Фәсил 109
Иса әлејһдарларыны мүһакимә едир
ӘЛЕЈҺДАРЛАР артыг Исадан нәсә сорушмаға ҹүрәт етмирләр. Онда Иса өзү онларын ҹаһиллијини ифша етмәјә башлајыр. О сорушур:
— Мәсиһ һаггында нә дүшүнүрсүнүз? О, кимин оғлудур?
— Давудун, — фәрисејләр дејирләр.
Доғрудан да, Мәсиһ Давудун нәслиндәндир. Иса буну инкар етмир. Лакин о сорушур: «Неҹә олур ки, Давуд бу ајәдә мүгәддәс руһун тәсири илә ону “Аға” адландырыр: “Јеһова Ағама деди: «Дүшмәнләрини ајағынын алтына гојанадәк сағымда отур»”? Әҝәр Давуд ону “Аға” адландырырса, о, Давудун оғлу неҹә ола биләр?»
Фәрисејләр сусурлар, чүнки Мәсиһин кимлијини ахырадәк дәрк етмирләр. Әслиндә, Мәсиһ фәрисејләрин дүшүндүјү кими садәҹә Давудун нәслиндән олан бир инсан дејил. О, әввәлләр ҝөјдә јашамышдыр вә Давуддан бөјүкдүр, онун ағасыдыр.
Иса шаҝирдләрини вә ҹамааты мирзәләрлә фәрисејләрдән еһтијат етмәјә чағырыр. Мирзәләр вә фәрисејләр «Мусанын јериндә отуруб» Аллаһын Ганунуну өјрәтдикләри үчүн Иса дејир: «Дедикләри һәр шејә әмәл един, лакин ҝөрдүкләри ишләри ҝөрмәјин. Чүнки онлар дејирләр, амма етмирләр».
Онлар икиүзлүдүрләр. Иса бир нечә ај бундан әввәл фәрисејин евиндә шам едәркән дедији сөзләрлә онлары иттиһам едир: «Һәр бир иши өзләрини ҹамаата ҝөстәрмәк үчүн едирләр». О мисал чәкир:
«Онлар һәмаил кими тахдыглары ајә гутуҹугларыны ҝенишләндирир». Гутуҹуг адәтән алына, јахуд гола бағланырды вә онун ичинә Ганундан ҝөтүрүлмүш бу дөрд парча гојулурду: Чыхыш 13:1—10, 11—16; Ганунун тәкрары 6:4—9 вә 11:13—21. Фәрисејләр ҹамаатын ҝөзүнә күл үфүрүб, ҝуја Гануну сәјлә иҹра етдикләрини ҝөстәрмәк үчүн бу гутуҹуглары бөјүдүрләр.
Сонра Иса дејир: «Әбаларынын сачагларыны узадырлар». Сајлар 15:38—40 ајәләриндә исраиллиләрә палтарларынын әтәјинә сачаг тикмәк әмр едилмишди. Амма фәрисејләр сачаглары башгаларына нисбәтән даһа узун тикирләр. Онлар һәр шеји ҝөзә чарпдырмаг истәјирләр. Исанын дедији кими, онлар «габаг ҹәрҝәләрдә отурмағы севирләр».
Әфсус ки, шан-шөһрәт дүшкүнлүјү Исанын шаҝирдләринә дә сирајәт едиб. Буна ҝөрә дә Иса онлара нәсиһәт верир: «Амма сиз өзүнүзү “Мүәллим” адландырмаға гојмајын, чүнки бир Мүәллиминиз вар, сиз исә бир-биринизә гардашсыныз. Һәмчинин јер үзүндә һеч кәси “ата” чағырмајын, чүнки бир Атаныз вар, О да сәмави Атадыр. Өзүнүзү “рәһбәр” адландырмаға иҹазә вермәјин, чүнки бир Рәһбәриниз вар, о да Мәсиһдир». Шаҝирдләр биринҹи олмаг истәјини үрәкләриндән чыхарыб атмалы идиләр. Иса онлары тәшвиг едир: «Сизләрдән ән бөјүјү гој сизә нөкәрчилик етсин».
Сонра о, мирзәләри вә фәрисејләри дөнә-дөнә икиүзлү адландырыр, өзү дә һәр дәфә сөзүнү «вај һалыныза» кәлмәси илә башлајыр. Онлар «сәмави падшаһлығын гапыларыны инсанларын үзүнә бағлајыр», «дул гадынларын евләрини талајыр вә өзләрини мөмин ҝөстәрмәк үчүн узун-узады дуа едирләр».
Иса дејир: «Вај сизин һалыныза, кор бәләдчиләр!» Фәрисејләр руһани дәјәрләри тапдаладыглары үчүн Иса онлары мүһакимә едир. Онлар буну өзләринә сәрф едән фикирләри ирәли сүрмәклә ҝөстәрирләр. Мисал үчүн, онлар дејирләр: «Әҝәр кимсә мәбәдә анд ичирсә, ејби јох; амма кимсә мәбәддәки гызыла анд ичирсә, андыны мүтләг јеринә јетирмәлидир». Онлар мәбәдин гызылыны бу ибадәт јеринин руһани дәјәриндән јухары тутмагла әхлаги ҹәһәтдән кор бәләдчи олдугларыны ҝөстәрирләр.
Сонра Иса јенидән фәрисејләри мүһакимә едир ки, онлар әһәмијјәти олмајан отлардан ондабир верҝисини өдәмәјә бөјүк диггәт ајырырлар, амма «Ганундакы даһа ваҹиб мәсәләләрә: һагг-әдаләтә, мәрһәмәтә вә сәдагәтә мәһәл» гојмурлар.
Иса фәрисејләри «ағҹаганады сүзҝәҹдән кечирән, амма дәвәни дири-дири удан кор бәләдчиләр» адландырыр. Онлар шәрабы сүзҝәҹдән кечирирдиләр ки, онун ичинә ағҹаганад дүшмәсин. Дини ајинләрә ҝөрә ағҹаганад мурдар сајылырды. Лакин фәрисејләр Ганунун даһа ваҹиб тәләбләринә лагејд јанашырлар, јәни дини ајинләрә ҝөрә натәмиз һејван олан дәвәни санки дири-дири удурлар. Матта 22:41—23:24; Марк 12:35—40; Лука 20:41—47; Левилиләр 11:4, 21—24.
▪ Иса фәрисејләрдән Давуд пејғәмбәрин Мәсиһ һаггында нә дедијини сорушанда онлар нә үчүн сусурлар?
▪ Фәрисејләр нәјә ҝөрә «ајә гутуҹугларыны» бөјүдүр вә узун сачаглар тикирләр?
▪ Иса шаҝирдләринә нә мәсләһәт ҝөрүр?
▪ Фәрисејләр руһани дәјәрләри неҹә тапдалајырлар? Иса онлары даһа ҹидди тәләбләрә лагејд јанашдыглары үчүн неҹә иттиһам едир?