Мүгәддәс Китаб һәјатлары дәјишир
Ҝүнү мотосиклет сүрмәк вә идманла мәшғул олмагла кечән бир наркоман нә үчүн һәјат тәрзини дәјишиб Аллаһа таммүддәтли хидмәтә башлады? Маһир гумарбазы өз вәрдишиндән әл чәкиб аиләсини доландырмаг үчүн һалал зәһмәти илә пул газанмаға нә тәшвиг етди? Ушаглыгдан Јеһованын Шаһиди кими тәрбијә алан, лакин сонралар Мүгәддәс Китаб нормаларындан узаглашан ҝәнҹ гызы һәјат тәрзи һаггында дүшүнмәјә нә вадар етди? Ҝәлин өзләринин бу һагда дедикләринә нәзәр салаг.
ҮМУМИ ТАНЫШЛЫГ
АДЫ: ТЕРРЕНС О’БРАЈН
ЈАШЫ: 57
ӨЛКӘ: АВСТРАЛИЈА
ТАРИХЧӘСИ: НАРКОМАН ВӘ МОТОСИКЛЕТ ҺӘВӘСКАРЫ
КЕЧМИШИМ: Ушаглығым Квинсленд штатынын инсанларла гајнашан пајтахты Брисбен шәһәриндә кечиб. Бахмајараг ки, валидејнләрим католик иди, сәккиз јашым оланда биз килсәдән ајағымызы кәсдик вә артыг евдә дин һаггында бир кәлмә дә кәсмәдик. Аиләм Голд-Кост (Австраилја) шәһәринә көчәндә мәним он јашым вар иди. Биз саһилә јахын јашајырдыг. Јенијетмәлијимин илк илләри чиммәклә вә сөрфинглә мәшғул олмагла кечиб.
Бүтүн бунлара рәғмән, ушаглығым елә дә хош олмајыб. Атам бизи атыб ҝедәндә сәккиз јашым вар иди. Анам јенидән аилә гурду, о вахтдан ички вә дава-далаш евимиздән әскик олмурду. Бир ахшам валидејнләрим арасында олан гызғын мүбаһисәдән сонра мән чарпајымда отуруб өзүмә сөз вердим ки, нә вахтса евләнсәм, һеч вахт арвадымла мүбаһисә етмәјәҹәјәм. Бу гәдәр проблемләрә бахмајараг, алты ушаг, анам вә аталығымдан ибарәт аиләмиз меһрибан иди.
Јенијетмәлијимин сон илләриндә һәмјашыдларымын әксәријјәти өзбашына һәјат сүрмәјә башлады. Онлар марихуана, түтүн чәкир вә башга наркотик маддәләр гәбул едирдиләр, һәмчинин спиртли ичкиләрдән суи-истифадә едирдиләр. Мән һәмјашыдларымдан һеч дә ҝери галмырдым. Үстәлик, мотосиклет дәлиси идим. Бир нечә дәфә ҹидди гәза кечирмәјимә бахмајараг, бу әјләнҹәдән әл чәкмәдим вә мотосиклетлә бүтүн Австралијаны долашмағы планлашдырдым.
Өз кефинә јашајан инсан олсам да, дүнјанын вәзијјәти һагда дүшүнәндә вә бәшәријјәтин проблемләринә әксәр инсанларын лагејд јанашдығыны ҝөрәндә һәмишә нараһатчылыг кечирирдим. Мән Аллаһ, дин вә дүнјанын вәзијјәти һаггында һәгигәти билмәји чох истәјирдим. Бу һагда ики католик кешишинә суал верәндә, онларын ҹавабы мәни гане етмәди. Ејни суаллары мүхтәлиф протестант руһаниләринә дә верәндә онларын да ирәли сүрдүкәри фикирләр мәним үчүн гәнаәтбәхш олмады. Сонра достум мәни Едди адлы Јеһованын Шаһиди илә таныш етди. Едди илә дөрд дәфә сөһбәт етдик, һәр дәфә дә о, мәним суалларыма Мүгәддәс Китабдан ҹаваб верирди. Елә илк ҝөрүшдән баша дүшдүм ки, хүсуси бир шеј тапмышам. Анҹаг онда һәлә дәрк етмирдим ки, һәјатымы көкүндән дәјишмәлијәм.
