шәкилдә ишләјир. Енержин долуб-дашыр, ишиндән зөвг алырсан, чохлу достларын вар вә һеч нәјин дәрдини чәкмирсән. Бүтүн бу хејир-дуалары сән Аллаһын Падшаһлығынын һөкмранлығы заманы алаҹагсан. Јеһованын тәјин етдији Падшаһ Иса Мәсиһ өз тәбәәләринин үзәринә бол-бол хејир-дуалар јағдыраҹаг вә онлара Јеһова һагда өјрәтмәјә давам едәҹәк.

² Садиг хидмәтчиләри ҝәләҹәкдә үмумдүнја маарифләндирмә ишиндә иштирак едәндә Јеһова онларла олаҹаг. Аллаһ вә Онун Оғлу артыг нечә әсрләрдир ки, садиг инсанлара дајагдырлар. Ҝөјә галхмаздан өнҹә, Иса садиг шаҝирдләрини онларла олаҹағына әмин етмишди. (Матта 28:19, 20 ајәләрини оху.) Бу вәдә олан етибарымызы мөһкәмләндирмәк үчүн ҝәлин тәхминән 2500 ил бундан әввәл гәдим Бабилдә јазылан пејғәмбәрликдән бир парчаны нәзәрдән кечирәк. Һал-һазырда јашадығымыз ахыр заман барәдә Даниел пејғәмбәр јазмышды: «Чох адам өзүнү ора-бура вураҹаг вә [«һәгиги», ЈД] билик артаҹаг» (Дан. 12:4). «Өзүнү ора-бура вурмаг» ибрани фелинин мәҹази мәнасыны, еләҹә дә бизим дөврүн амилләрини нәзәрә алсаг, бу фел «диггәтлә арашдырмаг» мәнасыны верир. Бу неҹә дә бөјүк хејир-дуалар ҝәтирмәли иди! Мүгәддәс Јазылары диггәтлә арашдыран инсанлар Аллаһын Кәламындан һәгиги, јәни дәгиг билик әлдә едәҹәкдиләр. Пејғәмбәрликдә һәмчинин дејилир ки, чохлары һәгиги билијә јијәләнәҹәк. Үстәлик, бу билик артаҹаг, ҝениш јајылаҹаг вә әлчатан олаҹаг. Әҝәр биз бу пејғәмбәрлијин неҹә јеринә јетдијини арашдырсаг, Исанын бу ҝүн дә өз шаҝирдләри илә олдуғуну вә Јеһованын бүтүн вәдләрини јеринә јетирмәјә гадир олдуғуну бир даһа ҝөрәҹәјик.

«ҺӘГИГИ БИЛИК» АШКАР ОЛУР

3. Һәвариләрин өлүмүндән сонра «һәгиги билик»лә нә баш верди?

³ Һәвариләрин өлүмүндән сонра, пејғәмбәрлик едилдији кими, һәгиги мәсиһчиләрин арасында дөнүкләр пејда олду вә алов кими сүрәтлә јајылдылар (Һәв. иш. 20:28—30; 2 Салон. 2:1—3). Сонракы әсрләр әрзиндә «һәгиги билик» нәинки Мүгәддәс Китабдан һеч бир анлајышы олмајанларын, һәтта өзләрини Мәсиһин давамчылары адландыранларын арасында белә јох иди. Христиан дүнјасынын дин рәһбәрләри Мүгәддәс Јазылара инандыгларыны сөјләдији бир һалда, инсанлара јалан дини тәлимләри — Аллаһы рүсвај едән «ҹинләрин [тәлимләрини]» өјрәдирдиләр (1 Тим. 4:1). Инсанлар, үмумиликдә, руһани ҹаһилликдә сахланылырды. Дөнүкләрин тәлимләринә Үч үгнум, өлмәз руһ вә әбәди ҹәһәннәм әзабы кими јалан еһкамлар дахил иди.

4. Бир груп мәсиһчи 1870-ҹи илләрдә «һәгиги билик»ләри неҹә ахтармаға башлады?

