Мүгәддәс Китаб һәјатлары дәјишир

АИЛӘ тәрбијәси ҝөрмәјән бир киши нәјин сајәсиндә хошбәхт инсан, јахшы әр вә ата олду? Позғун һәјат сүрән гадыны әхлаглы вә намуслу олмаға нә тәшвиг етди? Ҝөрәк бу барәдә онлар өзләри нә данышырлар.

«Өзүмү лазымсыз вә бәдбәхт һисс едирдим» (ВИКТОР ҺҮГО ҺЕРРЕРА).

АНАДАН ОЛДУҒУ ИЛ: 1974

ӨЛКӘ: ЧИЛИ

КЕЧМИШДӘ: ИЧКИ ДҮШКҮНҮ

АВТОБИОГРАФИЈА. Мән мәнзәрәли дијар олан Чилинин ҹәнуб һиссәсиндә, Ангол шәһәриндә дүнјаја ҝөз ачмышам. Атамы һеч вахт ҝөрмәмишәм. Үч јашым оланда анам мәни вә гардашымы ҝөтүрүб пајтахта — Сантјагоја көчдү. Аиләмиз евсиз инсанлар үчүн олан мүвәггәти дүшәрҝәдә, балаҹа бир отагда мәскунлашды. Биз иҹтимаи ајагјолундан истифадә едирдик, сују исә јанғын кранындан ҝөтүрүрдүк.

Тәхминән ики илдән сонра дөвләт бизә худмани бир ев верди. Әфсуслар олсун ки, јени гоншуларымыз әјјашлар, наркоманлар, ҹинајәткарлар вә фаһишәләр иди.

Бир ҝүн анам бир киши илә таныш олду. Онлар евләндиләр. Аталығым һәдсиз дәрәҹәдә чох ичирди. О, анамы вә мәни дөјүрдү. Мән тез-тез тәклијә чәкилиб ағлајырдым, пәнаһына сығына биләҹәјим ата һәсрәтиндә идим.

Анамын ҝеҹә-ҝүндүз ишләмәсинә бахмајараг, биз јенә дә чох касыб идик. Елә ҝүнләр олурду ки, јемәјә гуру сүддән вә шәкәрдән башга һеч нәјимиз олмурду. Ҝизлинҹә гоншунун пәнҹәрәсиндән онларын телевизоруна бахмаг гардашымла мәним әјләнҹәмиз иди. Анҹаг бир ҝүн о, бизи јахалады вә һәр шеј битди.

Аталығым ајыг оланда (бу исә чох надир һалларда баш верирди) бизә јемәјә нә исә аларды. Бир ҝүн о, бизә балаҹа телевизор алды. Бу, өзүмү хошбәхт һисс етдијим тәк-түк анлардан бири иди.

Он ики јашымда охумағы өјрәндим. Бир ил сонра мәктәби атдым вә ишләмәјә башладым. Бүтүн ҝүнү ишләјир, ишдән сонра исә иш јолдашларымла әјләнҹә ҝеҹәләринә ҝедирдим. Орада биз ички ичир вә наркотик гәбул едирдик. Тезликлә мәндә асылылыг јаранды.

20 јашым оланда Кати илә таныш олдум вә биз евләндик. Әввәл-әввәл һәр шеј јахшы иди, лакин мән јенидән көһнә һәјат тәрзимә гајытдым вә әввәлкиндән дә бетәр олдум. Вә бир ҝүн баша дүшдүм ки, ахырым ја һәбсхана, ја да гәбиристанлыг олаҹаг. Ән дәһшәтлиси дә о иди ки, оғлум Виктор мәним уҹбатымдан ушаглыгда чәкдијим әзаблары чәкирди. Өзүмдән зәһләм ҝедирди, өзүмү лазымсыз вә бәдбәхт һисс едирдим.

2001-ҹи илдә Јеһованын Шаһидләри бизә ҝәлдиләр вә Кати онларла Мүгәддәс Китабы өјрәнмәјә башлады. Кати өјрәндикләрини мәнимлә бөлүшүрдү. Мән дә мараг үчүн Мүгәддәс Китабы өјрәнмәјә башладым. 2003-ҹү илдә Кати өзүнү Аллаһа һәср едиб вәфтиз олду.

