Иса Мәсиһин мө’ҹүзәләри нәји ҝөстәрир?
ЈӘГИН тәәҹҹүб едәҹәксиниз ки, Иса Мәсиһин һәјатындан бәһс едән Мүгәддәс Китабын орижиналында бир дәфә дә олсун “мө’ҹүзә, фөвгәлтәбии һадисә” мә’насыны дашыјан сөзләрдән истифадә олунмур. Бә’зән “мө’ҹүзә” кими тәрҹүмә олунан гәдим јунан сөзү (динамис), һәрфи мә’нада “гүввә” демәкдир (Лука 8:46). Бу сөзү “габилијјәт” вә “гүдрәтли ишләр” кими дә вермәк олар (Матта 11:20, КМ; 25:15). Бир алимин сөзләринә ҝөрә, бу ифадә “иҹра едилән гүдрәтли иши, хүсусилә дә бу иши иҹра едән гүввәјә ишарә едир. Әсас е’тибары илә Аллаһын фәалијјәтдә олан гүввәси вурғуланыр”.
Башга бир гәдим јунан сөзү (тéрас) адәтән “мө’ҹүзәли бир шеј” мә’насыны дашыјан “харигә”, јахуд “әламәт” кими тәрҹүмә едилир (Јәһја 4:48; Һәвариләрин ишләри 2:19). Бу ифадә мүшаһидәчиләрә олан тә’сири гејд едир. Халг вә Мәсиһин шаҝирдләри онун гүдрәтли ишләринә тез-тез һејрәтләнир вә тәәҹҹүб едирдиләр (Марк 2:12; 4:41; 6:51; Лука 9:43).
Исанын мө’ҹүзәләринә аид едилән үчүнҹү јунан сөзү (симион) “әламәт” мә’насыны дашыјыр. Алим Роберт Деффинбауг јазыр ки, бу сөз “илк нөвбәдә мө’ҹүзәнин дашыдығы мә’наны нәзәрдә тутур”. О һәмчинин гејд едир: “Әламәт — Рәбб Иса һаггында һансыса һәгигәти билдирән мө’ҹүзәдир”.
Иллүзијадыр, јохса Аллаһдан верилән гүввә?
Мүгәддәс Китабда Исанын мө’ҹүзәләри инсанлары әјләндирмәк мәгсәдилә олан фокус вә ја иллүзија кими тәсвир едилмир. Онун мө’ҹүзәләри “Аллаһын әзәмәти”нин тәзаһүрү иди вә нүмунә үчүн Исанын оғландан ҹини говдуғу һадисәни ҝәтирмәк олар (Лука 9:37-43). Мәҝәр бу кими гүдрәтли ишләри ҝөрмәјә, һаггында “гүдрәтинин бөјүклүјү” дејилән Һәр Шејә Гадир Аллаһын гүввәси чатмазмы? (Ишаја 40:26). Әлбәттә ки, чатар.
Мүждәләрдә Исанын ҝөстәрдији тәхминән 35 мө’ҹүзәдән данышылыр. Лакин Мүгәддәс Китабда онун мө’ҹүзәләринин там сајы ҝөстәрилмир. Мәсәлән, Матта 14:14 ајәсиндә дејилир: “Иса... бөјүк бир издиһамла гаршылашды, онлара јазығы ҝәлди вә хәстәләрини сағалтды”. Бу заман Исанын нечә нәфәр хәстә сағалтдығы бизә мә’лум дејил.
Исанын ҝөстәрдији бу кими әзәмәтли ишләр онун Аллаһын Оғлу, вә’д едилмиш Мәсиһ олдуғу һаггында дедикләрини тәсдиг едирди. Мүгәддәс Јазыларда ајдын дејилир ки, Иса мө’ҹүзәләри Аллаһын гүввәсинин сајәсиндә иҹра едә билирди. Һәвари Петер Иса һаггында дејирди: “Онун васитәсилә Аллаһын аранызда јаратдығы мө’ҹүзәләр, харигәләр вә әламәтләрлә сизә Аллаһ тәрәфиндән тәсдиг едилмиш бир Адам иди. Өзүнүз дә билдијиниз кими” (Һәвариләрин ишләри 2:22). Башга бир вахтда Петер нөвбәти мәгамы вурғулајыр: “Аллаһын... Исаны, Мүгәддәс Руһ вә гүдрәт илә неҹә мәсһ етдијини, Онун јахшылыг едәрәк, иблисин истибдады алтында оланларын һамысына шәфа вериб, долашдығыны билирсиниз. Чүнки Аллаһ Онунла бәрабәр иди” (Һәвариләрин ишләри 10:37, 38).
