Садиг нөкәрбашы вә онун рәһбәрлик шурасы
«Вахтлы-вахтында онлара јемәк пајларыны вермәк үчүн ағасынын нөкәрләри үзәринә гојдуғу садиг вә ағыллы нөкәрбашы кимдир?» (ЛУКА 12:42).
1, 2. Иса сон ҝүнләрин әламәтиндән данышаркән һансы ваҹиб суалы галдырды?
СОН ҝүнләрин әламәтиндән данышаркән Иса белә бир суал галдырды: «Вахтлы-вахтында онлара јемәк вермәк үчүн, ағасынын өз нөкәрләри үзәринә гојдуғу садиг вә ағыллы гул кимдир?» Сонра Иса деди ки, бу гул садиглијинә ҝөрә Ағасынын бүтүн маликанәси үзәринә тәјин олунараг мүкафатландырылаҹаг (Мат. 24:45-47).
2 Иса ејни суалы бир нечә ај әввәл дә галдырмышды. (Лука 12:42-44 ајәләрини оху.) О, бу гулу «нөкәрбашы» адландырды, ејни заманда башга нөкәрләрдән дә данышды. Нөкәрбашы нөкәрләр үзәриндә тәјин олунан вә ев тәсәррүфатыны идарә едән адамдыр. Бунунла белә, нөкәрбашынын өзү дә гуллугчудур. Бу гул, јәни нөкәрбашы кимдир вә о, ‘вахтлы-вахтында јемәји’ неҹә верир? Руһани гиданын һансы канал васитәсилә верилдијини билмәк һәр биримиз үчүн ваҹибдир.
3. а) Христиан дүнјасынын шәрһчиләри Исанын «гул» һаггында дедикләрини неҹә изаһ етмәјә чалышырлар? б) «Нөкәрбашы», јәни «гул» вә ‘нөкәрләр’ кимләрдир?
3 Христиан дүнјасынын шәрһчиләри чох вахт дејирләр ки, Исанын бу сөзләри христианлар арасында мәсул вәзифә дашыјанлара аиддир. Лакин мәсәлдә ‘аға’ илә тәмсил олунан Иса демәк истәмирди ки, Христиан дүнјасынын мүхтәлиф тәригәтләринә мәнсуб чохсајлы гуллар олаҹаг. Әксинә, о, бүтүн маликанәсинин идарәсини тапшыраҹағы јалныз бир ‘нөкәрбашынын’, јәни ‘гулун’ олаҹағыны ајдын ҝөстәрди. Бу журналда дәфәләрлә изаһ олундуғу кими, нөкәрбашы мәсһ олунмуш шаҝирдләрдән ибарәт ‘кичик сүрүнү’ груп шәклиндә тәмсил едир. «Луканын Мүждәси»ндә Иса онлар барәдә данышыр (Лука 12:32). ‘Нөкәрләр’ дејилдикдә ејни груп нәзәрдә тутулса да, бу групда ајры-ајрылыгда һәр кәсин ролунун нәдән ибарәт олдуғу вурғуланыр. Мараглы суал јараныр: «Бу гул синфинин һәр бир үзвү вахтлы-вахтында верилән руһани гиданын пајланмасында иштирак едирми?» Мүгәддәс Јазыларын бу мәсәләјә даир нә дедијини диггәтлә арашдырдыгда ҹаваб бәлли олур.
Јеһованын гулу кечмишдә
4. Јеһова гәдим Исраил халгыны неҹә адландырмышды вә бу халг һаггында нәји гејд етмәк ваҹибдир?
4 Јеһова гәдимдә Өз Исраил халгына бүтөвлүкдә гул дејә мүраҹиәт едирди. «Рәбб бәјан едир: “Сизсиниз [ҹәмдә] Мәним шаһидләрим [ҹәмдә], сечдијим гулларым [‘гулум’, КМ]”» (Јешаја 43:10). Халгын бүтүн үзвләри бир гул синфинә дахил иди. Лакин гејд етмәк ваҹибдир ки, халга тәлим вермәк вәзифәси јалныз каһинләрә вә каһин синфинә дахил олмајан левилиләрә һәвалә олунмушду (2 Салн. 35:3; Мал. 2:7).
5. Исанын сөзләринә әсасән, һансы мүһүм дәјишиклик баш вермәли иди?
