Фәсил 119
Гејри-гануни мәһкәмә
ИСАНЫ бир ҹинајәткар кими, әли-голу бағлы һалда бөјүк нүфуз саһиби олан сабиг баш каһин Һаннанын евинә ҝәтирирләр. Иса 12 јашлы бир ушаг икән мәбәддә Ганун мүәллимләрини һејрәтә ҝәтирән заман Һанна баш каһин иди. Һаннадан сонра баш каһин вәзифәсини онун оғланларындан бир нечәси, инди исә күрәкәни Кајафа тутур.
Ҝөрүнүр, Һанна јәһудиләрин дини һәјатында узун мүддәт јүксәк мөвге тутдуғу үчүн Исаны әввәлҹә онун евинә ҝәтирирләр. Иса бурада олдуғу вахт баш каһин Кајафа фүрсәтдән истифадә едиб јәһудиләрин али мәһкәмәси олан Синедрионун 71 үзвүнү топлајыр вә јаланчы шаһидләр тапыр.
Һанна Исаны шаҝирдләри вә тәлимләри барәдә сорғу-суала тутур. Иса ҹаваб верир: «Мән һәр шеји дүнјаја ачыг-ашкар сөјләмишәм. Мән һәмишә јәһудиләрин топлашдығы синагогларда вә мәбәддә тәлим вермишәм. Һеч бир сөзү хәлвәтдә демәмишәм. Нијә мәни сорғу-суала чәкирсән? Данышдыгларымы ешидәнләрдән соруш. Онлар мәним нәдән данышдығымы билирләр».
Иса буну дејәндә јанында дурмуш бир мүһафизәчи онун үзүнә силлә чәкиб дејир: «Бөјүк каһинә ҹаваб гајтарырсан?»
Иса она ҹаваб верир: «Әҝәр дүз демирәмсә, сәһвими ҝөстәр. Јох әҝәр дүз данышырамса, мәни нијә вурурсан?» Бундан сонра Һанна Исаны әли-голу бағлы Кајафанын јанына ҝөндәрир.
Шүбһәсиз, бу арада бүтүн Синедрион — бөјүк каһинләр, ағсаггаллар вә мирзәләр Кајафанын евиндә топлашыр. Онлар Пасха ҝеҹәси мәһкәмә гурмагла ачыг-ашкар Гануна гаршы чыхырлар. Лакин бу рәһбәрләр һеч бир вәҹһлә өз чиркин нијјәтләриндән әл чәкмәк истәмирләр.
Һәлә бир нечә һәфтә бундан әввәл, Иса Лазары дирилдәндә Синедрион үзвләри ону өлдүрмәјә гәрар вермишдиләр. Ики ҝүн әввәл исә дин рәһбәрләри Исаны һијлә илә тутуб өлдүрмәк үчүн өз араларында данышмышдылар. Тәсәввүр едирсиниз, Иса һәлә мәһкәмә олунмамыш артыг өлүмә мәһкум едилиб?!
Инди исә Исанын әлејһинә дәлил-сүбут топламаг үчүн онлар јаланчы шаһидләр тапмаға чалышырлар. Лакин елә бир шаһид тапа билмирләр ки, сөзләри бир-биринә дүз ҝәлсин. Ахырда ики нәфәр ҝәлиб дејир: «Биз бу адамын сөзләрини өз гулағымызла ешитмишик. О белә дејиб: “Мән инсан әли илә тикилмиш бу мәбәди дағыдыб үч ҝүнә башгасыны, әллә тикилмәмиш мәбәд уҹалдаҹағам”».
Кајафа Исадан сорушур: «Нијә ҹаваб вермирсән? Ешидирсән, әлејһинә нәләр данышырлар?» Лакин Иса сусур. Синедрион лап биабырчы вәзијјәтдәдир, бу гәдәр шаһидин ујдурдуғу рәвајәтләр бир-бирилә узлашмыр. Буна ҝөрә дә баш каһин башга фәндә әл атыр.
Кајафа билир ки, киминсә өзүнү Аллаһын Оғлу адландырмасы јәһудиләрин хошуна ҝәлмир. Бундан әввәл онлар ики дәфә тәләм-тәләсик гәрар верәрәк Исаны күфр данышан адам кими өлүмә лајиг сајмышлар. Онларда јанлыш тәсәввүр јаранмышды ки, Иса өзүнү Аллаһа бир едир. Инди Кајафа һијләҝәрҹәсинә ондан сорушур: «Сәни вар олан Аллаһа анд верирәм, сөјлә, Аллаһын Оғлу Мәсиһ сәнсән?»
Јәһудиләр нә дүшүнүрләрсә-дүшүнсүнләр, Иса, һәгигәтән дә, Аллаһын Оғлудур. Инди Исанын сусмасы онун Мәсиһ олмадығы кими гијмәтләндирилә биләрди. Буна ҝөрә дә Иса мәрд-мәрданә дејир: «Бәли, мәнәм. Сиз инсан Оғлунун Гүдрәтлинин сағында отурдуғуну вә ҝөјүн булудлары үзәриндә ҝәлдијини ҝөрәҹәксиниз».
Кајафа буну ешидән кими артистҹәсинә јахасыны ҹырыб гышгырыр: «О күфр данышды! Даһа шаһидләр нәјимизә ҝәрәкдир? Индиҹә өз гулағынызла онун ағзындан күфр ешитдиниз. Һә, нә дејирсиниз?»
Синедрион гәрар верир: «О өлмәлидир». Онлар Исаны әлә салмаға вә она тәһгирамиз сөзләр демәјә башлајырлар. Сонра онун үзүнә силлә чәкир вә түпүрүрләр. Бәзиләри онун үзүнү өртүб јумруглајыр вә ришхәндлә дејирләр: «Еј, Мәсиһ! Пејғәмбәр дејилсән, де ҝөрәк, сәни ким вурду?» Беләҹә, онлар бу ҝеҹә мәһкәмәси заманы Иса илә гануна зидд вә кобуд давранырлар. Матта 26:57—68, 3, 4; Марк 14:53—65; Лука 22:54, 63—65; Јәһја 18:13—24; 11:45—53; 10:31—39; 5:16—18.
▪ Исаны әввәлҹә һара ҝәтирирләр вә орада нәләр олур?
▪ Сонра Исаны һара апарырлар вә нә үчүн?
▪ Кајафа Синедрионун Исаны өлүмә лајиг билмәсинә неҹә наил олур?
▪ Мәһкәмә вахты Иса илә неҹә ганунсуз вә кобуд рәфтар едилир?