Фәсил 23

Капернаһумда диҝәр мөҹүзәләр

БӘЛИ, Иса Мәсиһ Петери, Андреасы, Јагубу вә Јәһјаны шаҝирдлијә чағырыр; нөвбәти шәнбә онлар бирликдә Капернаһумдакы синагога ҝедирләр. Орада Иса тәлим верир, ҹамаат онун өјрәтмәк тәрзинә һејран галыр, чүнки Иса дин хадимләри кими јох, һакимијјәт саһиби кими өјрәдир.

Һәмин вахт орада ҹинә тутулмуш бир адам олур. Бирдән о гышгырыр: «Еј назаретли Иса! Биздән нә истәјирсән? Бизи мәһв етмәјә ҝәлмисән? Сәнин ким олдуғуну јахшы билирәм, сән Аллаһын Мүгәддәсисән».

Бу адамдакы ҹин Шејтанын табелијиндә олан ҹин мәләкләриндән биридир. Иса Мәсиһ һәмин ҹинә зәһмлә дејир: «Сәсини кәс вә ондан чых».

Бу ан ҹин һәмин адамы гыҹ едир вә бағырыб ондан чыхыр. Лакин о адама һеч бир хәтәр дәјмир. Һамы һејрәтдән донуб галыр. Сонра бир-бириндән: «Бу нәдир белә? — дејә сорушурлар. — Бу адам һәтта мурдар руһлара һөкм едир, онлар да итаәт едирләр!» Онун сорағы тез бир заманда бүтүн әтрафа јајылыр.

Синагогдан чыхандан сонра Иса шаҝирдләрлә бирҝә Шимон Петерин евинә ҝедир. Бу вахт Петерин гајынанасы гыздырма ичиндә јатыр. Исадан хаһиш едирләр ки, гадына јардым ҝөстәрсин. Иса ону әлиндән тутуб галдырыр. Гадын о саат сағалыр вә дуруб онлара гуллуг етмәјә башлајыр.

Ахшам дүшәндә адамлар һәр јердән өз хәстәләрини Петерин евинә ҝәтирирләр. Тезликлә бүтүн шәһәр ора топлашыр. Иса һәр ҹүр хәстәлији сағалдыр, һәтта ҹинә тутулмуш адамлары азад едир. Онун говдуғу ҹинләр адамлардан чыханда гышгырырлар: «Сән Аллаһын Оғлусан!» Амма Иса онлара данышмағы гәти гадаған едир, чүнки ҹинләр онун Мәсиһ олдуғуну билирләр. Марк 1:21—34; Лука 4:31—41; Матта 8:14—17.

▪ Иса Мәсиһ шәнбә ҝүнү синагогда оланда нә едир?

▪ Иса синагогдан чыхандан сонра һара ҝедир вә орада һансы мөҹүзәни ҝөстәрир?

▪ Һәмин ахшам даһа нәләр олур?