Фәсил 48
Иса јенидән Назаретә ҝедир
ҺӘМИН ҝүн Иса Мәсиһ чох чалышмышды: о, Декаполдан гајыгла Капернаһума гајытмыш, ганахмадан әзијјәт чәкән гадыны сағалтмыш вә Јаирин гызыны дирилтмишди. Амма ҝүн һәлә гуртармајыб. Јаирин евиндән гајыданда ики нәфәр кор киши онун далынҹа дүшүб бәркдән чығырыр: «Давуд Оғлу, бизә рәһмин ҝәлсин!»
«Давуд Оғлу» демәклә бу кишиләр Исанын Давуд падшаһын тахт-таҹынын вариси, демәли, вәд едилмиш Мәсиһ олдуғуна инандыгларыны ҝөстәрирләр. Амма Иса, ола билсин онларын инадыны јохламаг мәгсәдилә, өзүнү елә апарыр ки, ҝуја онларын хаһишини ешитмир. Кишиләр исә әл чәкмирләр. Онлар та Исанын галдығы евә гәдәр онун ардынҹа ҝедир, о, евә ҝирәндә онлар да ичәри ҝирирләр.
Орада Иса онлардан сорушур: «Сизҹә, мән буну едә биләрәм? Буна инанырсыныз?»
Онлар: «Бәли, Аға, инанырыг», — дејә гәтијјәтлә ҹаваб верирләр.
Иса онларын ҝөзләринә тохунур вә дејир: «Гој инандығыныз кими олсун». Онларын ҝөзләри дәрһал ачылыр. Иса онлара бәрк-бәрк тапшырыр: «Бахын һа, буну һеч кәсә данышмајын!» Онлар исә севиндикләриндән Исанын әмрини унудуб, бүтүн әтрафда онун һаггында данышырлар.
Кишиләр ҝедәр-ҝетмәз Исанын јанына ҹинә тутулмуш бир адам ҝәтирирләр, ҹин ону лал етмишди. Иса ҹини гован кими бу адамын дили ачылыр. Ҹамаат һејрәтлә дејир: «Индијәҹән Исраилдә белә шеј олмајыб».
Бурада фәрисејләр дә вар. Онлар мөҹүзәләри инкар едә билмирләр, лакин бәдхаһ олдугларындан инамсызлыг ҝөстәрир вә Исанын мөҹүзәләринин архасында кимин дурдуғуну даныб јенә дә: «Бу адам ҹинләрин һөкмдарынын әли илә ҹин говур», — дејирләр.
Бундан бир аз сонра Иса Мәсиһ боја-баша чатдығы Назаретә јолланыр, бу сәфәр шаҝирдләри дә онунладыр. Тәхминән бир ил габаг о, бурада синагогда сөһбәт етмишди. Әввәлҹә ҹамаат онун хош сөзләрини һејрәтлә динләмиш, сонра исә вердији тәлимдән инҹијиб гәзәбләнәрәк ону өлдүрмәк истәмишди. Анҹаг Исанын кечмиш гоншуларына рәһми ҝәлир вә тәзәдән онлара көмәк әлини узадыр.
Башга јерләрдә ҹамаат ахышыб Исанын башына топлашырды, бурада исә дејәсән белә олмур. Буна ҝөрә дә о, шәнбә ҝүнү синагога ҝедир вә орада тәлим верир. Ону динләјәнләрин чоху мат-мәәттәл галыб сорушур: «Бу адамда бу гәдәр һикмәт вә мөҹүзә һарадандыр? Мәҝәр бу, дүлҝәрин оғлу дејил? Мәҝәр анасынын ады Мәрјәм дејил? Мәҝәр бу, Јагуб, Јусиф, Шимон вә Јәһуданын гардашы дејил? Бүтүн баҹылары да арамызда дејилләрми? Елә исә, бу адамда бүтүн бунлар һарадандыр?»
Бәли, онларын фикринҹә Иса ади бир инсандыр, онларын ҝөзү габағында бөјүјүб, онун аиләсини таныјырлар. Ахы о, неҹә Мәсиһ ола биләр? Бүтүн сүбут-дәлилләрә, ондакы һикмәтә вә ҝөстәрдији мөҹүзәләрә бахмајараг, онлар Исаны гәбул етмирләр. Һәтта јахын гоһум-әгрәбасы да она инанмыр. Бу сәбәбдән Иса дејир: «Пејғәмбәр тәкҹә өз јурдунда, өз евиндә вә гоһумларынын арасында һөрмәт ҝөрмүр».
Иса онларын бу инамсызлығына мәәттәл галыр. Буна ҝөрә дә о, Назаретдә ҹәми бир нечә хәстәнин үзәринә әлини гојуб сағалдыр, даһа башга мөҹүзә ҝөстәрмир. Матта 9:27—34; 13:54—58; Марк 6:1—6; Јешаја 9:7.
▪ Кор кишиләр Исаја «Давуд Оғлу» дејә мүраҹиәт етмәклә нәјә инандыгларыны ҝөстәрирләр?
▪ Фәрисејләр Исанын мөҹүзәләрини кимлә әлагәләндирирләр?
▪ Исанын Назарет әһлинә рәһми ҝәлдији нәдән ҝөрүнүр?
▪ Иса Назаретдә неҹә гаршыланыр вә нә үчүн?