МҮГӘДДӘС КИТАБ ҺӘЈАТЫМЫ ДӘЈИШДИ. Бир ҝүн мән Рут 2:12 ајәсини охудум. Орада дејилир ки, Јеһова иман тәзаһүр етдирән вә Ону өзүнә сығынаҹаг едән инсанлары хејир-дуаландырыр. Баша дүшдүм ки, әҝәр һәјат тәрзими дәјишсәм, Аллаһы разы салмыш олаҹағам вә О, мәни дә хејир-дуаландыраҹаг. Мүгәддәс Китабда әјјашлығын дәфәләрлә мүһакимә олунмасы диггәтими чәкди. 2 Коринфлиләрә 7:1 ајәсиндә јазылан сөзләр мәнә чох тәсир етди. Бу ајә бизи тәшвиг едир ки, «бәдәни вә руһу мурдарлајан һәр шејдән өзүмүзү тәмизләјәк». Буна ҝөрә натәмиз вәрдишләримдән әл чәкмәјә башладым. Башланғыҹда өзүмә һаким ола билмирдим, амма Кати һәр заман мәнә дајаг олурду.

Ишдән чыхмалы олдум, чүнки орада сигарет чәкмәк вә ички ичмәк кими чох ҝүҹлү ширникдириҹи тәсирләрә мәруз галырдым. Бир мүддәт ишсиз галмағым доланышығымызы чәтинләшдирсә дә, Мүгәддәс Китабы өјрәнмәк үчүн даһа чох вахтым олду. Мәһз бу заман мән руһани ҹәһәтдән инкишаф етмәјә башладым. Кати һеч вахт мәндән газанҹымдан артығыны тәләб етмирди, нә дә садә һәјат тәрзи сүрдүјүмүзә ҝөрә мәни гынајырды. Севҝи долу дәстәјинә ҝөрә она үрәкдән миннәтдарам.

Ҝетдикҹә Јеһованын Шаһидләри илә даһа сых үнсијјәт едирдим. Онларын сајәсиндә мән баша дүшдүм ки, тәһсилсиз олмағыма бахмајараг, Јеһова Аллаһ Она сәмими-гәлбдән хидмәт етмәк арзуму гијмәтләндирир. Мәсиһчи јығынҹағында ҝөрдүјүмүз мәһәббәт вә бирлијин аиләмизә чох бөјүк тәсири олду. Бу ҹүр сүлһә биз һеч һарада раст ҝәлмәмишдик. 2004-ҹү ил декабр ајында мән дә өзүмү Аллаһа һәср едиб вәфтиз олдум.

МӘНӘ ФАЈДАСЫ. Мүгәддәс Китабын Јешаја 48:17 ајәсиндә јазылан «Аллаһын Рәбб Мәнәм, Мән сәнин хејринә сәни өјрәдирәм» сөзләринин доғрулуғуна өз шәхси тәҹрүбәмдә әмин олдум. Мәним дәјишмәјим анама вә гардашыма чох ҝөзәл тәсир бағышлады вә онлар да Аллаһын Кәламыны өјрәнмәјә башладылар. Һәтта гоншуларым да мәним дәјишдијими вә неҹә хошбәхт аиләјә саһиб олдуғуму ҝөрүб севинирләр.

Мәним Аллаһы севән вә мәни өзүнә етибарлы дост билән һәјат јолдашым вар. Атамы һеч вахт ҝөрмәсәм дә, Аллаһын Кәламындан бир ата кими үч оғлума неҹә тәрбијә вермәли олдуғуму өјрәндим. Онлар мәнә дәрин һөрмәт бәсләјирләр. Ән ваҹиби исә, Јеһова оғулларым үчүн ҝерчәк Аллаһдыр вә онлар Јараданымызы севирләр.

Аллаһа неҹә дә миннәтдарам ки, бәдбәхт ушаглығыма бахмајараг, мәнә хошбәхт олмаг имканы вериб.

«Мән гәзәбли вә агрессив бир инсан олдум» (НАБИҺА ЛАЗАРОВА).

АНАДАН ОЛДУҒУ ИЛ: 1974

ӨЛКӘ: БОЛГАРЫСТАН

КЕЧМИШДӘ: НАРКОТИК АЛВЕРЧИСИ

АВТОБИОГРАФИЈА. Мән Болгарыстанын Софија шәһәриндә орта тәбәгәли аиләдә доғулмушам. Атам бизи гојуб ҝедәндә мәним алты јашым вар иди. Бу, мәним үчүн бөјүк зәрбә олду, гәлбимә дәрин јара вурду. Өзүмү атылмыш һисс едир вә мәһәббәтә лајиг олмадығымы дүшүнүрдүм. Бөјүдүкҹә бу һиссләр мәни үсјанкар олмаға тәһрик етди. Мән гәзәбли вә агрессив бир инсан олдум.

