Фәсил 19
Иса Мәсиһ самаријалы гадына тәлим верир
ЈӘҺУДЕЈАДАН Галилејаја ҝедәркән Иса Мәсиһ вә шаҝирдләр Самарија бөлҝәсиндән кечмәли олурлар. Онлар ҝүнорта вахты динҹәлмәк үчүн Сихар шәһәри јахынлығындакы бир гујунун јанында дајанырлар. Әсрләр өнҹә Јагуб пејғәмбәрин газдығы һәмин гују инди дә дурур вә мүасир Наблус шәһәринин јахынлығындадыр.
Иса Мәсиһ динҹәлмәк үчүн орада галыр, шаҝирдләр исә јемәјә бир шеј алмагдан өтрү шәһәрә ҝедирләр. Бу вахт самаријалы бир гадын су үчүн гују башына ҝәлир. Иса она мүраҹиәт едир: «Мәнә ичмәјә су верәрсән?»
Мараглысы будур ки, јәһудиләрлә самаријалылар ҝүҹлү әдавәт уҹбатындан бир-бириләри илә данышмырлар. Буна ҝөрә дә гадын тәәҹҹүблә сорушур:
— Неҹә олур ки, сән јәһуди ола-ола мәндән — самаријалы бир гадындан су истәјирсән?
— Сәндән су истәјән адамын ким олдуғуну билсәјдин, өзүн ондан су истәјәрдин, о да сәнә һәјат сују верәрди.
— Аға, гују дәриндир, сәнин исә су чәкмәјә һеч ведрән дә јохдур. Сәндә һәјат сују һарадандыр? Мәҝәр сән бу гујуну бизә вермиш, бүтүн оғуллары вә мал-гарасы илә бирликдә бу гујунун сујундан ичмиш атамыз Јагубдан да бөјүксән?
— Бу сују ичән һәр бир адам јенә дә сусајаҹаг, анҹаг мәним верәҹәјим судан ичән адам әсла сусамајаҹаг. Бу су онун ичиндә гајнајан вә әбәди һәјат верән бир чешмә олаҹаг.
— Аға, мәнә дә бу судан вер ки, бир дә сусамајым вә бура су далынҹа ҝәлмәјим.
— Ҝет, әрини дә чағыр, бура ҝәл.
— Мәним әрим јохдур.
— Дүз дедин, әрин јохдур. Сәнин беш әрин олуб, анҹаг инди јашадығын киши әрин дејил.
— Аға, ҝөрүрәм сән пејғәмбәрсән. Бизим әҹдадларымыз Аллаһа бу дағда [јахынлыгдакы Ҝеризим дағы] ибадәт едибләр, сиз [јәни јәһудиләр] исә дејирсиниз ки, Аллаһа Јерусәлимдә ибадәт етмәк лазымдыр.
Лакин Иса Мәсиһ ајдынлашдырыр ки, ибадәт үчүн јер ваҹиб дејил. О дејир: «Елә бир вахт ҝәлир ки, һәгиги ибадәтчиләр Атаја руһла вә һәгигәтлә ибадәт едәҹәкләр. Чүнки Ата Она бу ҹүр ибадәт етмәк истәјәнләри ахтарыр. Аллаһ Руһдур вә Она ибадәт едәнләр руһла вә һәгигәтлә ибадәт етмәлидирләр».
Исанын бу сөзләриндән гадынын үрәји риггәтә ҝәлир. О дејир:
— Мән билирәм ки, Мәсиһ дејилән бир адам ҝәләҹәк. О ҝәләндә һәр шеји бизә ачаҹаг.
— Һәмин адам мәнәм.
Бир фикир верин! Ола билсин, һәјат тәрзинә ҝөрә бу гадына гоншу гадынлар пис ҝөзлә бахырлар. Онларын ҝөзүнә дәјмәмәк үчүн суја ҝүнорта вахты ҝәлән һәмин гадына Иса Мәсиһ шәрәф ҝөстәрир! О, һәлә һеч кимә өзүнүн кимлијини белә ачыг-ашкар билдирмәмишди. Бу, нә илә нәтиҹәләнир?
Хејли самаријалы иман ҝәтирир
Шаҝирдләр Сихар шәһәриндә азугә алыб ҝери гајыдырлар. Онлар ҝөрүрләр ки, Иса гујунун башында бир самаријалы гадынла сөһбәт едир. Шаҝирдләр ҝәлдикдә гадын сәһәнҝини орадаҹа гојуб шәһәрә ҝедир.
