Ушагларынызы өјрәдин

Иса итаәткар олмағы өјрәнди

ҺӘРДӘН сөзә бахмаг сәнә чәтин ҝәлир? ~ a Әҝәр беләдирсә, онда бурада тәәҹҹүблү бир шеј јохдур. Бәзән бу, һамы үчүн чәтин олур. Һәтта Исаја да итаәткар олмағы өјрәнмәк лазым ҝәлмишди. Сән буну билирдин? ~

Билирсән, бүтүн ушаглар кимә гулаг асмалыдырлар? ~ Бәли, ата-аналарына. Чүнки Мүгәддәс Китабда дејилир: «Рәбб јолунда валидејнләринизә итаәт един» (Ефеслиләрә 6:1). Исанын атасы кимдир? ~ Јеһова Аллаһ. О, бизим дә Атамыздыр (Матта 6:9, 10). Әҝәр десән ки, Јусиф онун атасы, Мәрјәм исә анасы олуб, јенә дә сәһв етмәзсән. Билирсән, неҹә олду ки, онлар Исанын валидејнләри олдулар? ~

Ҹәбрајыл мәләк Мәрјәмә деди ки, о, һеч вахт киши илә ҹинси әлагәдә олмаса да, ана олаҹаг. Бу һамиләлик Јеһованын ҝөстәрдији мөҹүзә сајәсиндә мүмкүн олду. Ҹәбрајыл Мәрјәмә деди: «Һагг-Тәаланын гүдрәти үстүнә көлҝә салаҹагдыр; буна ҝөрә дә, сәндән доғулаҹаг Мүгәддәсә Аллаһын Оғлу дејиләҹәкдир» (Лука 1:30—35).

Аллаһ Оғлунун һәјатыны ҝөјләрдән Мәрјәмин бәтнинә көчүрдү. Сонра о, башга ушаглар кими анасынын бәтниндә бөјүмәјә башлады. Тәхминән доггуз ај сонра Иса дүнјаја ҝөз ачды. Бу арада Јусиф Мәрјәмлә евләнди вә чохлары елә билди ки, Исанын әсил атасы Јусифдир. Әслиндә исә Јусиф онун өҝеј атасы иди. Буна ҝөрә дә демәк олар ки, Исанын ики атасы олуб!

Ҹәми 12 јашы оланда Иса сәмави Атасы Јеһованы нә гәдәр чох севдијини ҝөстәрди. Һәмин вахт Исанын аиләси адәт етдикләри кими, Јерусәлимдә Пасха бајрамыны кечирмәк үчүн узун сәфәрә чыхдылар. Сонра ҝери, Назаретә гајыданда Јусифлә Мәрјәм Исанын онларла олмадығыны һисс етмәдиләр. Ҝөрәсән, неҹә олду ки, Иса онларын ҝөзүндән јајынды? ~

Һәмин вахт Јусифлә Мәрјәмин башга ушаглары да вар иди (Матта 13:55, 56). Ҝөрүнүр, гоһумлары да онларла бирҝә сәфәрә чыхмышды. Онларын арасында аталары Зеведејлә вә еһтимала ҝөрә, Мәрјәмин баҹысы олан аналары Шаломитлә бәрабәр Јагуб вә Јәһја да вар иди. Буна ҝөрә дә, јәгин Мәрјәм ҝүман едирди ки, Иса гоһумларынын арасындадыр (Матта 27:56; Марк 15:40; Јәһја 19:25).

Јусифлә Мәрјәм Исанын ҝөзә дәјмәдијини ҝөрәндә тез-тәләсик Јерусәлимә гајытдылар. Онлар тәлаш ичиндә оғулларыны ахтармаға башладылар. Нәһајәт, үчүнҹү ҝүн ону мәбәддә тапдылар. Мәрјәм она деди: «Оғлум! Нә үчүн бизимлә белә даврандын? Будур, Сәнин атан вә мән бөјүк кәдәрлә Сәни ахтарырдыг». Амма Иса ҹаваб верди: «Мәни нә үчүн ахтарырдыныз? Билмирдинизми ки, Мән Атамын евиндә олмалыјам?» (Лука 2:45—50).

Сәнҹә, Исанын анасына бу ҹүр ҹаваб вермәси сәһв иди? ~ Валидејнләри билирдиләр ки, Аллаһын евиндә ибадәт етмәк Исанын хошуна ҝәлир (Мәзмур 122:1). Буна ҝөрә дә Иса дүшүнүрдү ки, валидејнләри ону илк нөвбәдә Аллаһын мәбәдиндә ахтармалы идиләр. Сәнҹә, бу, ағлабатан дејил? ~ Сонралар Мәрјәм Исанын дедикләри үзәриндә дүшүнүрдү.

Бәс Исанын Јусифлә Мәрјәмә мүнасибәти неҹә иди? ~ Мүгәддәс Китабда дејилир: «Иса онларла ҝетди вә Назаретә ҝәлди; вә онлара итаәт едирди» (Лука 2:51, 52). Биз Исанын бу нүмунәсиндән нә өјрәнә биләрик? ~ Бәли, биз дә валидејнләримизин сөзүнә бахмалыјыг.

Лакин Иса үчүн дә итаәткар олмаг, һәтта сәмави Атасына белә табе олмаг һәмишә асан олмурду.

Өлүмүндән әввәлки ҝеҹә Иса Јеһовадан хаһиш етди ки, она вердији тапшырыға даир фикрини дәјишсин (Лука 22:42). Амма чәтин олса да, Иса Аллаһын дедијини еләди. Мүгәддәс Китабда дејилир ки, о, «чәкдији изтирабларла итаәтли олмағы өјрәнди» (Ибраниләрә 5:8). Сәнҹә, биз дә итаәткар олмағы өјрәнә биләрик? ~

[Һашијә]

СУАЛЛАР:

▪ Неҹә олду ки, Мәрјәм Исанын анасы олду вә Исанын, мүәјјән мәнада, ики атасы олду?

▪ Нә үчүн валидејнләри Исанын онларла олмадығыны һисс етмәдиләр?

▪ Исанын фикринҹә, валидејнләри ону һарада ахтармалы идиләр?

▪ Исанын нүмунәсиндән нә өјрәнә биләрик?

[31-ҹи сәһифәдәки шәкил]

Сәнҹә, нә үчүн Јусифлә Мәрјәм Исаны илк нөвбәдә мәбәддә ахтармалы идиләр?