Иса Мәсиһин мө’ҹүзәләри фактдыр, јохса әфсанә?
“Ҹинә тутулмуш бир чох адамлары Исанын јанына ҝәтирдиләр. Вә О, сөз илә пис руһлары чыхартды вә хәстәләрин һамысыны сағалтды” (Матта 8:16). “О [Иса] да ојаныб күләјә гадаған етди вә ҝөлә: “Сус, сакит ол!” — деди. Күләк јатды вә дәрин сүкут чөкдү” (Марк 4:39). Бу кими һекајәтләрә неҹә јанашырсыныз? Кечмишдә баш вермиш реал һадисәләрин тәсвири кими, јохса аллегорик һекајә, ујдурма кими?
Бу ҝүн чохлары Исанын мө’ҹүзәләринин һәгигәтән дә баш вермәсинә ҹидди шүбһә едирләр. Телескоплар вә микроскоплар, космосун вә ҝенетика мүһәндислијинин тәдгиг олундуғу ерада мө’ҹүзәләр һаггындакы сөһбәтләрә вә гејри-тәбии һаллара инанмаг адама ағылсызлыг ҝәлир.
Бә’зиләри елә зәнн едирләр ки, мө’ҹүзәләр һаггында ҝедән сөһбәтләр әфсанә, јахуд аллегорик һекајәләрдир. Өз китабында “әсл” Исаны ҝөстәрмәји гаршысына мәгсәд гојмуш бир мүәллифин дедикләринә ҝөрә, Мәсиһин мө’ҹүзәләри һаггындакы һекајәләр — мәсиһчилији јајмаг мәгсәдинә гуллуг едән “рекламдан” савајы бир шеј дејил.
Башгалары исә Исанын мө’ҹүзәләрини — халис фырылдаг һесаб едирләр. Һәрдән Исанын өзүнү дә фырылдагчылыгда иттиһам едирләр. II әсрдә јашамыш Шәһид Јустинин јаздығы кими, Исанын тәнгидчиләри “ону сеһирбаз вә халгын јаланчысы адландырмаға белә ҹүр’әт етмишләр”. Бә’зиләри иддиа едирләр ки, Иса “өз мө’ҹүзәләрини јәһуди пејғәмбәри кими дејил, бу сәнәтә бүтпәрәст мә’бәдләрдә јијәләнмиш ҹадуҝәр кими ҝөстәрирди”.
“Гејри-мүмкүндүр” нә демәкдир?
Һәр шејдән ҝөрүндүјү кими, мө’ҹүзәләрин мүмкүн олмасына даир бу ҹүр шүбһәләрин бир әсас сәбәби вар. Инсанлара гејри-тәбии гүввәләрә инанмаг чәтиндир, онлар буну һәтта гејри-мүмкүн һесаб едирләр. Өзүнү агностик адландыран бир ҹаван оғлан дејир: “Мө’ҹүзәләр баш вермир, вәссалам”. Сонра о, XVIII әсрдә јашамыш шотланд философу Дејвид Јумун сөзләрини ситат ҝәтирир: “Мө’ҹүзә — тәбиәт ганунларынын позунтусудур”.
Лакин чохлары бу вә ја диҝәр һалларын гејри-мүмкүнлүјүнү иддиа етмәјә тәләсмәздиләр. Бир енсиклопедијаја әсасән, мө’ҹүзә — “бизә мә’лум олан тәбиәт ганунларынын көмәји илә изаһ едә билмәдијимиз һаллардыр” (“The World Book Encyclopedia”). Бу тә’рифә әсасән, космоса учуш, симсиз әлагә вә пејк радионавигасијасы ҹәми јүз ил бундан габаг инсанларын әксәријјәтинә “мө’ҹүзә” ҝөрүнә биләрди. Әлбәттә ки, мүасир елми нөгтеји-нәзәрдән изаһ едилә билмәдији үчүн мө’ҹүзәләрин мүмкүн олмадығыны иддиа етмәк дүзҝүн олмазды.
Иса Мәсиһә аид едилән бә’зи мө’ҹүзәләри Мүгәддәс Китабын контекстиндә нәзәрдән кечирсәк, нәји ашкар едә биләрик? Онлар фактдыр, јохса әфсанә?