Өлүләр дириләрә көмәк едә биләрми?

ГӘРБИ Африкадан олан Тамба адлы ҝәнҹ мәктәб имтаһанларыны вермәјә һазырлашырдыa. Анасы ону инандырмаға чалышырды ки, уғур газанмасы үчүн мүтләг өлмүш әҹдадларынын көмәји ҝәрәкдир. Сиҹилијанын Палермо шәһәриндә туристләр мумијаланмыш јүзләрлә ҹәсәдин сәрҝиләндији катакомбалары зијарәт едирләр. Бәзиләри инаныр ки, бу ҹәсәдләр инсаны горујан илаһи гүввәјә маликдирләр. Инсанлар һәр ил АБШ-ын Нју–Јорк штатынын гәрбиндәки чохсајлы медиумлары илә танынан Лили-Дејл шәһәринә ҝәлирләр. Бу инсанлар үмид едирләр ки, һәмин медиумларын васитәсилә өлән әзизләри вә ја достлары илә әлагә јарада вә онлардан көмәк ала биләрләр.

Бүтүн дүнјада инсанлар инаныр ки, өлүләр дириләрә көмәк етмәјә гадирдир. Бәс сиз неҹә дүшүнүрсүнүз? Ола билсин, сизә дә бу етигады ашылајыблар, јахуд јахынларыныздан кимсә буна инаныр. Өлән әзизимиз үчүн дарыхмағымыз нормал һалдыр. Медиумлар инсаны өлән әзизи илә ҝөрүшдүрә биләҹәкләрини иддиа едирләр. Бир медиум гадынын «Тајм» журналында јазылмыш сөзләринә әсасән, руһани аләмин гапылары «һәр заман ачыгдыр, јетәр ки, көмәјә чағырын». Бу һәгигәтдирми? Доғруданмы өлүләр дириләрә көмәк едә биләр? Бу суала Мүгәддәс Китабын вердији ајдын ҹаваб сизи тәәҹҹүбләндирә биләр.

Өлүләр һарадаса јашамаға давам едирми?

Мүгәддәс Китаб өлүләрин һансы вәзијјәтдә олдуғуну садә, ачыг-ајдын шәкилдә изаһ едир. Ваиз 9:5 ајәсиндә јазыланлара диггәт јетирин: «Дириләр өләҹәкләрини билир, анҹаг өлүләр һеч нә билмир. Онлара даһа һеч вахт әвәз верилмәјәҹәк». Өлүләр һиссләрә малик ола биләрми? 6-ҹы ајәдә ҹаваб верилир: «Өлүләрин севҝиси, нифрәти, пахыллығы артыг мәһв олуб. Сәма алтында ҝөрүлән ишләрдә даһа пајлары олмајаҹаг». Һәмчинин һәмин фәслин 10-ҹу ајәси дә буну вурғулајыр: «Өлүләр дијарында нә иш, нә фикир, нә билик, нә дә һикмәт вар». «Өлүләр дијары» кими тәрҹүмә олунан ибрани сөзү «шеол» бәшәријјәтин үмуми мәзарыны билдирир. Диггәтә лајигдир ки, буна мүвафиг олан јунан сөзү «һадес» Иса Мәсиһин өләндән сонра мүвәггәти олараг һарада олдуғуну ҝөстәрмәк үчүн ишләдилмишди (Һәвариләрин ишләри 2:31).

Иса һәлә сағ икән бир чохларына көмәк едирди, амма о билирди ки, өләҹәк. О, гәбирдә оланда да инсанлара көмәк едә биләҹәјини дүшүнүрдүмү? Хејр. О, өлүмүнү ишләмәјин мүмкүн олмадығы ҝеҹә вахты илә мүгајисә етмишди (Јәһја 9:4). Иса јахшы билирди ки, инсан өләндә ‘көлҝә кими’, јәни ҝүҹсүз олур (Јешаја 26:14).

