Фәсил 64

Бағышламаг дәрси

ҜӨРҮНҮР, Иса Мәсиһ шаҝирдләри илә бирҝә һәлә дә Капернаһумдакы евдәдир. О, гардашлар арасында анлашылмазлыг јарананда ону неҹә јолуна гојмағы изаһ едиб гуртарыр. Буна ҝөрә дә Петер сорушур: «Аға, гардашым мәнә гаршы ҝүнаһ иш ҝөрәндә мән ону нечә дәфә бағышламалыјам?» Јәһуди дин хадимләри өјрәдирләр ки, ҹәми үч дәфә бағышламаг олар. Петер сорушур: «Једди дәфә?» Јәгин, о, буну алиҹәнаблыг һесаб едир.

Бу мәсәләдә һесаб тутмағын өзү дүзҝүн дејил. Иса Петерин јанлыш дүшүнҹәсини дүзәлдир: «Једди дәфә јох, лазым ҝәлсә, јетмиш једди дәфәјә гәдәр бағышламалысан». Бунунла Иса ҝөстәрир ки, гардашыны бағышламаг үчүн Петер һәдд тәјин етмәмәлидир.

Бағышламағын зәрурилијини шаҝирдләринин бејниндә һәкк еләмәк үчүн Иса бир мәсәл данышыр. Бу мәсәлдә сөһбәт өз нөкәрләриндән борҹларыны топламаг истәјән бир падшаһдан ҝедир. Онун јанына бир нөкәр ҝәтирирләр. Һәмин нөкәр ағасына чох бөјүк мәбләғдә, «он мин талант пул борҹлу иди» (10 000 талант 60 000 000 динара бәрабәр иди). Нөкәр бу мәбләғи һеч ҹүр гајтара билмәјәҹәкди. Падшаһ әмр едир ки, нөкәрин өзү, арвад-ушағы вә һәр нәји варса, һамысы сатылсын вә борҹ ҝери гајтарылсын.

Онда нөкәр ағасынын ајағына јыхылыб јалвар-јахар едир: «Аға, бир аз сәбир елә, һамысыны гајтараҹағам».

Падшаһын нөкәрә рәһми ҝәлир вә онун бөјүк борҹуну ләғв едир. Иса мәсәлин ардыны данышараг дејир ки, борҹу ләғв едилән нөкәр дәрһал ҝедиб она ҹәми 100 динар борҹу олан бир нөкәр јолдашыны ахтарыб тапыр. Ону тутуб боғмаға башлајыр вә дејир: «Борҹуму сон гәпијинә кими гајтар».

Лакин о бири нөкәрин пулу јохдур. О, јолдашынын ајағына јыхылыб јалвармаға башлајыр: «Бир аз сәбир елә, һамысыны гајтараҹағам». Амма јолдашы өз ағасындан фәргли олараг, мәрһәмәт ҝөстәрмир, әксинә, борҹлу јолдашыны зиндана атыр.

Иса гејд едир ки, бу нөкәрин һәрәкәтини башга нөкәрләр ҝөрүрләр вә ҝедиб әһвалаты падшаһа данышырлар. Онда падшаһ бәрк гәзәбләнир вә һәмин нөкәри чағыртдырыб дејир: «Еј јарамаз нөкәр! Сән мәнә јалваранда мән бүтүн борҹуну бағышладым. Мәҝәр мән сәнә рәһм етдијим кими, сән дә нөкәр јолдашына рәһм етмәли дејилдин?» Һиддәтләнмиш падшаһ нөкәри зиндан рәисләринә верир ки, борҹуну сон гәпијинә кими өдәјәнә гәдәр зинданда галсын.

Иса сөзүнә белә јекун вурур: «Буну билин ки, әҝәр һәр бириниз гардашынызы үрәкдән бағышламасаныз, сәмави Атам да сизинлә беләҹә давранаҹаг».

Бу мәсәл бағышламағын зәрурилијини парлаг шәкилдә нүмајиш етдирир. Аллаһ ҝүнаһларымыздан топланан бөјүк борҹу бизә бағышлајыр. Бунун јанында мәсиһчи баҹы-гардашларымызын сәһвләри һеч нәдир. Бундан әлавә, Јеһова Аллаһ бизи мин дәфәләрлә бағышлајыб. Она гаршы ишләдијимиз ҝүнаһларын чохундан һеч хәбәримиз олмур. Бәс биз? Шикајәт үчүн әсас олса да, бизә гаршы ҝүнаһ ишләмиш гардашымызы бағышлаја билмәрик? Иса Дағүстү тәблиғиндә өјрәтдији кими, Јеһова Аллаһ ҝүнаһларымызы бағышлајаҹаг, «неҹә ки, өзүмүз дә бизә гаршы ҝүнаһ ишләјәнләри бағышламышыг». Матта 18:21—35; 6:12; Колослулара 3:13.

▪ Гардашыны бағышламаг барәдә сорушмаға Петери нә тәшвиг едир вә једди дәфә бағышламаг тәклифини нә үчүн о, алиҹәнаблыг һесаб едир?

▪ Падшаһ өз нөкәринин јалварышына неҹә јанашыр вә һәмин нөкәр ағасындан фәргли олараг, јолдашы илә неҹә рәфтар едир?

▪ Исанын бу мәсәлиндән һансы ибрәт ҝөтүрүрүк?