МҮГӘДДӘС КИТАБ ҺӘЈАТЫМЫ ДӘЈИШДИ: Австралијаны долашдығым вахт башга бир Јеһованын Шаһидинә раст ҝәлдим вә онунла сөһбәт етдим. Лакин Квинслендә гајыдандан сонра алты ај Јеһованын Шаһидләри илә әлагәм олмады.
Сонра бир дәфә ишдән евә гајыдаркән јолда әлләриндә балаҹа чанта, сәлигәли ҝејинмиш ики кишини ҝөрдүм вә дүшүндүм ки, јәгин онлар Јеһованын Шаһидидир. Онлара јахынлашанда фикримдә јанылмадығымы анладым вә мәнә Мүгәддәс Китабы өјрәтмәји хаһиш етдим. Елә һәмин андан Јеһованын Шаһидләринин јығынҹаг ҝөрүшләринә ҝетмәјә башладым вә һәтта 1973-ҹү илдә Сиднејдә кечирилән конгресдә олдум. Анҹаг аиләм, хүсусилә дә анам мәним Мүгәддәс Китабы өјрәнмәјимдән хәбәр тутанда гәти етиразыны билдирди. Бу вә диҝәр сәбәбләрдән ирәли ҝәләрәк мән Јеһованын Шаһидләри илә әлагәни кәсдим. Дүз бир ил башым јени мәшғулијјәтә, крикет ојнамаға гарышды.
Бир ҝүн баша дүшдүм ки, јалныз Јеһованын Шаһидләри илә Мүгәддәс Китабы өјрәнәндә өзүмү һәгигәтән хошбәхт һисс едирдим. Мән онларла јенидән әлагә сахладым вә јығынҹаг ҝөрүшләринә ҝетмәјә башладым. Һәмчинин наркоман достларымла бүтүн мүнасибәтләрими кәсдим.
Бу дәјишикликләри етмәјә мәни ән чох Мүгәддәс Китабдан Әјјуб һаггында өјрәндикләрим тәшвиг етди. Билл адлы меһрибан, ејни заманда ачыг сөзлү јашлы бир Шаһид мәнә мүнтәзәм Мүгәддәс Китабы өјрәдирди. Әјјубун әһвалатыны арашдырдыгдан сонра Билл мәндән сорушду ки, Шејтан даһа кимләрин өз мәнфәәти үчүн Аллаһа хидмәт етдијини иддиа етмишдир (Әјјуб 2:3—5). Мүгәддәс Китабдан билдијим персонажларын адларыны чәкдикҹә о, сәбирлә дејирди: «Дүздүр, онун да». Сонра о, дүз ҝөзүмүн ичинә бахыб деди: «Шејтан буну елә сәнин һаггында да дејир!» Буну ешидәндә аз гала стулдан јыхылмышдым. Буна кими дә мән өјрәндикләримин һамысынын һәгигәт олдуғуна әмин идим. Амма јалныз инди баша дүшдүм ки, нә үчүн өјрәндикләримә ујғун јашамалыјам. Бундан дөрд ај сонра мән вәфтиз олуб Јеһованын Шаһидләринин сырасына гошулдум.
МӘНӘ ФАЈДАСЫ: Ағлыма ҝәтирмәјә белә горхурам ки, Мүгәддәс Китаб нормаларына ујғун јашамағы өјрәнмәсәјдим, башыма нәләр ҝәләрди. Јәгин чохдан өлмүшдүм. Наркотик вә ички кечмиш досталарымын чохунун ахырына чыхды. Бәзиләринин исә аиләсиндә хошбәхтликдән әсәр-әламәт јохдур. Дүшүнүрәм ки, мәним дә агибәтим ејни ҹүр оларды.
Инди мән аиләлијәм вә арвадым Маргаретлә Јеһованын Шаһидләринин Австралијадакы филиалында хидмәт етмәкдән севинҹ дујуруг. Гоһумларымдан һеч ким Јеһованын Шаһиди олмады. Буна бахмајараг, өтән илләр әрзиндә Маргаретлә мән бир чох инсанлара вә мәним кими, һәјат тәрзләрини дәјишән әр-арвадлара Мүгәддәс Китабы өјрәтмәјин ҝәтирдији севинҹи јашамышыг. Нәтиҹәдә, биз чохлу ҝөзәл достлар газанмышыг. Бундан савајы, Јеһованын Шаһиди кими тәрбијә олунан Маргарет мәнә гырх ил бундан әввәл вердијим сөзүн үстүндә дурмаға көмәк едир. Биз артыг 25 илдән чохдур ки, хошбәхт аилә һәјаты сүрүрүк. Тәбии ки, нәдәсә сөзләримизин үст-үстә дүшмәдији вахтлар олур, анҹаг индијә кими бир дәфә дә олсун мүбаһисә етмәмишик. Биз јахшы билирик ки, бүтүн бунлара Мүгәддәс Китабын сајәсиндә наил олмушуг.