Исанын мө’ҹүзәләри онун тәблиғ етдији хәбәрлә сых бағлы иди. Марк 1:21-27 ајәләриндә Исанын тә’лими вә ҝөстәрдији мө’ҹүзәләрдән биринин халга неҹә тә’сир бағышладығы ҝөстәрилир. Марк 1:22 ајәсиндә дејилир ки, инсанлар “онун тә’лиминә тәәҹҹүбләндиләр”, 27-ҹи ајәјә әсасән исә онун ҹини говдуғуну ҝөрән инсанларын һамысыны “һејрәт бүрүдү”. Исанын һәм гүдрәтли ишләри, һәм тә’лими онун вә’д едилмиш Мәсиһ олдуғуну сүбут едирди.
Иса өзүнү садәҹә Мәсиһ адландырмырды: онун Мәсиһ олдуғуну, сөзләри вә әмәлләри илә бәрабәр, мө’ҹүзәләриндә тәзаһүр олунан Аллаһ тәрәфиндән верилән гүввә дә сүбут едирди. Онун ролу вә сәлаһијјәти һаггында суал јарандыгда Иса ҹәсарәтлә деди: “Мәндә олан шәһадәт [вәфтизчи] Јәһјанынкындан даһа бөјүкдүр; чүнки Атанын Мәнә иҹра етмәк үчүн тапшырдығы бу ишләр, инди етдијим ишләр, Мәним Ата тәрәфиндән ҝөндәрилдијимә шәһадәт едир” (Јәһја 5:36).
Мө’ҹүзәләрин ҝерчәклијинин сүбутлары
Нәјә ҝөрә Исанын мө’ҹүзәләринин һәгигәтән дә баш вердијинә шүбһә етмәк лазым дејил? Онларын ҝерчәклијинин бә’зи әламәтләрини нәзәрдән кечирәк.
Гүдрәтли ишләр иҹра едәркән Иса һеч заман диггәти өзүнә ҹәлб етмирди. О һәмишә елә едирди ки, һәр бир мө’ҹүзә Аллаһа шәрәф вә иззәт ҝәтирсин. Мәсәлән, кор адамы сағалтмаздан әввәл Иса “Аллаһын ишләри онда зүһур олсун дејә” шәфа верәҹәјини вурғулады (Јәһја 9:1-3; 11:1-4).
Ҝөзбағлајыҹылардан, сеһрбазлардан вә инам илә шәфа верәнләрдән фәргли олараг, Иса һеч заман һипноздан, фокусдан вә овсундан истифадә етмир, тамаша ҝөстәрмир вә емосионал мәрасимләр кечирмирди. Онун хидмәтиндә мөвһүматлара јер јох иди, мүгәддәс сајылан шејләрдән дә истифадә олунмурду. Исанын ики нәфәр кору башгаларынын диггәтини ҹәлб етмәдән сакитҹә неҹә сағалтдығыны хатырлајаг. Мүждәдә дејилир: “Иса онлара аҹыјыб ҝөзләринә тохунду; о анда ҝөзләри ачылды вә онлар Онун ардынҹа ҝетдиләр” (Матта 20:29-34). Нә һеч бир мәрасим, нә ајин, нә дә ки, тамаша вар иди. Иса мө’ҹүзәләри ачыг сурәтдә, чох вахт ҹамаатын ҝөзү гаршысында ҝөстәрирди. Она нә хүсуси ишыгландырма системи, нә сәки, нә дә ки, реквизит тәләб олунурду. Бу ҝүн ҝөстәрилән мө’ҹүзәләрә ҝәлдикдә исә, онлары чох вахт сәнәдләр әсасында тәсдиг етмәк мүмкүн дејил (Марк 5:24-29; Лука 7:11-15).
Иса онун мө’ҹүзәләриндән фајда әлдә едән инсанларын имана малик олдугларыны бә’зән е’тираф едирди. Лакин инсанда иман чатышмазлығы Исанын мө’ҹүзә ҝөстәрмәсинә мане олмурду. О, Галилејада, Кефернаһумда оланда “ҹинә тутулмуш бир чох адамлары Исанын јанына ҝәтирдиләр. Вә О, сөз илә пис руһлары чыхартды вә хәстәләрин һамысыны сағалтды” (Матта 8:16).
Иса кимләринсә марағыны дејил, инсанларын реал физики тәләбатларыны тә’мин етмәк мәгсәдилә мө’ҹүзәләр едирди (Марк 10:46-52; Лука 23:8). Бундан әлавә, Иса һеч заман өз шәхси мәнфәәти үчүн мө’ҹүзәләр ҝөстәрмирди (Матта 4:2-4; 10:8).
Мүждәдә нәгл едиләнләр һаггында нә демәк олар?
Исанын мө’ҹүзәләринә даир фактлар бизим үчүн дөрд Мүждәнин сәһифәләриндә горунуб сахланылыб. Онун мө’ҹүзәләринин һәгигәтән дә баш вериб-вермәдијини мүәјјәнләшдирәркән, орада јазыланлара е’тибар етмәк олармы? Бәли, олар.