⁴ Анҹаг 1870-ҹи илләрдә, ахыр ҝүнләрин башланмасына тәхминән 40 ил галмыш вәзијјәт дәјишмәјә башлады. АБШ-ын Пенсилванија штатында сәмими мәсиһчиләрдән ибарәт кичик бир груп Мүгәддәс Китабы диггәтлә арашдырмаг вә «һәгиги билик»ләри ахтарыб тапмаг үчүн ҝөрүшләр кечирирди (2 Тим. 3:1). Онлар өзләрини Мүгәддәс Китаб Тәдгигатчылары адландырырдылар. Иса демишди ки, биликләр «һикмәтли вә ағыллы адамлардан» ҝизли галаҹаг, лакин бу сөзләр Мүгәддәс Китаб Тәдгигатчыларына аид дејилди (Мат. 11:25). Чүнки онлар Аллаһын ирадәсини јеринә јетирмәк ешги илә алышыб-јанан сәмими вә тәвазөкар инсанлар иди. Онлар дуа едәрәк Мүгәддәс Јазылары охујур, инҹәләјир, мүзакирә едир вә үзәриндә дәриндән дүшүнүрдүләр. Үстәлик, бу мәсиһчиләр Мүгәддәс Китаб ајәләрини бир-бири илә тутушдурур вә буна бәнзәр арашдырмалар апаран диҝәр инсанларын ҝәлдији нәтиҹәләри тәдгиг едирдиләр. Тәдриҹән Мүгәддәс Китаб Тәдгигатчылары әсрләр әрзиндә ҝизли сахланылан һәгигәтләри гаврамаға башладылар.

5. «Көһнә илаһијјат» адлы трактатлар силсиләсинин мәгсәди нә иди?

⁵ Мүгәддәс Китаб Тәдгигатчылары өјрәндикләри шејләрә ҝөрә чох севинсәләр дә, гүррәләнмирдиләр. Онлар дәрк едирдиләр ки, бу биликләр һәр заман Мүгәддәс Китабда олуб. Буна ҝөрә дә онлары јени тәлим кими тәгдим етмирдиләр (1 Кор. 8:1). Әксинә, охуҹулары Мүгәддәс Китаб һәгигәтләри илә таныш етмәк мәгсәдилә онлар «Көһнә илаһијјат» адлы трактатлар силсиләси дәрҹ етдиләр. Бу силсиләдән олан биринҹи трактат инсанлара «Мүгәддәс Китабы арашдырмаға вә бүтүн јалан инсан адәт-әнәнәләрини рәдд едиб Ағамызын вә һәвариләрин тәблиғ етдикләри көһнә илаһи тәлимләрә гајытмаға» көмәк едирди («Көһнә илаһијјат» 1-ҹи нөмрә, 1889-ҹу ил апрел ајы, сәһ. 32).

6, 7. а) 1870-ҹи илләрдән бәри бизә һансы һәгигәтләр ачыгланыб? б) Һансы һәгигәтләри билдијинә ҝөрә сән хүсусилә севинирсән?

⁶ Бу кичик групун фәалијјәтә башладығы андан 100 илдән чох вахт өтүб. О вахтдан етибарән неҹә дә һејрәтамиз һәгигәтләр ачыгланыб!a Бу һәгигәтләр ҹансыхыҹы вә илаһијјатчылар тәрәфиндән мүзакирә едилмәли олан мүҹәррәд анлајышлар дејил. Бунлар мараглы, һәјатымыза мәна гатан, бизи азадлыға говушдуран, үрәкләримизи севинҹ вә үмидлә долдуран тәлимләрдир. Бу һәгигәтләр сајәсиндә биз Јеһова, Онун ҝөзәл хүсусијјәтләри вә нијјәтләри һагда өјрәнирик. Онлар һәм дә бизә Исанын ролуну, нә үчүн јер үзүнә ҝәлдијини вә өлдүјүнү, еләҹә дә һал-һазырда нә илә мәшғул олдуғуну ачыглајыб. Бу дәјәрли һәгигәтләр Аллаһын пислијә нә үчүн јол вердијини, инсанларын нә үчүн өлдүјүнү, бизим неҹә дуа етмәли олдуғумузу вә әсил хошбәхтлијә неҹә наил олмаг мүмкүн олдуғуну изаһ едир.

⁷ Инди биз әсрләр әрзиндә «сирр» галан, лакин бу ахыр ҝүнләрдә јеринә јетән пејғәмбәрликләрин ачыгланмасыны билирик (Дан. 12:9). Бунлар хүсусилә Мүждәләрдә вә «Вәһј» китабында јазылан пејғәмбәрликләрдир. Јеһова бизә ҝөзләримизлә ҝөрә билмәдијимиз һадисәләр һагда өјрәнмәјә көмәк едиб. Мәсәлән, биз Исанын тахта чыхдығыны, ҝөјдә мүһарибәнин баш вердијини вә Шејтанын ҝөјдән јерә атылдығыны билирик (Вәһј 12:7—12). Аллаһ һәмчинин бизә шаһиди олдуғумуз һадисәләрин — мүһарибәләрин, зәлзәләләрин, епидемијаларын, гида чатышмазлығынын, еләҹә дә бу сон дәрәҹәдә ағыр ҝүнләри чәтинләшдирән пис инсанларын нәјә ҝөрә даһа да артдығынын әсил сәбәбини ачыглајыб (2 Тим. 3:1—5; Лука 21:10, 11).

