Фәсил 14

Илк шаҝирдләр

ГЫРХ ҝүн чөллүкдә галандан сонра Иса Мәсиһ Вәфтизчи Јәһјанын јанына гајыдыр. Иса јахынлашанда Јәһја она ишарә едәрәк јанындакы адамлара дејир: «Бәшәријјәтин ҝүнаһыны јујан Аллаһын Гузусу будур! “Мәндән сонра ҝәлән мәни өтүб габағымда дурду, чүнки о, мәндән әввәл вар иди”, — дејә һаггында данышдығым адам будур». Јердә Јәһја Исадан јашҹа бөјүкдүр, лакин о билир ки, Иса әввәлләр ҝөјләрдә мөвҹуд олуб.

Амма бир нечә һәфтә бундан габаг Иса вәфтиз олмаг үчүн ҝәләндә Јәһја дәгиг билмирди ки, Аллаһын Мәсиһи мәһз Иса олаҹаг. Јәһја етираф едир: «Мән өзүм дә ону танымырдым, лакин мән суда вәфтиз едирәм ки, Исраил ону танысын».

Јәһја Исаны вәфтиз едән заман баш верәнләри орадакы адамлара белә тәсвир едир: «Мүгәддәс руһун ҝөјдән ҝөјәрчин кими ениб онун үзәриндә галдығыны ҝөрдүм. Мән өзүм дә ону танымырдым. Анҹаг мәни суда вәфтиз етмәјә ҝөндәрән Аллаһ деди: “Мүгәддәс руһун кимин үзәринә ениб галдығыны ҝөрсән, бил ки, мүгәддәс руһла вәфтиз едән одур”. Мән дә буну ҝөрдүм вә тәсдиг етдим ки, о, Аллаһын Оғлудур».

Ертәси ҝүн Вәфтизчи Јәһја ики шаҝирди илә бир јердә иди. Иса онлара јахынлашанда Јәһја јенә дә дејир: «Аллаһын Гузусу будур!» Јәһјанын ики шаҝирди бу сөзләри ешидәндә Исанын ардынҹа ҝедир. Онлардан биринин ады Андреас, диҝәрининки исә Јәһјадыр. Бу мәлуматы да мәһз һәмин Јәһја јазмышдыр. Белә еһтимал едилир ки, бу шаҝирд Јәһја Мәрјәмин баҹысы Саломенин оғлудур, јәни Исанын халасы оғлудур.

Иса Андреасла Јәһјанын онун далынҹа ҝәлдијини ҝөрүб онлардан сорушур:

— Нә истәјирсиниз?

Онлар да ондан сорушурлар:

— Мүәллим, сән һарада галырсан?

— Ҝәлин өзүнүз ҝөрәҹәксиниз.

Бу һадисә тәхминән ҝүнорта саат дөрддә баш верир. Онлар һәмин ҝүнү Исанын јанында галырлар. Бу, Андреаса бөјүк тәсир бағышлајыр вә о ҝедиб гардашы Петери тапыр, севинә-севинә она хәбәр верир: «Биз Мәсиһи тапмышыг!» Сонра гардашыны Исанын јанына ҝәтирир. Еһтимал ки, бу вахт шаҝирд Јәһја да ҝедиб өз гардашы Јагубу Исанын јанына ҝәтирир. Амма Јәһја өзүнүн јаздығы «Хош хәбәр»дә шәхсән она аид олан бу мәлуматы тәвазөкарлыгла бурахыб.

Сәһәриси ҝүн Иса Мәсиһ Бетсајда шәһәриндән олан Филипи ҝөрүр. Андреасла Петер дә һәмин шәһәрдән идиләр. Иса Филипи дәвәт едир: «Ардымҹа ҝәл».

Филип дә өз нөвбәсиндә Натанаели (о, Бартоломеј ады илә дә таныныр) тапыб дејир: «Биз Ганунда Мусанын јаздығы вә Пејғәмбәрләрин бәһс етдији адамы, назаретли Јусифин оғлу Исаны тапмышыг». Амма Натанаелин инанмағы ҝәлмир. «Һеч Назаретдән дә фәрли бир шеј чыхар?» — дејә о сорушур.

Онда Филип тәклиф едир: «Ҝәл, өзүн бах». Онлар Исаја јахынлашанда Иса Натанаели ҝөстәриб дејир:

— Будур, гәлбиндә зәррә гәдәр дә биҹлик олмајан әсил исраилли!

— Сән мәни һарадан таныјырсан? — дејә Натанаел сорушур.

— Филип сәни чағырмаздан әввәл мән сәни ҝөрмүшдүм. Сән әнҹир ағаҹынын алтында идин.

Һејрәтини ҝизләдә билмәјән Натанаел дејир: «Мүәллим, сән Аллаһын Оғлусан, сән Исраилин Падшаһысан!»

Иса ондан сорушур: «Сәни әнҹир ағаҹынын алтында ҝөрмүшдүм дедијимә ҝөрә мәнә инандын? Сән бунлардан да бөјүк ишләр ҝөрәҹәксән». Сонра онлара дејир: «Сизи әмин едирәм ки, сиз сәманын ачылдығыны вә Аллаһын мәләкләринин инсан Оғлунун [Иса Мәсиһин] јанына ениб-галхдыгларыны ҝөрәҹәксиниз».

Бундан бир гәдәр сонра Иса Мәсиһ бу јени шаҝирдләрини ҝөтүрүб Иордан вадисиндән Галилејаја јолланыр. Јәһја 1:29—51.

▪ Иса Мәсиһин илк шаҝирдләринин ады нәдир?

▪ Петер вә ола билсин, Јагуб Иса илә неҹә таныш олурлар?

▪ Иса Мәсиһин Аллаһын Оғлу олдуғуна Натанаел неҹә инаныр?