Биринҹи дәфә евдән гачанда 14 јашым вар иди. Мән тез-тез анамдан вә нәнәмлә бабамдан пул оғурлајырдым. Тез өзүмдән чыхдығым үчүн мәктәбдә башым проблемдән ачылмырды. Бунун уҹбатындан беш ил әрзиндә беш мәктәб дәјишмишдим. Аттестат алмағыма үч ил галмыш мәктәбдән чыхдым. Чох әхлагсыз һәјат сүрүрдүм. Мәндә сигаретдән вә марихуанадан асылылыг јаранмышды. Һәддиндән чох ичирдим, демәк олар ки, һәр ҝүн әјләнҹә ҝеҹәләринә ҝедирдим. Үстәлик, наркотик алвери илә мәшғул олмаға башладым. Инсанларын әзаб-әзијјәт чәкдији вә өлдүјү бу үмидсиз дүнјада јашамағын мәнасыны ҝөрмүрдүм. Бирҝүнлүк һәзз үчүн јашајырдым.

1998-ҹи илдә, 24 јашым оланда Бразилијанын Сан-Паулу шәһәринин һава лиманында ганунсуз наркотик алвери илә мәшғул олан заман тутулдум. Мәнә дөрд ил һәбс ҹәзасы кәсдиләр.

МҮГӘДДӘС КИТАБ ҺӘЈАТЫМЫ ДӘЈИШДИ. 2000-ҹи илдә Јеһованын Шаһидләри мәним олдуғум һәбсханаја һәфтәдә бир дәфә баш чәкмәјә башладылар. Онлардан бири, Маринес мәнә гаршы чох хејирхаһ иди. О, мәндә Мүгәддәс Китабы өјрәнмәк һәвәси ојатды. Әввәлләр һеч вахт Јеһованын Шаһидләри һагда ешитмәдијим үчүн диҝәр дустаглардан онлар барәдә нә билдикләрини сорушдум. Әксәријјәтин Шаһидләри писләмәси мәнә тәәҹҹүблү ҝәлди. Һәтта онлардан бири деди: «Һансы динә гошулурсан гошул, бирҹә Јеһованын Шаһиди олма». Онун сөзләри марағымы даһа да артырды; мән башгаларынын бу инсанлара нәјә ҝөрә бу гәдәр нифрәт етдикләрини билмәк истәдим. Белә бир гәнаәтә ҝәлдим ки, сәбәб онларын һәгиги диндә олмаларыдыр. Ахы Мүгәддәс Китабда дејилир ки, Иса пејғәмбәрин әсил давамчылары тәгибләрә мәруз галаҹаглар (2 Тимотејә 3:12).

Һәмин арада мәни һәбсхананын инзибати бинасында ишләмәјә тәјин етдиләр. Бир ҝүн анбарда «Ҝөзәтчи гүлләси» вә «Ојанын!» журналларынынa көһнә сајлары илә долу олан бир нечә гуту тапдым. Журналлары өз камерама апарыб охумаға башладым. Онлары охудугҹа мәндә елә һисс јаранырды ки, санки, гызмар ҝүнәш алтында сәһрада долашаркән сәрин су гујусу тапмышам. О ҝүндән етибарән журналлар бир дәгигә дә олсун әлимдән дүшмүрдү, һәр ҝүн саатларла Мүгәддәс Китабы арашдырырдым.

Бир ҝүн һәбсхана рәиси мәни чағыртдырды. Фикирләширдим ки, мәни азад едәҹәкләр, буна ҝөрә дә тез шеј-шүјләрими јығыб дустагларла видалашдым вә гача-гача рәисин отағына ҝетдим. Ора ҝәләндә мәлум олду ки, сахта сәнәдләрлә әлагәдар мәнә гаршы иддиа галдырылыб. Нәтиҹәдә, мәнә әлавә ики ил дә иш кәсдиләр.

Әввәл чох пис олдум. Анҹаг бир нечә ҝүндән сонра дәрк етдим ки, әслиндә, бу, хејир-дуа имиш. Мүгәддәс Китабдан чох шеј өјрәнсәм дә, үрәјимдә фикирләширдим ки, һәбсханадан чыхандан сонра көһнә һәјат тәрзимә гајыдаҹағам. Дәјишмәк үчүн мәнә даһа чох вахт лазым иди.