Иса Мәсиһлә сөһбәтдән тәәссүратланан гадын шәһәр әһлинә дејир: «Ај ҹамаат, ҝедин, ҝөрдүјүм бүтүн ишләри мәнә данышан адама бахын». Гадын онларын марағыны ојатмаг үчүн әлавә едир: «Бәлкә, Мәсиһ елә одур?» Бу сөзләр лап һәдәфә дәјир. Адамлар һәр шеји өз ҝөзләри илә ҝөрмәк үчүн дуруб ора ҝедирләр.
Бу арада шаҝирдләр Исаја јемәк тәклиф едирләр, лакин Иса онлара дејир: «Мәним өз јемәјим вар. Сизин ондан хәбәриниз јохдур».
Шаҝирдләр тәәҹҹүблә бир-бириндән сорушурлар: «Мәҝәр она кимсә јемәк ҝәтириб?» Иса онлара изаһ едир: «Мәним јемәјим мәни ҝөндәрәнин ирадәсини јеринә јетирмәк вә Онун ишини тамамламагдыр. Мәҝәр өзүнүз демирсиниз ки, бичинә һәлә дөрд ај вар?» Иса руһани бичини вурғулајараг дејир: «Башынызы галдырын вә тарлалара бахын, мәһсул јетишиб вә бичинә һазырдыр. Бичинчи артыг әмәк һаггыны алыр вә әбәди һәјат үчүн мәһсул јығыр ки, әкән дә, бичән дә гоша севинсинләр».
Бәлкә дә Иса Мәсиһ гадынла етдији сөһбәтин боллуҹа бәһрә вердијини артыг ҝөрүр — бу гадынын шәһадәти нәтиҹәсиндә хејли адам Исаја иман ҝәтирир. Гадын шәһәр әһлинә: «О, ҝөрдүјүм бүтүн ишләри мәнә данышды», — дејәрәк шәһадәт верир. Буна ҝөрә дә Сихар ҹамааты Исанын јанына ҝәлиб хаһиш едир ки, о, јанларында галсын вә онларла әтрафлы сөһбәт етсин. Иса дәвәти гәбул едир вә ики ҝүн онларын јанында галыр.
Самаријалылар Исаны динләјир вә чохлу адам она иман ҝәтирир. Онлар гадына дејирләр: «Биз инди јалныз сәнин дедикләринә ҝөрә она инанмырыг. Чүнки онун сөзләрини өз гулагларымызла ешитдик вә билирик ки, о, доғрудан да, дүнјанын хиласкарыдыр». Иса Мәсиһин ишләри һаггында данышаркән самаријалы гадын кими, биз дә адамларда мараг ојадыб онлары даһа чох өјрәнмәјә тәшвиг едә биләрик.
Ону да хатырладаг ки, Иса бичинә һәлә дөрд ај галдығыны дејир. Јәгин ки, Фәләстиндә јазда башлајан арпа бичини нәзәрдә тутулур. Инди һарадаса нојабр, јахуд декабр ајыдыр. Демәли, 30-ҹу илин Пасха бајрамындан сонра Иса шаҝирдләри илә тәхминән сәккиз ај әрзиндә Јәһудејада адамлары өјрәдир вә вәфтиз едирләр. Һал-һазырда онлар доғма Галилеја бөлҝәсинә ҝедирләр. Ҝөрәсән, орада онлары нә ҝөзләјир? Јәһја 4:3—43.
▪ Нә үчүн самаријалы гадын Исанын онунла данышмағына тәәҹҹүбләнир?
▪ Иса Мәсиһ һәјат сују вә ибадәт јери һаггында гадына нәләри изаһ едир?
▪ Иса Мәсиһ өзүнүн ким олдуғуну гадына неҹә билдирир? Буну һәмин гадына ачыгламасы нә үчүн гәрибә һалдыр?
▪ Самаријалы гадын неҹә шәһадәт верир вә бу неҹә гаршыланыр?
▪ Иса Мәсиһ јемәјини бичинлә неҹә әлагәләндирир?
▪ Отузунҹу илин Пасха бајрамындан сонра Исанын Јәһудејада нечә ај хидмәт етдијини неҹә билмәк олар?