Фәсил 3

Јолу һазырлајан доғулур

ЕЛИЗАБЕТИН доғмаг вахты јахынлашыр. Сон үч ај әрзиндә Мәрјәм онун јанында иди. Инди исә Мәрјәм онунла сағоллашыб узун бир јол гәт едәрәк евинә, Назаретә гајытмалыдыр. Тәхминән алты ајдан сонра Мәрјәмин дә ушағы олаҹаг.

Мәрјәм ҝетдикдән бир гәдәр сонра Елизабет доғур. Хошбәхтликдән, доғуш раһат кечир, ана да, көрпә дә сағламдырлар. Елизабет ушағы гоһум-әгрәбасына, гоншуларына ҝөстәрәндә һамы чох севинир.

Исраилдә оғлан ушағы доғуланда, Аллаһын ганунуна әсасән, сәккизинҹи ҝүндә сүннәт едилирди. Бу мәрасимә ҝөрә бүтүн гоһумлар вә достлар Зәкәријјәҝилә топлашыр. Онлар ушаға атасы Зәкәријјәнин адыны гојмаг истәјирләр. Лакин Елизабет: «Јох! Онун ады Јәһја олаҹаг», — дејә етираз едир. Хатырлајырсынызса, Ҹәбрајыл мәләк демишди ки, ушаға бу ад гојулмалыдыр.

Орадакылар разылашмырлар вә бир ағыздан: «Ахы гоһумларыныз арасында бу адда адам јохдур», — дејирләр. Сонра ишарәләрлә атасындан ушаға һансы ады гојмаг истәдијини сорушурлар. Зәкәријјә бир лөвһәҹик ҝөтүрүб јазыр: «Ушағын ады Јәһјадыр». Һамы мәәттәл галыр.

Бу ан бир мөҹүзә баш верир — Зәкәријјәнин дили ачылыр! Јәгин јадыныздадыр ки, Зәкәријјә Елизабетин ушаг доғаҹағыны хәбәр верән мәләјә инанмамышды, буна ҝөрә дә онун дили тутулмушду. Инди исә, Зәкәријјә данышмаға башлајанда орадакылар һејрәтә ҝәлир вә үрәкләриндә дејирләр: «Ҝөрәсән, бу ушаг нәчи олаҹаг?»

Зәкәријјә мүгәддәс руһла долуб севинә-севинә дејир: «Исраилин Аллаһы Јеһоваја шүкүрләр олсун! Чүнки Онун Өз халгына рәһми ҝәлди, она ниҹат јолуну ачды. Гулу Давудун евиндән бизә ҝүҹлү бир хиласкар верди». Әлбәттә ки, «хиласкар» сөзү һәлә доғулмамыш Иса Мәсиһә ишарә едир. Зәкәријјә дејир ки, Аллаһ бу хиласкарын васитәсилә «бизи дүшмәнләрин әлиндән гуртардыгдан сонра Она өмүр боју ҹәсарәтлә, сәдагәт вә салеһлик ичиндә ибадәт етмәк шәрәфини бизә нәсиб едәҹәк».

Сонра Зәкәријјә өз оғлу Јәһја илә әлагәдар бир пејғәмбәрлик сөјләјир: «Еј көрпә, сән исә Аллаһ-Тааланын пејғәмбәри адланаҹагсан, она ҝөрә ки, Јеһованын гаршысында ҝедиб Онун јолларыны һазырлајаҹагсан, Аллаһымызын рәһми сајәсиндә, ҝүнаһларын бағышланмасы васитәсилә Онун халгына хилас һаггында билик верәҹәксән. Бу рәһмин сајәсиндә ҝөјдән ҝәлән шәфәг үзәримизә нур сачаҹаг, зүлмәтдә вә өлүм көлҝәсиндә отуранлара ишыг верәҹәк, аддымларымызы сүлһ јолуна истигамәтләндирәҹәк».

Бу әрәфәдә һәлә әрдә олмајан Мәрјәм Назаретә, өз евинә ҝәлиб чатыр. Бәс ҝөрәсән, онун һамиләлији ашкар оланда башына нәләр ҝәләҹәк? Лука 1:56—80; Левилиләр 12:2, 3.

▪ Јәһја Исадан нә гәдәр бөјүкдүр?

▪ Јәһјанын анадан олмасынын сәккизинҹи ҝүнүндә нәләр олур?

▪ Аллаһ Өз халгына неҹә рәһм ҝөстәрди?

▪ Габагҹадан дејилдији кими, Јәһја нә едәҹәкди?