8. Биз ҝөрдүјүмүз вә ешитдијимиз шејләрә ҝөрә бүтүн иззәти кимә веририк?

⁸ Биз Исанын шаҝирдләринә дедији нөвбәти сөзләринә шәрикик: «Сизин ҝөрдүјүнүзү ҝөрән ҝөзләр неҹә дә хошбәхтдир. Инанын, бир чох пејғәмбәр вә падшаһ сизин ҝөрдүкләринизи ҝөрмәк арзусунда иди, амма ҝөрмәди; ешитдикләринизи ешитмәк арзусунда иди, амма ешитмәди» (Лука 10:23, 24). Бу кими шејләри ҝөрә вә ешидә билдијимиз үчүн бүтүн иззәти Јеһова Аллаһа веририк. Аллаһ Исанын давамчылары олан бизләрә һәгигәти там дәрк етмәјә көмәк едән «көмәкчи», јәни мүгәддәс руһуну ҝөндәрдији үчүн Она үрәкдән миннәтдарыг! (Јәһја 16:7, 13 ајәләрини оху.) Ҝәлин һәгиги билијин нә гәдәр дәјәрли олдуғуну һеч вахт унутмајаг вә бу билији сәхавәтлә башгалары илә бөлүшәк!

«ЧОХ АДАМ» ҺӘГИГИ БИЛИЈИ ГӘБУЛ ЕДИР

9. «Ҝөзәтчи гүлләси» журналынын 1881-ҹи ил апрел сајында һансы чағырыш дәрҹ олунмушду?

⁹ «Ҝөзәтчи гүлләси» журналынын илк нәшринин ишыг үзү ҝөрмәсиндән тәхминән ики ил сонра, јәни 1881-ҹи илин апрел сајында «1000 тәблиғчи тәләб олунур» чағырышы дәрҹ олунмушду. Һәмин мәгаләдә дејилирди: «Ағамызын ишинә вахтларынын јарысыны вә ја ондан да чох һәср едә биләнләрә бир тәклифимиз вар... јәни: имканыныз јол вердији гәдәр бөјүк вә кичик шәһәрләрә китабпајлајан вә ја мүждәчи кими ҝедиб һәр јердә сәмими мәсиһчиләри ахтарын. Сиз ҝөрәҹәксиниз ки, онларын чоху Аллаһын гејрәтини чәкир, анҹаг буну билијә әсасланараг етмирләр; онлара Атамызын ҹалалынын зәнҝинлијини вә Кәламынын ҝөзәллијини билдирин».

10. Инсанлар таммүддәтли тәблиғчи олмаг чағырышына неҹә һај верирдиләр?

¹⁰ Һәмин чағырыш ҝөстәрирди ки, Мүгәддәс Китаб Тәдгигатчылары һәгиги мәсиһчиләр үчүн ән ваҹиб ишин тәблиғ иши олдуғуну дәрк едирләр. О вахтлар Мүгәддәс Китаб Тәдгигатчыларынын ҝөрүшләриндә вур-тут бир нечә јүз адам иштирак етдији үчүн «1000 тәблиғчи тәләб олунур» чағырышы кимәсә гәрибә ҝөрүнә биләрди. Лакин трактат вә ја журнал охудугдан сонра бир чох инсанлар һәгигәти тапдыгларыны дәрк едир вә бу чағырыша ҹанла-башла һај верирдиләр. Мәсәлән, Мүгәддәс Китаб Тәдгигатчыларынын дәрҹ етдији «Ҝөзәтчи гүлләси» журналыны вә бир китабчаны охудугдан сонра Лондонда (Инҝилтәрә) јашајан бир охуҹу 1882-ҹи илдә јазмышды: «Хаһиш едирәм, Аллаһын мүбарәк ишини иҹра етмәк үчүн нәји вә неҹә тәблиғ етмәли олдуғуму мәнә өјрәдин».

11, 12. а) Бизим мәгсәдимиз китабпајлајанларын мәгсәдинә неҹә охшајыр? б) Китабпајлајанлар «синифләр», јәни јығынҹаглар неҹә тәшкил едирдиләр?

