Фәсил 39

Мәғрурлар вә һәлимләр

ВӘФТИЗЧИ ЈӘҺЈАНЫН ҝөзәл хүсусијјәтләри барәдә данышдыгдан сонра Иса Мәсиһ диггәтини әтрафындакы мәғрур вә сәбатсыз адамлара јөнәлдиб дејир: «Бу нәсил... базар мејданында отуруб бири диҝәринә: “Биз сизин үчүн түтәк чалдыг, амма сиз ојнамадыныз; биз ағы дедик, амма сиз кәдәрдән башыныза дөјмәдиниз”, — дејән ушаглара бәнзәјир».

Исанын бу сөзләринин мәнасы нәдир? О изаһ едир: «Јәһја ҝәлиб нә јејир, нә ичир, амма ҹамаат дејир: “Онда ҹин вар”. Инсан Оғлу ҝәлиб һәм јејир, һәм ичир, инсанлар јенә дејирләр: “Будур һа, гарынгулу вә шәраб дүшкүнү, верҝијығанларын вә ҝүнаһлыларын досту”». Бәли, инсанлары разы салмаг мүшкүл мәсәләдир.

Бу адамлар да һәр шејдән наразыдырлар. Јәһја доғулмаздан әввәл мәләк онун атасына демишди ки, ушағын «дилинә шәраб вә ја диҝәр кефләндириҹи ички дәјмәмәлидир». О, мәләјин бу ҝөстәришинә мүвафиг олараг, нәзири кими өзүнү һәр шејдән мәһрум едир вә ҹамаат дејир ки, о ҹинә тутулуб. Иса исә заһид дејил, ади адамлар кими јашајыр, амма она «гарынгулу» дејирләр.

Бу инсанлары разы салмаг неҹә дә чәтиндир! Онлар достлары шән һава чалдыгда ојнамајан, ағы дејәркән ағламајан ушаглара бәнзәјирләр. Беләҹә, Иса дејир: «Һикмәтин доғрулуғу әмәлләриндән бәлли олур». Бәли, Јәһјанын вә Исанын ҝөрдүкләри ишләр онлара гаршы сүрүлән иттиһамларын јалан олдуғуну үзә чыхарыр.

Сонра Иса Хоразин, Бетсајда вә Капернаһуму иттиһам едир, чүнки о, мөҹүзәләринин чохуну бу шәһәрләрдә етмишди. Иса гејд едир ки, әҝәр о, бу мөҹүзәләри Финикијанын Сур вә Сидон шәһәрләриндә етсәјди, бу шәһәрләрин ҹамааты төвбә едиб чул ҝејинәр вә күл ичиндә отурардылар. Иса, өзүнүн бир нөв фәалијјәт мәркәзи олан, Капернаһум шәһәрини мүһакимә едәрәк дејир: «Һөкм ҝүнү Содом торпағы үчүн таб ҝәтирмәк она [Капернаһума] нисбәтән даһа асан олаҹаг».

Даһа сонра Иса сәмави Атасына шүкүр едир. Чүнки Аллаһ саф инҹијә бәнзәр руһани һәгигәтләри ағыллы вә һикмәтли адамлардан ҝизләдиб «көрпәләрә», јәни һәлимләрә ачыр.

Сонда Иса үрәкачан бир дәвәтлә мүраҹиәт едир: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәнә бахыб өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр. Чүнки бојундуруғум раһат, јүкүм јүнҝүлдүр».

Бәли, Иса адамлары тәравәтләндирир. Неҹә? О, онлары дин хадимләринин ағыр јүк кими инсанларын бојнуна гојдуғу әнәнәләрин, мисал үчүн, шәнбә ҝүнү илә бағлы сәрт гајдаларын көләлијиндән азад едир. О, һәмчинин һакимијјәт саһибләринин зүлмү вә ҝүнаһларын ағырлығы алтында инилдәјән инсанлара гәлб раһатлығы ҝәтирир. Иса виҹдан әзабы чәкән адамлара ҝүнаһларын бағышланмасына вә Аллаһла ҝөзәл мүнасибәт гурмаға апаран јолу ҝөстәрир.

Биз өзүмүзү Аллаһа һәср етдикдә Исанын дедији раһат бојундуруғу ҝөтүрмүш олуруг. Беләҹә, шәфгәтли вә мәрһәмәтли сәмави Атамыза хидмәт етмәк үчүн үзүмүзә гапы ачылыр. Исанын јанына ҝәләнләрә тәклиф етдији јүнҝүл јүк исә әбәди һәјата јетишмәк үчүн Аллаһын тәләбләринә риајәт етмәк демәкдир. Бу әмрләр Мүгәддәс Китабда јазылыб вә онлара әмәл етмәк гәтијјән ағыр дејил. Матта 11:16—30; Лука 1:15; 7:31—35; 1 Јәһја 5:3.

▪ Нә үчүн Исанын мәғрур вә сәбатсыз мүасирләри ушаглара бәнзәјирләр?

▪ Иса сәмави Атасына нәдән өтрү шүкүр едир?

▪ Инсанларын бојнуна һансы ағыр јүк гојулуб вә Иса онлара неҹә раһатлыг верир?