Фәсил 50

Тәгибләрә гаршы һазырлыг

ИСА МӘСИҺ шаҝирдләринә тәблиғ етмәк үсулларыны өјрәтдикдән сонра онлара әлејһдарларла үзләшәҹәкләрини билдирир. О дејир: «Мән сизи ҹанаварлар арасына гузу кими ҝөндәрирәм... Инсанларла еһтијатлы олун, чүнки онлар сизи мәһкәмәләрә верәҹәк вә өз синагогларында гамчылајаҹаглар. Мәндән өтрү сизи һакимләрин вә падшаһларын өнүнә ҝәтирәҹәкләр».

Һәрчәнд Исанын давамчылары шиддәтли тәгибләрә мәруз галаҹаг, амма о, онлары архајын едир: «Сизи мәһкәмәјә верәндә нәдән вә ја неҹә данышаҹағыныз барәсиндә нараһат олмајын, чүнки нә демәк лазым олдуғу сизә һәмин ан вериләҹәк. Данышанда тәк олмајаҹагсыныз, Атанызын мүгәддәс руһу сизин васитәнизлә данышаҹаг».

Иса давам едир: «Гардаш гардашы, ата өвладыны өлүмә верәҹәк. Ушаглар валидејнләринә гаршы галхаҹаг вә онлары өлүмә верәҹәкләр». Сонра әлавә едир: «Мәним адыма ҝөрә һамы сизә нифрәт едәҹәк. Анҹаг ахыра кими дөзән хилас олаҹаг».

Тәблиғ чох мүһүм ишдир. Буна ҝөрә дә Иса гејд едир ки, азадлыгда галыб тәблиғ едә билмәк үчүн еһтијатлы олмаг ҝәрәкдир: «Сизи бир шәһәрдә тәгиб едәндә, о бири шәһәрә гачын. Буну билин ки, сиз Исраил шәһәрләринин һамысыны ҝәзиб гуртармамыш инсан Оғлу ҝәләҹәк».

Һәрчәнд Иса Мәсиһ ҝөстәришләри, хәбәрдарлығы вә үрәк-дирәји 12 һәварисинә верир, лакин бу сөзләр Иса өлүб-дириләндән сонра үмумдүнја тәблиғ ишиндә чалышаҹаг һәр кәсә аиддир. Буну Исанын «һамы сизә нифрәт едәҹәк» сөзләриндән ҝөрмәк олур; һәвариләр исә анҹаг исраиллиләрә тәблиғ етмәк үчүн ҝөндәрилирләр. Һәм дә бу гыса тәблиғ кампанијасы вахты һәвариләр һакимләрин вә ја падшаһларын јанына апарылмады; бу вахт иман ҝәтирәнләр јахынлары тәрәфиндән өлүмә верилмәдиләр.

Иса шаҝирдләрә бүтүн шәһәрләри ҝәзиб гуртармамыш «инсан Оғлу ҝәләҹәк» демәклә бир пејғәмбәрлик сөјләјир. Бу о демәкдир ки, шаҝирдләр Падшаһлыг һаггында хәбәрлә дүнјаны доланыб гуртармамыш, шанлы падшаһ Иса Мәсиһ Һар-Маҝедонда Јеһова Аллаһын һөкмләрини иҹра етмәк үчүн ҝәләҹәк.

Сонра Иса тәблиғ иши илә бағлы белә дејир: «Шаҝирд мүәллиминдән вә нөкәр ағасындан үстүн дејил». Исанын давамчылары билмәлидирләр ки, сәмави Падшаһлығы тәблиғ етмәк үстүндә ағалары пислик ҝөрүб, тәгиб олунурса, онлар да белә шејләрлә гаршылашаҹаглар. Бунун үзәринә Иса нәсиһәт верир: «Бәдәни өлдүрүб, амма ҝәләҹәк һәјатыныза хәтәр јетирә билмәјәнләрдән горхмајын, әксинә, сизи Һинном дәрәсиндә мәһв етмәјә гадир оландан горхун».

Бу саһәдә Иса өзү нүмунә олаҹагды. О, мүтләг гүдрәт саһиби олан Јеһова Аллаһа сәдагәтини итирмәмәк үчүн, өлүмүн ҝөзүнә дик бахаҹагды! Бәли, һәјаты мәһв едән дә (инсаны ҝәләҹәкдә әбәди јашамагдан мәһрум етмәк), өлмүш инсаны дирилдиб она әбәди һәјат бәхш едән дә Гадир Аллаһ Јеһовадыр. Һәгигәтән дә, сәмави Атамыз Јеһова Аллаһ мисилсиз мәһәббәт вә мәрһәмәт саһибидир.

Даһа сонра Иса Јеһова Аллаһын гајғы вә мәһәббәтини вурғулајан бир мәсәл сөјләјәрәк шаҝирдләринә үрәк-дирәк верир. О сорушур: «Мәҝәр ики сәрчәни бир гара гәпијә сатмырлар? Һәрчәнд онлардан һеч бири Атанызын хәбәри олмадан јерә дүшмүр. Сизин исә сачынызын телләри белә бир-бир сајылыб. Буна ҝөрә дә горхмајын. Сиз сәрчәләрдән гат-гат гијмәтлисиниз».

Исанын өз шаҝирдләринә һәвалә етдији хош хәбәр бир адамын гәбул едиб, диҝәр адамын гәбул етмәдији аиләләрдә фикир ајрылығы јарадаҹагды. Иса дејир: «Елә билмәјин ки, мән јер үзүнә сүлһ ҝәтирмәјә ҝәлмишәм. Мән јер үзүнә сүлһ јох, гылынҹ ҝәтирмишәм». Беләликлә, Мүгәддәс Китабдакы һәгигәтә һај вермәк үчүн ҹәсарәт лазымдыр. Иса гејд едир: «Атасыны вә ја анасыны мәндән чох истәјән мәнә лајиг дејил, һәмчинин оғлуну вә ја гызыны мәндән чох истәјән мәнә лајиг дејил».

Ахырда Иса ҝөстәрир ки, онун шаҝирдләрини гәбул едән адам ону гәбул етмиш олур. О дејир: «Ким бу кичикләрдән биринә онун шаҝирд олдуғу үчүн бир парч сәрин су верирсә, инанын ки, мүкафатсыз галмајаҹаг». Матта 10:16—42.

▪ Иса Мәсиһ шаҝирдләрини нәдән хәбәрдар едир?

▪ О, шаҝирдләрини һансы сөзләрлә архајын едир?

▪ Нәјә ҝөрә Исанын ҝөстәришләри мүасир мәсиһчиләрә дә аиддир?

▪ Исанын шаҝирди мүәллиминдән һансы мәнада үстүн дејил?