¹¹ Китаб пајламаг ишиндә 1885-ҹи илдә 300-ә јахын Мүгәддәс Китаб Тәдгигатчысы иштирак едирди. Бизим кими, һәмин таммүддәтли хидмәтчиләрин дә мәгсәди Иса Мәсиһ үчүн шаҝирд һазырламаг иди. Бунунла белә, онларын тәлим үсуллары бизимкиндән фәргләнирди. Адәтән, биз һәр бир инсанла ајры-ајрылыгда дәрс кечирик. Сонра Мүгәддәс Китабы өјрәтдијимиз инсаны артыг мөвҹуд олан јығынҹаға дәвәт едирик. Әввәлләр исә баҹы-гардашлар китаблар пајлајырдылар, сонра да мараг ҝөстәрән инсанлары бир јерә јығыб онларла груп шәклиндә Мүгәддәс Јазылары арашдырырдылар. Бу јолла китабпајлајанлар јығынҹаглар тәшкил едирдиләр. Лакин һәмин илләрдә јығынҹаға «синиф» дејирдиләр.

¹² Мәсәлән, 1907-ҹи илдә бир груп китабпајлајан бир шәһәри әләк-вәләк едәрәк «Миниллијин шәфәги» (һәмчинин «Мүгәддәс Јазыларын тәдгиги» адланыр) китабы олан инсанлары ахтарыб тапмаға чалышырдылар. «Ҝөзәтчи гүлләси»ндә гејд олунурду: «Онлар [һәгигәтә мараг ҝөстәрәнләр] кичик груп шәклиндә мараглананлардан биринин евиндә топлашдылар. Китабпајлајан базар ҝүнү онларла сәһәрдән ахшама гәдәр Аллаһын әсрләр планыны мүзакирә етди. Нөвбәти базар ҝүнү исә онлары мүнтәзәм шәкилдә ҝөрүшләр кечирмәјә тәшвиг етди». 1911-ҹи илдә гардашлар тәблиғ үсулларыны дәјишдиләр. 58 нәфәр хүсуси сәјјар хидмәтчи АБШ вә Канадада ачыг мәрузәләрлә чыхыш едирди. Бу гардашлар мәрузәләрдә иштирак едән мараглананларын ад вә үнванларыны әлдә едирдиләр вә онлары шәхси евләрдә бирҝә топлашмаға тәшвиг едәрәк «синифләр» тәшкил едирдиләр. 1914-ҹү илдә бүтүн дүнјада Мүгәддәс Китаб Тәдгигатчыларынын 1200 јығынҹағы варды.

13. Һәгиги билијин јајылмасы илә әлагәдар сәнә ән бөјүк тәсир бағышлајан нәдир?

¹³ Бу ҝүн бүтүн дүнјада тәхминән 109 400 јығынҹаг вар вә тәхминән 895 800 гардаш вә баҹы пионер кими хидмәт едир. Инди сәккиз милјона јахын инсан һәгиги билији гәбул едир вә өјрәндикләрини һәјатларында тәтбиг едирләр. (Јешаја 60:22 ајәсини оху.)b Бу, һәгигәтән дә, һејрәтамиздир, чүнки Иса габагҹадан шаҝирдләринә адына ҝөрә һамынын онлара нифрәт едәҹәјини сөјләмишди. О һәмчинин демишди ки, давамчылары тәгибләрлә үзләшәҹәк, һәбсә дүшәҹәк, һәтта өлдүрүләҹәкләр (Лука 21:12—17). Шејтанын, ҹинләрин вә инсанлар арасындан олан әлалтыларынын тәгибләринә бахмајараг, Јеһованын халгы шаҝирд һазырламаг тапшырығыны јеријә јетирмәкдә мисли ҝөрүнмәмиш уғур газаныб. Бизим ҝүнләрдә һәгиги мәсиһчиләр «бүтүн јер үзүндә» — тропик ҹәнҝәлликләрдән тутмуш сојуг тундраја гәдәр, дағларда, сәһраларда, шәһәрләрдә вә әһалиси сејрәк олан әразиләрдә тәблиғ едирләр (Мат. 24:14). Аллаһын көмәји олмадан бу иши һәјата кечирмәк һеч вахт мүмкүн олмазды.

«ҺӘГИГИ БИЛИК» АРТЫР

14. Нәшрләримизин сајәсиндә «һәгиги билик» неҹә артыб?