ҮМУМИ ТАНЫШЛЫГ
АДЫ: МАСАҺИРО ОКАБАЈАШИ
ЈАШЫ: 39
ӨЛКӘ: ЈАПОНИЈА
ТАРИХЧӘСИ: ГУМАРБАЗ
КЕЧМИШИМ: Мән Нагоја шәһәриндән гатарла тәхминән јарым саатлыг мәсәфәси олан нисбәтән кичик шәһәр Ивакурада боја-баша чатмышам. Атам да, анам да хатирәләримдә меһрибан инсан кими галыблар. Анҹаг даһа сонра өјрәндим ки, сән демә, атам «јакуза» бандасынын үзвү имиш. О, беш нәфәрдән ибарәт аиләмизи һарам јолла газандығы пулла доландырырмыш. Атам һәр ҝүн о гәдәр ичирди ки, ахырда гараҹијәр сиррозундан өлдү. Онда мәним 20 јашым вар иди.
Атам корејалы олдуғундан ҹәмијјәт ичиндә бизә гаршы чох вахт ајры-сечкилик едилирди. Бу вә диҝәр проблемләрә ҝөрә мәним јенијетмәлик илләрим һеч дә хош кечмәди. Јухары синифдә охујанда тез-тез дәрсләри бурахырдым, бир илдән сонра исә мәктәбә тамамилә ҝетмәдим. Һәм полисин гејдијјатында олдуғумдан, һәм дә јары корејалы олдуғум үчүн иш тапмаг мүшкүл мәсәлә иди. Нәһајәт, мән бир иш тапдым, амма сонра дизимдән зәдәләндијим үчүн артыг физики иш ҝөрә билмирдим.
Өзүмү доландырмаг үчүн пачинко (јапон гумар ојуну) ојнамаға башладым. О вахт мән бир гызла јашајырдым. О, мәним нормал иш тапмағымы вә онунла евләнмәјими истәјирди. Амма гумардан чохлу пул ҝәлдији үчүн һәјат тәрзими дәјишмәк истәмирдим.
МҮГӘДДӘС КИТАБ ҺӘЈАТЫМЫ ДӘЈИШДИ: Бир ҝүн гапымызы Јеһованын Шаһидләриндән бири дөјдү вә мәнә «Һәјат неҹә әмәлә ҝәлиб? Тәкамүл, јохса јарадылма јолу илә?» китабыны верди. Әввәлләр мән бу суалын үзәриндә һеч дүшүнмәмишдим. Анҹаг бу китабы охудугдан сонра мән Мүгәддәс Китаб һаггында даһа чох өјрәнмәјә разы олдум. Мәни һәмишә инсан өләндән сонра онунла нә баш вердији марагландырырды. Бу вә диҝәр суаллара Мүгәддәс Китабдан ајдын ҹаваб алдыгда санки ҝөзләрим ачылды.
Мән баша дүшдүм ки, Мүгәддәс Китабдан өјрәндикләрими тәтбиг етмәлијәм. Буна ҝөрә дә никаһсыз јашадығым гызла мүнасибәтләрими рәсмиләшдирдим, сигарети атдым, саралтдығым узун сачларымы кәсдим вә үст-башыма әл ҝәздирдим. Һәмчинин гумарын да дашыны атдым.
Бу дәјишикликләри етмәк мәнә һеч дә асан олмады. Мәсәлән, сигарети атмаға ҝүҹүм чатмырды. Лакин Јеһова Аллаһа үрәкдән дуа етмәјин вә Она ҝүвәнмәјин сајәсиндә буну баҹардым. Гумары атандан сонра тапдығым биринҹи иш дә мәним үчүн әсил сынаг иди. Иш чох чәтин вә ҝәрҝин иди, алдығым мааш исә гумарда газандығымын јарысы иди. Бу чәтин вахтларымда Мүгәддәс Китабын Филипилиләрә 4:6, 7 ајәләри мәнә чох көмәк етди. Орада дејилир: «Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр». Бу сөзләрин һәгигәт олдуғуна дөнә-дөнә әмин олмушам.
