Фәсил 91

Лазар дирилир

ИСА МӘСИҺ ҹамаатла бирҝә Лазарын гојулдуғу сәрдабәјә јахынлашыр. Сәрдабә ағзы дашла өртүлмүш бир мағарадыр. Иса дејир: «Дашы кәнара чәкин».

Исанын нә етмәк истәдијини баша дүшмәјән Марта етираз едир: «Аға, о, дөрд ҝүндүр ки, бурададыр, индијә јәгин ијләнәр».

Анҹаг Иса ондан сорушур: «Мәҝәр сәнә демәдим ки, инансан, Аллаһын әзәмәтини ҝөрәҹәксән?»

Дашы ҝөтүрүрләр. Иса ҝөзләрини ҝөјә галдырыб уҹадан дуа едир: «Ата, чох сағ ол ки, мәни ешитдин. Билирәм, Сән мәни һәмишә ешидирсән; анҹаг буну бурада дурмуш ҹамаатдан өтрү дедим ки, мәни Сәнин ҝөндәрдијинә инансынлар». Бунунла Иса ҝөстәрмәк истәјир ки, онун инди ҝөрәҹәји иш Аллаһын ҝүҹү сајәсиндәдир. Сонра Иса чағырыр: «Лазар, чөлә чых!»

Вә Лазар чыхыр. О, сарғыларла кәфәнләниб, үзүнү исә дәсмалла өртүбләр. Иса дејир: «Кәфәнини ачын, азад олсун».

Марта илә Мәрјәмә башсағлығы вермәјә ҝәлмиш јәһудиләрин чоху бу мөҹүзәни ҝөрәндә Исаја иман ҝәтирирләр. Диҝәрләри исә Исанын нә етдијини фәрисејләрә данышмаг үчүн ҝедирләр. Фәрисејләрлә бөјүк каһинләр дәрһал јәһудиләрин али мәһкәмәси олан Синедриону чағырырлар.

Синедриона баш каһин (һәмин вахт баш каһин Кајафа иди), һәмчинин фәрисејләр, садукејләр, бөјүк каһинләр вә сабиг баш каһинләр дахилдир. Онлар дејирләр: «Биз нә едәк? Бу адам чохлу мөҹүзә ҝөстәрир. Ону өзбашына гојсаг, һамы она инанаҹаг, онда ромалылар ҝәлиб һәм мәбәдимизин, һәм дә халгымызын ахырына чыхаҹаглар».

Дин рәһбәрләри Исанын «чохлу мөҹүзә ҝөстәрдијини» етираф етсәләр дә, әслиндә, онлар өз мөвгеләри вә вәзифәләриндән өтрү нараһатдырлар. Лазарын дирилмәси садукејләр үчүн лап ағыр зәрбә олуб, чүнки онлар дирилмәјә инанмырлар.

Садукеј олдуғу еһтимал едилән Кајафа сөз алыб дејир: «Сиз һеч нә билмирсиниз вә бир шеји баша дүшмүрсүнүз ки, бүтүн халгын мәһвиндәнсә, бир адамын өлмәси мәһз сизин үчүн јахшыдыр».

Бу сөзләри Аллаһ Кајафанын дилинә гојур. Сонралар бу һадисәни нәгл едән һәвари Јәһја јазыр: «О [Кајафа] бу сөзләри өзүндән демәди». Кајафа Исанын өлүмүнү истәјир, чүнки Иса онларын нүфуз вә һакимијјәтини сарсыдыр. Анҹаг Јәһјанын дедији кими, «Иса јалныз халг үчүн јох, һәм дә Аллаһын пәрән-пәрән олмуш өвладларыны бир јерә јығмаг үчүн өлүр». Бәли, Аллаһын Оғлу Атасынын нијјәтинә ујғун олараг бәшәријјәт уғрунда ҹаныны фәда едир.

Синедрион Исанын өлүмүнә гәрар верир вә беләҹә, Кајафа истәјинә наил олур. Лакин Иса бу һагда ешидир (ола билсин, бу мәлуматы она дост мүнасибәти бәсләјән Синедрион үзвү Никодим чатдырыр) вә орадан чыхыб ҝедир. Јәһја 11:38—54.

▪ Нәјә ҝөрә Иса Лазары дирилтмәздән әввәл уҹадан дуа едир?

▪ Лазарын дирилмәсинин шаһидләри нә едирләр?

▪ Синедрион үзвләринин бәдхаһлығы неҹә үзә чыхыр?

▪ Кајафанын нијјәти нәдир? Аллаһ онун васитәсилә һансы пејғәмбәрлији верир?