Фәсил 114

Хатирә ҝеҹәси

ИСА МӘСИҺ һәвариләрин ајағыны јујуб гуртардыгдан сонра онлара Мүгәддәс Јазылардан Мәзмур 41:9 ајәсини ситат ҝәтирир: «Мәнимлә чөрәк кәсән мәнә хәјанәт етди». Бу сөзләрдән сонра о, дахилән һәјәҹан кечирир вә бәјан едир: «Сизләрдән бири мәни сатаҹаг».

Буну ешидәндә һәвариләри гәм-гүссә бүрүјүр вә бир-бир ондан сорушурлар: «Аға, бу мән дејиләм ки?» Һәтта Јәһуда Искариот да бу суалы верир. Исанын јанында әјләшән Јәһја она тәрәф әјилиб сорушур: «Аға, сән кими дејирсән?»

Иса ҹаваб верир: «О адам мәнимлә бир габдан јејән он ики һәваридән биридир. Дүздүр, инсан Оғлу онун һаггында јазылдығы кими, ҝедир, амма вај ону сатанын һалына! О адам дүнјаја һеч ҝәлмәсәјди, онун үчүн даһа јахшы оларды». Бундан сонра Шејтан Јәһуданын үрәјинин корландығындан истифадә едәрәк јенидән онун гәлбинә ҝирир. Бир гәдәр сонра Иса јериндә олараг Јәһуданы «һәлака мәһкум едилмиш адам» адландырыр.

О, Јәһудаја дејир: «Нә едәҹәксәнсә, тез елә». О бири һәвариләр Исанын нәји нәзәрдә тутдуғуну баша дүшмүрләр. Пул гутусу Јәһудада олдуғу үчүн бәзиләри елә билир ки, Иса она: «Бајрам үчүн лазым олан шејләри ал», — дејир, јахуд да ҝедиб касыблара бир шеј пајламағы тапшырыр.

Јәһуда ҝедәндән сонра Иса садиг һәвариләри илә јени бир бајрам, Хатирә Ҝеҹәсини тәсис едир. О, чөрәк ҝөтүрүр, Аллаһа шүкүр едир, чөрәји бөлүр вә һәвариләрә верәрәк дејир: «Ҝөтүрүн, јејин». Сонра изаһ едир: «Бу чөрәк сизин уғрунузда фәда едиләҹәк бәдәними тәмсил едир. Хатирәми јад етмәк үчүн буну һәмишә един».

Онларын һәр бири бу чөрәкдән јејир. Сонра Иса әлинә шәраб ҹамыны ҝөтүрүр. Иса јенә дә Аллаһа шүкүр едир, ҹамы һәвариләринә өтүрүр вә хаһиш едир ки, ондан ичсинләр. О дејир: «Бу ҹам сизин уғрунузда ахыдылаҹаг ганым әсасында бағланан јени әһди тәмсил едир».

Беләликлә, бу, Исанын өлүмүнүн Хатирә Ҝеҹәсидир. Исанын дедији кими, ону һәр ил нисанын 14-ү јад етмәк лазымдыр. Бу һадисә Хатирә Ҝеҹәсиндә иштирак едәнләрә Исанын вә онун Атасынын бәшәријјәти өлүмүн пәнҹәсиндән гуртармаг үчүн нәләр етдикләрини хатырладаҹагды. Исанын әслән јәһуди олан давамчылары үчүн бу мәрасим Пасханы әвәз едәҹәкди.

Исанын төкүлән ганы васитәсилә гүввәјә минән јени әһд көһнә Ганун әһдини әвәз едир. Иса Мәсиһ Јеһова Аллаһла 144 000 мәсһ олунмуш мәсиһчиләр арасында васитәчи ролуну ојнајыр. Јени әһд ҝүнаһларын бағышланмасы илә јанашы, јени бир халгын — падшаһ-каһинләрдән ибарәт сәмави халгын тәшкил олунмасына имкан јарадыр. Матта 26:21—29; Марк 14:18—25; Лука 22:19—23; Јәһја 13:18—30; 17:12; 1 Коринфлиләрә 5:7.

▪ Иса бир јолдашы илә бағлы Мүгәддәс Јазылардан һансы ајәни ситат ҝәтирир вә нәји бәјан едир?

▪ Һәвариләр нәјә ҝөрә кәдәрләнирләр вә һәр бири нә сорушур?

▪ Иса Јәһудаја нә дејир вә о бири һәвариләр буну неҹә баша дүшүрләр?

▪ Јәһуда ҝедәндән сонра Иса һансы мәрасими тәсис едир вә бу мәрасим һансы мәгсәдә хидмәт едир?

▪ Јени әһд кимләр арасында бағланыр вә бунун сајәсиндә нә мүмкүн олур?