Фәсил 124

Иса едама апарылыр

БУ ГӘДӘР ишҝәнҹә гаршысында сакит вүгарла дурмуш Исаја һејрәтләнән Пилат јенә дә ону азад етмәјә ҹәһд ҝөстәрир. Бу да өз нөвбәсиндә бөјүк каһинләри лап һөвсәләдән чыхарыр. Онлар истәмирләр ки, мәнфур нијјәтләринә нәсә мане олсун вә јенидән гышгырырлар: «Ону дирәјә мыхла! Дирәјә мыхла!»

«Апарын өзүнүз дирәјә мыхлајын», — дејә Пилат ҹаваб верир. Ҝөрүнүр, јәһудиләрин ағыр дини ҹинајәт төрәтмиш адамлары едам етмәјә ихтијары вар иди. Сонра Пилат, ән азы бешинҹи дәфә, Исанын ҝүнаһсыз олдуғуну бәјан едир: «Мән онда һеч бир ҝүнаһ ҝөрмүрәм».

Сијаси иттиһамлардан бир шеј чыхмадығыны ҝөрән јәһудиләр бир нечә саат әввәл Синедрионда ирәли сүрдүкләри дини иттиһамлара гајыдыб Исаны Аллаһа гаршы күфр данышмагда ҝүнаһландырырлар. Онлар дејирләр: «Бизим бир ганунумуз вар вә һәмин гануна ҝөрә о өлмәлидир, чүнки о, иддиа едир ки, Аллаһын оғлудур».

Пилат буну илк дәфәдир ки, ешидир вә о, бәрк горхур. Пилат артыг баша дүшүр ки, Иса гејри-ади инсандыр; арвадынын јухусу, Исанын һејрәт доғуран дахили ҝүҹү буна ачыг-ајдын сүбутдур. Амма «Аллаһын оғлу»... Пилат билир ки, Иса Галилејадандыр. Мәҝәр о, әввәлләр дә јашајыб? Пилат Исаны јенидән сараја апарыр вә сорушур: «Сән һарадансан?»

Лакин Иса сусур. О, даһа әввәл Пилата падшаһ олдуғуну, амма падшаһлығынын бу дүнјадан олмадығыны демишди. Артыг әлавә изаһата еһтијаҹ јохдур. Лакин Исанын сусмасы Пилатын гүруруна тохунур вә о, өзүндән чыхыр: «Сән мәнә ҹаваб вермирсән? Мәҝәр билмирсән ки, сәни азад етмәјин дә, дирәјә мыхламағын да ихтијары мәним әлимдәдир?»

Иса һөрмәтлә дејир: «Сәнә ҝөјдән верилмәсәјди, мәним үзәримдә һеч бир ихтијарын олмазды». Иса бу сөзләрлә Аллаһын јери идарә етмәк үчүн инсан һакимијјәтләринә вердији сәлаһијјәти нәзәрдә тутур. Иса әлавә едир: «Буна ҝөрә дә мәни сәнә тәслим етмиш адамын ҝүнаһы даһа ағырдыр». Һәгигәтән дә, Исаја едилән һагсызлыглара ҝәлдикдә, баш каһин Кајафа илә онун тәрәфдарлары вә Јәһуда Искариот Пилатдан даһа бөјүк мәсулијјәт дашыјырлар.

Бу сөзләр Пилата ҝүҹлү тәсир бағышлајыр. Үстәлик, о, Исанын илаһи мәншәји олмасындан горхур. Буна ҝөрә дә бир даһа ону азад етмәјә чалышыр. Лакин јәһудиләр гәти етиразларыны билдирирләр. Онлар јенидән сијаси иттиһамларыны тәкрар едиб Пилаты һијләҝәрҹәсинә һәдәләјирләр: «Сән бу адамы азад етсән, сезара дост дејилсән. Өзүнү падшаһ елан едән һәр бир адам сезара гаршы чыхыр».

Пилат ҹамаатын сөзүнә әһәмијјәт вермир. О, Исаны бир даһа онларын гаршысына чыхарыб дејир:

— Бу да сизин падшаһыныз!

— Она өлүм! Она өлүм! Ону дирәјә мыхла!

— Дејирсиниз, падшаһынызы дирәјә мыхлајым? — Пилат үмидсиз һалда сорушур.

Рома ағалығы јәһудиләрин чијниндә ағыр јүкдүр. Онларын Рома һакимијјәтиндән зәһләләри ҝедир. Лакин бөјүк каһинләр ријакарҹасына дејирләр: «Бизим сезардан башга падшаһымыз јохдур».

Өз адына вә күрсүсүнә ҝөрә нараһат олан Пилат ахырда јәһудиләрин тәләбләринә бојун әјир. О, Исанын едамына әмр верир. Әсҝәрләр Исанын әјниндәки хәләти чыхарыб өз палтарыны ҝејиндирирләр. Ону едам јеринә апаранда ишҝәнҹә дирәјини дә өзүнә дашытдырырлар.

Бүтүн бунлар нисанын 14-ү, ҝүнүн биринҹи јарысында баш верир; бәлкә дә инди ҝүнортаја аз галыб. Иса дүнәнки ҝүн сәһәрдән та индијәдәк ајаг үстәдир, бир-биринин ардынҹа ағыр сынаглара мәруз галыб. Буна ҝөрә дә дирәјин ағырлығы алтында тезликлә онун тагәти кәсилир. Онда әсҝәрләр јолнан ҝедән бир адамы, киреналы Шимону тутуб (Кирена Африкада јерләширди), Исанын ишҝәнҹә дирәјини дашымаға мәҹбур едирләр. Исанын ардынҹа хејли адам ҝедир, гадынлар онун үчүн ағлајыр вә дәрддән синәләринә вурурлар.

Иса дөнүб гадынлара дејир: «Еј Јерусәлим гызлары, мәним үчүн ағламајын. Өзүнүзүн вә ушагларынызын ҝүнүнә ағлајын. Чүнки елә бир вахт ҝәлир ки, онда инсанлар дејәҹәкләр: “Сонсуз, ушаг доғмамыш вә дөш әмиздирмәмиш гадынлар нә хошбәхтдир!”... Әҝәр ағаҹын ҹанында су вар икән белә едирләрсә, ҝөрүн о гурујанда нә олаҹаг!»

Иса бурада јәһуди халгыны тәмсил едән ағаҹы нәзәрдә тутур. Нә гәдәр ки Иса вә она иман ҝәтирәнләр онларын арасындадыр «ағаҹын ҹанында су вар». Лакин бу адамлар халгын арасындан ҝөтүрүлдүкдә гупгуру гурумуш ағаҹ, јәни руһани ҹәһәтдән өлү халг галаҹаг. Рома ордусу Аллаһын һөкмүнү иҹра етмәјә ҝәләндә јәһуди халгы үчүн ағламаг вахты ҝәләҹәк. Јәһја 19:6—17; 18:31; Лука 23:24—31; Матта 27:31, 32; Марк 15:20, 21.

▪ Сијаси иттиһамларындан бир шеј чыхмајанда дин рәһбәрләри һансы иттиһамы ирәли сүрүрләр?

▪ Пилат нәјә ҝөрә бәрк горхур?

▪ Исаја едилән писликләрә ҝөрә кимләрин ҝүнаһы даһа бөјүкдүр?

▪ Каһинләр Исаны едам етмәјә Пилаты неҹә вадар едирләр?

▪ Иса ағлајан гадынлара нә дејир? О, «ҹанында су» олан вә «гурумуш» ағаҹ дејәркән нәји нәзәрдә тутур?