МӘНӘ ФАЈДАСЫ: Илк дәфә Јеһованын Шаһидләри илә Мүгәддәс Китабы өјрәнмәјә башлајанда арвадым буна һеч дә разы дејилди. Анҹаг һәрәкәтләримдә бөјүк дәјишикликләр етдијими ҝөрәндә о да Мүгәддәс Китабы өјрәнмәјә вә мәнимлә Јеһованын Шаһидләринин јығынҹаг ҝөрүшләринә ҝетмәјә башлады. Инди һәр икимиз Јеһованын Шаһидијик. Аллаһа бирликдә хидмәт етмәк әсил хејир-дуадыр!
Мүгәддәс Китабы өјрәнмәздән әввәл хошбәхт инсан олдуғуму дүшүнүрдүм. Анҹаг әсил хошбәхтлијин нә демәк олдуғуну инди анлајырам. Мүгәддәс Китаб нормаларына ујғун јашамаг асан дејил, лакин әминәм ки, бу, һәјатда тута биләҹәјим ән ҝөзәл јолдур.
ҮМУМИ ТАНЫШЛЫГ
АДЫ: ЕЛИЗАБЕТ ҸЕЈН СКОФИЛД
ЈАШЫ: 35
ӨЛКӘ: БӨЈҮК БРИТАНИЈА
ТАРИХЧӘСИ: ӘЈЛӘНҸӘ ҮЧҮН ЈАШАЈАН
КЕЧМИШИМ: Мән Шотландијанын Глазго шәһәриндән бир аз аралыда јерләшән Һардгејт адлы кичик шәһәрдә бөјүмүшәм. Јеһованын Шаһиди олан анам једди јашым оланда мәнә Мүгәддәс Китабы өјрәтмәјә башлады. Анҹаг 17 јашым оланда мәнә мәктәб јолдашларымла вахт кечирмәк — ҝеҹә клубларына ҝетмәк, ағыр рока гулаг асмаг, спиртли ички ичмәк даһа мараглы ҝәлирди. Руһани шејләр мәни гәтијјән марагландырмырды. Әјләнмәк үчүн истираһәт ҝүнләрини сәбирсизликлә ҝөзләјирдим. Лакин 21 јашым оланда һәр шеј дәјишди.
Мән Шимали Ирландијада јашајан гоһумларымҝилә ҝетмишдим. Мән орада оланда «нарынҹы орден»ин тәрәфдары олан протестантлар митинг кечирирдиләр. Протестантларла католикләрин бир-биринә гаршы ҝөстәрдикләри нифрәт вә фанатизм мәни шока салмышды. Бу һадисә мәни санки јухудан ајылтды. Анамын мәнә Мүгәддәс Китабдан өјрәтдикләри јадыма дүшдү. Мән билирдим ки, Аллаһ Онун нормаларына ујғун јашамајан инсанлардан һеч вахт разы галмајаҹаг. Бирдән баша дүшдүм ки, Аллаһын мәним неҹә јашамағымы истәдијинә әһәмијјәт вермәјиб, өзүм үчүн јашајырам. Гәрара ҝәлдим ки, евимизә, Шотландијаја гајыданда Мүгәддәс Китабы там ҹиддијјәтлә арашдыраҹағам.
МҮГӘДДӘС КИТАБ ҺӘЈАТЫМЫ ДӘЈИШДИ: Бу гәдәр фасиләдән сонра мән өз доғма шәһәримдә Јеһованын Шаһидләринин јығынҹаг ҝөрүшүнә ҝедәндә өзүмү нараһат һисс едир вә һәјәҹанланырдым. Анҹаг һамы мәни ҝүләрүзлә гаршылады. Мүгәддәс Китабдан өјрәндикләрими һәјата кечирмәјә башладым. Елә о вахтдан бир јеткин баҹы мәнә хүсуси диггәт јетирирди. О, мәнә өзүмү јенидән јығынҹағын бир үзвү кими һисс етмәјә көмәк етди. Кечмиш достларым мәни ҝеҹә клубларына јенә дә дәвәт едирдиләр, амма онлара билдирдим ки, Мүгәддәс Китаб нормалары илә јашамаға гәти гәрарлыјам. Бир мүддәт сонра онлар мәни раһат бурахдылар.