5 Иса гул һаггында данышаркән Исраил халгынымы нәзәрдә тутурду? Јох. Бу, Исанын өз мүасирләри олан јәһудиләрә дедији сөзләрдән бәллидир: «Аллаһын Сәлтәнәти сиздән алыныб, онун мејвәләрини јетишдирәҹәк бир халга вериләҹәкдир» (Мат. 21:43). Бурадан ајдын ҝөрүнүр ки, дәјишикликләр баш вермәли иди. Јеһова јени халгдан истифадә едәҹәкди. Лакин руһани тәлимә ҝәлдикдә, Исанын мәсәлиндәки ‘гулун’ ҝөрдүјү иш гәдим Исраилдә ‘гулун’ ҝөрдүјү ишлә ејнидир.
Садиг гул пејда олур
6. Ерамызын 33-ҹү илинин Пентикост ҝүнүндә һансы халг јаранды вә бу халгын үзвләри кимләр олду?
6 Јени халг — «Аллаһын Исраили» руһани исраиллиләрдән тәшкил олунуб (Галат. 6:16; Ром. 2:28, 29; 9:6). Бу халг б. е. 33-ҹү илинин Пентикост ҝүнүндә Аллаһын руһу Онун хидмәтчиләринин үзәринә төкүлән заман јаранды. О вахтдан етибарән бүтүн мәсһ олунмуш мәсиһчиләр Ағанын, Иса Мәсиһин тәјин етдији гул синфи кими хидмәт едән халгын бир һиссәси олду. Бу халгын һәр бир үзвүнә хош хәбәри тәблиғ етмәк вә шаҝирдләр һазырламаг тапшырылмышды (Мат. 28:19, 20). Бәс вахтлы-вахтында руһани гида илә тәмин етмәк ишиндә бу групун һәр бир үзвү иштирак етмәли идими? Ҝәлин Мүгәддәс Јазыларын бу суала неҹә ҹаваб вердијинә бахаг.
7. Әввәлҹә һәвариләрин әсас иши нәдән ибарәт иди вә сонрадан онлар һансы әлавә мәсулијјәтләри алдылар?
7 Иса 12 һәварисини тәјин едәндә онларын әсас иши хош хәбәри башгаларына тәблиғ етмәкдән ибарәт иди. (Марк 3:13-15 ајәләрини оху.) Бу тәјинат «ҝөндәрмәк» мәнасыны дашыјан јунан фелиндән әмәлә ҝәлән апостолос («һәвари» кими тәрҹүмә олунур) сөзүнүн әсас мәнасына мүвафигдир. Лакин вахт кечдикҹә вә мәсиһчи јығынҹағы тәсис олунмаг үзрә икән һәвариләрин үзәринә нәзарәт етмәк иши дүшдү (Һәв. иш. 1:20-26; 15:1-22).
8, 9. а) Он ики һәваринин әсас иши нәдән ибарәт иди? б) Даһа кимләрә рәһбәрлик шурасы тәрәфиндән тәсдигләнән әлавә мәсулијјәтләр һәвалә олунду?
8 Руһани гида илә тәмин етмәк ишиндә әсас мәсулијјәт кимин үзәринә дүшүрдү? Ҹавабы Пентикост ҝүнүндән сонра баш верән һадисәләрдән ҝөрмәк олар. Дул гадынлара ҝүндәлик јемәк пајламагла бағлы мүбаһисә дүшәндә 12 һәвари шаҝирдләри топлајыб онлара деди: «Аллаһын кәламыны бурахыб мадди мәсәләләрлә мәшғул олмағымыз мәгбул дејил». (Һәвариләрин ишләри 6:1-6 ајәләрини оху.) Һәвариләр «бу иш үчүн» руһән јеткин вә јарарлы гардашлары тәјин етдиләр ки, өзләрини «Аллаһын кәламыны јајмаг ишинә» һәср етсинләр. Јеһова бу гәрара хејир-дуа вердији үчүн Онун ‘кәламы вүсәт алыр вә Јерусәлимдә шаҝирдләрин сајы хејли артырды’ (Һәв. иш. 6:7). Беләликлә, руһани гида илә тәмин етмәк ишиндә әсас мәсулијјәт һәвариләрин үзәринә дүшүрдү (Һәв. иш. 2:42).
