Астролоҝија вә фалчылыг ҝәләҹәјә пәнҹәрәдир?

АСТРОЛОҜИЈА

Астролоҝијаја улдузларын, ајын вә планетләрин инсанларын һәјатына бөјүк тәсири олдуғу фикринә әсасланан инанҹларын үмуми адыдыр. Астрологлар иддиа едир ки, инсан дүнјаја ҝәлән ан улдузларын сәмадакы дүзүлүшү онун хасијјәтинә вә ҝәләҹәјинә тәсир едир.

Астролоҝијанын көкү гәдим Бабилистана ҝедиб чыхса да, ҝүнү бу ҝүн дә чох популјардыр. 2012-ҹи илдә Бирләшмиш Штатларда апарылан бир сорғуда иштирак едәнләрин үчдә бири астролоҝијаны «бир нөв елм» һесаб етдијини демиш, он фаизи исә онун елм олдуғуна шүбһә етмәдијини билдирмишдир. Бәс астролоҝијаны елм адландырмаг олар? Хејр. Буну нөвбәти сәбәбләр әсасында дејә биләрик.

• Астрологларын дедикләринин әксинә олараг, планетләр вә улдузлар инсанларын һәјатына тәсир етмәк гүввәсинә малик дејил.

• Чох вахт дејилән прогнозлар о гәдәр үмуми олур ки, онлары һамыја шамил етмәк олар.

• Бу ҝүн астроложи һесабламалар гәдим инанҹа — планетләрин јерин әтрафында дөвр етмә инанҹына әсасән апарылыр. Әслиндә исә планетләр ҝүнәшин әтрафында дөвр едир.

• Мүхтәлиф астрологларын ејни шәхсин һәјаты һаггында вердији прогнозлар үст-үстә дүшмүр.

• Астролоҝија инсанлары доғум тарихләринә ҝөрә, 12 група, јәни зодиак ишарәсинә ајырыр. Һәр зодиак ишарәси үчүн Ҝүнәшин онун әразисиндән кечмә вахтына ујғун тарих тәјин олунуб. Әсрләр әрзиндә Јер күрәси фәзада јерини дәјишдијиндән бу тарихләр тәјин олунан зодиак ишарәләри илә ујғун ҝәлмир. Лакин астролоҝијада һәлә дә бу тарихләрдән истифадә едилдији үчүн инсанын доғулдуғу тарих зодиак ишарәләри илә үст-үстә дүшмүр.

Белә фикир вар ки, зодиак ишарәләри инсанларын характериндән хәбәр верир. Әслиндә исә ејни тарихдә доғулан инсанлар һеч дә ејни хасијјәтдә олмурлар; инсанын доғум тарихи онун хасијјәти һаггында һеч нә ачыгламыр. Астрологлар инсанлары олдуғу кими ҝөрмәк әвәзинә, онларын хасијјәти барәдә өз еһтималлары әсасында фикир јүрүдүрләр. Мәҝәр буну гәрәзли мүнасибәт адландырмаг јеринә дүшмүр?

ФАЛЧЫЛЫГ

Гәдим заманларда инсанлар фалчылара үз тутурдулар. Бәзиләри һејванларын вә инсанларын дахили органларында вә ја хорузун дәни неҹә димдикләмәсиндә дә мәна ахтарырды. Диҝәрләри чај јарпаглары, јахуд гәһвә дәнәләри илә фала бахырды. Бу ҝүн фалчылар тарот картлары, кристал күрәләр, зәр фалы вә диҝәр үсуллардан истифадә едәрәк инсанын ҝәләҹәјини «охујурлар». Бәс фалчылыг ҝәләҹәји өјрәнмәк үчүн етибарлы үсулдур? Хејр. Ҝәлин бәзи мәгамлара диггәт јетирәк.

Ҝөтүрәк ујғунлуг мәсәләсини. Мүхтәлиф фалчылыг үсуллары васитәсилә дејилән прогнозлар чох вахт бир-бириндән фәргләнир. Һәтта ејни үсул васитәсилә верилән прогнозлар да мүхтәлиф олур. Мәсәлән, ејни картла фала бахан ики бахыҹынын вердији мәлумат әслиндә ејни олмалыдыр. Лакин адәтән бу, белә олмур.

Фалчыларын нијјәти вә истифадә үсуллар инсанда шүбһә доғурур. Тәнгидчиләр гејд едир ки, бахыҹыларын истифадә етдији картлар, кристал күрәләр садәҹә ҝөздән пәрдә асмаг үчүндүр вә онлар әслиндә бу вәсаитләр васитәсилә јох, инсанын реаксијасына, давранышына фикир верәрәк нәтиҹә чыхарырлар. Мәсәлән, тәҹрүбәли фалчы үмуми суаллар верир вә мүштәринин нә дедијини, өзүнү неҹә апардығыны диггәтлә изләјәрәк онун һаггында мәлумат топламаға чалышыр. Сонра мүштәринин өзүнүн дә хәбәри олмадан вердији бу мәлуматлары, белә десәк, өзүнә сатыр. Мүштәриләрин етибарыны газанан бир чох фалчы бу јолла күллү мигдарда пул әлдә едир.

АЛЛАҺЫН КӘЛАМЫНДА НӘ ДЕЈИЛИР?

Астролоҝија вә фалчылыға әсасән, инсанын ҝәләҹәји әввәлҹәдән јазылыб. Бәс бу, беләдирми? Мүгәддәс Китабда ҝөстәрилир ки, инсан нәјә инандығыны вә нә етмәк истәдијини өзү гәрарлашдырмаг игтидарындадыр вә вердији гәрарлар онун ҝәләҹәјинә тәсир едир (Јушә 24:15).

Аллаһа ибадәт едән инсанларын астролоҝијаја вә фалчылыға инанмамаг үчүн башга бир сәбәби дә вар: Аллаһ бу ишләри һарам бујурур. «Аранызда... рәммал, сеһрбаз, фала бахан, ҹадуҝәр, овсунчу, ҹиндар јанына ҝедән, ҝәләҹәји дејән, өлүләри чағыран олмамалыдыр. Чүнки бу ишләри ҝөрән һәр кәс Јеһованынa ҝөзүндә мәнфурдур» (Ганунун тәкрары 18:10—12).