Фәсил 49

Галилејада нөвбәти тәблиғ иши

ТӘХМИНӘН ики илдир ки, Иса Мәсиһ јорулмадан тәблиғ едир. Инди дә о динҹәлмир, һәвәслә Галилеја бөлҝәсинә үчүнҹү дәфә тәблиғ сәјаһәтинә чыхараг фәалијјәтини даһа да ҝенишләндирир. О, бир-бир шәһәр вә кәндләри ҝәзир, Аллаһын Падшаһлығы һаггында хош хәбәри тәблиғ едир. Бу сәјаһәт заманы ҝөрдүјү шејләр ону әмин едир ки, тәблиғ ишини ҝүҹләндирмәк лазымдыр.

Иса һансы јерә ҝәлирсә руһани ҹәһәтдән јохсул, тәсәллијә мөһтаҹ күтләләри ҝөрүр. Иса онларын һалына аҹыјыр, чүнки бу адамлар «чобансыз гојунлар кими јазыг вә пәракәндә һалда»дырлар. О, шаҝирдләринә дејир: «Бәли, мәһсул бол, ишчи исә аздыр. Буна ҝөрә дә бичин Саһибинә јалварын ки, мәһсулу јығмаг үчүн бичинчи ҝөндәрсин».

Исанын бу барәдә планы вар. О, бир ил бундан габаг сечдији 12 һәварисини чағырыб тәблиғ етмәк үчүн ики-ики ајырыр вә онлара тапшырыг вериб дејир: «Башга халгларын јанына апаран јола чыхмајын вә самаријалыларын шәһәрләринә ҝирмәјин. Јалныз Исраил евинин итмиш гојунларынын јанына ҝедин. Ҝетдијиниз јерләрдә: “Сәмави Падшаһлыг јахынлашыб”, — дејәрәк тәблиғ един».

Онлар сәмави Падшаһлыг һаггында тәблиғ етмәлидирләр. Нүмунә үчүн вердији дуада Иса шаҝирдләринә бу Падшаһлыг һаггында дуа етмәји өјрәтмишди. Бу Падшаһлыг артыг јахынлашыб, чүнки Аллаһын тәјин етдији падшаһ, јәни Иса Мәсиһ онларладыр. Шаҝирдләр сәмави һөкумәтин нүмајәндәләри олдугларыны тәсдиг едә билсинләр дејә Иса онлара шәфа вермәк вә дирилтмәк габилијјәти верир. Һәмчинин онлара тапшырыр ки, буну һавајы етсинләр.

Сонра Иса шаҝирдләринә дејир ки, тәблиғә ҝедәркән мадди еһтијаҹлары үчүн тәдарүк ҝөрмәсинләр: «Кисәнизә гызыл, ҝүмүш вә ја мис пул гојмајын. Өзүнүзлә нә һејбә, нә дәјишәк көјнәк, нә сәндәл, нә дә әса ҝөтүрмәјин, чүнки зәһмәткеш рузијә лајигдир». Хош хәбәрә миннәтдарлыгла һај верәнләр онлары јемәк вә јатагла тәмин едәҹәкди. Иса дејир: «Һансы шәһәрә вә ја кәндә ҝирсәниз, лајигли адамлары ахтарын вә башга јерә ҝедәнә гәдәр орада галын».

Бунун ардынҹа Иса шаҝирдләринә, ев саһибләри илә Падшаһлыг һаггында неҹә сөһбәтә башламағы өјрәдир: «Бир евә ҝирәндә ев сакинләрини саламлајын. Әҝәр о евдәкиләр лајиглидирләрсә, гој диләдијиниз сүлһ онларын үзәринә ҝәлсин, јох әҝәр лајигли дејилләрсә, гој сүлһүнүз өзүнүзә гајытсын. Һансы јердә сизи гәбул етмәсәләр вә ја сөзүнүзү динләмәсәләр, о евдән, јахуд о шәһәрдән чыханда ајағынызын тозуну да чырпын».

Иса дејир ки, шаҝирдләрин ҝәтирдији хәбәри гәбул етмәјән шәһәр мәһкум едиләҹәк. О бәјан едир: «Әмин олун ки, Содом вә Һоморра торпағы үчүн Һөкм ҝүнүндә таб ҝәтирмәк о шәһәрә нисбәтән даһа асан олаҹаг». Матта 9:35—10:15; Марк 6:6—12; Лука 9:1—5.

▪ Иса Галилејаја үчүнҹү тәблиғ сәфәринә нә вахт башлајыр вә бу сәфәр заманы нәјә әмин олур?

▪ Иса 12 шаҝирдини тәблиғә ҝөндәрәндә онлара һансы ҝөстәришләри верир?

▪ Шаҝирдләр һансы сәбәбә ҝөрә сәмави Падшаһлығын јахынлашдығы һаггында өјрәдә биләрдиләр?