Фәсил 104
Аллаһын сәси үчүнҹү дәфә ешидилир
ИСА МӘСИҺ мәбәддәдир. Гаршыдакы өлүмү илә бағлы фикирләр ону үзүр. Ҝөрәсән, онун өлүмү Атасынын адына неҹә тәсир едәҹәк? Ону ән чох нараһат едән будур. О, Атасына дуа едир: «Ата, Өз адыны шөһрәтләндир».
Бу заман ҝөјдән ҝурултулу бир сәс бәјан едир: «Шөһрәтләндирмишәм вә јенә дә шөһрәтләндирәҹәјәм».
Онун әһатәсиндә олан издиһам һејрәтдән донуб галыр. Бәзиләри дејир: «Онунла мәләк данышырды». Башгаларына исә елә ҝәлир ки, илдырым чахыр. Амма бу сәс Јеһова Аллаһын сәсидир! Бу, Исанын јердәки хидмәти әрзиндә Аллаһын ҝөјдән данышдығы јеҝанә һал дејил.
Үч ил јарым бундан әввәл Иса вәфтиз оларкән Вәфтизчи Јәһја Аллаһын сәсини ешитмишди. О вахт Аллаһ Иса һаггында белә демишди: «Бу, Мәним севимли Оғлумдур, Мән ондан чох разыјам». Икинҹи дәфә Аллаһын сәси өтәнилки Пасхадан бир гәдәр сонра Исанын ҝөркәми дәјишәндә ешидилмишди. Һәмин вахт Аллаһ Јагуба, Јәһјаја вә Петерә Иса Мәсиһ барәдә демишди: «Бу, Мәним севимли Оғлумдур. Мән ондан чох разыјам. Она гулаг асын». Инди исә нисан ајынын 10-у, Исанын өлүмүнә дөрд ҝүн галмыш Аллаһ үчүнҹү дәфә ҝөјләрдән бәјан едир. Амма бу дәфә Онун сәсини чохлу сајда адам ешидир!
Иса дејир: «Бу сәс мәним үчүн јох, сизин үчүн иди». Ҝөјдән ҝәлән бу сәс Исанын, һәгигәтән дә, Аллаһын Оғлу вә вәд едилмиш Мәсиһ олдуғуну сүбут едир. Иса сөзүнә давам едир: «Бу дүнјаја һөкм кәсмәк вахты јетишди. Инди бу дүнјанын һөкмдары девриләҹәк». Исанын өлүмәдәк Аллаһа садиг галмасы бу дүнјанын һөкмдары олан Шејтан Иблисин «деврилмәјә», башга сөзлә, мәһв едилмәјә лајиг олдуғуну тәсдиг едир.
Иса гаршыдакы өлүмү сајәсиндә нәләрин мүмкүн олаҹағына ишарә едәрәк дејир: «Мән исә јухары галдырыланда һәр ҹүр инсаны өзүмә ҹәлб едәҹәјәм». Бәли, Исанын өлүмү мәғлубијјәт јох, галибијјәт олаҹаг! Ахы о, өлүмү илә инсанлары өзүнә ҹәлб едиб әбәди һәјата апараҹаг.
Издиһам исә буна етираз едир: «Биз Ганундан ешитмишик ки, Мәсиһ әбәди галмалыдыр. Неҹә олур, сән дејирсән ки, инсан Оғлу јухары галдырылмалыдыр? Ахы бу инсан Оғлу кимдир?»
Бир белә сүбут гаршысында, үстәлик, Аллаһын сәсини ешидәндән сонра да, чохлары Исанын һәгигәтән инсан Оғлу вә вәд едилмиш Мәсиһ олдуғуна инанмырлар. Иса алты ај бундан әввәл Чардаглар бајрамында олдуғу кими, јенә дә өзүнү «нур» адландырыр вә ону динләјән ҹамаата дејир: «Нә гәдәр ки, нур сизинләдир, нурун өвладлары олмаг үчүн бу нура иман ҝәтирин». Бундан сонра Иса орадан ҝедир вә һәјаты тәһлүкәдә олдуғу үчүн ҹамаатдан ҝизләнир.
Јәһудиләрин Исаја инамсызлыг ҝөстәрмәләри илә Јешаја пејғәмбәрин бу сөзләри јеринә јетир: «Ҝөзүнү кор етди, үрәјини даша дөндәрди ки, ҝөзләри илә ҝөрмәсинләр, үрәкләри илә дәрк етмәсинләр вә ҝери дөнмәсинләр ки, онлара шәфа верим». Јешаја пејғәмбәр ҝөрүнтүдә Јеһова Аллаһын һүзуруну ҝөрмүшдү; Иса Мәсиһ дә (јер үзүнә инсан кими ҝәлмәмишдән әввәлки ҹалалында) орада, Јеһованын јанында иди. Јәһудиләр исә Исанын онлара вәд едилмиш Хиласкар олдуғуну тәсдиг едән сүбутлары инадла рәдд едирләр. Беләликлә, Јешаја пејғәмбәрин дедији сөзләр јеринә јетир.
Бунунла белә, јәһуди рәһбәрләриндән дә (ҝөрүнүр, Синедрион үзвләри) бир чохлары Исаја иман ҝәтирирләр. Мисал үчүн Никодими вә ариматејалы Јусифи ҝөстәрә биләрик. Анҹаг инди бу рәһбәрләр синагогдакы мөвгеләрини итирмәмәк үчүн иманларыны бүрузә вермирләр. Ҝөрүн, онлар нә гәдәр шеј итирирләр!
Иса дејир: «Мәнә иман едән јалныз мәнә јох, мәни ҝөндәрәнә дә иман етмиш олур. Мәни ҝөрән мәни ҝөндәрәни дә ҝөрмүш олур... Мән сөзләрими ешидиб онлара әмәл етмәјәни мүһакимә етмирәм. Мән дүнјаны мүһакимә етмәјә јох, хилас етмәјә ҝәлмишәм... Ағзымдан чыхан сөз ахырынҹы ҝүндә ону мүһакимә едәҹәк».
Бәли, Јеһова бәшәријјәти севдији үчүн Исаны јер үзүнә ҝөндәриб ки, она иман ҝәтирәнләр хилас олсунлар. Хилас олмаг истәјән инсан Аллаһын Иса васитәсилә сөјләдикләринә итаәт етмәлидир. Дүнјанын мүһакимәси исә «ахырынҹы ҝүндә», Мәсиһин Миниллик һөкмранлығы заманы олаҹаг.
Иса сөзләринә белә јекун вурур: «Мән өзүмдән данышмамышам, мәни ҝөндәрән Ата мәнә нә һагда данышмағы әмр едиб. Мән билирәм ки, Онун әмри әбәди һәјата апарыр. Атам мәнә неҹә дејибсә, мән дә елә данышырам». Јәһја 12:28—50; 19:38, 39; Матта 3:17; 17:5; Јешаја 6:1, 8—10.
▪ Исанын јердәки хидмәти заманы һансы үч һалда инсанлар Аллаһын сәсини ешитмишләр?
▪ Јешаја пејғәмбәр Исанын ҹалалыны һарада ҝөрмүшдү?
▪ Јәһуди рәһбәрләриндән кимләр Исаја иман ҝәтирир? Нәјә ҝөрә онлар иманларыны бүрузә вермирләр?
▪ «Ахырынҹы ҝүн» нәдир вә инсанлар һәмин вахт нәјин әсасында мүһакимә олунаҹаглар?