Бәзән мәнә елә ҝәлирди ки, Аллаһ мәним кими инсанын ибадәтини һеч вахт гәбул етмәз. Амма мән 1 Коринфлиләрә 6:9—11 кими ајәләрин үзәриндә дәриндән дүшүндүм. Бу ајәләрдә ҝөстәрилир ки, ерамызын биринҹи әсриндә Иса пејғәмбәрин бәзи давамчылары Аллаһа ибадәт етмәмишдән габаг оғру, ички дүшкүнү вә сојғунчу олмушлар. Лакин Аллаһын көмәјилә онлар дәјишдиләр. Кечмишдә јашајан бу инсанларын нүмунәси мәни чох руһландырды.

Пис вәрдишләримин бәзиләриндән, мәсәлән, наркотикдән әл чәкмәк мәнә о гәдәр дә чәтин олмады. Лакин сигарети атанаҹан чох әзаб чәкдим. Бир илдән чох давам едән мүбаризәдән сонра ахыр ки, бу вәрдишимин дә өһдәсиндән ҝәлдим. Сигарети атмагда онун инсан организмә вурдуғу зәрәрләри арашдырмағымын бөјүк көмәји дәјди. Амма ән бөјүк көмәк Јеһоваја усанмадан дуа етмәјим олду.

Атам бизи тәрк едәндә өзүмү атылмыш һисс едирдим, амма Јеһоваја јахынлашдыгҹа јаваш-јаваш бу һиссләрин өһдәсиндән ҝәлдим. Мүгәддәс Китабда јазылан Мәзмур 27:10 ајәси мәни риггәтә ҝәтирди. Орада дејилир: «Ата-анам мәни атса белә, Рәбб мәни гәбул едәр». Анладым ки, һеч вахт мәни тәрк етмәјәҹәк ән јахшы Атаны тапмышам! Артыг һәјатымын мәнасы вар. 2004-ҹү ил апрел ајында, һәбсханадан чыхандан алты ај сонра вәфтиз олдум.

МӘНӘ ФАЈДАСЫ. Инди мән хошбәхтәм. Инсаны мәһвә апаран вәрдишләрдән ҹанымы гуртарандан сонра өзүмү физики вә емосионал ҹәһәтдән гат-гат јахшы һисс едирәм. Бу ҝүн мәним хошбәхт аиләм вар вә сәмави Атам Јеһова мәнә Өз достлуғуну бәхш едиб. Она ибадәт едән инсанлар арасында өзүмә чохлу ата, ана, гардаш вә баҹы тапмышам (Марк 10:29, 30). Онлара миннәтдарам ки, мәндә мәним ҝөрә билмәдијим потенсиалы ҝөрдүләр.

Һәрдән елә анлар олур ки, кечмишдә сүрдүјүм һәјат тәрзимә ҝөрә өзүмү чох гынајыр вә руһ дүшкүнлүјүнә гапылырам. Амма Аллаһын әввәлки ишләрин бир даһа хатырланмајаҹағы јени дүнјаја даир вәди мәнә тәсәлли верир (Јешаја 65:17). Лакин кечмишдә башыма ҝәлән һадисәләр мәнә ејни проблемләрлә үзләшән инсанлара шәфгәтлә јанашмаға көмәк едир. Јашадыгларымын јеҝанә фајдасы будур. Тәблиғдә Аллаһын Кәламындакы хош хәбәри инсанларла бөлүшәркән гаршыма чыхан наркоманларла, ички дүшкүнләри илә вә ја ҹинајәткарларла раһат дил тапырам вә онлара гаршы гәрәзсизәм. Әминәм ки, әҝәр мәним кими инсан Јеһованы разы салмаг үчүн һәјатында белә дәјишикликләр едә билдисә, демәли, буну һәр кәс баҹарар!

[Һашијә]

[27–ҹи сәһифәдәки шәкил]

«Атамы һеч вахт ҝөрмәсәм дә, Аллаһын Кәламындан бир ата кими үч оғлума неҹә тәрбијә вермәли олдуғуму өјрәндим»

[29–ҹу сәһифәдәки шәкил]

«Һеч вахт мәни тәрк етмәјәҹәк ән јахшы Атаны тапмышам!»