Фәсил 121
Әввәл Синедрионун, сонра Пилатын гаршысында
ҜЕҸӘ сона чатыр. Петер үч дәфә Исаны даныб, Синедрион үзвләри исә гондарма мәһкәмәни битириб дағылышыблар. Лакин сәһәр ачыланда онлар Синедрионун залында топлашырлар. Јәгин, онлар ҝеҹә вахты ганунсуз кечирдикләри мәһкәмә ишинә гануни дон ҝејиндирмәк истәјирләр. Иса ораја ҝәтириләндә онлар јенә дә дејирләр:
— Әҝәр Мәсиһсәнсә, де, биз дә биләк.
— Десәм дә инанмајаҹагсыныз. Сиздән сорушсам, ҹаваб вермәјәҹәксиниз, — бунунла белә, Иса мәрд-мәрданә ким олдуғуну бәјан едир: — Индән белә, Инсан Оғлу гүдрәтли Аллаһын сағында отураҹаг.
— Демәли, сән Аллаһын Оғлусан? — онлар бир ағыздан сорушурлар.
— Өзүнүз дејирсиниз ки, мән Аллаһын Оғлујам.
Исаны өлдүрмәји гәт етмиш адамлар үчүн бу ҹаваб кифајәт едир. Онлар буну күфр сајырлар вә дејирләр: «Даһа башга шәһадәт нәјимизә лазымдыр? Буну онун өз дилиндән ешитдик». Сонра онун әлләрини бағлајырлар вә апарыб Рома валиси Понти Пилата тәһвил верирләр.
Исаны сатмыш хаин Јәһуда һадисәләри диггәтлә изләјир. О, Исанын мәһкум едилдијини ҝөрәндә виҹдан әзабы чәкир. Буна ҝөрә дә 30 ҝүмүшү гајтармаг үчүн бөјүк каһинләрлә ағсаггалларын јанына ҝедиб дејир: «Салеһ адамы сатмагда ҝүнаһ етмишәм».
Онлар исә дејирләр: «Бизә нә? Өзүн биләрсән!» Онда Јәһуда ҝүмүш сиккәләри мәбәддә атыб орадан чыхыр вә ҝедиб өзүнү асыр. Ҝөрүнүр, кәндири бағладығы будаг сыныр вә о, гајалыға дүшүб парчаланыр.
Бөјүк каһинләр исә билмирләр, бу пуллары неҹә етсинләр. Онлар дејирләр: «Буну мүгәддәс хәзинәјә атмаг дүзҝүн дејил, чүнки бу пул ган пулудур». Буна ҝөрә дә мәсләһәтләшиб о пула јаделлиләри дәфн етмәк үчүн дулусчунун тарласыны алырлар. Һәмин јер о ҝүндән «Ган тарласы» адланыр.
Сәһәрин ҝөзү ачыланда Исаны валинин сарајына ҝәтирирләр. Лакин ону ҝәтирән јәһудиләр валинин сарајына ҝирмирләр, онлар һесаб едирләр ки, диҝәр милләтләрин нүмајәндәләри илә јахын әлагәдә олмаг онлары мурдарлајыр. Пилат өзү онларын габағына чыхыб сорушур: «Бу адамы нәдә иттиһам едирсиниз?»
Онлар ҹаваб верирләр: «Әҝәр бу адам ҹинајәткар олмасајды, ону сәнин јанына ҝәтирмәздик».
Пилат бу ишә гарышмаг истәмәдијиндән дејир: «Апарын ону өз ганунуза ҝөрә мүһакимә един».
Јәһудиләр Исаны өлдүрмәк нијјәтләрини ачыглајараг дејирләр: «Бизим адам өлдүрмәјә ихтијарымыз јохдур». Әҝәр онлар Пасха бајрамында Исаны өлдүрсәләр, еһтимал вар ки, ҹамаат ајаға галхсын, чүнки чохлары Исаја рәғбәт бәсләјир. Буна ҝөрә дә онлар истәјирләр ки, ромалылар Исаны сијаси ҹинајәтдә иттиһам едиб өлдүрсүнләр, онда халгын гаршысында мәсулијјәтдән гуртула биләҹәкләр.
Беләҹә, дин рәһбәрләри Исаны күфр данышмагда ҝүнаһландырдыглары ҝеҹә мәһкәмәси барәдә бир кәлмә дә демәдән башга бир бәһанә ујдурурлар. Онлар үч бәнддән ибарәт иттиһам ирәли сүрүрләр: «[1] Бу адам халгымызы јолдан чыхарыр, [2] сезара верҝи өдәмәји гадаған едир, үстәлик [3] өзүнү Мәсиһ, падшаһ адландырыр».
Исанын падшаһ олмасы иддиасы Пилатын марағына сәбәб олур. Буна ҝөрә дә о, сараја гајыдыр вә Исаны јанына чағырыб сорушур: «Сән јәһудиләрин падшаһысан?» Башга сөзлә, Пилат билмәк истәјир ки, Иса гануну позараг өзүнү сезара рәгиб едир, јохса јох.
Иса Пилатын онун һаггында нәләр ешитдијини өјрәнмәк үчүн сорушур: «Сән буну өзүндән дејирсән, јохса мәним һаггымда кимдәнсә ешитмисән?»
Пилат онун барәсиндә һеч нә билмәдијини вә һәгигәти өјрәнмәк истәдијини билдирир: «Мәҝәр мән јәһудијәм? Өз халгын вә бөјүк каһинләрин сәни мәнә тәслим едиб. Де ҝөрүм, нә иш тутмусан?»
Иса Падшаһлыгла бағлы мәсәләдән һеч вәҹһлә бојун гачырмыр. Шүбһәсиз, онун ҹавабы Пилаты бәрк һејрәтләндирир. Лука 22:66—23:3; Матта 27:1—11; Марк 15:1; Јәһја 18:28—35; Һәвариләрин ишләри 1:16—20.
▪ Синедрион үзвләри сәһәр тездән һансы мәгсәдлә топлашырлар?
▪ Јәһуда Искариот неҹә өлүр вә 30 ҝүмүш пул нәјә хәрҹләнир?
▪ Нә үчүн јәһудиләр Исаны ромалыларын әли илә өлдүртмәк истәјирләр?
▪ Јәһудиләр Исаја гаршы һансы иттиһамлары ирәли сүрүрләр?