9 Мүәјјән мүддәт сонра башгаларына да ҹидди мәсулијјәтләр һәвалә олунду. Павел вә Барнаба мүгәддәс руһун рәһбәрлији илә Антакја јығынҹағы тәрәфиндән миссионер кими ҝөндәрилдиләр. Онлар 12 һәваринин сырасына дахил олмасалар да, һәвари кими танынырдылар (Һәв. иш. 13:1-3; 14:14; Галат. 1:19). Онларын тәјинаты Јерусәлимдәки рәһбәрлик шурасы тәрәфиндән тәсдигләнди (Галат. 2:7-10). Гыса мүддәт сонра Павел руһани гиданын пајланмасы ишиндә иштирак етмәјә башлады. О, Аллаһдан илһам алараг илк мәктубуну јазды.
10. Биринҹи әсрдә руһани гиданын һазырланмасында руһла мәсһ олунмуш мәсиһчиләрин һамысы иштирак едирдими? Изаһ един.
10 Бәс бүтүн мәсһ олунмуш мәсиһчиләр тәблиғ ишинә нәзарәт етмәкдә вә руһани гиданын һазырланмасында иштирак едирдиләрми? Јох. Һәвари Павел дејир: «Һамы һәваридирми? Һамы пејғәмбәрдирми? Һамы мүәллимдирми? Һамы мөҹүзә јарада биләрми?» (1 Кор. 12:29). Руһдан доғулан мәсһ олунмуш мәсиһчиләрин һамысы тәблиғ ишиндә иштирак етсә дә, Јунанҹа Мүгәддәс Јазыларын 27 китабынын јазылмасында чох мәһдуд сајда киши — ҹәми сәккиз нәфәр иштирак етмишдир.
Садиг гул бизим ҝүнләрдә
11. Гулун үзәринә тәјин олундуғу ‘маликанәјә’ нә дахилдир?
11 Исанын Матта 24:45 ајәсиндә јазылан сөзләри ајдын ҝөстәрир ки, садиг вә ағыллы гул синфи сон ҝүнләр әрзиндә дә јер үзүндә мөвҹуд олмалы иди. Вәһј 12:17 ајәсиндә онлар гадынын өвладынын «диҝәр» үзвләри, јәни галығы адландырылыр. Бу галыг бир груп кими јер үзүндә Мәсиһин бүтүн маликанәси үзәринә тәјин олунуб. Садиг нөкәрбашынын гејдинә галмалы олдуғу Ағанын јер үзүндәки ‘маликанәсинин’ марагларына Падшаһлығын јерүзү тәбәәләри вә хош хәбәрин тәблиғиндә истифадә олунан мадди әмлак дахилдир.
12, 13. Мәсиһчи сәмави дәвәтә малик олуб-олмадығыны һарадан билир?
12 Мәсиһчи ҝөјләр үмидинә малик олуб-олмадығыны вә руһани Исраилин галығына дахил олуб-олмадығыны һарадан билир? Ҹавабы һәвари Павелин онунла бирҝә сәмави үмидә шәрик оланлара јаздығы сөзләрдән тапмаг олар: «Аллаһын Руһу илә идарә олунанларын һамысы Аллаһын оғулларыдыр. Чүнки сиз јенә дә горху ичиндә јашамаг үчүн көләлик руһуну алмадыныз, оғуллуг руһуну алдыныз. Бу руһла, “Абба, Ата!”,— дејә сәсләнирик. Елә һәмин Руһ биздәки руһа шәһадәт едир ки, биз Аллаһын өвладларыјыг. Вә әҝәр өвладыјыгса, демәли, ејни заманда варисләрик, Аллаһын варисләријик; вә әҝәр Мәсиһлә бәрабәр иззәт газанмаг үчүн Онунла изтираб чәкириксә, Мәсиһин һәмварисләријик» (Ром. 8:14-17).
13 Садә сөзләрлә десәк, онлар ајры-ајрылыгда Аллаһын мүгәддәс руһу илә мәсһ олунур вә сәмави ‘дәвәти’ алырлар (Ибр. 3:1). Бу дәвәти онларын һәр биринә ајры-ајрылыгда Аллаһын Өзү верир. Онлар да, өз нөвбәсиндә, сорғу-суалсыз, шәкк-шүбһәсиз вә һеч бир горху һисс етмәдән Аллаһын оғуллары кими доғулмаға разы олурлар. (1 Јәһја 2:20, 21 ајәләрини оху.) Беләликлә, онлар һансы үмидә малик олаҹагларыны өзләри сечмир, лакин Јеһова онларын үзәринә мөһүрүнү, јәни мүгәддәс руһуну гојур (2 Кор. 1:21, 22; 1 Пет. 1:3, 4).
