Фәсил 58

Чөрәк вә маја

ДЕКАПОЛ бөлҝәсиндә Исанын јанына ахын-ахын адам ҝәлиб. Онлардан чоху Исаны динләмәк вә шәфа тапмаг үчүн узун јоллар гәт едиб, әһалисинин әксәријјәти бүтпәрәстләр олан бу јерә ҝәлмишләр. Бу адамлар өзләри илә ири сәбәтләр ҝөтүрүбләр. Адәтән, јәһудиләр башга милләтләрин јашадығы әразијә ҝедәндә азугәләрини сәбәтә гојуб апарырдылар.

Бир мүддәт кечдикдән сонра Иса шаҝирдләрини јанына чағырыб дејир:

— Ҹамаата јазығым ҝәлир. Артыг үч ҝүндүр ки, јанымдадырлар, јемәјә дә һеч нәләри јохдур. Онлары евләринә аҹ јола салсам, јолда тагәтдән дүшә биләрләр. Ахы чохлары узаг јерләрдән ҝәлиб.

— Бу чөллүкдә бу гәдәр ҹамааты једиртмәк үчүн һарадан чөрәк тапмаг олар?

— Нечә чөрәјиниз вар?

— Једди чөрәјимиз вар, бир нечә дәнә дә хырда балығымыз.

Иса ҝөстәриш верир ки, ҹамаат јерә отурсун, сонра чөрәји вә балығы ҝөтүрүб шүкүр едир вә шаҝирдләринә верир. Онлар да чөрәкләри ҹамаата пајлајырлар, һамы дојунҹа јејир. Гадын вә ушаглары чыхмаг шәртилә, бурада дөрд мин киши вар иди. Бунунла белә, ахырда артыг галмыш тикәләрдән једди долу сәбәт јығылыр!

Сонра Иса халгы јола салыр, өзү исә шаҝирдләри илә бирҝә гајыға минир, онлар Галилеја ҝөлүнүн гәрб саһилинә тәрәф үзүрләр. Бурада фәрисејләр, бу дәфә садукејләрлә (садукејләр дини тәригәт иди) бирҝә ҝәлиб, Исаны сынамаг мәгсәдилә ҝөјдән бир әламәт ҝөстәрмәсини истәјирләр.

Иса билир ки, онлар ону сынајырлар, буна ҝөрә дә белә ҹаваб верир: «Ахшам дүшәндә сиз дејирсиниз: “Һава јахшы олаҹаг, чүнки ҝөјүн үзү гыпгырмызыдыр”; сүбһ чағы исә дејирсиниз: “Һәрчәнд ҝөј гызарыб, лакин тутгун олдуғундан бу ҝүн һава сојуг вә јағмурлу олаҹаг”. Ҝөј үзүнүн ҝөрүнүшүнү неҹә јозмағы баҹарырсыныз, амма дөврләрин әламәтләрини јоза билмирсиниз!»

Иса онлары «пис вә зинакар нәсил» адландырыр вә бундан габаг бир дәфә фәрисејләрә вердији ҹавабы тәкрар едәрәк дејир ки, Јунус пејғәмбәрин әламәтиндән башга әламәт онлар ҝөрмәјәҹәкләр. Сонра Иса шаҝирдләри илә гајыға миниб ҝөлүн шимал-шәрг саһилинә, Бетсајдаја јола дүшүр. Јолда шаҝирдләрин јадына дүшүр ки, чөрәк ҝөтүрмәји унудублар вә ҹәми бир чөрәкләри вар.

Иса фәрисејләр вә Һиродун ардыҹыллары олан садукејләрлә ҝөрүшүнү нәзәрдә тутараг шаҝирдләрини хәбәрдар едир: «Бахын һа, өзүнүзү фәрисејләрин вә Һиродун мајасындан ҝөзләјин». «Маја» сөзүнү ешидәндә шаҝирдләр елә дүшүнүрләр ки, Иса онларын чөрәк ҝөтүрмәји унутдугларына ишарә едир вә өз араларында мүбаһисә едирләр. Иса ҝөрәндә ки, ону дүз баша дүшмәјибләр, дејир: «Чөрәк ҝөтүрмәдијиниз үчүн нијә мүбаһисә едирсиниз?»

Иса минләрлә адама мөҹүзә илә чөрәк вермишдир, өзү дә ахырынҹы дәфә буну ҹәми бир-ики ҝүн әввәл едиб. Шаҝирдләр билмәли идиләр ки, Иса чөрәкдән өтрү нараһат олмур. Иса онлара хатырладыр:

— Мәҝәр јадыныздан чыхыб ки, мән беш мин адам үчүн беш чөрәји бөләндә нечә долу зәнбил јығдыныз?

— Он ики.

— Бәс дөрд мин адам үчүн једди чөрәји бөләндә нечә долу сәбәт јығмышдыныз?

— Једди.

— Јәни һәлә дә сөзүмүн ҹаныны анламырсыныз? Мәҝәр баша дүшмүрсүнүз ки, мән сизинлә чөрәк барәсиндә данышмырам? Дедијим одур ки, өзүнүзү фәрисејләрин вә садукејләрин мајасындан ҝөзләјин.

Нәһајәт шаҝирдләр онун фикрини баша дүшүрләр. Хәмири аҹыдыб галдырмаг үчүн истифадә едилән маја бурада «корланма» мәнасыны дашыјыр. Инди шаҝирдләрә ајдын олур ки, Иса мәҹази дилдә данышыр вә онлары хәбәрдар едир ки, өзләрини фәрисејләрин вә садукејләрин корлајыҹы тәлимләриндән горусунлар. Марк 8:1—21; Матта 15:32—16:12.

▪ Адамлар ири сәбәтләри нә үчүн ҝөтүрүбләр?

▪ Декаполдан чыхдыгдан сонра Иса һаралара ҝедир?

▪ «Маја» сөзү шаҝирдләрдә һансы анлашылмазлығы јарадыр?

▪ Иса «фәрисејләрин вә садукејләрин мајасы» ифадәси илә нә демәк истәјир?