Фәсил 52
Иса минләрлә адамы мөҹүзә илә дојдурур
ВӘФТИЗЧИ ЈӘҺЈАНЫН өлүмүндән гыса мүддәт кечиб. Бу арада Иса Мәсиһин 12 һәвариси Галилејаны башдан-баша ҝәзиб тәблиғ етмиш вә инди ҝери гајыдыблар. Онлар өз тәәссүратларыны севинә-севинә Исаја данышырлар. Иса ҝөрүр ки, һәвариләр чох јорулуб, үстәлик, ҝәлиб-ҝедәнләрин дә арды-арасы кәсилмир. Онлар һәтта чөрәк јемәјә маҹал тапмырлар. О тәклиф едир: «Ҝәлин сакит бир јерә ҝедәк, бир аз динҹинизи алын».
Онлар гајыға миниб (еһтимал ки, Капернаһумун јахынлығында) сакит бир јерә јола дүшүрләр. Јәгин ки, онлар Иорданын шәргиндә јерләшән Бетсајданы өтүб о тәрәфә ҝедирләр. Кимләрсә онларын јола дүшдүјүнү ҝөрүр, диҝәрләри буну ешидир. Бүтүн ҹамаат ҝөлүн саһили боју гачыр вә гајыг саһилә јан аланда артыг орада онлары ҝөзләјир.
Иса гајыгдан чыхыр вә бу издиһама бахыб онлара јазығы ҝәлир, чүнки бу адамлар «чобансыз гојун кими»дирләр. О, хәстәләри сағалдыр вә ҹамаата чохлу тәлим верир.
Вахт тез кечир вә Исанын шаҝирдләри она јахынлашыб дејирләр: «Бура чөллүкдүр вә артыг ҝеҹдир. Ҹамааты бурах, әтраф кәндләрә, обалара ҝедиб өзләри үчүн јемәјә бир шеј алсынлар».
Лакин Иса шаҝирдләрә: «Сиз онлара јемәк верин», — дејир. Сонра о, Филипи сынамаг үчүн ондан сорушур: «Бу адамлар үчүн һарадан чөрәк алаг?» Әслиндә, Иса нә едәҹәјини билирди.
Филип үчүн бу, ағласығмаз бир шејдир. Ахы орада беш миндән артыг киши вар вә гадынларла ушаглары һесаблајанда он миндән чох адам едир. Буна ҝөрә дә Филип белә ҹаваб верир: «Бу гәдәр адама һеч ики јүз динарлыг [динар бир ҝүнлүк әмәк һаггы иди] чөрәк дә бәс еләмәз ки, һеч олмаса һәрәси бир тикә јесин».
Јәгин ки, бу гәдәр адамы једиздирмәјин мүмкүн олмадығыны ҝөстәрмәк үчүн Андреас дејир: «Бурада бир оғлан ушағында беш арпа чөрәји вә ики балаҹа балыг вар». Сонра әлавә едир: «Амма бу гәдәр адам үчүн бунлар нәдир ки?»
Баһар фәсли олдуғундан (гејд еләјәк ки, 32-ҹи илин Пасха бајрамына аз галырды) јердә от галхыб. Иса шаҝирдләринә тапшырыр ки, гој ҹамаат әлли-әлли, јүз-јүз отун үстүндә әјләшсин. Сонра о, 5 чөрәји вә 2 балығы ҝөтүрүб ҝөјә бахыр вә бәрәкәт диләјир. Онлары шаҝирдләрә верир, шаҝирдләр дә ҹамаата пајлајырлар. Бу, бир мөҹүзәдир: һамы јејиб дојур!
Јејиб гуртардыгдан сонра Иса шаҝирдләринә бујурур: «Артыг галан тикәләри јығын ки, һеч нә зај олмасын». Шаҝирдләр артыг галан тикәләрдән 12 зәнбил долдурурлар! Матта 14:13—21; Марк 6:30—44; Лука 9:10—17; Јәһја 6:1—13.
▪ Нәјә ҝөрә Иса һәвариләри үчүн сакит бир јер ахтарыр?
▪ Иса шаҝирдләрини һара апарыр, амма нә үчүн онлар динҹәлә билмирләр?
▪ Ахшам дүшәндә шаҝирдләр Исаја нә дејирләр вә Иса ҹамаатын гајғысына неҹә галыр?