Фәсил 21

Доғма шәһәриндәки синагогда

ИСА МӘСИҺ Назаретә гајыдыр, шәһәр әһли һәјәҹан ичиндәдир. Тәхминән бир ил бундан габаг о вәфтиз олмаг үчүн Јәһјанын јанына ҝедәндә ҹамаат ону ади бир дүлҝәр кими таныјырды. Инди исә мөҹүзәләр ҝөстәрән бир адам кими һәр јердә ад чыхарыб. Шәһәр сакинләри интизардадыр, онлар һәмин мөҹүзәләри бурада ҝөрмәк истәјирләр.

Иса адәти үзрә синагога ҝәләндә онларын һөвсәләси даһа да даралыр. Ибадәт вахты о, гираәт үчүн ајаға галхыр; она Јешаја пејғәмбәрин сөјләдији пејғәмбәрлик јазылмыш тумары верирләр. Иса Јеһованын мүгәддәс руһу илә мәсһ олунмуш шәхс һаггында јазылмыш јери ачыб охујур. Биз һәмин сөзләри Мүгәддәс Китабда, «Јешаја» китабынын 61-ҹи фәслиндә охуја биләрик.

Һәмин шәхсин әсирләрә азадлығы, корлара ишығы вә Јеһованын илтифат илини тәблиғ едәҹәјини охудугдан сонра Иса тумары синагог хидмәтчисинә гајтарыр вә јеринә әјләшир. Һамынын ҝөзү ондадыр. Иса, еһтимал ки, охудугларыны бир гәдәр ачыгладыгдан сонра бәјан едир: «Ешитдијиниз бу ајәләр бу ҝүн јеринә јетди».

Инсанлар онун дедији «хош сөзләрә» һејран галыр вә бир-бириндән сорушурлар: «Мәҝәр бу, Јусифин оғлу дејил?» Иса онларын мөҹүзә ҝөрмәк истәдикләрини билир, она ҝөрә дә сөзүнә белә давам едир: «Јәгин сиз “Тәбиб, әввәлҹә өзүнү сағалт” мәсәлини мәнә аид едәҹәксиниз. “Капернаһумда ҝөрдүјүн ишләрин сорағы гулағымыза чатыб, онлардан өз вәтәниндә дә елә”, — дејәҹәксиниз». Ҝөрүнүр, Исанын көһнә гоншулары һесаб едирләр ки, о, илк нөвбәдә һәмшәһәрлиләриндән олан хәстәләри сағалтмалыдыр. Буна ҝөрә дә онлар ондан инҹијибләр.

Буну анлајан Иса онлара кечмишдә олмуш һадисәләри мисал ҝәтирир: Илјас пејғәмбәрин ҝүнләриндә Исраил торпағында хејли дул гадын вар иди. Лакин Илјас онлардан һеч биринин јанына ҝөндәрилмәди. О, Сидон дијарына, исраилли олмајан бир дул гадынын евинә ҝетди вә орада мөҹүзә ҝөстәриб ону өлүмдән гуртарды. Елиша пејғәмбәрин ҝүнләриндә Исраилдә бир чох ҹүзамлы вар иди, лакин Елиша јалныз Суријалы Нааманы сағалтды.

Синагогдакылар онлардакы худбинлији вә иман чатышмазлығыны ифша едән бу мүгајисәләри ешидәндә бәрк гәзәбләнирләр. Онлар Исаны гамарлајыб дарта-дарта шәһәрдән кәнара чыхарыр вә Назарет шәһәринин тикилдији дағын сылдырымына ҝәтириб ашағы атмаг истәјирләр. Лакин Иса онларын әлиндән гуртулур вә чыхыб орадан ҝедир. Лука 4:16—30; 1 Падшаһлар 17:8—16; 2 Падшаһлар 5:8—14.

▪ Назарет ҹамааты нә үчүн һәјәҹан ичиндәдир?

▪ Исанын һәмшәһәрлиләри әввәлҹә онун нитгини неҹә динләјирләр? Сонра онлар нәјә ҝөрә гәзәбләнирләр?

▪ Ҹамаат Исаја нә етмәк истәјир?