Артыг гејд едилдији кими, Иса мө’ҹүзәләри чохсајлы шаһидләрин ҝөзү гаршысында ачыг шәкилдә ҝөстәрирди. Илк Мүждәләр һәмин шаһидләрин чохунун сағ олдуғу заман гәләмә алынмышдыр. Мүждәни јазанларын дүрүстлүјү барәдә “Мө’ҹүзәләр вә дирилмә ҝүнү” китабында белә дејилир: “Мүждәни јазанлары дини тәблиғат мәгсәдилә тарихи һәгигәтләри мө’ҹүзәләр һаггында ујдурмалара гәрг етмәкдә ҝүнаһландырмаг тамамилә әдаләтсиз оларды. [...] Онлар дүрүст сәлнамәчиләр олмаға ҹан атырдылар” (“The Miracles and the Resurrection”).
Мәсиһчилијин әлејһинә олан јәһудиләр Мүждәләрдә тәсвир едилән гүдрәтли ишләри һеч заман инкар етмирдиләр. Онлар јалныз бу ишләрин иҹра едилмәсиндә истифадә олунан гүввәни шүбһә алтына гојурдулар (Марк 3:22-26). Даһа сонра јашамыш тәнгидчиләр дә Исанын мө’ҹүзәләрини инкар едә билмәмишләр. Онун мө’ҹүзәләри б. е. I вә II әсрләринә аид олан мәтнләрдә хатырланыр. Шүбһәсиз ки, Исанын мө’ҹүзәләри һаггында Мүждәләрдә јазылан мә’луматлары доғру һесаб етмәјә бизим бүтүн әсасларымыз вар.
Мө’ҹүзәләр ҝөстәрән инсан
Исанын мө’ҹүзәләрини нәзәрдән кечирәркән, онларын һәгигилијинә даир јалныз мәнтиги дәлилләрлә мәһдудлашмаг дүзҝүн олмазды. Исанын гүдрәтли ишләринин тәсвир едилдији Мүждәләрдә гаршымызда дәрин һиссләрә вә мисилсиз шәфгәтә малик олан, әтрафдакыларын рифаһы үчүн бүтүн үрәкдән нараһат олан инсан дурур.
Мәсәлән, ҹүзам хәстәлијинә тутулмуш адамын үмидсиз јалварышла Исаја мүраҹиәт етдији һадисәни ҝөтүрәк: “Әҝәр истәсән, мәни саф едә биләрсән. Исанын рәһми ҝәлди, әлини узадыб она тохунду вә деди: “Истәјирәм, саф ол!”. Һәмин адам дәрһал шәфа тапды (Марк 1:40-42). Беләликлә Иса, ону мө’ҹүзәләр ҝөстәрмәјә тәшвиг едән Аллаһын гүввәси сајәсиндә шәфгәт ҝөстәрирди.
Бәс Иса Наин шәһәриндән чыхан дәфн мәрасимини ҝөрән заман нә баш верди? Өлмүш ҝәнҹ оғлан дул гадынын јеҝанә оғлу иди. Гадына јазығы ҝәлән Иса она јахынлашыб деди: “Ағлама!”. Вә онун оғлуну һәјата гајтарды (Лука 7:11-15).
Мө’ҹүзәләр ҝөстәрәркән, Исаны инсанлара көмәк етмәјә дәрин шәфгәт вә мәрһәмәт һиссинин тәшвиг етдијини билмәк тәсәлливериҹидир . Лакин белә мө’ҹүзәләр садәҹә тарихи фактлардан ибарәт дејил. Ибраниләрә 13:8 ајәсиндә дејилир: “Иса Мәсиһ, дүнән, бу ҝүн вә әбәди олараг ејнидир”. Инди о, ҝөјдә Падшаһлыг едир. О, һазырдыр вә Аллаһын вердији гүдрәтли гүввәдән истифадә едиб, јер үзүндә инсан оларкән ҝөстәрдији мө’ҹүзәләрдән дә чох ишләр ҝөрә биләр. Тезликлә Иса, Аллаһа итаәткар олан инсанлары сағалтмаг үчүн бу гүввәдән истифадә едәҹәкдир. Јеһованын Шаһидләри бу ишыглы ҝәләҹәк һаггында әтрафлы өјрәнмәкдә сизә севинҹлә көмәк едәҹәкләр.
[4 вә 5-ҹи сәһифәләрдәки шәкилләр]
Исанын мө’ҹүзәләри “Аллаһын әзәмәти”нин тәзаһүрү иди.
[7-ҹи сәһифәдәки шәкил]
Исаја дәрин һиссләр хас иди.