Фәсил 74
Мартанын алдығы мәсләһәт вә дуа һаггында тәлим
ИСА МӘСИҺ Јәһудејада тәблиғ едәндә бир ҝүн Бетанија кәндинә ҝәлир. Бурада Марта илә Мәрјәм баҹылары вә онларын гардашы Лазар јашајырлар. Ҝөрүнүр, Иса онларла хидмәтинин башланғыҹында таныш олуб вә онларла достлашыб. Инди Иса онлара гонаг ҝәлир вә Марта ону һөрмәтлә гаршылајыр.
Марта Иса үчүн әлиндән ҝәләни едир. Ахы вәд едилмиш Мәсиһи өз евиндә гонаг етмәк бөјүк шәрәфдир! Буна ҝөрә дә Марта лајигли сүфрә ачмаг истәјир вә чалышыр ки, бурада галмаг Исаја хош олсун.
Баҹысы Мәрјәм исә Исанын ајаглары јанында отуруб гулаг асыр. Бир аздан Марта ҝәлиб Исаја шикајәтләнир: «Аға, баҹым мәни тәк гојуб көмәк еләмир, нијә она бир сөз демирсән? Она де ки, дуруб мәнә көмәк етсин».
Лакин Иса Мәрјәмә һеч нә демир. Әксинә, әл-ајаға дүшмүш Мартаја мәсләһәт верир. О, меһрибанҹасына дејир: «Марта, Марта, сән чох шеј үчүн нараһат олуб өзүнү јорурсан. Әслиндә инсана аз шеј лазымдыр, һәтта бир шеј дә кифајәт едәр». Иса дејир ки, бир наһардан өтрү бир белә вахт сәрф едиб ҹүрбәҹүр хөрәкләр һазырламаг лазым дејил. Ҹәми бир-ики хөрәк кифајәтдир, һәтта бир хөрәк дә бәс едәр.
Әлбәттә, Марта бүтүн бунлары тәмиз нијјәтлә едир, о, гонагпәрвәрлик ҝөстәрмәјә чалышыр. Лакин башы һазырлыг ҝөрмәјә гарышдығындан шәхсән Аллаһын Оғлундан тәлим алмаг имканыны әлдән верир. Буна ҝөрә дә Иса сөзүнү белә гуртарыр: «Мәрјәм өзүнә јахшы пај сечиб вә бу, ондан алынмајаҹаг».
Башга бир вахт бир шаҝирд Исадан сорушур: «Аға, Јәһја шаҝирдләринә өјрәтдији кими, сән дә бизә дуа етмәји өјрәт». Ҝөрүнүр, Иса ил јарым бундан әввәл Дағүстү тәблиғиндә дуа барәдә тәлим верәндә бу шаҝирд орада олмајыб. Буна ҝөрә дә Иса дуанын бәндләрини јенидән дејир вә сонра бир мәсәл чәкәрәк дуада исрарлы олмағын ваҹиблијини вурғулајыр.
«Тутаг ки, бир адамын досту вар, — дејә Иса сөзә башлајыр, — вә о, ҝеҹә јарысы достунун јанына ҝәлиб дејир: “Достум, мәнә үч чөрәк вер, индиҹә јолдан бир достум ҝәлиб, онун габағына гојмаға һеч нәјим јохдур”. Ев саһиби ичәридән дејир: “Мәни нараһат еләмә. Гапы бағлыдыр, ушагларым да јанымда јатырлар. Мән дуруб сәнә һеч нә верә билмәрәм”. Сизә ону дејим ки, бу адам достлуг хатиринә дуруб она һеч нә вермәсә дә, досту исрар етдији үчүн дураҹаг вә лазым олан шејләри она верәҹәк».
Иса һеч дә демир ки, Јеһова Аллаһ бу мәсәлдәки дост кими, хаһишләрә көнүлсүз һај верир. Хејр, Иса ҝөстәрмәк истәјир ки, әҝәр гарагабаг дост тәкидлә едилән хаһишләрә ҹаваб верирсә, үрәји мәһәббәтлә долу олан сәмави Атамыз буну мүтләг едәҹәк. Сонра Иса дејир: «Беләликлә, дурмадан диләјин, сизә вериләҹәк; дурмадан ахтарын, тапаҹагсыныз; дурмадан гапыны дөјүн вә сизә ачаҹаглар. Чүнки диләјән истәдијини алыр, ахтаран тапыр вә гапыны дөјәнә ачырлар».
Даһа сонра Иса гејри-камил, ҝүнаһлы аталары нүмунә ҝәтирир: «Доғрудан да, мәҝәр аранызда елә бир ата вар ки, оғлу балыг истәјәндә балыг әвәзинә она илан версин? Јахуд јумурта истәјәндә она әгрәб версин? Беләликлә, әҝәр сиз пис олдуғунуз һалда ушагларыныза јахшы немәтләр верә билирсинизсә, мәҝәр ҝөјдәки Ата ондан истәјәнләрә мүгәддәс руһундан вермәјәҹәк?» Бәли, Иса бизи дуаларда исрарлы олмаға шөвглә тәшвиг едир. Лука 10:38—11:13.
▪ Марта нәјә ҝөрә Иса үчүн чохлу шеј һазырламаг истәјир?
▪ Мәрјәм нә едир вә нә үчүн Иса Мартаны јох, ону тәрифләјир?
▪ Иса дуа илә бағлы тәлими нә үчүн тәкрарламалы олур?
▪ Иса дуада исрарлы олмағын ваҹиблијини неҹә ҝөстәрир?