Ҹәннәтә апаран јол

Өтән мәгаләләрдән өјрәндик ки, Аллаһ тезликлә бу шәр дүнјаја, онун бүтүн проблемләринә сон гојаҹаг. Бу мүтләг олаҹаг! Чүнки Аллаһ Өз Кәламында вәд едир:

«Дүнја өз истәкләри илә бәрабәр кечиб ҝедир» (1 ЈӘҺЈА 2:17).

Сөзсүз, сағ галанлар да олаҹаг. Чүнки һәмин ајәдә белә бир вәд дә јазылыб:

«Аллаһын истәјини јеринә јетирән исә әбәди јашајыр».

Демәли, сағ галмаг үчүн Аллаһын истәјини јеринә јетирмәк ваҹибдир. Аллаһын истәјинин нәдән ибарәт олдуғуну билмәк үчүн исә әввәлҹә Ону танымалыјыг.

АЛЛАҺЫ ТАНЫЈЫН ВӘ ХИЛАС ОЛУН

Шәкилләр: 1) Тибб баҹысы јорғун вә мәјус һалда хәстәхананын дөшәмәсиндә отуруб. 2) О, хәстәхананын буфетиндә фасилә едәндә ҝөрүр ки, иш јолдашы севинҹлә журнал охујур. 3) Иш јолдашы тибб баҹысына Мүгәддәс Китабдан ајә охујур вә она jw.org
сајтынын визит картыны верир.

Мүгәддәс Китабда дејилир: «Әбәди һәјат одур ки, Сәни, тәк ҝерчәк Аллаһы... танысынлар» (Јәһја 17:3). Дүнјанын сонунда хилас олуб әбәди јашамаг истәјириксә, Аллаһы танымалыјыг. Аллаһы танымаг садәҹә Аллаһын варлығына инанмаг, јахуд Онун һагда бәзи шејләри билмәк демәк дејил. Биз Аллаһла дост олмалыјыг. Киминләсә достлуғумузу мөһкәмләндирмәк үчүн онунла вахт кечирмәк лазымдыр. Бу, Аллаһла достлуға да аиддир. Ҝәлин Мүгәддәс Китабдан бәзи ваҹиб һәгигәтләрә нәзәр салаг. Бунлар бизә Аллаһла дост олмаға вә бу достлуғу горумаға көмәк едәҹәк.

Мүгәддәс Китабдакы һәгигәтләр

Аллаһын әзәли нијјәти о иди ки, инсанлар Ҹәннәтдә јашасын.

Аллаһ Адәмлә Һәвваны јаратды вә онлары Әдән бағында, јәни Ҹәннәтдә мәскун етди. Адәмлә Һәвва ҝүнаһсыз, камил идиләр. Хошбәхт һәјат сүрсүнләр дејә Аллаһ онлары һәр шејлә тәмин етмишди. Адәмлә Һәвва һеч вахт өлмәјиб әбәди јашаја биләрдиләр. Амма бир шәртлә: онлар Аллаһла достлуғу горумалы идиләр. Ди ҝәл, онлар Аллаһын вердији садә бир әмри поздулар.

Дүнјадакы әзаб-әзијјәтин сәбәби вар.

Адәм Аллаһын итаәтиндән чыхмагла һәм өзүнүн, һәм дә бүтүн бәшәријјәтин әбәди јашамаг имканыны бада верди. Мүгәддәс Китаб буну белә изаһ едир: «Ҝүнаһ бир адам васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди» (Ромалылара 5:12). Неҹә ки, һансыса бир гүсур валидејнләрдән өвлада ирсән кечә билир, ејнилә, ҝүнаһ да ирс олараг Адәмдән өвладларына кечди. Мәһз буна ҝөрә инсанлар гоҹалыр вә өлүр.

Аллаһ бизә көмәк етмәк үчүн артыг тәдбир ҝөрүб.

Мүгәддәс Китабда дејилир: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһја 3:16). Аллаһ Иса Мәсиһи јер үзүнә ҝөндәрди ки, һәјатыны бизим уғрумузда гурбан версин. Бу, Аллаһын бизә олан мәһәббәтинин изһарыдыр. Һиндистанда јашајан 86 јашлы Прабһаркар адлы бир киши дејир: «Бу барәдә дүшүнәндә Јеһованынa мәни нә гәдәр чох севдијини ҝөрүрәм. Онун мәһәббәти сајәсиндә әбәди јашајаҹағыма үмид едирәм».

