Башгалары сәнә бахыб нә өјрәнир?
1. Шаҝирдләри Иса илә хидмәтдә оларкән ондан нә өјрәнирдиләр?
1 Иса демишди: «Бојундуруғуму үзәринизә ҝөтүрүн вә Мәндән өјрәнин» (Мат. 11:29). Ајдындыр ки, о, башгаларыны тәкҹә сөзләри илә јох, ҝөзәл нүмунәси илә дә өјрәдирди. Бир дүшүн, шаҝирдләри Исаја бахыб ондан нә өјрәнирдиләр? О, мүлајим, хејирхаһ вә мәһәббәтли иди (Мат. 8:1—3; Марк 6:30—34). О, һәгигәтән дә һәлим иди (Јәһ. 13:2—5). Шаҝирдләри Иса илә хидмәтдә оланда онун һәгигәти башгаларына мәһарәтлә өјрәдәрәк јорулмадан тәблиғ етдијини ҝөрүрдүләр (Лука 8:1; 21:37, 38). Хидмәтдә бизи мүшаһидә едәнләрә бәс биз неҹә тәсир ҝөстәририк?
2. Саһәдә тәблиғ едәркән садә ҝејимимиз вә нүмунәви давранышымыз инсанлара неҹә тәсир едә биләр?
2 Саһәдә тәблиғ етдијимиз инсанлар. Садә ҝејимимиз, јахшы давранышымыз вә инсанлара сәмими марағымыз онлара ҝүҹлү тәсир бағышлаја биләр (2 Кор. 6:3; Филип. 1:27). Онлар Мүгәддәс Китаба тез-тез мүраҹиәт етдијимизә диггәт јетирирләр. Диҝәрләринә исә онлары һөрмәтлә динләмәјимиз тәсир едир. Һеч вахт унутма ки, бу саһәләрдә јахшы нүмунә гојмаг инсанлары Падшаһлыг хәбәринә ҹәлб едә биләр.
3. Баҹы-гардашларымыза неҹә јахшы тәсир ҝөстәрә биләрик?
3 Баҹы-гардашларымыз. Баҹы-гардашларымыза јахшы тәсир бағышлаја биләҹәјимизин үзәриндә дә дүшүн. Бизим хидмәтдә сәјимиз онлары ејни ҹүр давранмаға тәшвиг едә биләр. Дәмир дәмири итиләдији кими, јахшы һазырладығымыз тәгдимәләр дә башгаларыны тәблиғ етмәк баҹарыгларыны тәкмилләшдирмәјә тәшвиг едә биләр (Сүл. мәс. 27:17). Марагланан инсанларла бағлы дәгиг гејдләр етмәјә чалышмағымыз вә тез бир заманда онлара јенидән баш чәкмәјимиз баҹы-гардашларымызда бу ҹүр давранмаг истәјини ојада биләр. Хидмәтимизи там шәкилдә иҹра етмәклә биз һәмиманлыларымыза ҝөзәл нүмунә верәҹәјик (2 Тим. 4:5).
4. Нәјә ҝөрә вахташыры олараг башгаларына неҹә нүмунә вердијимизи јохламалыјыг?
4 Нәјә ҝөрә вахташыры олараг давранышынын, дедикләринин вә вердијин нүмунәнин башгаларына неҹә тәсир ҝөстәрдијини јохламајасан? Нүмунәви давранышымыз Јеһованы разы салаҹаг вә бизи һәвари Павелин һиссләринә шәрик олмаға тәшвиг едәҹәк. О, белә демишди: «Мән Мәсиһи тәглид етдијим кими, сиз дә мәни тәглид един» (1 Кор. 11:1).