Фәсил 60
Мәсиһин падшаһлыг ҹалалынын ҝөрүнтүсү
ИСА МӘСИҺ Филиппи Гејсәријјәсинә ҝәлиб орада һәвариләрә вә ҹамаата тәлим верир. Онун дедији сөзләр һамыны һејрәтә салыр: «Ешидин вә аҝаһ олун, бурада дуранлардан бәзиләри Инсан Оғлунун өз падшаһлығында ҝәлдијини ҝөрмәјинҹә әсла өлмәјәҹәк».
Јәгин, шаҝирдләр дүшүнүрләр: ҝөрәсән, Иса нә демәк истәјир? Тәхминән бир һәфтә сонра Иса Петери, Јагубу вә Јәһјаны ҝөтүрүб уҹа даға галхыр. Еһтимал ки, бу ҝеҹә вахты олур, чүнки шаҝирдләри јуху басыр. Иса дуа едир вә бу вахт онларын ҝөзү гаршысында онун ҝөркәми дәјишир: үзү ҝүнәш кими шәфәг сачыр, палтары ағаппаг олуб пар-пар парылдајыр.
Сонра «Муса вә Илјас» олдуғу анлашылан ики кишинин ҝөрүнтүсү пејда олур. Онлар Иса илә онун Јерусәлимдә дүнјадан ајрылаҹағы барәдә сөһбәт едирләр. «Ајрылма» Исанын өләҹәјини вә сонра дириләҹәјини билдирир. Бу сөһбәтдән ајдын олур ки, Исаны шәрәфсиз өлүм ҝөзләјир. Беләҹә, Исанын башына бу ишин ҝәлмәјәҹәјинә Петерин бәсләдији үмид боша чыхыр.
Артыг шаҝирдләрин ҝөзләриндән јуху гачыб, онлар баш верәнләрә һејрәтлә бахыр вә гулаг асырлар. Һәрчәнд бу бир ҝөрүнтүдүр, амма елә ҝерчәкдир ки, Петер сөһбәтә гошулуб дејир: «Аға, бизим бура ҝәлмәјимиз нә јахшы олду! Истәјирсән, үч чадыр гурум: бирини сәнә, бирини Мусаја, бирини дә Илјаса».
Петер һәлә данышаркән бир булуд топасы онлары бүрүјүр вә булуддан бир сәс дејир: «Бу, Мәним севимли Оғлумдур. Мән ондан чох разыјам. Она гулаг асын». Шаҝирдләр бу сәси ешидәндә үзүстә јерә јыхылырлар. Амма Иса онлара дејир: «Дурун, горхмајын». Онлар дуранда ҝөрүрләр ки, Иса тәкдир.
Ертәси ҝүн дағдан енәндә Иса онлара тапшырыр: «Инсан Оғлу дирилмәјинҹә ҝөрдүјүнүзү һеч кимә данышмајын». Ҝөрүнтүдә Илјасын пејда олмасы шаҝирдләрдә суал доғурур: «Нәјә ҝөрә мирзәләр дејирләр ки, әввәлҹә Илјас ҝәлмәлидир?»
Иса ҹаваб верир: «Илјас артыг ҝәлиб. Һејф ки, ону танымадылар». Иса Вәфтизчи Јәһјаны нәзәрдә тутур. Јәһјаја Илјас пејғәмбәрин тапшырығына бәнзәр бир иш тапшырылмышды: Илјас пејғәмбәр Елиша пејғәмбәр үчүн јол һазырладығы кими, Јәһја да Мәсиһ үчүн јол һазырлады.
Бу ҝөрүнтү һәм Исаны, һәм дә шаҝирдләри чох мөһкәмләндирир. О, Мәсиһин падшаһлыг ҹалалыны санки габагҹадан нүмајиш етдирир. Исанын бир һәфтә әввәл вәд етдији кими, шаҝирдләр әслиндә «инсан Оғлунун өз падшаһлығында ҝәлдијини» ҝөрүрләр. Исанын өлүмүндән сонра Петер јазмышды ки, онлар Иса илә бирликдә дағда оларкән «Мәсиһин әзәмәтинин шәхсән шаһиди олублар».
Фәрисејләр Исадан Мүгәддәс Јазыларда Аллаһын вәд етдији сечилмиш падшаһ олдуғуну тәсдиг едән әламәт ҝөстәрмәсини тәләб едирдиләр. Онлар һеч бир әламәт алмадылар. Амма Исанын ән јахын шаҝирдләринә сәмави Падшаһлыгла бағлы пејғәмбәрликләри тәсдиг едән һадисәни, Исанын ҝөркәминин дәјишмәси ҝөрүнтүсүнү ҝөрмәјә изин верилди. Буна ҝөрә дә Петер сонралар јазырды: «Беләликлә, биз пејғәмбәрлик сөзүнүн доғрулуғуна даһа да әмин олмушуг». Матта 16:13, 16:28—17:13; Марк 9:1—13; Лука 9:27—37; 2 Петер 1:16—19.
▪ Бәзиләри өлүмү дадмадан Мәсиһин «өз падшаһлығында ҝәлдијини» неҹә ҝөрүр?
▪ Ҝөрүнтүдә Муса пејғәмбәр, Илјас пејғәмбәр вә Иса Мәсиһ нә барәдә сөһбәт едирләр?
▪ Нәјә ҝөрә бу ҝөрүнтү Исанын шаҝирдләрини чох мөһкәмләндирир?