Дүзҝүн нөгтеји-нәзәр
14. Мәсһ олунмушлар өз дәвәтләринә неҹә јанашырлар?
14 Бу мәсһ олунмушлар сәмави мүкафатларыны ҝөзләдикләри мүддәтдә өзләри һагда һансы фикирдә олмалыдырлар? Онлар баша дүшүрләр ки, мөһтәшәм дәвәт алмаларына бахмајараг, бу садәҹә бир дәвәтдир. Онлар бу мүкафата наил олмаг үчүн өләнәдәк садиг галмалыдырлар. Онлар тәвазөкарлыгла Павелин сөзләрилә разылашырлар: «Гардашлар, мән һесаб етмирәм ки, ону әлдә етмишәм. Јалныз бир шеј едирәм, архада галан һәр шеји унудуб, гаршыда олана чатмаға ҹан атараг, Аллаһын Мәсиһ Иса васитәсилә етдији јүксәк дәвәтә дахил олан мүкафат үчүн һәдәфә доғру гачырам» (Филип. 3:13, 14). Мәсһ олунмуш галыг әлиндән ҝәләни етмәлидир ки, там тәвазөкарлыгла ‘алдығы дәвәтә лајиг бир һәјат сүрсүн’ вә буну «горху вә ләрзә илә» етсин (Ефес. 4:1, 2; Филип. 2:12; 1 Салон. 2:12).
15. Мәсиһчиләр Хатирә Ҝеҹәсиндә символлардан гәбул едәнләрә неҹә мүнасибәт ҝөстәрмәлидирләр вә мәсһ олунмушлар өзләри барәдә һансы фикирдәдирләр?
15 Бәс диҝәр мәсиһчиләр мәсһ олундуғуну иддиа едән вә Хатирә Ҝеҹәсиндә символлардан гәбул етмәјә башлајан кәсә неҹә мүнасибәт ҝөстәрмәлидир? Һеч ким ону мүһакимә етмәмәлидир. Бу јалныз онунла Јеһова арасында олан бир мәсәләдир (Ром. 14:12). Лакин һәгигәтән дә мәсһ олунмуш мәсиһчиләр өзләринә гаршы хүсуси диггәт тәләб етмирләр. Онлар мәсһ олундуглары үчүн һәтта ‘бөјүк издиһамын’ бәзи тәҹрүбәли үзвләриндән даһа дәрин анлајыша малик олдугларыны дүшүнмүрләр (Вәһј 7:9). Онлар фикирләшмирләр ки, мүтләг ‘башга гојунлара’ мәнсуб олан һәмкарларындан даһа чох мүгәддәс руһа маликдирләр (Јәһ. 10:16). Онлар өзләринә хүсуси мүнасибәт ҝөзләмирләр; символлардан гәбул етдикләри үчүн өзләрини јығынҹағын тәјин олунмуш ағсаггалларындан үстүн тутмурлар.
16-18. а) Мәсһ олунмушларын һамысы јени руһани һәгигәтләрин ачыгланмасында иштирак едирми? Нүмунә чәкин. б) Нәјә ҝөрә Рәһбәрлик Шурасы символлардан гәбул едән һәр бир кәслә мәсләһәтләшмәји лүзум билмир?
16 Демәк олармы ки, Мүгәддәс Китабын јени һәгигәтләрини ачыгламаг үчүн јер үзүндә јашајан бүтүн мәсһ олунмушлар бир-бирилә әлагә гурурлар? Хејр. Гул синфи бүтөвлүкдә нөкәрләри руһани гида илә тәмин етмәк мәсулијјәти дашыса да, бу синфә дахил оланларын һамысына ејни мәсулијјәт вә ја иш һәвалә олунмајыб. (1 Коринфлиләрә 12:14-18 ајәләрини оху.) Артыг гејд олундуғу кими, биринҹи әсрдә ваҹиб әһәмијјәт дашыјан тәблиғ ишиндә һамы иштирак едирди. Лакин Аллаһын Кәламынын јазылмасында вә мәсиһчи јығынҹағына нәзарәт етмәк ишиндә јалныз чох мәһдуд сајда инсан иштирак етмишди.