Өлүм һагда охшар фикри вурғуламаг үчүн Иса, һәмчинин мүгајисәдән истифадә етмишди. Досту Лазар өләндә, о, өлүмү јухуја бәнзәтмишди (Јәһја 11:11—13). Биз јатан инсандан көмәк ҝөзләмирик, елә дејилми? Јатан адам һеч нә һисс етмир вә онун һеч кимә көмәји дәјмир.

Өлән инсандан јашајан бир һиссә ајрылырмы?

Өлән адам шүурсуз вә фәалијјәтсиз олур. Аллаһ Адәмә һөкм кәсәрәк белә демишди: «Алын тәринлә чөрәк јејәҹәксән. Ахырда торпаға гајыдаҹагсан, чүнки орадан ҝөтүрүлмүсән, она ҝөрә ки јерин торпағысан, торпаға да гајыдаҹагсан» (Јарадылыш 3:19). Јеһова Адәми торпагдан јаратмаздан әввәл о, һарада иди? Тәбии ки, о, һеч јердә јашамырды! Бир сөзлә, Адәм мөвҹуд дејилди! Беләликлә, Јеһова Аллаһ Адәмә «торпаға гајыдаҹагсан» дејәркән онун өләҹәјини вә торпаға гарышаҹағыны нәзәрдә тутурду. Адәм һеч бир руһани аләмә көчмәди. Өлмәклә Адәм јенидән јохлуға гајытды. Онун ҹәзасы башга аләмә көчмәк јох, өлүм, һәјатын мөвҹуд олмамасы олду (Ромалылара 6:23).

Лакин кимсә дејә биләр: «Бәс өлү илә әлагә јаратдығыны, сәсини ешитдијини, һәтта өзүнү ҝөрдүјүнү сөјләјән инсанларын данышдыгларына нә ад вермәк олар?» Бу ҹүр мәлуматлар дүнјанын бир чох јерләриндә мүтәмади ешидилир. Белә сөзләр әзизини, јахуд јахын достуну итирәнләрә үмид верир, онлары өлүләрлә әлагә гура билдијини иддиа едән руһ чағыран медиумлара мүраҹиәт етмәјә тәшвиг едир.

Бәс бу ҹүр әһвалатлар һәгигәтдирми? Әҝәр беләдирсә, бәс онда бу, јухарыда Мүгәддәс Китабдан ҝәтирилән фикирләрә зидд ҝетмирми? Мәсиһ Иса Аллаһын Кәламынын һәгигәт олдуғуну демишди (Јәһја 17:17). Һәгигәт өзү-өзүнә зидд ҝедә билмәз. Өлүләрин јашајанлара көмәк едә биләҹәји илә бағлы дејилән иддиалара неҹә мүнасибәт ҝөстәрмәли олдуғумуза даир әслиндә Мүгәддәс Китабда ајдын ҝөстәриш вар. Мүгәддәс Китабда өлүдән көмәк алмаға ҹәһд ҝөстәрән бир адамдан бәһс едилир. Һәмин һадисәни диггәтлә охусаг, һәгигәт үзә чыхаҹаг.

Падшаһ өлүдән көмәк истәјир

Исраилин шималында ганлы дөјүшләр ҝедирди. Дәһшәтли филишт ордусу Шаул падшаһа вә онун адамларына гаршы вурушурдулар. Шаул филиштлиләрин дүшәрҝәсини ҝөрәндә «горхудан үрәји әсди». Һакимијјәтинин белә бир дөврүндә Шаул һәгиги ибадәтдән үз дөндәрди. Бу, она ҝәтириб чыхарды ки, Јеһова онун көмәк үчүн етдији јалварышларына һај вермәди. Бәс Шаул көмәк үчүн һара үз тутсун? Аллаһын пејғәмбәри Шамуел дә артыг өлмүшдү (1 Шамуел 28:3, 5, 6).

Шаул рәһбәрлик үчүн Ен-Дордакы ҹиндар гадына мүраҹиәт етди. О јалварыб ҹиндардан хаһиш етди ки, онун үчүн өлмүш Шамуели чағырсын. Ҹиндар бир руһ чағырды. Бу «Шамуел» Шаула деди ки, филиштлиләр онлары мәғлуб едәҹәк, Шаул вә оғуллары исә дөјүшдә өләҹәк (1 Шамуел 28:7—19). Бу сөзләри дејән һәгигәтәнми Шамуелин өзү иди?

