Аллаһын Кәламы һәгигәтдир
1. Мүгәддәс Китабда һансы ваҹиб мә’луматлар вар?
1 Мәзмурчу јазырды: “Сөзүнүн һамысы һәгигәтдир” (Мәз. 119:160). Илһамланмыш Кәламы васитәсилә, Јеһова һәјатымызын ән зәрури суалларына ганеедиҹи ҹаваб верир. О, еһтијаҹы оланлара тәсәлли вә үмид верир, һәмчинин Она неҹә јахынлаша биләҹәјимизи ҝөстәрир. Миннәтдарлыг һисси дујан бир гадын дејир: “Мүгәддәс Китаб һәгигәтини өјрәнәндә, санки гаранлыг вә тутгун бир јердән чыхыб тәмиз, парлаг вә гәшәнҝ отаға дахил олурсан”. Бәс сән, јаранан һәр бир имкандан истифадә едәрәк Аллаһын Кәламындан олан һәгигәти бөлүшмәјә ҹәһд ҝөстәрирсәнми?
2. Мүгәддәс Китаб инсанларын һәјатыны неҹә јахшылашдырыр?
2 Аллаһын Кәламынын гүввәси вә ҹазибәдарлығы. Мүгәддәс Китаб һәгигәти үрәкләри риггәтә ҝәтирмәјә вә һәјаты дәјишмәјә гадирдир (Ибр. 4:12). Роза адында ҝәнҹ бир гадын фаһишәликлә мәшғул олур, сәрхошлуг едир вә наркотик гәбул едирди. О дејир: “Бир ҝүн үмидим һәр шејдән үзүләндә, Јеһованын Шаһидләри олан бир әр-арвад мәнә, Мүгәддәс Китабын проблемләримизи неҹә һәлл етмәкдә көмәк етдијини сөјләдиләр. Мән Аллаһын Кәламыны өјрәнмәјә башладым вә ашкар етдим ки, бу, чох һејранедиҹидир. Һараданса гүввә әлдә етдим вә бир ај әрзиндә јени, тәмиз һәјата башладым. Инди һәјатымын мә’насыны тапмышам, буна ҝөрә дә мәнә алкогол вә наркотик лазым дејил. Вә Јеһованын досту олмаға ҝүҹлү истәјим олдуғу үчүн, Онун нормаларына әсасән јашамаг гәрарына ҝәлдим. Әҝәр Аллаһын Кәламы сајәсиндә әлдә етдијим мүдриклик олмасајды, јәгин ки, өзүмә гәсд етмишдим” (Мәз. 119:92).
3. Нәјә ҝөрә Мүгәддәс Китаб хәбәрини данышмагдан бизи һеч нә сахламалы дејил?
3 Мүасир китабларын әксәријјәтиндән фәргли олараг, Мүгәддәс Китаб “һәр милләтдән, бүтүн гәбиләләрдән, халглардан вә дилләрдән олан” инсанлара мүраҹиәт едир (Вәһј 7:9). Аллаһын арзусу одур ки, “бүтүн инсанлар хилас олуб, һәгигәти дәрк етсинләр” (1 Тим. 2:4). Буна ҝөрә дә биз, инсанын һәјат тәрзинә ҝөрә һеч заман белә бир нәтиҹәјә ҝәлмәмәлијик ки, о һәгигәти гәбул етмәјәҹәк. Әксинә, ҝәлин Падшаһлыг һаггында хәбәри һамыја данышаг, бунунла јанашы һәр дәфә имкан јарананда Мүгәддәс Китабын өзүндән охумаға чалышаг.
4. Хидмәт заманы Мүгәддәс Китабы неҹә тәтбиг едә биләрик?
4 Мүгәддәс Китабы тәтбиг ет. Хидмәтдә Мүгәддәс Китабы тәтбиг етмәјин чох үсуллары вар. Журналлар тәгдим едәркән, чап олунмуш тәгдимәдәки Мүгәддәс Китаб ајәләрини оху. Бә’зи тәблиғчиләр јени нәшри тәклиф едәркән, ҝириш сөзләриндә мүнасиб Мүгәддәс Китаб ајәләрини охумағы хошлајырлар. Инсана тәкрар баш чәкән заман, һәр дәфә бир вә ја бир нечә Мүгәддәс Китаб ајәси оху, беләликлә дә һәмән адама дәгиг билик әлдә етмәкдә көмәк ет. Әҝәр Мүгәддәс Китаб өјрәнмәси кечирирсәнсә, гој сизин мүзакирәнизин әсасыны Мүгәддәс Китаб ајәләри тәшкил етсин. Һәтта хидмәтдә олмајан заман белә, Мүгәддәс Китабы әлинин алтында сахла ки, имкан јаранан кими гејри-рәсми сурәтдә шаһидлик едә биләсән (2 Тим. 2:15).
5. Нәјә ҝөрә Мүгәддәс Китабы хидмәтдә тәтбиг етмәјә сә’ј ҝөстәрмәлијик?
5 Ҝәлин, хидмәт заманы һәр имкан јарананда Мүгәддәс Китабы тәтбиг едәрәк, башгаларына, Аллаһын һәгигәт Кәламынын тәшвигедиҹи гүввәсиндән фајдаланмаға көмәк едәк (1 Салон. 2:13).