Фәсил 10

Јерусәлимә зијарәт

БАҺАР фәслидир. Һәр ил бу вахты Јусифин аиләси јәһуди Пасха бајрамыны гејд етмәк үчүн гоһум-гоншулары илә бирҝә Јерусәлимә зијарәтә ҝедирләр. Јерусәлим Назарет шәһәриндән тәхминән 100 километр аралыда јерләшир. Инди Јусифин аиләси јола һазырлашыр вә евдә һәмишәки кими бајрамгабағы бир ҹанланма вар. Иса артыг 12 јашын ичиндәдир вә бу бајрамы хүсуси һәвәслә ҝөзләјир.

Пасха бајрамы Иса вә онун аиләси үчүн бир ҝүнлә гуртармыр. Адәтән, онлар Пасха бајрамынын арды һесаб едилән, Пасхадан дәрһал сонра башлајыб једди ҝүн давам едән Мајасыз Чөрәк бајрамына да галырлар. Јол да дахил олмагла, бүтүн зијарәт тәхминән ики һәфтә чәкир. Амма бу ил зијарәт бир гәдәр узаныр. Ҝәлин ҝөрәк нә олуб.

Әһвалат Јерусәлимдән гајыданда баш верир. Иса Јусифлә Мәрјәмин јанында олмур; валидејнләри елә фикирләширләр ки, ушаг онларла бирҝә ҝери гајыдан гоһум-гоншунун арасындадыр. Амма ҝеҹәләмәк үчүн дајананда Иса ҝәлиб чыхмыр вә онлар ону јол јолдашлары арасында ахтармаға башлајырлар, лакин тапа билмирләр. Беләликлә, Јусиф вә Мәрјәм ону тапмаг үчүн тәзәдән Јерусәлимә гајыдырлар.

Бүтүн ҝүнү ону ахтарырлар, амма тапмырлар. Нөвбәти ҝүн дә еләҹә. Нәһајәт, үчүнҹү ҝүн мәбәдә ҝедирләр вә ҝөрүрләр ки, о, мәбәддәки отаглардан бириндә јәһуди мүәллимләринин арасында отуруб онлара гулаг асыр вә суал верир.

Мәрјәм ондан сорушур: «Оғлум, сән нијә белә еләдин? Атанла мән сәни чох ахтардыг, сәни тапана гәдәр үрәјимизи једик».

Иса валидејнләринин ону һарада ахтармағы билмәдикләринә тәәҹҹүбләнир. О дејир: «Мәни нијә ахтарырдыныз? Мәҝәр билмирдиниз ки, мән Атамын евиндә олмалыјам?»

Иса валидејнләринин буну нијә билмәдикләрини анлаја билмир. Бунунла белә, онларла бирликдә евә гајыдыр. Иса һеч вахт валидејнләринин сөзүндән чыхмыр, бөјүјүб һикмәтлә долур, Аллаһын вә инсанларын һүсн-рәғбәтини газаныр. Бәли, Иса лап ушаглыгдан һәм руһани ишләрә ҹан атмагда, һәм дә ата-анаја һөрмәт ҝөстәрмәкдә ҝөзәл нүмунә верир. Лука 2:40—52; 22:7.

▪ Һәр ил баһарда Иса валидејнләри илә һара зијарәтә ҝедир? Адәтән бу зијарәт нә гәдәр чәкир?

▪ Иса 12 јашында оланда, онлар зијарәтдән гајыдаркән нә баш верир?

▪ Иса буҝүнкү ҝәнҹләр үчүн һансы нүмунәни гојуб?