Фәсил 98
Исанын өлүмүнә јахын шаҝирдләр арасындакы мүбаһисә
ЕРАМЫЗЫН 33-ҹү илинин Пасха бајрамына ҹәми бир һәфтә галыб. Иса шаҝирдләри илә Иордан чајыны кечиб Перејадан Јерусәлимә, бајрама ҝедир. Онларын јанында чохлу адам вар.
Иса шаҝирдләриндән ирәлидә ҝедир вә һамы онун әзминә һејран галыб. Јадыныздадырса, бир нечә һәфтә бундан әввәл, Лазар өлән заман Иса Перејадан Јәһудејаја ҝетмәк истәјирди. Онда Томас шаҝирдләрә демишди: «Ҝедәк, биз дә онунла өләк». Һәмчинин јадыныза ҝәлирсә, Иса Лазары дирилтдикдән сонра Синедрион үзвләри ону өлдүрмәк үчүн план гурмушдулар. Буна ҝөрә дә тәәҹҹүблү дејил ки, шаҝирдләр Јәһудејаја горха-горха ҝирирләр.
Иса он ики һәварисини, ҝәләҹәкдә баш верәҹәк һадисәләрә һазырламаг үчүн, ҹамаатын ичиндән ајырыб онлара дејир: «Инди Јерусәлимә ҝедирик. Инсан Оғлу бөјүк каһинләрин вә мирзәләрин әлинә вериләҹәк, онлар инсан Оғлуну өлүмә мәһкум едәҹәк вә башга милләтләрдән олан адамлара тәслим едәҹәкләр. Онлар да инсан Оғлуну лаға гојаҹаг, үзүнә түпүрәҹәк, гамчылајаҹаг вә өлдүрәҹәкләр. Лакин о, үч ҝүндән сонра дириләҹәк».
Сон ајлар әрзиндә артыг үчүнҹү дәфәдир ки, Иса шаҝирдләринә өлүмү вә дириләҹәји барәдә данышыр. Лакин онлар буну дәрк етмирләр. Ола билсин, онлар Исраил падшаһлығынын јенидән јер үзүндә бәрпа олунаҹағына инаныр вә јер үзүндә падшаһлыгда Мәсиһлә бирҝә шан-шөһрәт саһиби олаҹагларыны ҝөзләјирләр.
Пасхаја ҝедәнләр арасында һәвари Јагубла Јәһјанын анасы Саломе дә вар. Иса бу ики гардашы тез өзләриндән чыхдыглары үчүн «илдырым оғуллары» адландырмышды. Артыг бир нечә вахтдыр ки, бу гардашларын үрәјиндә Мәсиһин падшаһлығында јүксәк вәзифә тутмаг истәји јараныб вә бу истәји аналарына да билдирибләр. Буна ҝөрә дә Саломе Исаја јахынлашараг онун гаршысында диз чөкүр вә оғулларынын адындан хаһиш едир.
Иса ондан сорушур: «Нә истәјирсән?»
Саломе дејир: «Сөз вер ки, падшаһлығында бир оғлум сәнин сағында, о бириси солунда отураҹаг».
Иса бу сөзләрин Јагубла Јәһјадан ҝәлдијини билдијиндән үзүнү онлара тутуб дејир: «Сиз нә истәдијинизи билмирсиниз. Мәним ичдијим ҹамдан ичә биләрсинизми?»
Онлар: «Бәли, ичә биләрик», — дејә ҹаваб верирләр. Иса олмазын тәгибләрлә гаршылашаҹағыны вә сонда өлдүрүләҹәјини елә индиҹә онлара демишди. Ҝөрүнүр, онлар баша дүшмүрләр ки, Иса тезликлә ичәҹәји «ҹам» дедикдә бунлары нәзәрдә тутур.
Бунунла белә, о, гардашлара дејир: «Доғрудур, мәним ичдијим ҹамдан ичәҹәксиниз, амма кимин сағымда, кимин солумда отураҹағыны мән һәлл етмирәм. Атам бу јерләри кимин үчүн һазырлајыбса, онлар да орада отураҹаглар».
Галан он һәвари Јагубла Јәһјанын Исадан нә хаһиш етдијини хәбәр тутанда һиддәтләнир. Јәгин, бундан әввәл дә һәвариләр арасында кимин бөјүк олаҹағы илә әлагәдар мүбаһисәләрдә бу ики гардаш даһа фәал олмушдулар. Гардашларын индики хаһиши ҝөстәрир ки, онлар Исанын бу мәсәләјә даир нәсиһәтини гулагардына вурублар. Әфсуслар олсун ки, онлар һәлә дә бу нијјәтләриндән әл чәкмәјибләр.
Иса јаранмыш ихтилафы вә инҹиклији арадан галдырмаг үчүн он ики һәварисини бир јерә топлајыр. О, мәһәббәтлә онлара нәсиһәт верир: «Сиз јахшы билирсиниз ки, халгларын һөкмдарлары онларын үзәриндә ағалыг едир вә рәһбәрләри онлара башчылыг едирләр. Амма сизин аранызда белә олмамалыдыр. Аранызда бөјүклүк етмәк истәјән гуллуғунузда дурмалыдыр, биринҹи олмаг истәјән сизә нөкәрчилик етмәлидир».
Иса һәвариләри үчүн ҝөзәл нүмунәдир. О дејир: «Ахы инсан Оғлу да она ҝөрә ҝәлмәјиб ки, она гуллуг етсинләр, әксинә, о, хидмәт етмәк вә бир чохлары уғрунда ҹаныны фидјә кими вермәк үчүн ҝәлиб». Иса нәинки инсанлара хидмәт едир, тезликлә бәшәријјәт уғрунда һәтта ҹаныны гурбан верәҹәк! Беләликлә, шаҝирдләри дә онун нүмунәсини изләјәрәк башгаларынын онлара хидмәт етмәсини ҝөзләмәк вә јүксәк мөвге тутмаг әвәзинә, башгаларына хидмәт етмәли вә өзләрини онлардан ашағы тутмалыдырлар. Матта 20:17—28; Марк 3:17; 9:33—37; 10:32—45; Лука 18:31—34; Јәһја 11:16.
▪ Шаҝирдләр нәјә ҝөрә горхуја дүшүрләр?
▪ Иса шаҝирдләрини ҝәләҹәкдә баш верәҹәк һадисәләрә неҹә һазырлајыр?
▪ Исадан нә хаһиш едирләр вә бу, диҝәр һәвариләрә неҹә тәсир ҝөстәрир?
▪ Иса һәвариләр арасында јаранмыш ихтилафы неҹә һәлл едир?