Бу һагда дүшүнүн. Мүгәддәс Китабда дејилир ки, инсан өләндә ‘торпаға дүшүр’ вә ‘нијјәтләри јох олур’ (Мәзмур 146:4). Һәм Шаул, һәм дә Шамуел билирди ки, Аллаһ ҹиндарлара вә руһ чағыранлара мүраҹиәт етмәји мүһакимә едир. Мәһз бу сәбәбдән Шаул әввәлләр өлкәни бу ҹүр ишләрлә мәшғул олан инсанлардан тәмизләмишди (Левилиләр 19:31).

Бунун үзәриндә дүшүнүн. Әҝәр һәгигәтән дә садиг Шамуел руһ кими јашајырдыса, о, Аллаһын әмрини позар вә Шаулла ҝөрүшмәк үчүн медиумла әлбир олардымы? Јеһова Шаулла данышмырды. Бәс онда демәк олармы ки, ҹиндар гадын маһијјәт етибары илә Күлли-Ихтијар Аллаһы өлмүш Шамуелин васитәсилә Шаулла данышмаға мәҹбур етмишди? Хејр. Ајдындыр ки, бу «Шамуел» һеч бир вәҹһлә Аллаһын һәгиги пејғәмбәри ола билмәзди. Бу руһ, өлмүш Шамуелин ҹилдинә ҝирмиш ҹин иди.

Ҹинләр бәшәр тарихинин әввәлиндә Аллаһын һакимијјәтинә гаршы үсјана галхан мәләкләрдир (Јарадылыш 6:1—4; Јәһуда 6). Бу ҹинләр инсан сағ оланда ону изләјә биләрләр; һәр бир инсанын неҹә данышдығындан, бахдығындан вә һәрәкәт етдијиндән хәбәрдардырлар. Ҹинләр ҹан атырлар ки, Мүгәддәс Китабда дејиләнләрин ҝуја јалан олдуғуну сүбут етсинләр. Буна ҝөрә дә Мүгәддәс Китабын бизи спиритизмин истәнилән нөвүндән узаг дурмаға сәсләмәси тәәҹҹүблү дејил! (Ганунун тәкрары 18:10—12). Бу пис руһлар бу ҝүн дә фәалдырлар.

Инди биз баша дүшә биләрик ки, нә үчүн бәзиләри өлән әзизинин «сәсини ешитдијини» вә ја «өзүнү ҝөрдүјүнү» дејир. Һәрдән инсанлар белә ҝөрүнтүләрин фајдалы олдуғуну дүшүнсә дә, бу пис руһларын әсас мәгсәди инсанлары алдатмагдырb. (Ефеслиләрә 6:12). Һәмчинин бир шеји дүшүнүн: Јеһова бизим гејдимизә галан мәһәббәтли Аллаһдыр. Әҝәр өлүләр һәгигәтән дә һарадаса јашамаға давам едирләрсә, һәмчинин достларынын вә аиләсинин дадына чата билирләрсә, о заман мәһәббәтли Јараданымыз онларла әлагә гурмағы гадаған едәрдими вә буна «ијрәнҹ» бир шеј кими бахардымы? Әлбәттә ки, јох! (1 Петер 5:7). Бәс онда көмәји һансы етибарлы мәнбәдән ала биләрик?

Дириләр вә өлүләр үчүн әсил көмәк

Дејиләнләрдән баша дүшдүк ки, өлүләр дириләрә көмәк едә билмәзләр. Бундан әлавә, көмәк үчүн өлүләрә мүраҹиәт етмәк нәинки һеч бир нәтиҹәни вермир, һәтта зијан да ҝәтирир. Белә ки, бу ҹүр давранмагла биз Аллаһын ганунуну позар вә тәһлүкәли вәзијјәтә, ҹинләрин тәсири алтына дүшә биләрик.