Етдији јахшылыға ҝөрә Аллаһа миннәтдарлығымызы ҝөстәрә биләрик.

Мүгәддәс Китабда дејилир ки, Аллаһын бизә етдији јахшылығы гијмәтләндирдијимизи Онун әмрләринә риајәт етмәклә ҝөстәрә биләрик (1 Јәһја 2:3). Јеһова Аллаһ бизә билдирир ки, инди хошбәхт олмаг үчүн неҹә јашамалыјыг (Әшија 48:17, 18). Аллаһ бизим әзаб чәкмәјимизи истәмир. О вәд едир ки, әҝәр биз Онун өјүд-нәсиһәтинә әмәл етсәк, һәм инди хошбәхт јашајаҹағыг, һәм дә әбәди јашамаг имканымыз олаҹаг.

АЛЛАҺЫН КӘЛАМЫНЫ ҺӘР ҜҮН ОХУЈУН

Тибб баҹысы наһар фасиләсиндә Мүгәддәс Китабы охујандан сонра сәмаја бахыр. — Дүнјанын сонунда хилас олмаг үчүн дуа едиб Аллаһдан көмәк истәјин вә Онун истәјини јеринә јетирин

Биз јашамаг үчүн мүнтәзәм гидаланырыг. Амма Иса Мәсиһ демишди: «Инсан јалныз чөрәклә јашамамалыдыр, Јеһованын ағзындан чыхан һәр бир кәлмә илә јашамалыдыр» (Мәтта 4:4).

Биз бу ҝүн Јеһованын сөзләрини Мүгәддәс Китабын сәһифәләриндән охуја биләрик. Бу китабы охудугҹа, сиз Аллаһын кечмишдә вә инди ҝөрдүјү ишләрлә таныш олаҹагсыныз вә ҝәләҹәкдә нәләр едәҹәјини өјрәнәҹәксиниз.

ДУА ЕДИБ АЛЛАҺДАН КӨМӘК ИСТӘЈИН

Бәзән инсан Аллаһын дедији кими јашамаг истәјир, амма Онун ҝүнаһ һесаб етдији әмәлләрдән әл чәкә билмир. Бу заман Аллаһы танымағын инсана чох бөјүк көмәји дәјә биләр.

Ҝәлин шәрти олараг Сакура адландырдығымыз бир гадынын нүмунәсинә бахаг. О, әввәлләр әхлагсыз һәјат тәрзи сүрүрдү. Анҹаг Мүгәддәс Китабы арашдыранда ҝөрдү ки, Аллаһ әхлагсызлыг етмәмәји бујурур (1 Коринфлиләрә 6:18). Сакура дуа едиб Аллаһдан ҝүҹ истәди вә пис әмәлиндән әл чәкә билди. Амма онда һәлә дә белә истәкләр баш галдырыр. О дејир: «Ағлыма натәмиз фикирләр ҝәләндә дуа едиб бу барәдә Јеһова илә данышырам. Билирәм ки, бу мүбаризәни тәкбашына апара билмәрәм. Дуа етмәјин сајәсиндә Јеһоваја даһа да јахын олурам». Сакура кими милјонларла инсан Аллаһла јахындан таныш олур. Аллаһ онлара һәјатларында дәјишиклик етмәјә ҝүҹ верир, салеһ өмүр сүрмәјә көмәк едир (Филиппилиләрә 4:13).

Сиз Аллаһы јахындан таныдыгҹа, Аллаһ да сизи таныјаҹаг, сизи Өзүнә дост биләҹәк (Галатијалылара 4:9; Зәбур 25:14). О заман Аллаһын вәд етдији Ҹәннәтдә јашаја биләҹәксиниз. Бәс Ҹәннәтдә һәјат неҹә олаҹаг? Нөвбәти мәгалә бу суала ҹаваб верир.

a Мүгәддәс Китаба әсасән, «Јеһова» Аллаһын адыдыр.