Фәсил 78

Һазыр олун!

ИСА МӘСИҺ ҹамаата тамаһкарлыг барәдә хәбәрдарлыг верир вә шаҝирдләринә мадди шејләрә һәддән зијадә алудә олмамағы тапшырыр. Бунун ардынҹа о, руһландырыҹы сөзләр дејир: «Горхма кичик сүрү, чүнки Атаныз падшаһлығы сизә вермәји мүнасиб билди». Беләҹә, мәлум олур ки, Падшаһлыға нисбәтән аз адам ҝөтүрүләҹәк (сонрадан онларын 144 000 нәфәр олаҹағы ҝөстәрилди). Әбәди һәјата говушаҹаг инсанларын бөјүк әксәријјәти бу Падшаһлығын јер үзүндәки тәбәәләри олаҹаглар.

Падшаһлыг мисилсиз бир әнамдыр! Иса шаҝирдләрини алаҹаглары бу әнамын мүгабилиндә онлардан нә ҝөзләнилдијини ҝөстәрмәк үчүн тәшвиг едир: «Һәр нәјиниз варса, сатын вә сәдәгә верин». Бәли, шаҝирдләр нәләри варса сәрф едиб башгаларына руһани көмәк ҝөстәрмәли вә беләҹә, «ҝөјдә һеч вахт түкәнмәјән хәзинә» јығмалыдырлар.

Сонра Иса шаҝирдләрини онун ҝәлишинә һазыр олмаға чағырыр: «Гој белиниз гуршаглы олсун вә чырағыныз һәмишә јансын. Сиз ағасынын тој зијафәтиндән гајытмасыны ҝөзләјән, аға ҝәлиб гапыны дөјәндә гапыны дәрһал ачан адамлар кими олун. Аға ҝәләндә ојаг тапдығы нөкәрләр неҹә дә хошбәхтдирләр! Инанын ки, аға гуршагланыб, онлары сүфрә архасында әјләшдирәҹәк вә өзү дуруб онлара гуллуг едәҹәк».

Бу мәсәлдә нөкәрләр узун палтарларынын әтәјини јығыб гуршаға тахараг ҝеҹә вахты јағла допдолу чырагларын ҝур ишығында јорулмадан чалышырлар. Бунунла онлар ағанын ҝәлишинә һазыр олдугларыны ҝөстәрирләр. Иса изаһ едир: «Әҝәр аға чох ҝеҹ, һәтта ҝеҹә јарысындан сонра да ҝәлиб онлары ојаг тапарса, о нөкәрләр неҹә дә хошбәхтдирләр!»

Аға нөкәрләрини гејри-ади шәкилдә мүкафатландыраҹаг. О, онлары сүфрәјә әјләшдирәҹәк вә өзү дуруб онлара хидмәт едәҹәк. Онларла нөкәр кими дејил, дост кими рәфтар едәҹәк. Ағаны ҝөзләјәрәк бүтүн ҝеҹәни чалышмағын мүгабилиндә онлара лајигли мүкафат верилир! Сонда Иса дејир: «Сиз дә һазыр олун, чүнки инсан Оғлу ҝөзләмәдијиниз саатда ҝәләҹәк».

Петер сорушур: «Аға, сән бу мәсәли тәкҹә бизим үчүн чәкирсән, јохса һамы үчүн?»

Иса бирбаша ҹаваб вермир, әвәзиндә даһа бир мәсәл данышыр: «Өз гуллугчуларына вахтлы-вахтында јемәк пајларыны вермәк үчүн онларын үзәриндә ағанын гојаҹағы садиг вә ағыллы нөкәрбашы кимдир? Ағасы ҝәләндә иш башында олан нөкәр неҹә дә хошбәхтдир! Инанын, ағасы бүтүн әмлакынын идарәсини она тапшыраҹаг».

«Аға» — Иса Мәсиһдир. «Нөкәрбашы» «кичик сүрү»нү тәмсил едир. «Гуллугчулар» ифадәси дә һәмчинин Падшаһлығын 144 000 нәфәр варисинә аиддир, амма онлардан һәр биринин фәрди ишини вурғулајыр. Садиг нөкәрбашыја һәвалә едилмиш «әмлак», Падшаһлығын јер үзүндәки тәбәәләри дә дахил олмагла, ағанын јердәки ишләридир.

Иса гејд едир ки, ола билсин, нөкәрбашы групуна дахил оланлардан һамысы садиг галмасын. О дејир: «Ишдир, әҝәр о нөкәр үрәјиндә: “Ағамын ҝәлмәјинә һәлә вар”, — дејиб нөкәрләри вә гуллугчу гызлары дөјүр, јејиб-ичиб сәрхош олурса, ағасы онун ҝөзләмәдији ҝүн... ҝәлиб она ағыр ҹәза верәҹәк».

Сонра Иса өз ҝәлишини јәһудиләр үчүн одлу-аловлу вахта бәнзәдир, чүнки бәзиләри онун тәлимләрини гәбул едир, диҝәрләри јох. Иса үч илдән артыгдыр ки, суда вәфтиз олуб, инди исә онун өлүмә вәфтиз олунмасы баша чатмаг үзрәдир. О дејир: «Онун тамам олмасыны ҝөзләјәркән үрәјим бәрк сыхылыр!»

Шаҝирдләрә үнванландығы сөзләрдән сонра Иса јенидән ҹамаата мүраҹиәт едир. О һејфсиләнир ки, адамлар онун ким олдуғунун ачыг-ајдын дәлилләрини вә онун ролуну инадла рәдд едирләр. Иса дејир: «Гәрбдән галхан бир булуд ҝөрәндә дејирсиниз: “Туфан олаҹаг”. Белә дә олур. Ҹәнуб күләјинин әсдијини ҝөрәндә дејирсиниз: “Бәрк исти олаҹаг”. Белә дә олур. Икиүзлүләр! Јерин вә ҝөјүн ҝөрүнүшүндән һаванын неҹә олаҹағыны мүәјјән едә билирсиниз. Бәс неҹә олур ки, инди баш верәнләрин мәнасыны билмирсиниз?» Лука 12:32—59.

▪ «Кичик сүрүјә» нечә нәфәр дахилдир вә онлар һансы әнамы алырлар?

▪ Иса шаҝирдләринә һазыр олмағын ваҹиблијини неҹә изаһ едир?

▪ Исанын мәсәлиндә «аға», «нөкәрбашы», «гуллугчулар» вә «әмлак» кимләри вә нәји тәмсил едир?