17 Нүмунә үчүн: Мүгәддәс Јазыларда бәзән дејилир ки, «ҹәмијјәт», јәни јығынҹаг интизам мәсәләләрини һәлл етмәк үчүн мүәјјән тәдбирләр ҝөрүр (Мат. 18:17). Әслиндә исә, бурада јығынҹағын тәмсилчиси кими бу тәдбирләри ҝөрмәк сәлаһијјәти олан ағсаггаллар нәзәрдә тутулур. Ағсаггаллар мүәјјән гәрар гәбул етмәздән өнҹә јығынҹағын бүтүн үзвләринин фикрини өјрәнмирләр. Онлар тәјин олундуглары вәзифәләрини иҹра едирләр вә бүтүн јығынҹағын рифаһы наминә чалышырлар.
18 Буна бәнзәр тәрздә, бу ҝүн дә мәһдуд сајда мәсһ олунмушлар гул синфини тәмсил етмәк мәсулијјәти дашыјыр. Онлар Јеһованын Шаһидләринин Рәһбәрлик Шурасыны тәшкил едирләр. Мүгәддәс руһла мәсһ олунмуш бу кишиләр Падшаһлыг ишинә вә руһани гида програмынын һәјата кечирилмәсинә нәзарәт едирләр. Биринҹи әсрдә олдуғу кими, бу ҝүн дә Рәһбәрлик Шурасы гәрар гәбул етмәздән өнҹә гул синфинин һәр бир үзвү илә мәсләһәтләшмир. (Һәвариләрин ишләри 16:4, 5 ајәләрини оху.) Лакин мәсһ олунмуш Шаһидләрин һамысы һазыркы мүһүм бичин ишиндә фәал иштирак едир. Бир синиф кими, «садиг вә ағыллы гул» бир бәдәни тәшкил едир, лакин ајры-ајрылыгда онларын һәр биринә мүхтәлиф ишләр һәвалә олунуб (1 Кор. 12:19-26).
19, 20. Бөјүк издиһам «садиг вә ағыллы гул»а вә онун Рәһбәрлик Шурасына һансы таразлы нөгтеји-нәзәрә маликдир?
19 Јухарыда дејиләнләр јер үзүндә әбәди јашамаг үмидинә малик олан вә даим артмагда олан бөјүк издиһамын үзвләринә неҹә тәсир етмәлидир? Падшаһын маликанәсинин бир һиссәси кими, онлар «садиг вә ағыллы гул»у тәмсил едән Рәһбәрлик Шурасынын бүтүн тәдбирләрини бөјүк севинҹлә дәстәкләјирләр. Бөјүк издиһамын үзвләри Рәһбәрлик Шурасынын нәздиндә һазырланан руһани гидаја ҝөрә миннәтдардырлар. Лакин ејни заманда бөјүк издиһамын үзвләри гул синфинә дәрин һөрмәт ҝөстәрмәклә јанашы, диггәтли олмалыдырлар ки, гулун үзвү олдуғуну иддиа едән һәр кәси уҹалтмасынлар. Һәгигәтән дә Аллаһын руһу илә мәсһ олунмуш һеч бир мәсиһчи өзүнә белә бир мүнасибәтин ҝөстәрилмәсини үрәјиндән белә кечирмир (Һәв. иш. 10:25, 26; 14:14, 15).
20 Мәсһ олунмуш галығын бир һиссәси олан ‘нөкәрләр’ вә ја бөјүк издиһамын үзвләри олмағымыздан асылы олмајараг, ҝәлин садиг нөкәрбашы вә онун Рәһбәрлик Шурасы илә там әмәкдашлыг етмәјә гәти гәрарлы олаг. Ҝәлин һәр биримиз ‘ојаг дураг’ вә садиглијимизи сона гәдәр горујаг (Мат. 24:13, 42).
Јадыныздадырмы?
• «Садиг вә ағыллы гул» вә ‘нөкәрләр’ кимләрдир?
• Мәсиһчи сәмави дәвәтә малик олуб-олмадығыны һарадан билир?
• Јени руһани гиданын һазырланмасында әсас мәсулијјәти ким дашыјыр?
• Мәсһ олунмуш кәс өзү һагда һансы фикирдә олмалыдыр?
[23-ҹү сәһифәдәки шәкил]
Бизим ҝүнләрдә Рәһбәрлик Шурасы садиг вә ағыллы гул синфини тәмсил едир. Ејни гурулуш I әсрдә дә мөвҹуд иди