Мүгәддәс Китаб бизи ән јахшы көмәк Мәнбәјинә — Јараданымыз Јеһоваја јөнәлдир. О, бизи өлүмүн пәнҹәсиндән хилас едә биләр (Мәзмур 33:19, 20). Јеһова бизә көмәк етмәјә һәр заман һазырдыр. Онун вердији үмид, јаланчы медиумларын вердији үмиддән фәргли олараг, реалдыр.

Мәгаләнин әввәлиндә ады чәкилән Тамба медиумларын тәгдим етдији сахта үмидлә Јеһованын бизә чатдырдығы һәгигәт арасындакы фәрги шәхси тәҹрүбәсиндә ҝөрдү. Ҹиндар она өлмүш әҹдадларынын руһуна гурбан ҝәтирмәсә, мәктәб имтаһанындан кәсиләҹәјини иддиа едирди. Тамба Јеһованын Шаһидләри илә Мүгәддәс Китабы өјрәнмәјә башлады. О, өлүләрин әслиндә һансы вәзијјәтдә олдуғуну, һабелә өзләрини өлмүш әҹдадларын јеринә гојан пис гүввәләр һаггында өјрәнди. Анасынын медиумдан көмәк истәмәси үчүн она ҝүҹлү тәзјиг етмәсинә бахмајараг, Тамба: «Бу дәфә кәсилсәм, ҝәлән ил јенә ҹәһд ҝөстәрәрәм»,— дејәрәк имтина етди.

Бунун ахыры неҹә олду? Тамба имтаһандан әла гијмәт алды! Буна мат галмыш анасынын медиумлара инамы итди вә бундан сонра гурбан ҝәтирмәк һагда бир кәлмә дә кәсмәди. Тамба өјрәнди ки, Јеһова бизи ‘дириләр барәсиндә өлүләрлә данышмагдан’ чәкиндирир (Јешаја 8:19). Мүгәддәс Китабы өјрәнмәк Тамбаны әмин етди ки, әҝәр Аллаһын ганунундан зөвг аларса, уғур газанаҹаг (Мәзмур 1:1—3).

Бәс өлән әзизләримиз һаггында нә демәк олар? Онлар үчүн һеч бир үмид јохдур? Јашајанлара јардым етмәклә јанашы, Јеһова гәбирләрдә оланлара да көмәк едәҹәјини вәд едир. Өләнләрин нә гәдәр ҝүҹсүз олдуғуну тәсвир етдикдән сонра Јешаја пејғәмбәр 26-ҹы фәслин 19-ҹу ајәсиндә нида едир: «Сәнин өлүләрин јашајаҹаг.... Еј торпаг алтында јатанлар, ојанын, севинҹ нәғмәсини охујун». Пејғәмбәрликдә бу сөзләрин ардынҹа ‘торпагдакы өлүләрин’ јенидән јашајаҹағы дејилир.

Бир тәсәввүр един! Гәбирләрдә јатан милјардларла көмәксиз инсан һәјата гајыдаҹаг! Бәли, Мүгәддәс Китабда дејилир ки, Јеһова өлүләрә һәјат вермәјин ‘һәсрәтини чәкир’ (Әјјуб 14:14, 15). Бу вәдләр инанылмаз кими ҝөрүнүр? Иса Мәсиһ бу үмидин ҝерчәк олдуғуна о гәдәр әмин иди ки, өлмүш инсанларын артыг Јеһованын ҝөзүндә јашадыгларыны демишди (Лука 20:37, 38).

Истәјәрдинизми ки, сизин дә бу ҹүр үмидиниз олсун?c Мүгәддәс Китабдан дәгиг билији алмаға давам един. Өјрәндикҹә әмин олаҹагсыныз ки, Јеһова һәм јашајанлара, һәм дә өләнләрә көмәк едә биләр вә Онун вәди «һәгиги вә етимада лајигдир» (Вәһј 21:4, 5).

[Һашијәләр]

[23-ҹү сәһифәдәки јазы]

Итирдијимиз әзизимизин һәсрәтини чәкмәк нормалдыр

[24-ҹү сәһифәдәки шәкил]

Шаул падшаһла данышан доғруданмы Шамуелин руһу иди?