¹⁴ «Һәгиги билик» хош хәбәри тәблиғ едән чохсајлы инсанларын сајәсиндә артыб. Бу ишдә нәшрләримизин дә ролу бөјүкдүр. 1879-ҹу илин ијул ајында Мүгәддәс Китаб Тәдгигатчылары «Ҝөзәтчи гүлләси» журналынын илк сајыны дәрҹ етдиләр. Һәмин вахт бу журнал «Сион Ҝөзәтчи гүлләси вә Мәсиһин иштиракынын ҹарчысы» адланырды. Өзәл ширкәт тәрәфиндән чап едилән бу журналын илк тиражы јалныз инҝилис дилиндә 6000 әдәд тәшкил едирди. Ијирми једди јашлы Чарлз Тејз Рассел редактор сечилди, јеткин Мүгәддәс Китаб Тәдгигатчыларындан беш нәфәр исә мүнтәзәм шәкилдә журнал үчүн мәгаләләр јазырды. Һал-һазырда «Ҝөзәтчи гүлләси» 195 дилдә нәшр олунур. Бу, һәр бурахылышы 42 182 000 тиражла чыхан дүнјада ән ҝениш јајылмыш журналдыр. Икинҹи јердә исә «Ојанын!» журналы дурур. Бу журнал 84 дилдә 41 042 000 тиражла чап олунур. Үстәлик, һәр ил 100 милјона јахын Мүгәддәс Китаб вә мүхтәлиф китаблар да чап олунур.

15. Нәшрләримизин чап олунмасы неҹә малијјәләшдирилир?

¹⁵ Бу бөјүк иш көнүллү ианәләр һесабына малијјәләшир. (Матта 10:8 ајәсини оху.) Артыг бу фактын өзү полиграфија (чап) сәнајесиндә чалышан, чап машынларын, кағызын, мүрәккәбин вә диҝәр материалларын гијмәтиндән хәбәри олан инсанлар үчүн тәәҹҹүбләндириҹидир. Чап ләвазиматларынын алыш-вериши илә мәшғул олан бир гардаш дејир: «Мәтбәәләримизә баш чәкән иш адамлары мүасир аваданлыгларла тәҹһиз едилән вә јүксәк истеһсал гүввәси олан бу мүәссисәләримизин көнүллү ианәләр һесабына малијјәләшдирилдијини биләндә онлары һејрәт бүрүјүр. Бет-Елдә хидмәт едәнләрин ҝәнҹ вә хошбәхт олмалары да онларда ејни тәәссүраты ојадыр».

«ДҮНЈА РӘББИН БИЛИЈИ ИЛӘ ДОЛАҸАГ»

16. Һәгиги билијин артмасына сәбәб нәдир?

¹⁶ Һәгиги билик јахшы нијјәтдән ирәли ҝәләрәк артырылыр. Аллаһын ирадәси одур ки, «һәр ҹүр инсан хилас олуб һәгигәт барәсиндә дәгиг билијә јијәләнсин» (1 Тим. 2:3, 4). Јеһова истәјир ки, инсанлар һәгигәти билсин, Она лајиг шәкилдә ибадәт етсин вә хејир-дуаларыны алсынлар. Һәгиги билијин артмасы сајәсиндә Јеһова мәсһ олунмушларын јердә галан үзвләрини топлајыб. О һәмчинин «һәр милләтдән, һәр гәбиләдән, һәр халгдан вә һәр дилдән» олан адамларын ичиндән јер үзүндә әбәди јашамаг үмидинә малик олан бөјүк издиһамы да бир араја ҝәтирир (Вәһј 7:9).

17. Һәгиги мәсиһчиләрин сајынын артмасы нәјә дәлаләт едир?

¹⁷ Сон 130 ил әрзиндә јер күрәсинин һәр јериндә Аллаһын һәгиги хидмәтчиләринин сајы хејли артыб. Бу артым ачыг-ајдын шәкилдә ҝөстәрир ки, Аллаһ вә Онун тәјин етдији Падшаһ олан Иса Мәсиһ һәр заман һәгиги мәсиһчиләрин јанында олублар — онлара истигамәт вериб, горујуб, тәшкил едиб вә тәлим верибләр. Бу һәмчинин Јеһованын ҝәләҹәклә бағлы вердији вәдләрин дә һөкмән һәјата кечәҹәјинә дәлаләт едир. «Сулар дәнизи бүрүдүјү кими дүнја... [Јеһованын] билији илә долаҹаг» (Јешаја 11:9). Һәмин вахт бәшәријјәт неҹә дә ҝөзәл хејир-дуалар алаҹаг!

[Һашијәләр]

[6–ҹы сәһифәдәки шәкил]

Еркән Мүгәддәс Китаб Тәдгигатчылары Аллаһын ирадәсини јеринә јетирмәк ешги илә алышыб-јанан сәмими вә тәвазөкар инсанлар иди

[7–ҹи сәһифәдәки шәкил]

Јеһова Онун һәгиги билијини јајмаг сәјләрини гијмәтләндирир