Фәсил 106
Рәһбәрләрин ич үзү ортаја чыхыр
ИСА МӘСИҺ мәбәддәдир. О, өз ҹавабы илә дин рәһбәрләрини чаш-баш гојуб. Онлар һәлә өзләринә ҝәлмәмиш Иса: «Буна нә дејәрсиниз?» — дејәрәк онларын кимлијини үзә чыхаран бир мәсәл чәкир. О данышыр:
«Бир адамын ики өвлады вар иди. Бир ҝүн о, бөјүк оғлуна јахынлашыб дејир: “Бала, ҝет бу ҝүн үзүмлүкдә ишлә. Баш үстә, аға, ҝедәрәм”. Амма ҝетмир. Ата кичик оғлуна да һәмин шеји дејир. Бу оғул исә белә ҹаваб верир: “Ҝетмирәм”. Амма сонрадан дедијинә пешман олуб ҝедир». Иса дин рәһбәрләриндән сорушур:
— Инди дејин ҝөрүм, бу ики оғулдан һансы бири атасынын истәјини јеринә јетирди?
— Кичији, — әлејһдарлар ҹаваб верирләр.
— Буну билин ки, верҝијығанлар вә фаһишәләр Аллаһын падшаһлығына сиздән габаг ҝирәҹәкләр, — дејә Иса онлара билдирир. Верҝијығанлар вә фаһишәләр әввәлҹә Аллаһын јолундан узаг идиләр. Анҹаг сонрадан, «кичик оғул» кими, пешман олуб Аллаһа хидмәт етмәјә башладылар. Дин рәһбәрләри исә «бөјүк оғула» бәнзәјирләр, онлар Аллаһа хидмәт етдикләрини иддиа едирләр. Амма Иса онлара дејир: «[Вәфтизчи] Јәһја ҝәлиб сизә салеһлик јолуну ҝөстәрди, сиз исә она инанмадыныз. Анҹаг верҝијығанлар вә фаһишәләр она инанды. Сиз исә бунлары ҝөрә-ҝөрә јенә дә пешманчылыг чәкиб она инанмадыныз».
Сонра Иса изаһ едир ки, онларын гәбаһәти јалныз Аллаһа хидмәт етмәмәләриндә дејил. Онлар һәм дә бәднијјәт инсанлардыр. Иса мәсәл чәкир: «Бир мүлкәдар вар иди. О, үзүм бағы салды, әтрафыны чәпәрләди, үзүм сыхмаг үчүн чала газды, бир гүллә тикди вә бағы бағбанлара иҹарәјә вериб башга өлкәјә јолланды. Мәһсул јығымы вахты ҝәләндә мүлкәдар өз пајыны алмаг үчүн нөкәрләрини бағбанларын јанына ҝөндәрди. Анҹаг бағбанлар нөкәрләри тутуб бирини дөјдүләр, о бирисини өлдүрдүләр, диҝәрини исә даша басдылар. Мүлкәдар икинҹи дәфә онларын јанына әввәлкиндән дә чох нөкәр ҝөндәрди, амма бағбанлар бунларла да ејни ҹүр рәфтар етдиләр».
Јеһова Аллаһы тәмсил едән «мүлкәдар» «нөкәрләрини», јәни пејғәмбәрләри «үзүм бағына», «бағбанларын» јанына ҝөндәрир. Бу «бағбанлар» Мүгәддәс Китабда «үзүм бағы» илә тәмсил олунан Исраил халгынын рәһбәрләридир.
Мүлкәдар бағбанларын нөкәрләрлә пис давраныб онлары өлдүрдүјүнү биләндә башга гәрар гәбул едир. Иса нәгл едир: «“Јәгин оғлума һөрмәтлә јанашарлар”, — дејиб [мүлкәдар] оғлуну ҝөндәрди. Бағбанлар саһибин оғлуну ҝөрәндә бир-бириләринә дедиләр: “Бу варисдир. Ҝәлин ону өлдүрәк, мирасы бизә галсын!” Бағбанлар ону тутуб бағдан бајыра атдылар вә өлдүрдүләр».
Сонра Иса дин рәһбәрләриндән сорушур: «Сизҹә, бағын саһиби ҝәләндә бағбанлара нә едәҹәк?»
Онлар ҹаваб верирләр: «Бүтүн бу пис әмәлләринә ҝөрә онларын ахыры да пис олаҹаг. Мүлкәдар үзүм бағыны башга бағбанлара иҹарәјә верәҹәк. Онлар саһибин мејвә пајыны вахтлы-вахтында верәҹәкләр».
Бу рәһбәрләр өз дилләри илә өзләрини мәһкум едирләр. Ахы онлар да Јеһова Аллаһын «үзүм бағы» олан Исраил халгынын «бағбанлары» арасындадырлар. Јеһова Аллаһ бу бағбанлардан бәһрә, јәни Онун Оғлуна — Мәсиһә иман ҝәтирмәләрини ҝөзләјир. Бу бәһрәләри вермәдикләринә ҝөрә Иса онлары хәбәрдар едир: «Мәҝәр Мүгәддәс Јазыларда: “Бәнналарын рәдд етдикләри даш әсас ҝушәдашы олду. Буну едән Јеһовадыр вә биз буна һејран галмышыг”, — сөзләрини һеч охумамысыныз? Буна ҝөрә дә ешидин вә аҝаһ олун, Аллаһын падшаһлығы сиздән алынаҹаг вә онун бәһрәсини ҝәтирән халга вериләҹәк. Һәмчинин буну да билин ки, бу дашын үстүнә јыхылан һәр бир кәс әзилиб өләҹәк. Бу даш кимин үстүнә дүшсә, ону тәләф едәҹәк».
Мирзәләр вә бөјүк каһинләр сөһбәтин онлардан ҝетдијини анлајыб «варис» Исаны өлдүрмәк истәјирләр. Буна ҝөрә дә Аллаһын Падшаһлығында һакимијјәт сүрмәк имтијазы бир милләт кими онлардан алынаҹаг вә лајигли бәһрәләр јетишдирәҹәк јени «бағбанлара» вериләҹәк. Бу «бағбанлар» јени халгы тәшкил едәҹәк.
Бу дәфә дә дин рәһбәрләри Исаны өлдүрмәјә ҹүрәт етмирләр, чүнки ону пејғәмбәр сајан ҹамаатдан горхурлар. Матта 21:28—46; Марк 12:1—12; Лука 20:9—19; Јешаја 5:1—7.
▪ Исанын чәкдији биринҹи мәсәлдә ики оғул кимләри тәмсил едир?
▪ Нөвбәти мәсәлдә «мүлкәдар», «үзүм бағы», «бағбанлар», «нөкәрләр» вә «варис» кими вә нәји тәмсил едир?
▪ «Бағбанларын» агибәти неҹә олаҹаг вә онлар кимләрлә әвәз олунаҹаг?