Әввәлләр Мүгәддәс Китаба јалныз ганун-гајда китабы кими бахырдым. Инди она мүнасибәтим тамамилә фәрглидир. Мәним кечирдијим һиссләри јашајан вә ејни зәифликләри олан Мүгәддәс Китаб персонажларына реал инсанлар кими бахмаға башладым. Онлар да мәним кими сәһвләр бурахмыш, лакин үрәкдән төвбә етдикдән сонра Јеһова Аллаһ онлары бағышламышды. Бу, мәни әмин етди ки, әҝәр Аллаһы разы салмаг үчүн әлимдән ҝәләни етсәм, јенијетмәлијимдә Ондан үз дөндәрдијимә бахмајараг, мәни бағышлајаҹаг вә етдијим сәһвләри унудаҹаг.
Мәнә ән чох тәсир едән анамын давранышы олду. Мән Аллаһдан үз дөндәрсәм дә, о, буну етмәди. Онун Јеһоваја садиглији сајәсиндә баша дүшдүм ки, Јеһоваја хидмәтдә һәр шејдән кечмәјә дәјәр. Мән ушаг оланда анам мәни өзү илә евдән-евә тәблиғ етмәјә апарырды. Бу, мәним һеч хошума ҝәлмирди вә тәсәввүр едә билмирдим ки, башгаларына тәблиғ етмәклә вахты неҹә һәдәр вермәк олар. Анҹаг инди Исанын Матта 6:31—33 ајәләриндә јазылмыш вәдини өз үзәримдә јохламаг гәрарына ҝәлдим. О демишди: «“Нә јејәҹәјик?”, “Нә ичәҹәјик?”, “Нә ҝејәҹәјик?” — дејә гајғы чәкмәјин... сәмави Атаныз да бүтүн бу шејләрә еһтијаҹ дујдуғунузу билир. Лакин әввәлҹә Аллаһын Сәлтәнәтини вә Онун салеһлијини ахтарын; вә бунларын һамысы сизә әлавә олараг вериләҹәкдир». Јеһованын Шаһиди кими вәфтиз олундугдан чох кечмәмиш бүтүн вахтымы апаран ишими дәјишиб, јарымҝүнлүк ишә дүзәлдим вә таммүддәтли хидмәтә башладым.
МӘНӘ ФАЈДАСЫ: Јенијетмәлик илләрими әјләнмәклә кечирсәм дә, һеч нәдән мәмнунлуг дујмурдум. Һәјатым мәнасыз иди. Инди бүтүн ҝүҹүмү Јеһоваја хидмәтә сәрф етдијим үчүн һәјатымдан олдугҹа разыјам. Мәналы вә мәгсәдјөнлү һәјат сүрүрәм. Инди мән аиләлијәм вә јолдашымла һәр һәфтә Јеһованын Шаһидләринин мүхтәлиф јығынҹагларына баш чәкир, һәмиманлыларымызы руһландырырыг. Бу, мәним үчүн бөјүк шәрәфдир. Икинҹи дәфә мәнә шанс вердији үчүн Јеһоваја чох миннәтдарам!
[19-ҹу сәһифәдәки јазы]
«Елә илк ҝөрүшдән баша дүшдүм ки, хүсуси бир шеј тапмышам. Анҹаг онда һәлә дәрк етмирдим ки, һәјатымы көкүндән дәјишмәлијәм»
[21-ҹи сәһифәдәки јазы]
«Сигарети атмаға ҝүҹүм чатмырды. Лакин Јеһова Аллаһа үрәкдән дуа етмәјин вә Она ҝүвәнмәјин сајәсиндә буну баҹардым»
[22-ҹи сәһифәдәки јазы]
«Әввәлләр Мүгәддәс Китаба јалныз ганун-гајда китабы кими бахырдым. Инди она мүнасибәтим тамамилә фәрглидир. Мәним кечирдијим һиссләри јашајан вә ејни зәифликләри олан Мүгәддәс Китаб персонажларына реал инсанлар кими бахмаға башладым»